ینی ایلینیز اوغورلو اولسون


May 21, 2017

«آغاج»

ماتی میخاناسی

نئچه وقتدن بیر، حئساب کیتاب ائله‌ماخ وورار منیم بئینیمه. بوگون گینه چؤرتکه‌نی گتیریب قویدوم قاباغیما، باشلادیم سالیب چیخماغا: «رئیس ستاد انتخابات» دییب بو ایل ۲۹۰ مین نفره یخین آدام، شورا سئچیم‌لرینه آد یازدیریب. بولارین ۵۵ مین نفری شهرلرده‌دیلر قالانی کندلرده.
هله او کند کاندیدالارین قویاخ کنارا، بئله نظره قویاخ کی شهر کاندیدلرینین هر بیری متوسط حالتده ۵ بسته A4 کاغاذ تبلیغ اوچون در دووارا یاپیشدیرا، یانی ۲۵۰۰ وراق کاغاذ. بولاری بیربیرینه ضرب ائله اولار ۱۳۷ میلیون وراق، هله بونو گیرده‌له توت ۱۴۰ میلیون وراق کاغاذ ساخلا یادیندا.
🌲
گئدیب تحقیق ائله‌میشم گؤرموشم بیردانا آغاجدان کی ۳۰ متر بویو ۳۰ سانتی‌متر ده انی اولا، حدود ۱۲۰ مین وراق کاغاذ تولید اولور. او ۱۴۰ میلیون وراقی تقسیم ائله بو ۱۲۰ مینه، اولور حدود ۱۲۰۰ آغاج. یانی شورا سئچیم‌لرینین تبلیغاتینا خاطیر ۱۲۰۰ آغاج کسیلمه‌لیدی، ایندی بونو ساخلا یادیندا.
🌲
گینه «رئیس ستاد انتخابات» دییب بو ایل حدود ۶۸۰۰ نفر بو سئچیم‌لردن شهرلرین شوراسینا گیره‌جاخ. ایندی او ۱۲۰۰ آغاجی تقسیم ائله بولارین آراسیندا، هر بیرینه حدودن آغاجین بئش دن بیری یئتیشیر، یانی اولار ۶ متر بویوندا، ۳۰ سانتی‌متر یوغونلوغوندا بیر آغاج. بو ان بویدا آغاجی ساخلا یادیندا.
🌲
او ان بویدا آغاج اولسون بوتون یالان دانیشانلار، شورایا گئدیب پول ییه‌نلر، شورایا گئدیب طایفا تیریغین ایش باشینا گتیرنلر، شورانی حسن سوخدی ده‌ییرمانی ائلیه‌نلرین هامیسینین گؤزونه! من گؤز دئدیم سیز اؤزوز بیلرسیز نمنه اوخویاسیز.

No comments:

Post a Comment