ینی ایلینیز اوغورلو اولسون


Feb 18, 2017

كوچه لرده آدام يانير.

قهرمان قنبرى

آخشام تئز ياتماليام، چونكى صاباح لار بنزين سيراسى اوزون اولور و بى واقتا قالديغيم زامان سيرادا قاليب و وقتينده ايشه باشليا بيلميرم! آخى بوگونلر ماشيندا ميوه ساتانلارين سايى سى آرتيب  و صاباح لارى ياخچى يئر توتا بيلمه سم، ساتيشيم آز اولور و ميوه لر اوزون سوره ماشين اوستونده قالسا خراب اولارلار. داشقادا يا آرابادا ميوه ساتماق ايشى ده  ريقابتلى اولوب، هامى منيم كيمى كَندلره َ گَلديغى سوسوزلوخ و  قورولوق ندنى له شهره كوچوب و شهردهَ ده ياشاماغا لازيم اولان سواد و باجاريغى اولماديغيندان، يا داشقا و ماشيندا منيم كيمى ميوه ساتيب و چَرچيليغ ائلير و يادا آرادا- سيرادا ساختمان فهله ليغينه باخيرلار.
بودا بيزيم بير بدبخت ليغيميزلردن دير، كَنده آزدان چوخدان حيوان ساخلاماخ و اكينجى ليق دن باشيميزى ساخلارديق اما گلديلَر دئديلر كى چاى لارا باراج( سد) وؤروروق كى محصول لار چوخالسين، بير ايكى ايل ده محصول لار چوخالدى، اما اوبيرسى يانداندا اورمو گولو قورويوب و گول ده اولان دوزلارى ئيل گوجوله اَكين يئرلرينه داغيليب و اَكين يئرلري و قينديرغالارى ( مرتع) محو ائله دى. بير ايكى ايل "اولوب – قالانلاريميزى" ساتيب ئيديخ، دئديخ دوَزلر. دولت ده هر گون بير وعده وئريردى كى دوزله جخ، اما سونرا باخديق كى يوخ بونلاردان له له يه چورك چيخماز و بيزده او بيرى لر كيمى شهره كوچمه لييْق. شهره كوچمك ده هاساد دئيل، بير عمر كنده اوز اَليميز اوز باشيميز اولوب، آز تاپميشيق آز يئميشيق و چوخ تاپيب چوخ يئميشيق. اينديده مجبور شهرده بير تيكه چورك ايچون هر گون جانيميزلا  موجاديله وئرمه لييْق. اول ايسته ديم تهرانا گئده م، اما سونرا فرزانه له مصلحت له شندن سونرا بو قرارا گلديق كى اورميه ده ايمامزادادا يئرلشق، آخى فرزانه دا دوز دئردى ، بيز نه دوغرو دوزگون فارسى باشاريريق و نه بير سرمايه واريميزدير، تهران كيمى غريب يئرده بو شرايطده باش ساخلاماخ هاساد اولمازدى و اورميه داها ياخچى اولاردى دوشوندوق. نهايت اورمونون امام زاده محله سينده بير اوتاق- بير قافاناليخ ( كيچيك حال) ائو توتوب و بوردا يئرلشديق. وار- يوخوموزو ساتيب بيردنه ده پيكان وانت آليب، اوستونده ميوه ساتماخدان باشيميزى دولانديريريخ، البته هردن شهردارى مامورلارينان گيزلَنَن پارانج ايونويوروق، هردن رشوه وئريريخ هردن يالواريريق، بعضى زامان جريمه و بعضاً ده بير ايكى گون ده ايشيميزى تعطيل ائليريخ تا آرالار سؤويوب يات- كوت اولاندان سونرا ايشيميزى باشلاياق. اوشاقلارين مدرسه سى باشلايير و اونلارادا پار- پالتار آلماق لازيم، الله توكل بلكه اوشاقلارين الله هى بيزه بير روزى قيسمت ائله دى. يورقانى چكيب و گوزلريمى يومورام.

صبح بئش ده يوخودان قارخديم، هاوا هله قارانليق دير، فرزانه منَدن تئز دوروب و چاى قويوب و فلاكسي دولدورور منيم ايچون! گئديب حياط ده شيرى آچيب اوز- اَليمى يويوب و دونوب فرزانه نين يانيندا قافاخانادا اوتوردوم، فرزانه بير سارى دون گيب و اوتورموشدو، اوزون توتوب و منه سارى دئدى:
- ايستيرسن بير شيرين چاى ساليم و بير تيكه پنير چورك دن صبحانه يئيب گئت.
- يوخ فلاسكى دولدور و صبحانه نى ده قوى سورا ييه رم، تئز گئديم كى بوگونلر همى بنزين سيراسى اوزون اولور و همى ده خوش يئر توتماسام ماشينى پارك ائله مه غه، ساتيشيم آز اولوب و ميوه لر قاليب خاراب اولار. اينشالاه كى بو گونلر پيناردان- اوختايين  روزى سين الله تعالى يئتيرَر و اونلارين يانيندا شرمنده اولمانيق. بونلارى دئيب و فلاكسي لا چورك سفره سين گوتوروب دوروب آياقا قالخيب يولا توشدوم، گوى ده اولدوز يوخ اما قارانليق دير، ماشينى يانديريب و فرزانه حياط قاپى سين آچادى و من ماشينان پمپ بنزينه سارى يولا دوشدوم.خيابان خلوت دير و يواش يواش اينسانلار ديشارى يا چيخارلار، ماشينين شوشه سين آشاغى يا ائنديريم تا كى صاباحين تميز هاواسى اوزومه وُرسون، تزه بير شعر نوارى آليميشام اونو ضبطه قويوب و و ضبطى آچيرام، صاباحين تميز و خلوت و ذهنيمين دَديرگينليغينده، يولدان-  شعرهَ جومورام!
باشیم اوسته گئجه ایتینین قانادلاریندان قوپان قهقه نین،
سونونجو هیجاسی
بیراز بیزیمله اوزاق قاتلاردا عمی اوغلودور
چای کئچنده گوت گوته دیدیک قارانلیغیمیزلا
ماریجوانا کوللاری اعتراض اویره دیر زیروه ده یارپاقلارا
یارپاقلار قارانلیق داملاسیدیر شیمشکلر سینه سینی آریدلایاندا
مئشه ده آغاجلار،انسانلارا قییمادی،
خیابانلاردا انسانلار آغاجلارا.
آغاجلار اوزلرینی یاندیردی مئشه لرده
انسانلار اوزلرینی کوچه لرده...
"دومان اردم"
امام زادا دان پمپ بنزينه او قدر يول دئييل و سيردا دوران ماشين لاردان پمپ بنزين اوزاق دان گورسه نير. منده ساغا چونوب و بير پيكان وانت داليندا سيرا گوزلَريم. بو آرادا بير چاى توكوب، چورك بوقچاسين آچيب بير تيكه پنير چورَك توتوب و يئمه غه مشغول اولورام. بو آندا بير هاى كوى سسى گلير، باشيمى قاوزايب باخيرام، ايكى نفر سوزله شير، هر زامان سيرا اوستونده دعوا معركه اولار ، بو سرى  موتور سيكلت دن سيرايا كئچيب بير نفر . اونلارى بوراخيب و من ماشينا قايديب و چاى مى ايچيرَم. دوشونورم كى بو گون شهردارى نين سد معبر مأمورلارى گلسه اونلارى نجور باشدان ائليه م، آخى ايندى بئش آلتى گون دور منه گير وئريبلر، هر گون صوبح رشوه اولاراق هر كس دَن بئش مين تومان آليب گئديرلر، اما نئچه گوندو منه يئتيرنده دايانيب مندَن باش - باشا ورولار. قاسيم كى چوخداندى ميوه ساتير و من هم يئرليم سايلير دئير كى بونلار ايداره يه آمار گوسترمك زورونداديلار، اونا گوره هردَن آرا- سيرا بير نفرَ گير وئريب رشوه آلميب و اونون وسايل لرين ضبط ائليب و دادگاه ها گوندريلر كى تا ايداره ده گورسدسينلر كى اونلار ايشلرين گورولر. هر نه اولسا آرادا قوربانليق لازيمدى، سوزون دوزو من اوزوم دن قورخورام، آخى من بوردا هامى دان تازا كارام و تانيديغيم آزدى، اصلينده اوچ - دورد گون تعطيل ائله مه غى دوشونورم كى آرالار ياتيب و سونرا ايشه باشليام، اما پيناردان - اوختايين مدرسه لرى باشلايير و اونلارين باشلانيشينا پول لازيمدير، اونا گوره مجبور بير يول تاپماليام، بيرده اولماز كى آيين ييرمى گونى تعطيل اولا. سيرا منيم كى دير و كئچيب بنزينى وروب- پولون وئريب و يولا توشورم. يولدا گئده- گئده دوشونورم كى قاسيم لا دانيشيب بلكه بو سد معبر مامورلارينا بير طورلو باشدان ائليه . آخى قاسيم اونلارى داها ياخچى تانيير و اوزون زامان بوردا اولدوغو ايچون مامورلاردان آراسى سازدير، حتى اونلارين بعضى زامانلار رشوه سين قاسيم يغير. قاسيم دا منيم هم كندليم دير و اصلينده بوردادا هر زامان منه يارديمجى اولوب و منى ده ائله بورا گتيرن قاسيم اولوب، قاسيم ياخچى يولداش و ياخچى اينسان دير كى هامينين ايشينه گلير. بو خيالاردايديم كى ميدانا يئتيريب و كيمسه گلمه ميشدن بير خوش يئرده پارك ائلديم، بوجور يئرلرده گره ك بيراز زرنگ اولاسان يوخسا پاپاغينينى يئل آپارار. اوچ يوز مين تومان ليخ قارپيز آلميشام، البته يوز مين تومان قاباخدان وئرميشم و قرار اولوب ايكى يوز مين تومان دن ساتاندان سونرا وئرم. بونلارى ايكى –اوچ گون ايچينده ساتا بيلسم ياخچى اولار: اليم بيراز آچيليب همى پيناردان – اوختاى يين اوخولونا پالتار و كيتاب دفتر آلارام و همى ده "تره بارچى يا" قالان بورجومو وئرم، اودا توشلاديغى زامان ايتديرير و همن فائز چكير ايكى گون بورج اوستوندن كئچمَدَن. بيراز كئچمَدَن قاسيم دا گلدى، اودا قارپيز آليب سانكى. قاسيم وانتله سرعتله قاباغيمدان كئچير و مندن اوزاخدا بير گوشه ده ساخلايير. قاسيما طرف گديب و اونا سارى اوزومو توتوب دئيرم:
-سلام مش قاسيم نه وار نه يوخ؟
قاسيم بير سويوخ لحنينَن جواب وئرير: سلام، ساغولاسان.
-باغيشلا بيلسه ديم سنده قارپيز آليبسان من آييرى بير شى آلارديم.
= جانين ساغولسون، بويله بير ايشلر چوخ اولار.
-دئيرم قاسيم بو شهردارى مأمورلارى نئچه گوندور منه گير وئريبلر سانيرام، گور اونلارى بير طرفليخ ائليه سن. مدرسه لر باشلانير، اوشاخ لارا مدرسه وسائلى المام لازيمدير. باخ ايندى بونلار منيم كيچيما دولاشسالار، ائويم يخيلار. گور اوزون نئنيرسن سن آلاه.
- حاج احمد تك اولسا بئش- اون مين ايضافه وئريب و ايشلرى حل ائلرم، اما بو تزه گلن حاجى محمد ناف قولاغى توكلولردن دير و رشوه آلمير، اونا گوره ده حاجى احمد اونودان احتياط ائلير و اوندان برابر اولدوغو زامان اونون هويونا اويور.
-يوخ بابا بودا رشوه آلير، ساققالينا باخما، مَمى نن- اسماعيل دان كئچنلرده هره سيندن اون مين تومان آلميشدى. هاميسى بير بئزين قيراغى ديلار.
قاسيم او حالدا كى ترازونو قوشوب و قارپيزلارى وانت اوستونده چكى- دوزَن وئريردى جواب وئردى: او زامان مَمى يه يا اسماعيلا دئگينن كى دانيشسينلار اوندان، منيم اوندان آرام يوخدور و پول يئديغينى بيلميرم و لااقل منيم اَليمدن پول يئمير.
او حالدا كى بير سيگار چيخارديب دوداغيما قويوردوم جواب وئرديم: بيلرسن كى مَمى گيله دئسم، داها ايشى خارابلارلار. اونلاردان منيم اولدن آرام يوخدو، اونسوزدا اونلار اونون بونون آياغينين آلتين دئشرلر كى تهلكه نى اوز باشلاريندان آتسينلار. قالدى كى منيم بوردا ياخين آداميم سن سن و سندن سونرا منيم بو شهرده بير كسيم يوخ.
-قوى گوروم نئنيرم، منده سنين گيبى قارداش، منده اوزومو پيس كوه ده محافيظت ائليرم: اما گوزوم اوستونده و اگر گلسه لر چابا گوسته رَم بير طرفليخ ائليم.
اللر وار قارداش، تانرى سنى منه چوخ گورمه سين. بونلارى دئيب و اوز يئريمه دونورم. يولدا دوشونورم كى كئشگه بيلرديم قاسيم قارپيز آليب و من بوگون آيرى بير شى آلارديم. گوستردغيى ايلگى دن سانيرام منيم ده بوگون قارپيز ساتليغيما قيسقانيردى: آخى ايكى- اوچ كيشى بير شى ساتاندا، آرالاريندا ريقابت اولور و بعضى زامان گورورسن ساتيش فياتى و يا كاليته فرقلى اولدوغو دورومدا، ساتانلارين آراسيندا آنلاشمازليخ يارانير.
هاوا ايستى دير و گونش تام چيخيب، اينسانلار يغيليرلار يواش-يواش. منده قارپيزلارى دوزوب و ايكى سين سئچيب پيچاقلا پرچالاييب و نمونه اولاراق گورونن يئره قويورام و او بير قارپيزلارين اوزورينه چادير چكيرم كى تا كى گوندن قورونسونلار. تكرار قاسيما سارى گئديرم و اونان سوروشورام كى بير-بيردن آنلاشاخ كى قارپيزلارى نئچه يه ساتماليق. ندن كى بير اوجوز وئريب و او بيرى باها وئرديغى زامان، ايكى كيشى نين آراسيندا آنلاشمازليخ و حتى دعوا چيخا بيلر. قاسيم دئدى كى من كيلوسون بئش يوزه ساتماغينى دوشونورم، سنده اوز كئفيندى، نچه يه ساتيرسان سات. قاسيمين قارپيزلارينا باخديم، او قدر تعريفلى دئيلر و منيم قارپيزلاريم اونونكوندان ياخچى ديرلار. بودا همى منده سئوينج يارادى كى من قاسيم دان ياخچى ساتيشيم اولاجاق، همى ده بيراز اوره گيمده قورخو يارادى كى قاسيم ساتيشي آز اولسا قيسقانيب مندن اينجييه جكدير.
حسن عمى ده منيم يانيمدا ساخلاييب، اودا بوگون يئرالما آليب ساتماق ايچون. حسنَ عمى هاميميزدان ياشلى دير و ايرانين چوخ يئرينده ايشچيليق ائليب، او آلچاق و دولو بير كيشى دير كى بير عمور چاليشاندان سونرا ايندى وانت اوستونده ميوه ساتير. او چوخ بير يئرده دايمانماز و نورمالدا يئرالما- سوغان كيمى بير شى لر ساتار كى قازانجى آزدير، اما مثلاً خراب اولماز و ايكى گون موقعيت خراب اولدوغو زامان تعطيل اولسا آرابا داليندا كى جينسلر آرادان گئتمز و يا اونو كوچه باجادا ساتا بيلر. او دئير كى حوصله م چكمير بو مامورلاردان آغيز- آغيزا وئريب و سونرادا اونلارا باج وئرم. قالسين كى بوردا هامى عوض بوكى بيرلشه مامورلارين قاباغيندا، اونلارين قاباغيندا يالتاخليق ائليرلر و بير- بيرلرينين آياغينين آلتين دئشيلر تا مامورلار بونلاردان ايشلرى اولماسين اما بونلارين يولداشلارينان ايشلرى اولسون. او دئيردى كى ايشچيليق ائلينده ده بوجوردو، هر كس ايش صاحابينا يالتاخليق ائليردى و اوز حقيندن كئچيردَى كى ايش صاحابى اونو ايش اوستونده اينجيدمه سين و يا گورورسن ايش آركادشلارينى ايش صاحابينا چوغولوغون ائليرديلر كى ايش صاحابى بونلارا بير قورو باراكانلا دئسين و بونلارين ايش آركاداشين ايشدن چيخارسين. او دئيردى كى ازيلميش آداملارين اوزگونجه لرى اولماز و هر زامان اوزلرين اَزن ظاليم آداملارين گوزلرينَن باخيرلار و بونا گوره كى ظاليم لر هر زامان اونلارا اسكيح گوزدن باخيرلار و اونلارى ازمَك ايستيرلر: اونلاردا اوزلرينه آلچاق آدام گيبى باخيرلار و اوزلرى اوزلرين اَزمك ايستيرلر، اوز ايستك لرينن.
حسن عمى منه سارى گليب و سالام وئرَرك، ال وئردى و بير اوزونه اوزل اولان صميمى لحنى دن دئدى: اوغول بالا قارپيز ساتيرسان؟
-          هه حسن عمى.
-          بالا سنه نئچه سرى دئميشم بير شى ساتگينان كى خاراب اولماسين، حتى قازانجى آز اولسادا گارانتى اولسون: اونسوز دا مجبور اولماسان دولت آداملارى لا باش-باشا ووراسان.
-          ياشلى اولدوغونا باخماياراق، حسن عمى هر زامان اَل وئرنده آدامين اَلين سيخير. او حالدا كى اَليمى چكمه غه چاليشريرام اونا جواب وئرديم: مدرسه زامانى دير حسن عمى، خرجلر يئرده، ائوه كيراسى گوزونو آچيب يومدوغون زامان گليب يئتيرير. اونا گوره بوجور قازانجى چوخ اولان ميوه لردن ساتيرام، يئرالما سوغانين اوزون بيلرسن قازانجى آز اولور.
-          اوزون بيلرسن اوغلان، اما مامورلاردان گوزله. هم يئرلين ده قارپيز ساتير، پيشيْينى باسا بيلر گورسه بازارين كساد ائليرسن.
-          يوخ حسن عمى، قاسيم منيم هم يئرليم دى، اونسوزدا او منه بوردا چوخ يارديم ائليْير. قاسيم دا بو ايشى گورسه دا يانى كى دونيادا كيمسه يه اعتبار ائلمك اولماز. آدام نجور اولار كى دونيادا كيمسه يه اعتبار ائله مه سين، اوندا نجور ياشاماخ اولار؟
-          حسن عمى او حالدا كى آغزينا بير سيگار قويوب و وانتين اوستونده اوتوروب اونو چكيردى جواب وئردى: نه لر گوردوخ اوغول، بئش قوروش پول دان اوتورو دده بالاسين ساتيغينى گورموشم. قالسين كى ميمون بوغولدوغو زامان بالاسينين اوستونه چيخير تا كى اوزون قورتارسين. بيزلرين دورومو عينى او بوغولان ميمونون دُرومودور  يعقوب: هر كسن اوزون قورتارماق ايستير، هر كس آخشام چوره گينه محتاج دير، پس آخشام ائوينه چورگ آپارماق ايچون هر كسين آليندن چورگ قاپماغا چابا گوسترير. حاكيم لر بيلرك اينسانلارى عاج ساخلاييرلار تا كى اينسان لار مجبور اولسون لار كى بير پارچا چورك ايچون قورد كيمى بير-بيرلرين پارچالاسينار.  بودا حاكيم لرين ايشينه گلير، اينسانلار داها بير-بيرلرينه رحم ائتميرلر، اونلار داها بير-بيرلرينه گووَنميرلر. هر كس دنيزده اولان بير كوچوك آدا دير سانكى، سئوديخلرينين يانيندادا اوزونو تك حيس ائليرسن. گولوشلرين آرخاسيندا اوخ وار سانكى.
او حالدا كى قارپيزلارى بيرازين يئره دوزوردوم تا كى مشترى پسند اولسون حسن عمى يه سارى دئديم: اما هر شى كناردا دوزدو كى سن عمور بويو ايرانين هر يئرينده ايشچى ليخ ائليب و چاليشيب سان و بونان دولايى غنى  تجربه صاحابى سان. اما هله اينسانلار ايليشگى سينده مرام وار و هله اينسانلار دار گونلرده بير-بيرلرينين يانيندا اولورلار و ميمون گيبى بوغولاندا  چاره سيزليغ دن اوزلرين قورتارماق ايچون بالالارينين اوستونه چيخميرلار. حسن عمى او حالدا كى هر زامانكى گيبى شوخلوق و كدرلى فيگورلا دانيشيردى جواب وئردى: يعقوب بالا قوى سن دئيَن اولسون قان ياتسين! بو حالدا منه بير ياشلى مشترى گلدى و قارپيزين فياتين سوردو، جواب وئرديم بئش يوز تومان كيلوسو. مشترى او حالدا كى قارپيزلارى بير-بير چاليب و قولاغيلا سسينه قولاق آسيردى منه سارى اوزون توتدو و دئدى دورد يوز اَلى تومانا وئر كيلوسون بيرين آليم! منده صاباح سيفته سى اولسون دئديم اولسون الله خير وئرسين. ياشلى مشترى قارپيزلارى بير-بير دَنيييب و سسلرينه قولاق آساراق يئرينه قويوردو، او اوزو ماشينين اوستونه چيخدى و قارپيزلارى قولاغينين ديبينده بير- بير امتحان ائليردى. بو حالدا حسن عمى ياخينلاشدى و ياشلى مشترى يه سارى دئدى: اوغول جعفر قارپيز آليرسان؟ ياشلى مشترى كى حسن عمى له سانكى تانيشى دير جواب وئردى: هه حسن عمى بير ياخچى قارپيز ايستيرم سئچيب آلام. حسن عمى او حالدا كى سسى ايچريدن چيخيردى بير هيجانلى سسله دئدى: من اؤلوم سن ائولنديغين زامان بوجور ديقت ائلدين كى آلديغين آرواد ايچى بوش يا ايچى دولودور، هيچ اونو بوجور دَنَدين قاباغينا نجور چيخا؟ جعفر حسن عمى يه سارى دئدى: يوخ والاه، سوزون دوغروسو قونشولارين بيرى آناما دئميشدى فلان قيز ياخچى دير و اونونلا جعفرى ائولنديرين، اودا باجيلاريملا  گئديب باخيب بَيَنيب و نشانلاميشديلار و منه ده سورادان دئديلر و منده قبول ائليب ائولنيب و ايندى ده آلاها شوكور اوشاقلاردان و حياتيميزدان راضى يام، قاباغيما صاليح آرواد چيخدى آلاهين امرى له! حسن عمى كى قيپ-قيرميزى قيزارميشدى وانت اوستونده كى جعفره سارى دئدى: اولن سن گوزونو يوموب مال گيبى ائولنيرسن و بير عمور مادى و معنوى حياتينى  تانيماديغين آدملا پايلاشيب و ريسكه ساليرسان، اما بير قارپيزا دورد-بئش مين تومان وئرديغين زامان بير وانت قارپيزا يوموراق دويوب اونلارين بير-بير سسينه قولاغ آسيرسان كى باشينا بورك كئچمسين. گده سيزلر نجور آدام سيز؟ بير قارپيزدير آل قورتار گئدسين، نه يه بو قارپيزلاري چالخاليب تولوغون چيخارديرسان! اولن قوى سندن ده بير نفر بير تيكه چورك يئسين، بودا بير كاسيب آدامدير، هله اَلى تومان چيخيرسان هيچ، قارپيزلارى دا اَزيب تولوغون چيخارديرسان؟ گوتور بيرين إئنگينن آشاغيا! جعفر كى بير قارپيز گوتوروب آشاغى يا ائنيردى حسن عمى يه دئدى: سن هاردان چيخدين صاباح-صاباح، قويموياجاخسان بير دوغرو دوزگون قارپيز سئچك؟ باخ بو اوغلانين دا بازارينا باعيث اولورسان و سنه گوره مشترى لرده بوندان قاچارلار! جعفر اوزون منه سارى توتاراق دئدى: باخ بو آدام دان اوزاخ دور هر زامان، ديلى زهرمار گيبى دير و مشترى لر بونو گورسه سنين يانيندا سنه ياخين گلمزلر و چورگينه باعيث اولارلار. گولوُب و قارپيزى اَليندن آليب و قاپانا قويوب و اونون دورد مين ايكى يوز تومان توتدوغونو سويله ديم. جعفر دورده نه مين ليخ چيخارداراق اونو منه سارى اوزادى. حسن دئدى اوغول چيخارد دوغرو دوزگون پولونو وئر، آلاندا چَنه وروب بير كسيرسن، پولو وئرنده ده ايكى كسيرسن؟ گئده اؤلنده سن نجور تانرى يا جان وِرَجَكسَن؟ جعفر اَلى تيتره يه-تيتره يه چيخاردى ايكى يوز تومان دا پولارين اوستونه قويدو و حسنه سارى دئدى ايندى سندن يئرآلما آلاندا حايفين چيخارام، سن منيم جانيما قصد ائليب سن بوگون سانكى. حسن عمى جواب وئردى: اوغول منيم سنه ساتيلاجاخ يئرآلما يوخومدور، آنجاق سنه وراجاخ بير ياخچى زوپام وار ماشينين داليندا كى شهردارى مامورلارينا ساخلاميشام، گَل بلكه آلله هين وئردى قيسمت سنينكى اولدو. اسكى دن دئيبلر تانرى كور قوشون روزى سين يواسي آغزيندا يئتيرَر، سنين ده زوپا پايٰيين منيم اَليمده. جعفر گولره ك جواب وئردى: حسن عمى سانكى سنده پول چوخدور و اونو خرجله يه بيلمه يه رك اونو بيزه ديه وئرمك ايستيرسن؟ حسن عمى جعفره ياخينلاشاراق جواب وئردى: بيرگون جانيمى بوغازيما يغيب و گوزلريمى يوموب بو زوپانى دولانديراجايام، اُولن بو قدرده ظلوم و عدالت سيزليغ اولار؟ مملكتى يئرسيز دويمورسوز ايندى ده، ديه يه گوز تيكيبسيز؟ جعفر حسن عمى نين قولارينان توتوب و اونا سارى دئدى گَل منه بيراز يئرالما ساتگينان، مملكت ايشين بوراخ ايش صاحابلارينا، بيز اوز ايشيميزه باخاق قوى. حسن عمى او حالدا كى سيگارين آليشديريردى جعفره سارى دئدى: اوغول گئت صاباح-صاباح، سندن باش باشا وورماغا حاليم يوخدور، اونسوزدا سندن باشلانان سوفته آخشامى عاجليخ دان بيتر. جعفر حسن عمى يه سارى دئدى: يانى ايندى من آيرى آدام نان يئرآلما آلسام ناراحانت اولماسان؟ حسن عمى گوله گوله جواب وئردى: اوغول نييه ناراحات اولوم گئت گينن كيم نن آليرسان آل! جعفر ساققالينا اَلين چكيب كُتون دوزلدرخ او حالدا كى حسن عمى دن اوزاخلاشيردى جواب وئردى: باخ كسب آدامى دئيلسن، سوفته و مشترى نى تانرى نين بويودوغونا گوره قووموياجاخسان. الله تعالى دئيب سندن حركت مندن بركت!
حسن عمى اوزون جعفره سارى توتوب و جواب وئردى: گئت اوغول گئت، منيم اَليمده بيرى اؤلجَك اما گئت تانرى يا شوكور ائله كى سن اولموياسان، سندن گَلَن چورك زهر- زيكيم اولسون. صيفتينه باخ من اؤلوم هئچ چورك گورسنمير اوندا، او قالا كى سندن بيرينه چورك گله!
جعفر او حالدا كى قيرجاناريردى حسن عمى دن آيريلدي و گئده- گئده اوز- اوزونه دئيردى كى باخ گئديرم سنين رقيبيندن آلام باخيب اونا قيسقانما.
حسن عمى سيگارين چكرك باشين آشاغى ديكيب و ماشيندان يواش يواش اوزاخلاشاراق آديم آتماغا چيخدى. او هردن جانى سيخيليرسا بويله ياپار، سيگاراسين چكرك سكوتدا باشين آشاغى يا ساليب و ساكيتجه آديم آتار و بير ياريم ساعات سونرا دونور.
بازاريم ياخچيدى و يواش –يواش مشترى لر گليب گئديرلر، بوجور اولسا اوختاى دان پيناردان روزى سى يئتيريب و اونلارين قاباغيندا شرمنده اولمارام. حسن عمى بو حالدا گليب و يانيما گلدى و گوله رخ دئدى اوغول بالا يعقوب يازارين ياخچى دير و باخيرام گوزلرين گولور!
هه يه حسن عمى چوخ خوشدو، بويله قاباغا گئدسه يواش- يواش آخشاما قارپيزلارى قورتاريب و اوختاي دان پينارين يانيندا شرمنده اولمارام. حسن عمى گوله رك جواب وئردى: اوشاقلارين قاباغيندا اوزونو چاره سيز حيس ائتمك چوخ چتين دير يعقوب، او زامان كى اينسان اوزونو اوشاقلارينين قاباغيندا چاره سيز حيس ائدير، او زامان كى آتا اوشاقلارينين گوزونه باخماقدان اوتانير او زامان دير كى اينسان ياشاماق ايستمير، او زامان اوتانماماق ايچون اؤلمك ايستيرسن، اوتانماماق ايچون اينسان حتى هر اسكيك ليغه اَل آتماق ايستير.
بو حالدا حاجى احمدَدن حاجى محمد دى گوردوم كى بير باشدان گليرلر. هره سى بير قارا شالوار گئيب و بير آغ كوينكى اوستونه سالاراق يانلاريندا بئش آلتى آدام بير باشدان توولانا-توولانا هركسين يانيندا بئش اون دقيقه بكليب و باشقاسينين اوستونه گئديرلر. حسن عمى دئدى اوغول يعقوب من گئديرم بونلاردان آغيز- آغيزا وئره بيلميرم، منجه يغيشدير سنده گئت.
-          يوخ حسن عمى من ايسته سم ده گئده بيلمرم من قارپيزلارى يئره دوشه ميشم، سنين كيمى هر زاديم ماشيندا دئيل كى منيب ماشينا گئدم. بئش اون تومان وئرم حل اولار، هر زامانكى گيبى پول تله سى دير.
حسن عمى آرابايا ميندى و يولا توشوب گئتدى. حاج احمدَدن- حاجى محمد قاسيمين يانينا گئتديلر و اونون يانيندا دايانيب و بير نئچه دقيقه دايانديلار. حيس ائدرم قاسيم منى گوستردى، فيكير ائليرم دئدى كى اوندان ايشينيز اولماسين. اورگيمده بير قورخو و اوميد وار. ايچيم چاليب چارخالانير، يا حسن عمى دئديغى كيمى اولسا نه اولاجاخ؟
حاجى محمد بير نئچه نفر دوره سينده كى آدامى لا منه سارى گلدى. اون بئش مين تومان حاضيرلاديم و اووجومون ايچينه قويدوم، گلديغى آن همن قارشيسينا قاچيب و سلام وئريب و اَليمى اوزالدارق اونان يالاه وئرمك ايستديم تا بويله پولو اَلينه وئرم. يالاه وئرديم و پولو اَلينه قويدوم.
-          دولت مامورونا رشوه وئريرسن ها! سن يانى بو قدر قودوروبسان كى دولت مامورونون اوؤجونا پول قويورسان. كندن گليب شهرين گوزليغين پوزوب، بلديه قانونلارى و كورالارين آياغينين آلتينا قويورسان و ايندى ده بو جيسارت صاحابى اولوبسان كى دولت مامورونا رشوه وئرمك ايستيرسن، ها بى ناموس. حاجى محمد پولو يارديمجى لارينا وئردى و شيله نن قويدو يعقوبون قولاغينا. هر كس باشين آشاغى يا ساليب و يعقوب دان حاجى محمدده باخيردى، هر كس هم سئونيردى و هم اوتانيردى.
-          يعقوب بير ميلته باخدى و بير حاجى محمدده و سسى تيتره يه تيتره يه دئدى: حاج آقا پيس قصديم يوخودور، باغيشلايين، اوشاقلاريما باغيشلايين منى!
حاجى محمد سانكى بير اصلان گيبى باغيريردى يعقوبا سارى يورودو و اونون اوزوندَن باشقا بير شيله وؤراراق هامى دوياراق اونون اوزرينه باغيردى: سنى كوپك اوغلو منه رشوه وئرمك ايسترسن ها، من كى نامازيم و اوروجوم كچمير و حياتيمدا آلاهين و امام مين ايذنيله بير تيكه حارام چورك يئمه ميشم. عينى حالدا حاجى محمد و دوره سينده كى اداملارى يعقوبون قارپيزلارين و ترازولارين يئرلره داغيديب سپه ييلر، سانكى لشكرى ايسلام كفر اموالين داغيدير. حاجى محمد يعقوبون ياخاسيندان ياپيشيب و آغزينين توپورجكى له يعقوبون اوزونو ايسلاداراق يعقوبا سارى باغيرير: سنى، سنين آتانى يانديراجايام. سنى اوشاقلارينين قاباغيندا شرمنده ائله يه جه يم، سنين آروادينى اَرسيز قوياجايام، سنى زيندانا سالديراجايام، سن منه رشوه وئريرسن و يومروق دان قويودو يعقوبون گوزونون اوستونه.
دونيا يعقوبون باشينا دولانيردى سانكى، گوزلرى قافاسينا چيخميش دير، نه آغلييا بيليردى و نه دانيشا بيليردى. زامان وار كى اينسان پاتلاماق ايستير. يعقوب يوخ اولماق ايستير سانكى، بو قدر كوچولدوغو ايچون اينتقام آلماق ايستير: هم اوزوندَن و هم اونو تحقير ائلينلردن. حاجى محمدين اليندن قاچيب او بيچاقى كى قارپيزلارى ايمتحان ائليردى حيزلا اَلينه آلير و حاجى محمددين اوستونه گئدير، ايندى يعقوب دور كى باغيرير: من شهرى پيس گورسه ديرم، اما سيزلر اينسان ليغى پيس گوسترير سيز. سن منيم روحومو اؤلدوردون ، سن منى مجبور ائلدين كى سنى اؤلدورم، سن منى تحقير ائدين. يعقوبون اَللرى قانلى دير و حاجى محمددَن هيچ بير سس چيخمير. هر كس دالا چكيلير، هر كس اوزون قوروماق ايستير. بو زامانلار اورمان لارا حاكيم اولان ياسالار حاكيم اولور، يعقوب او حالدا كى دورت ليتيريخ بنزين گالونون اَلينه آليب توم سسيله باغيرير: ياشاماق ايسته ديم، كنددن مجبور اولاراق قووُلدوم، پيسديحلى لر گيبى شهرى پيس گوسترديم، اما اگر اوشاق لاريمين قاباغيندا اوتانسام ياشاماغين نه آنلامى قالير. من ياشاماق ايسته ديم، اونا جان آتديم اما منى ياشاتماديلار. نه من كيمسه نين آرخاسيندا دورا بيلديم و نه كيمسه منيم آرخامدا دوردو چتينليخ لرده، بورا سانكى اورمان دير. من جانيمى قورتاريب اوزومو يانديرماق ايستيرم، سيزده بير گون اوزونوزو مجبور اولوب يانديراجاخسينيز. يعقوب بنزينى قافاسينا توكدو و كبريتي چكدى: سانكى بير پارچا اود آفريقان قارا لارى كيمى دَلى لر گيبى تك باشينا دانس ائدير.
قهرمان قنبرى


No comments:

Post a Comment