ذولفقار کمالی
یئنه باشیم اوسته نه هرله نیرسن...؟
پاسلی قلینچ كیمی زهرله نیرسن
گاهدان اوجالانیب گاهدان انیرسن
ایتیل گؤز ائویندن آی قارا بولوت
باخیب گولومسه سین آی قارا بولوت
قوی گؤروم سمانین گول جمالینی
گولدن چیچكدن او صاف حالینی
نشانلی قیز كیمی خوش خیالینی
او ماوی سماده بیر لكه سن سن
چیچك لر باشینا غم توكرسن سن ؟
من سنی عمرومده چوخ سینامشام
هم گوندوز هم گئجه هر سحر آخشام
قارا اؤلوم كیمی گاه صبح گاهدا شام
منیم طالعیمه قدم قویوبسان
قلبیمی سونگو تك سوكوب اویوسان
چكیل خیالیمی ائتمه پریشان
گون چیخیب پارلاسین بیر آذر نشان
گولسون طبیعتده كاینات جهان
یاییلسین داغلارا نور سپه ـ سپه
قاینار بولاغلاری هی اؤپه ـ اؤپه.
No comments:
Post a Comment