پائیز

س. حاتملوی

آذربایجان تورپاق لاریندا هر فصل ین اؤزونه یاراشان گؤزللیک لری وار.

قیش فصلینده وطنیمین هوندور داغلارینین قارلی زیروه لرینه باخاندا، بو عظمتین قارشی سیندا، انسانین اوره یینده، یالنیز حؤرمت و سایقی حس لری اویانیر.

بیزیم اورالاردا یاز گلنده، هاوادا غریبه بیر نفس دالغالانیر. بئله بو گونده ن صاباحا، باهارین گلدییینی بیلمک اولور.

یای فصلینه گلدیکده، گوندوزلرین ایسی سینده ن سونرا، آخشاملارین سرین هاواسی، انسانین روحونو نوازش ائدیر و اسن سرین یئل ده، بئله انسانین چیممه یی گلیر.

آمما پائیز... آمما پائیز. ... بو فصل ده حسنوو و آستارا- خالخال مئشه لرینه یولو دوشن، آذربایجان تورپاقلاریندا پائیزین نه قدر گؤزل و نه قدر الوان اولدوغونو باشا دوشه بیلر.

و سونرا پائیزین جلوه لری بیزیم سهنداوادا. ...

اورالاردا کی پائیزین گؤزللیک لری باشقا جور اولور.

گؤزلریمی یوموب و خیالیمدا ایللر بویو اوزاق قالماغا مجبور اولدوغوموم تورپاقلاردا، پائیزین گؤزللیک لری جانلاندیرماغا چالیشیرام.

*****

آمما بو گون سیزلره یاشادیغیم اؤلکه ده، یانی فئدرال آلماندا پائیزین نه قدر گؤزل اولدوغونو آنلاتماغا چالیشاجاغام. ائله بیر گؤزل لیک لر کی، اونلاری جانلاندیرماق، یالنیز ماهر رساملارین الینده ن گلیر.

بو اؤلکه نین طبیعتی اینانیلماز قدر گؤزل و طراوتلی دی. بو اؤلکه ده یاشاماغا باشلادیغیم ایلک ایللرده، بیزیم آذربایجاندا راستلاشمادیغیم، غریبه بیر شئی نظریمی جلب ائتدی: بو تورپاقلاردا، طبیعت ین هر دورت فصلینده و هر فصله اویغون چیچک لر بیتیر.

بورالاردا یاز فصل ینده مئشه لرده آنا طبیعتین سخاوتلی اللری سحر ائدیجی الوان منظره لر یارادیر. گؤز ایشله دیکجه یاشیل لیق و بیتمک بیلمه ین مئشه لرده، گزمه یین لذتی اونودولماز دی.

لاکن یاز فصلی نین وورقونو اولان من، پائیزین نه اولدوغونو و نه قدر گؤزل اولدوغونو، دوغرودان بورالاردا و بو تورپاق لاردا ده رینن حس ائتدیم و بئله لیکه بو اؤلکه ده حیاتیمدا بیرینجی دفعه، پائیز فصلینی، باهاردان داها چوخ سئومه یه باشلادیم.

بورالاردا باشقا اؤلکه لرده اولدوغو کیمی، پائیز فصلی عین زاماندا محصولو ییغیشدیریب، داشیماق فصلی دیر. باشقا ملت لرده اولدوغو کیمی، آلمانلاردا دا، بو فصله عاید شنلیک لر وار. بونلارین ان گؤزه لی، اوزومو ده ریب و شراب سالماق شنلیگی دی.

بوتون اروپالیلاردا اولدوغو کیمی آلمان لاردا دا، شراب ین باشقا بیر یئری وار. بیلدیییمیز کیمی، خریستیان دینینه عاید اولان آئین لرده، آزاجیق شراب ایچیلیر. عین زاماندا یئمک سوفرالاریندا دا، بیر قدح شراب ایچمک چوخ معمول دی.

منجه بو اولکه ده، پائیز فصلی طبیعیتین هر دورت فصلینی بیرلشدیریر. الوان رنگ لر بیر- بیرینه قاریشیر و آنا طبیعت ین رسام اللری بیر- بیرینه قاریشان بو رنگ لرده ن، معجزه لر یارادیر. «قیزیل اوکتوبر» آدلانان پائیز گونلرینده، هاوادا قیش فصلی نین گلمه سینی حس ائتدییین حالدا، باهارین یوموشاق نفسی، یای فصلی نین گونشی ایله قوجاقلاشیر و انسان دا اینانیلماز شن احوال- روحیه یارادیر.

  

 پاییز دیر

گونشین رنگی بیر آز قاچیب

بیلر- بیلمز هاوا بیر آز سویوب

مئشه لرده رنگ لرین چیغیرتیسی

                            گؤز باتیریر

ماوی، قیرمیزیا ساتاشیر

ساری، یاشیل لا قووالاشیر

قارا، آغلا قوجاقلاشیر

و

قارا دان

کوسن قهوه ای

بوز لا باریشیر

پاییزدیر

هاوا بیر آز پاییزلاشیب

گئجه لر گئت- گئده

         اوزانیر

پاییز گلیر .............