ینی ایلینیز اوغورلو اولسون


Dec 11, 2016

سنلی،‌ سنسیز دویغولاریم 3


هانیه ‌تبریزلی «آیمان»

(1)
كبريت قوطوسونا باخيرديم
«
خطرسيز»دير يازميشدي.
آنجاق دوشوندوم كي
بير چؤپو ايله
دونياني اودا چكمك اولار.
سنين ده سؤزلريني
كبريت قوطوسوندا يازيلان سؤزلر كيمي سانيرديم

يازيقلار اولسون اؤزومه گلديگيمده
آنلاديم كي
بوتون دونيامي اودلاييب، گئتميسن
ايندي بير من قالميشام،
بير ده كوله دؤنموش اوره‌ييم!…

(2)
سن گئده‌لي
دونيانين بوتون آجيلاريني
قوينوما بوراخيب
اوسته‌ليك، قلبيمي ده
اؤزونله آپاردين،
داها كيمسه‌يه وئرمه‌لي
اوره‌ييم يوخدور.
(3)
اوره‌ییم سیندی
بوش وئر سينان،‌ سينمالي‌دير.
باشینا تصدّق
قضا و قدریدی باشینان سوووشدو

گوزومون یاشی آخاندا
دئييرسن:
سو آیدینلییق دی
اولسون بو سويا
سئوگي‌ ده قاتارام
عؤمور بويو
ياشاييشين آيدين اولسون!
(4)
آي تانريم!..
چوخ يورولدوم،
جان اوسته‌يم
ندن وار‌ـ‌ گل ائديرسن؟
يالواريرام
قورتار مني بو ظولومدن!..
(5)
دوداقلاريمي
سنين يئرينه،
سيگار اؤپور،
آليشديرماق ايستمز!
ائله سنسيزليكدن يانمادايام
اودوم
سيگاري دا يانديرير!..
(6)
اوره‌يين سيخيلماييب
بير آهين
نه قدر آجي اولدوغونو آنلاماسان!..
داريخمانين آنلاميني
داها سوروشما لطفا!
دردين،
آجي‌نين،
يانيب قوورولماغين
نه اولدوسونو آنلايا بيلمزسن!…
(7)
تانریم!…
سئوگيمي سنه تاپشيريرام.
آمما سندن بیر دیله‌يیم وار!..
اونو بيرينين ايستي قوجاغيندا گؤرسن
اوره‌ييمي دونداريب
كدرلر ايچينه بوراخديغيني خاطيرلات!..
(8)
کونلونو سیندیردیسا
سنی بوراخدیسا
سيزلاما، آغلاما
دؤز
بو قوجا دونيادي
بیر گون…بیریئرده… بیرداش اوره‌ك
اونو دا سیندیراجاق
بويونا آجي‌ـ‌ آجي آغيتلار
اوخوناجاق
اصلا شوبهه‌ن اولماسين!..
(9)
اوره‌ييمي
ياتاق‌تاختيما باغلایاجام
اؤزونو ييرتيب، داغيتسا دا
قیشقیريب، باغیريب،
ائل،‌ عالمي جانا گتيرسه ده
اؤرگشمه‌ليدي؛
بو دونيادا
هر قانمازا
بئل باغلاييب، آليشمازلار!..
(10)
من
هله بؤيويوب
يئتگين‌لشمه‌ميشم
اما
بو یاشاییش
يئتري قدر
قؤجالديب مني
(11)
آه سئويملي کؤلگه‌م
هئچ بيليرسن
گونش بولود آرخاسيندا
گيزله‌ننده
نه قدر يالقيزلاشيرام؟!…
(12)
اؤزون بيليرسن
گؤزلرينين درينليگينه
نه قدر حيرانام!
گؤزلرينده؛
بير ماوي دنيز تاپديم،
او دنيزده بوغولماق ايسته‌ييرم
ايزين وئريرميسين؟
(13)
آخشاملار
گون باتان چاغي
آتاسيزليق آجيسي
يامان گؤينه‌دير اوره‌ييمي!

http://ishiq.net/?p=17011
 

No comments:

Post a Comment