Apr 8, 2017

ایچگی یه بنزه ر بیر شئی وار بو هاوالاردا

س. سیداوالی

حورمتلی پن (سورگونده گونئی آذربایجانین قلم انجمنی) سایتی نین باش رداکتورو!

بیر آز گئچ اولسادا، اؤنجه نوروز بایرامینی تبریک دئییب و سیزین باشلادیغینیز و چتین لیکله دوام ائتدییینیز بو نجیب و ملی - دموکراتیک مبارزه میزده چوخ مهم یئری اولان ایشینیزده، سیزلره باشاریلار و موفقیت لر آرزو ائدیره م.
بیلمیره م باهارین گلمه سی ایله نوروز گلیر، یوخسا نوروز بایرامی، باهارین گلمه سینین موشتولوغونو آلماغا گلیر.
هر حالدا هر ایکیسی ده خوش گلیب و صفا گتیریبلر. چونکی، حیاتین گؤزللیک لری، بوتون چتین لیکلره رغما، بشرین بیر قسمی نین یاراتدیغی چیرکین لیکلرین قاباغیندا، دیزه چؤکمه مه لیدیر. 
قوی باهار اؤز گؤزللیک لریله, بوتون انسانی حاقلاریندان محروم اولان, ایراندا دینچی بیر رژیمین استبداد و زوراکیلیغیندان جانا گلن جنوبی آذربایجان خالقینین بیر آز اولسادا اوزونو گولدورسون.

منیم یاشادیغیم اؤلکه یه ده باهار گلیب و گول- چیچکی ایله هر یئری بیر جنت باغچاسی کیمی الوانلاشدیریبدی.
باهار ایله قوشلار دا گئری گلیبلر و گوندوزلر طبیعت ده ولوله سالیرلار. آرتیق سحرلر یوخودان قوشلارین سسی ایله اویانیرام. طبیعتین مغنی لری اولان بو خیرداجا جانلی لاری گؤروب، دوشونوره م: عجبا  بو قدر مختلف رنگلی و سسلی قوشلار، بیرده ن - بیره هارادان ‌گلدیلر؟...
موسیقی بسته کاری اولماق لازیم کی، طبیعتین بیز فانی انسانلارا بخش ائتدییی بو روحو اوخشار الحانلاریندان، ابدی و اونودولمایان موسیقی لر یاراتسین.
بو هفته سونو طبیعتده سئره چیخمیشدیم. گونش ین شعاع لاری هر یئری بوروموش و بوتون جانلی لارا حیات وئره ن ایستی سینین نوازش لری ایله, تورپاق آیلار سوره ن یوخوسوندان یاواش- یاواش اویانیردی. یوخودان اویانان آنا تورپاق, ائله بیل کی گرنشدیکجه, زنجیرلرینی دارتیب، قیریردی*. بئله لیکله آنا طبیعت, میلیونلار ایل بوندان اول باشلادیغی سیکلی نین دوامینی گتیرمک ده ایدی. بوغدالار, آرپالار و چاودارلار, تورپاقدان باش قالدیرماقدایدیلار. هر یئره باخیردیم, طبیعت ین وئردییی نعمت لرین قدرینی بیلمه ین اولادلاری اولان بیزلری، گینه ده  سخاوتلی اللریله یئدیزدیرمه یه حاضیرلاشماسینا شاهید اولوردوم. آیاقلاریمین آلتیندا ازیلن و تورپاغا چئوریلن کسسک لری حس ائدیردیم. ده رینده ن نفس آلیب و هاوادا دالغالانان گول چیچک ین عطرینی جییه رلریمده حبس ائتمه یه چالیشیردیم. بوتون یئر-گؤی انسانی یاشاماغا دعوت ائدیردی. هاوادا وصف ائتمه یی ممکون اولمایان بیر شئی واریدی. آددیملادیقجا، آدامی باشدان چیخاران و دوغروداندا هوشونو الینده ن آلان بیر شئی یی حس ائتمک ‌اولوردو.
او آن دا، ایسته ر- ایسته مز  عاغلیما اورهان ولی نین " ایچگی یه بنزه ر بیر شئی وار بو هاوالاردا " شعری گلدی. بو شعری دفعه لر اوخوسام دا، او گون بویوک تورک شاعیری ایله بیر آن دا اولسا بئله، " روحداش" اولدوم.
بلکه ده هئچ زامان بیر داها تکرار اولمایان او غریبه حس لری خاطیرلایاراق، بو شعری سیزین سایت ین حؤرمتلی ‌اوخوجولارینا دا  نیسگیل ائله مک ایسته دیم. کیم بیلیر، بلکه اونلاردان بعضی سینه،  بیر آن دا بئله اولسا، منیم کیمی بویوک تورک شاعیری ایله " روحداش" اولماق نصیب اولدو:

ایچگی یه بنزه ر بیر شئی وار بو هاوالاردا

ایچگی یه بنزه ر بیر شئی وار بو هاوالاردا
کؤتو ائدییور انسانی، کؤتو...
هله بیر حسرتلیک اولدومو سر ده،
سئودییین باشقا یئرده،
سن باشقا یئرده.
دردلی ائدییور انسانی، دردلی.

ایچگی یه بنزه ر بیر شئی وار بو هاوالاردا،
سرخوش ائدییور انسانی، سرخوش.


İçkiye Benzer Bir Şey Var Bu Havalarda

İçkiye benzer bir şey var bu havalarda
Kötü ediyor insanı, kötü...
Hele bir hasretlik oldu mu serde;
Sevdiğin başka yerde,
Sen başka yerde.
Dertli ediyor insanı, dertli.

İçkiye benzer bir şey var bu havalarda,
Sarhoş ediyor insanı, sarhoş.



* بورادا سون ایللرده وفات ائده ن معاصیر تورک شاعیرلرینده ن آتیلا الحان ین  شعرینده ن یاد ائتمه مک، انصاف سیزلیقدی:
"...
دیشاریدا طبیعت موسیم ین ان چینقیراقلی آییندادیر.
توپراق آنا بوتون رنجیرلرینده ن چؤزولموش
صاباحلار آخشام اوستلری مانولیا کیمی پارلاق
تارلالارین اوزو گولموش
..."

dışarda tabiat mevsimin en çıngıraklı ayındadır
toprak ana bütün zincirlerinden çözülmüş
sabahlar akşam üstleri manolya gibi parlak
tarlaların yüzü gülmüş


ایچگی: آلکل لی ایچمه لیلر
کؤتو: خوشا گلمز, پیس, خراب
دیشاریدا: چؤل ده, ائشیکده
چینقیراقلی: نشئه لی, زینقیروولی
مانولیا: ماگنولیا آغاجی
تارلا: زمی, اکین یئری

No comments:

Post a Comment