Jul 23, 2017

کاسیب‌دان دؤلتدیه، ایستی گونلرین سرینله‌دنلری

ماتی میخاناسی

یئلپیح:
حصیری یئلپیحی کی دسته‌سینه ده پارچا دولویوبلار، سویونان ایسلاداسان، سورا اؤزووی اوننان یئللیه‌سن اولار کاسیبلارین کولر گازی‌سی! بولارین بیر جوره ده پلاستیکیسی وار کی فقط منقل یئلله‌ماخ دردینه ده‌یر.

- پنکه:
یئلپیحدن بیرآز یاخجیدی، یانی پوخا گؤره تزهدی! هاوا بتر قیزیشاندا، پنکه فقط ایستی هاوانی پوفلر آدامین صیفتینه. بیر نفر ده واریدی کی تازا کنکور وئرمیشدی، چوخدا فیزیک اوخوموشدی، او دییردی پنکه هاوانین مولکول‌لارین ترپه‌در، بو مولکول‌لار بیربیرینه ده‌یر، انرژی جنبشی تبدیل اولار ایستیه، اوتاقین هاواسی قیزیشار! یالان دوغروسی اؤز بوینونا!

-
کولر آبی:
کاسیب دا چوخ ایسته‌سه جیبدن مایا قویا گئدیب بیدانا مئید این کوجووار، میز اوستو، کولر آبی آلار گتیریب قویار ائوه. بیردانا ۲.۲۵ لئتیرلیخ «نوشابه نکوار» قابینان دا ایچینه تئز تئز بوزلو سو تؤکر دورار قاباغیندا دییه‌ر: «من اؤلوم گؤرنه سرین وئریر، پوخ یئدی کولر گازی!». هردم بیرده ائوده هئشکیم اولمویاندا، یا دؤربر خلوت اولاندا، دورار کولر قاباغیندا، کؤینه‌یین چکر اوسته، یا شالوارین سییرر اشاغا، بدنینین او حساس یئرلرین سرینه وئرر ایچی گئچر.

-
کولر گازی:
لامصب بتر بیر شئیدی دا، پولون اولا آلاسان، ائو اولور یخچل کیمی بیر یئر. البته واردی بعضیلر کی کولری ایکی آی کئفینن ایشلدیب، ایکی آی باشی برق قبضی گلنده، سرینله‌دیخلارین هامیسی بورنوندان تؤکولوب. یادا واردی بعضی شؤهرت‌بازلار کی کولری ویریب دووارا، قوناخ گلندن گلنه ایشلدر، قالان گونلرده ده یئلپیحینن اؤزون یئللر.

-
استخر:
او شؤهرت‌بازلارا کی کولر گازی‌نن بیزه پوز وئریللر عرض ائلیم کی پوللو دئدیغین، ائوینده گؤلو، استخری زادی اولار گئدیب توشر اونا سرینلر، بیزده بولاری البته اینستاگرامدا گؤرروخ.

                           *****

پئیکان تاکسیلاردا شوفئر ایسته‌سه موسافیرینه ده‌یقه یاریم مایا قویا، VIP خدمات وئره، الین اوزالدار داشبوردا اوردان شوشه یئندیره‌نین دستگیره‌سین چیخاردار دییه‌ر: «آلا بیرآز شوشه‌نی یئندیر سرینله»!
                      *****

🥝🥔

گؤی و میوه صینفی فوتبال تیملرینه بنزیر. موز ائله‌بیل «برزیل» فوتبال تیمی دی، هامی انتظاری وار برزیل همیشه اوتسون. نئجه کی برزیل تیمی نه قدر ده گوجو آزالسا، فیفا رده‌بندی سینده اشاغا یئنسه گینه برزیل دی، موزون دا قیمتی نه قدر اوجوزلاشسا گینه ده موزدی. بو طرفدن، گیلاس، اریک کیمی بیر میوه‌لر ده مثلن «بلژیک» دی. شاید بیر دوره گلیب رده‌بندی ده برزیلی قاباخلیالار، آما چون ائله سورعتینن گلیب سورعتینن ده گئدرلر هئشکیمین یادیندا قالماز. بو آرادا یئرآلما سوغانی دا دئماخ اولار کی مثلن «ایران» تیمی دی! هئشکیمین انتظاری یوخدی ایران برزیلی اوتا یا رده‌بندی ده اونو قاباخلیا، ووردی بیر گون بئله بیر ایش اولدی هامی بیر طرفدن تعجب ائلر، بیر طرفدن ده برزیله یازیخلیغی گلر کی گؤر نه گونه قالیب کی ایران دا اونو قاباخلییب!
بولار هامیسی باعث اولوب کی گؤی و میوه قیمتلرینده، موز معیار قیمت اولسون. مثلن سوروشوسان سوغان نئچه؟ دییر ۵۰۰۰ تومن. بوجور وقتلر هاممی قئییدیب دییه‌ر موز نئچه‌دی؟ باخ اورا موز ۳۵۰۰ تومن سوغان ۵۰۰۰! اولماسا موز آپاریب دوغرویاخ دوغرویاخ غذا ایچینه.
عرب الفباسیندا متن وارسا بورادا یازین، یوخسا بو سطرلری سیلین

No comments:

Post a Comment