سئوگي يئرينه قاچينيلماز اؤلوم

قابريئل قارسيا مارکئس - ترجومه ائدن: نريمان عبدوررحمانلي (  kitabxana.net )

سئناتور اونئسيمو سانچئس حياتي‌نين‌ قادينينا راست گلنده اؤلومونه آلتي آي اون بير گون قالميشدي.

او همين قاديني ويتسئ-کرالليغين قيزيلگول باغيندا، ايکي ‌اوزلو يانوسا بنزر کندده گؤرموشدو: گئجه‌لر بو کند اوزاقدان اوزوب گلن قاچاقمالچي گميلره سيغيناجاق وئرن ليمانييدي، گوندوزلر ايسه صحرايا بنزر دنيزين ساحيلينده‌کي دوزنليگين قوتبلري بيلينمه‌ين، هئچ نه‌يه يارامايان بير گوشه‌سي کيمي گؤرونوردو.

کند دونيادا هر شئيدن او قدر اوزاق دوشموشدو کي، بورادا کيمينسه طالعييني دگيشمگه قادير اولان بير کيمسه‌‌نين‌ ياشاماسي هئچ کسين عاغلينا گلمزدي.

گؤرونور آدي دا کنده گولونج اوچون وئريلميشدي: چونکي نه واختسا جاماعاتين بوردا گؤردوکلري ايلک قيزيلگولو آخيردا لاورا فارينايلا تانيش اولدوغو همين گون سئناتور اونئسيمو سانچئس گتيرميشدي.

دؤرد ايلدن بير کئچيريلن سئچکي کامپانيياسي اؤز قايداسينجا گئديردي.

سحر فورقونلار مضحکه‌چيلرله گليب چيخديلار.

سونرا يوک ماشينلاري سئچکي‌قاباغي ييغينجاقلار زاماني جاماعاتي اگلنديرمک اوچون موزدلا توتولموش، شهرجيکدن شهرجيگه داشينان قيزيل‌دريليلري گتيرديلر. ساعات اون بيره ياخين موسيقي سسلري، بزکلي ايشيقلار وئرن فيشنگلرين پارتالاييشي سس-کويو آلتيندا چييه‌لک سويو رنگلي نازيرليک آوتوموبيلي کنده گيردي.

ايچريده‌کي سرينليکده غريبه، اطرافدا باش وئرنلرله اويوشمايان ساکيتليکله سئناتور اونئسيمو سانچئس اوتورموشدو.

او، ماشينين‌ قاپيسيني آچان کيمي بورکودن تنتيدي، خاليص ايپکدن اولان کؤينگي بير آنداجا تردن ايسلاندي، سئناتور اؤزونو هئچ واخت اولماديغي قدر ياشلي، تنها حيس ائله‌دي.

اونون بو ياخينلاردا قيرخ ايکي ياشي تامام اولموشدو، واختيله هئتتينگئنده موهنديس-مئتالورق فرقلنمه ديپلومونو آلميشدي. اوزون ايللر ايدي کي، اؤزونه خوصوصي بير خئيري اولماسا دا، پيس ترجومه‌لرده لاتين کلاسسيکلري‌نين‌ اثرلريني موطاليعه ائله‌ييردي.

او دايم شن، گوله‌ين آلمان قيزينا ائولنميشدي، بئش اوشاقلاري وار ايدي، هاميسي دا اونون ائوينده خوشبختديلر، اوچ آي اول ياخين ميلاد گونونده اؤله‌جگيني اونا سؤيله‌ينه قدر اؤزو هاميدان خوشبخت ايدي  .

ييغينجاغا حاضيرليق قورتاراناجان سئناتور اونونچون آيريلميش ائوده هئچ اولماسا، بير ساعات تک قالماغا، دينجلمگه مووفق اولدو.

اوزانمازدان اول صحرادان تزه-تر کئچيريب گتيرديگي قيزيلگولو سرين سويا قويدو.

سونراسا گوندوز اولدوغو کيمي بير داها قيزارديلميش کئچي اتي يئمه‌مک اوچون هميشه اؤزويله گزديرديگي پهريز سيييغي ايله ناهار ائله‌دي، آغريلاري‌نين‌ باشلانماسيني گؤزلمه‌ييب بير نئچه کئي‌لشديريجي حب آتدي.

سونرا ائلئکتريک هاواتميزليه‌‌نيني تور يئللنجگين يا‌نينا قويدو، اگنينده‌کي بوتون پالتارلاري چيخاريب آتدي، ياري يوخولو اؤلوم حاقيندا دوشونمه‌مک اوچون بوتون قووه‌سيني توپلاييب اون بئش دقيقه قيزيلگولون کؤلگه‌سينده اوزاندي. حکيملردن باشقا هئچ کس بيلميردي کي، او، محکومدور، اولجه‌دن معلوم اولان اؤلوم ساعاتيني گؤزله‌يير.

اونا گؤره ده او، هئچ نه‌يي دگيشمه‌ييب بو سيرري تکباشينا اؤزويله قبره آپارماغي قرارا آلدي، آنجاق بو قرارا لووغاليقدان دئگيل، تواضؤع‌کارليقدان گلميشدي.

گوندوز ساعات اوچده کوبود کتاندان تيکيلميش شالواردا، پارلاق، گوللو کؤينکده دينجلميش اوزونو ترتميز قيرخميش حالدا، کئي‌لشديريجي درمانلارلا ساکيتلشديريلميش اورکله جاماعاتين ايچينده گؤروننده او اؤزونو بوتون قابيليتلري‌نين‌ آغاسي حيس ائديردي.

آنجاق اونو اوزموش اؤلوم گؤرونور، دوشوندوگوندن داها حيله گر ايدي، چونکي خطابت کورسوسونه قالخاندا اليني سيخماق شرفينه نايل اولانلارا اؤزونده غريبه بير نيفرت دويوردو، کيچيک، چيلپاق مئيدا‌نين‌ تاپدانميش تورپاغي اوستونده سيرالانميش آياق‌يالين قيزيل دريليلره ده يازيغي گلمه‌دي.

 الي‌نين‌ حؤکملو، آز قالا حيددتلي حرکتي ايله آلقيشلاري کسدي، ال-قولونو آتمادان باخيشلاريني بورکودن يورولموش دنيزه ديکيب دانيشماغا باشلادي. او سليس دانيشيردي، درين سسينده دورغون سودان نسه وار ايدي.

آما ازبرله‌ديگي، دفعه‌لرله سؤيله‌ديگي سؤزلر اونا گؤره يادينا دوشموردولر کي، اونلارا حقيقتي دئمک آرزوسو حاکيم ايدي، ترسينه، سئناتور مارک آورئلي‌نين‌ خاطيره‌لري‌نين‌ دؤردونجو کيتابينداکي بير نصيحته اعتيراض ائله‌مک ايسته‌ييردي.

-  بيز بو دونيادا طبيعته قاليب گلمک اوچون ياشاييريق، - او بوتون اعتيقادلارينا دابان-دابانا ضيد اولان بير عيباره ايله باشلادي. - اوندا بيز وطنين‌ تاپيلميشلاري، حسرت، يوردسوزلوق سلطنتينده تانري‌نين يئتيملري، اؤز اؤلکه‌سي‌نين‌ ايرينله‌ميش يارالاري اولماياجاغيق. بئله‌ليکله خانيملار و جنابلار، گلين باشقا جور اولاق، گلين گوجلو، خوشبخت اولاق.

بونلار اونون تاماشاسي‌نين‌ عادي دوستورلاري ايديلر.

او دانيشير، کؤمکچيلريسه هاوايا بوللوجا کاغيذ گؤيرچينلر آتيرديلار، کاغيذ گؤيرچينلر جانلانيب تاختادان دوزلديلميش خطابت کورسوسونون اوزرينده دؤوره وورور، دنيزه طرف اوچوردولار.

بو زامان باشقا يارديمچيلاري اينجه کئچه‌دن يارپاقلاري اولان ساختا آغاجلاري فورقونلاردان چيخارير، اونلاري جاماعاتين آرخا طرفينده مئيدا‌نين‌ تورپاغينا باسديريرديلار.

آغاجلاري باسيديرب قورتاراندان سونرا اوزرينده شوشه پنجره‌لي، قيرميزي کرپيجدن ائو چکيلميش کارتون آرخاليق قويوردولار،  بو دئکوراسييالارلا واقعي حياتين ميسکين داخمالاريني اؤرتوردولر.

تروپپايا تاماشاني حاضيرلاماغا واخت وئرمک اوچون سئناتور اؤز نيطقيني ايکي لاتين سيتاتييلا اوزاتدي. او، ياغيش ياغديران ماشينلار، سيّار اينکوباتورلار، شوران تورپاقلاردا خييار بيتيرن، ديبچکده آلا-بزک بنؤوشه چيچکلنديرن گوبره-مؤعجيزه وعد ائتدي.

اونلارين خياليندا جانلانديرديقلاري دونيا‌نين‌ ييغيلديغيني، قورولدوغونو گؤرنده اليني اوزاديب قيشقيردي:

- خانيملار و جنابلار، بودور باخين بيز نئجه ياشاياجاغيق! گؤرون، بيز نئجه ياشاياجاغيق!

 هامي گئري باخدي. شکيل- ائولرين آراسيندا رنگلي کاغيذدان دوزلديلميش اوکئانلار آراسي گمي اوزوردو، گمي آرخاليقداکي شهرين ان اوجا بيناسيندان دا هوندور ايدي.

يالنيز سئناتور حيس ائله‌دي کي، کارتون شهرجيک بير يئردن باشقا يئره داشينديغيندان، دفعه لرله ييغيليب-سؤکولدوگوندن، پيس هاوادان اولدوقجا ضرر چکيب، دئمک اولار کي، ويتسئ-کرالليغين قيزيلگول باغي کندي‌نين‌ ائولري کيمي کاسيب، توزلو، غملي گؤرکم آليب.

***

اون ايکي ايل عرضينده ايلک دفعه ايدي، نئلسون فارينا سئناتورو سالاملاماغا گئتمه‌ميشدي.

او، نيطقه يونولماميش تاختالاردان تيکيلميش ائوي‌نين‌ قاباغيندا تزه بوداقلاردان هؤرولموش تالواري‌نين‌ آلتينداکي تور يئللنجگينده اوزانيب گونورتا اوستو مورگوسو آراسيندا قولاق آسيردي.

نئلسون فارينا بو ائوي بيرينجي آرواديني تيکه-تيکه دوغرايان آپتئکچي اللرييله تيکميشدي.

او، ويتسئ-کرالليغين قيزيلگول باغي کندينده ايلک دفعه گوناهسيز اوزون‌قويروق آرا توتوقوشولارييلا يوکلنميش قاييقدا گؤرونموشدو، اونلارلا بيرليکده قاييقدا جانيلر کاتورقاسيندان قاچاندا پاراماريبودا راست گلديگي، گؤزل، سؤيوش سؤيمگه خوصوصي مئيل گؤسترن، سونرا اونا قيز دوغموش قارا‌ دريلي قادين دا وار ايدي.

تئزليکله بو قادين اؤلدو، آما او بيري کيمي، دوغرانميش بدني اؤز ديريليگينده گول کلمي اوچون گوبره اولمادي، اؤز اجلي ايله دونيادان کؤچدو، قارا‌ دريلي قادي‌نين‌ هوللاند آديني لؤوحه‌جيکله ابديلشديريب يئرلي قبيريستانليقدا بوتؤو دفن ائتديلر.

قيزينا اوندان گؤزل بدن، دريسي‌نين‌ رنگي، آتاسيندانسا قيزيلي، حئيرت دولو گؤزلر قالميشدي.

نئلسون فارينا‌نين‌ دا بئله حساب ائلمگه اساسي وار کي، اونون ائوينده دونيا‌نين‌ ان گؤزل قاديني بؤيويور.

هله بيرينجي سئچکي کامپانيياسيندا سئناتور اونئسيمو سانچئسله تانيش اولاندا نئلسون فارينا اوندان ساکيت ياشاماغا ايمکان وئرن ساختا شخصي وثيقه تاپماغا کؤمک گؤسترمگي خواهيش ائتدي. سئناتور بو خواهيشي نزاکتله، لاکين قطعيتله ردد ائتدي.

نئلسون فارينا تسليم اولمادي، بير نئچه ايل دالبادال، سئناتورون هر گليشينده اؤز خواهيشي ايله اونا موراجيعت ائتمگه باهانا تاپيردي. آنجاق هر دفعه عئينيله همين جاوابي آليردي.

بئله‌ليکله ده او، بو دفعه نه واختسا دنيز قولدورلاري‌نين‌ دالدالاناجاق يئري اولموش، بورکودن آلوولانان بو يئرده ديري‌گؤزلو چورومگه محکوم اولموش حالدا تور يئللنجگينده قالماغي قرارا آلدي.

ناطيق قورتاراندان سونرا گورلايان آلقيشلاري ائشيدنده او ديکلدي، بوينونو اوزاديب تاماشا‌نين‌ آرخا حيصه سيني - بينالارين اَگري داياقلاريني، آغاجلارين مفتيللريني، اوکئانلاراراسي گميني حرکته گتيرن، جاماعاتين سئزه بيلمه‌ديگي قوللوقچولاري گؤردو.

نئلسون فارينا‌نين‌ ايچينده ييغيلميش بوتون حيددت پوسکوردو:

- لعنته گلميش، - او، فرانسيزجا دونقولداندي، - سيياست ايشلرينده او دوغرودان دا اويونبازدي!

***

چيخيشدان سونرا سئناتور عادتي اوزره اورکئستر موسيقيسي، پيروتئخنيک فيشنگلرين ايشيغي آلتيندا کوچه گزينتيسي کئچيردي.

گزينتي واختي کندين ساکينلري اونو دؤوره‌يه آليب اؤز احتيياجلاري باره‌ده حئکايتلرله تنگه گتيرديلر.

سئناتور هر کسه جاني‌يانانليقلا قولاق آسير، هميشه اؤز اوزرينه چتين يئرينه يئتيريلن عؤهده‌ليک گؤتورمه‌دن تسللي وئرمگه اوصول تاپيردي. آما آزياشلي اوشاغي ايله ائوي‌نين‌ دامينا چيخميش بير قادين فيشنگلرين گورولتوسونو و جاماعاتين سس-کويونو باتيرماغا مووفق اولدو:

- من چوخ آز شئي خواهيش ائديرم، سئناتور، - او قيشقيردي. - منه آنجاق ياراماز نوهوردان سو گتيرمک اوچون ائششک لازيمدي!

سئناتور آلتي باش چيرکلي، آريق اوشاغا باخدي:

- ياخشي، - سئناتور دئدي، - سنين‌ ائششگين اولاجاق.

تئزليکله اونون کؤمکچيلريندن بيري قادي‌نين‌ ائوينه سئناتور طرفيندن باغيشلانماسيني هئچ کس اونوتماسين دئيه، بؤيورلرينه يويولماز رنگله سئچکي شوعاري يازيلميش يوک ائششگي گتيردي.

او قدر ده اوزون سورمه‌ين گزينتيسي زاماني سئناتور شهرجيگين باشقا ساکينلرينه ده اؤز خئييرخاه موناسيبتلري‌نين‌ کيچيک نومونه‌لريني گؤستردي، بوندان باشقا سئناتورون کئچمه‌سينه باخماق اوچون چارپاييسيني کوچه‌يه چيخارتديرميش خسته‌يه اؤز الي ايله بير قاشيق درمان وئردي.

سونونجو کونجو دؤوره ووراندا حاصارين چاتلاغيندان تور يئللنديکجه اوزانميش نئلسون فاريناني گؤردو.  نئلسون فارينا‌نين‌ صيفتي سئناتورا کول رنگينده - بوز، غملي گؤروندو.

بونا باخماياراق او، هوسسيز ده اولسا اونو سالاملادي:

- نئجه ياشاييرسينيز؟

او سئناتورا طرف دؤندو، اونو کدرلي گؤزلري‌نين‌ کهربا ايشيغينا غرق ائله‌دي.

- من؟ اؤزونوز بيليرسينيز، - دئيه فرانسيزجا جاواب وئردي. اونون قيزي صؤحبتي ائشيديب داخمادان چيخدي.

قيزين اَگنينده کؤهنه خالات وار ايدي، باشيني رنگبرنگ بانتلار بزه‌ييردي، صيفتي ايسه گوندن يانماماق اوچون کرئمله ياغلانميشدي، آنجاق بو گؤرکمده ده تصوور ائله‌مک اولاردي کي، دونيادا اوندان گؤزل قيز يوخدو. حتّي سئناتورون نفسي ده توتولدو:.

- لعنت شئيطانا، - او حئيرتله ايچيني چکدي، - لازيم ايدي‌مي، آللاه بئله گؤزل ياراتسين!

***

همين آخشام نئلسون فارينا قيزينا ان گؤزل پالتاريني گئيينمگي تاپشيردي، اونو سئناتورون يا‌نينا گؤندردي. ايستيدن الدن دوشموش، بورونلاريني قوناق ائوينه سؤيکه‌ييب اوزانميش ايکي گؤزتچي اونا آستاناداکي يئگانه ايستولدا اوتوروب گؤزله‌مگي امر ائتديلر.

سئناتور اؤز چيخيشلاريندا توخونماديغي حقيقتلر باره‌ده آچيق دانيشماق اوچون ويتسئ-کرالليغين قيزيلگول باغي‌نين‌ ان نوفوزلو ساکينلرييله بيرليکده قونشو اوتاقدا ايجلاس کئچيريردي.

بو آداملار صحرا‌نين‌ بوتون ديگر شهرجيکلرينده ايجلاسلاردا ايشتيراک ائله‌ينلره او قدر اوخشاييرديلار کي، سئناتورا ائله گليردي کي، عئيني بير ايجلاس هر آخشام کئچيريلير، بو دا اونو تنگه گتيرميشدي.

سئناتورون کؤينگي تردن ايسلانميشدي، او، اوتاغين يوخولو دونوقلوغوندا يئکنسق صورتده ويزيلدايان ائلئکتريک هاواتميزله‌ينيندن گلن ايستي هاوا‌نين‌ آخينييلا اونو قورولاماغا چاليشيردي.

- شوبهه‌سيز کي، بيز سيزينله کاغيذ قوشلار يئميريک، - سئناتور دانيشيردي. - سيز د، من ده بيليريک کي، بو آياق‌يولو يئرينده آغاجلار، چيچکلر بيتن، نوهوردا چؤمچه‌قويروقلارين عوضينه دورنا باليقلاري اوزن گوندن سيزين ده، منيم ده گؤرمگه ايشيميز قالماياجاق. سيز مني باشا دوشورسونوز؟

هامي سوسوردو، سئناتور دانيشا-دانيشا تقويمدن بير ورق قوپاريب کاغيذ کپنک دوزلتدي.

ائله-بئل، غئيري-ايرادي کاغيذ کپنگي هاواتميزلييه‌‌نين‌ خفيف هاوا آخينينا آتدي، کپنک دؤوره ووراراق ياري آچيق قاپييا ساري اوچدو. سئناتور توختاق حالدا دانيشماغينا داوام ائله‌ييردي، اؤلومله سازيشه گيرمه‌سه‌يدي، بونا قابيل اولا بيلمزدي.

- بئله اولان حالدا، - او دئدي، - سيزين اؤزونوزون گؤزل بيلديگينيزي من تکرار ائتمک ايسته‌ميرم: يئنيدن سئچيلمگيمده سيز مندن چوخ ماراقليسينيز، چونکي من ايگلنميش سو و قيزيل‌دريلي تريندن بوغازاجان دويموشام، سيزسه، عکسينه بونونلا ياشاييرسينيز.

***

کاغيذ کپنک آستانايا اوچاندا لاورا فارينا اونو او دقيقه گؤردو. گؤزتچيلر گؤرمه‌ديلر، چونکي سؤيکنه‌جکلي ايستوللاريندا اوتورموش وضعيتده توفنگلريني قوجاقلاييب ياتيرديلار.

قانادلاريندا باسما اولان نهنگ کپنک بير نئچه دؤوره ووردو، سونرا کاغيذ آچيليب ديوارا ياپيشدي. قونشو اوتاقدا گورلايان آلقيش سسلريندن اويانميش گؤزتچيلردن بيري دئدي کي، اونون جهدي عبثدي.

- قوپارا بيلمزسن، - او، يوخو ايچينده دونقولداندي، - چونکي ديوارا چکيليب.

لاورا فارينا يئنه ايستولا اوتوردو، ائله بو زامان ايجلاس ائدنلر اوتاقدان چيخماغا باشلاديلار. سئناتور دستگيندن توتوب قاپي‌نين‌ آراسيندا دايانميشدي. لاورا فاريناني آنجاق آستانا بوشالاندا گؤردو:

- سن بوردا نئيله‌ييرسن؟

- مني آتام گؤندردي، - قيز فرانسيزجا جاواب وئردي.

سئناتور هر شئيي باشا دوشدو. او، ياتميش گؤزتچيلر، سونرا آغلاگلمز گؤزلليگيله اونون آغريلاري اوزرينده غلبه چالميش لاورا فارينايا باخدي، فيکيرلشدي کي، اؤلوم آرتيق اونون عوضينه هر شئيي نظره آليب.

- ايچري کئچ، - او، قيزا دئدي.

لاورا فارينا سانکي اووسونلانيب قاپيدا داياندي: اوتاقدا باياقکي کاغيذ کپنک کيمي مينلرله بانک بيلئتلري هاوادا پيريلتي ايله اوچوشوردولار.

سئناتور وئنتيلياتورو سؤندوردو، بانک بيلئتلري هاوادا کؤمکسيز قاليب دؤشمگه، اوتاقداکي اشيالارين اوزرينه قونماغا باشلاديلار.

- گؤرورسن، - سئناتور گولومسوندو، - حتّي زيبيل ده اوچور.

لاورا فارينا بو آن اؤزونو مکتبلي کيمي حيس ائله‌دي.

اونون خام نئفتله گونش رنگينه چالان شومال دريسي واردي، ساچلاري جاوان ماديا‌نين‌ يالماني کيمي ايدي، ايري گؤزلريندنسه ايشيقدان دا پارلاق نور ساچيليردي.

سئناتور اونون باخيشلاري‌نين‌ شؤعله‌سيني ايزله‌دي، آخيردا شوراندان ضرر چکميش قيزيلگولو گؤردو: .

- قيزيلگولدو، - سئناتور ديللندي.

- بيليرم، - قيز آزجا اوتانجاقليقلا جاواب وئردي، - بئله‌سيني ريواچکدا گؤرموشم.

سئناتور چارپايييا اوتوردو، قيزيلگوللر حاقيندا دانيشماقدا داوام ائله‌ييب کؤينگي‌نين‌ دويمه‌لريني آچماغا باشلادي.

سينه‌سي‌نين‌ يان طرفيند، اورگي‌نين‌ يئرلشديگيني احتيمال ائله‌ديگي يئرده دنيز قولدورو دؤگمه‌سي - اوخلا دئشيلميش اورک واردي.

او، ياش کؤينگي دؤشمگه توللادي. لاکين فارينادان خواهيش ائله‌دي کي، چکمه‌لريني چيخارماقدا اونا کؤمک ائلسين.

قيز چارپايي‌نين‌ قاباغيندا ديزلري اوسته چؤکدو. چکمه‌‌نين‌ باغلاري ايله اللشنده سئناتور فيکيرلي-فيکيرلي اونا باخيردي، اؤزو-اؤزوندن سوروشوردو کي، بو گؤروش اونلارين ايکيسيندن هانسي اوچون بدبختليگه چئوريله‌جک.

- سن کي لاپ اوشاقسان، - سئناتور ديللندي.

- هئچ ده يوخ، - قيز اعتيراض ائله‌دي. - آپرئلده اون دوققوز ياشيم تامام اولاجاق.

سئناتور ماراقلاندي:

- آيين نئچه‌سينده؟:

- اون بيرينده، - قيز جاواب وئردي.

سئناتورون کئفي کؤکلدي.

- بيز ايکيميز ده بوزوو بورجو آلتيندا دوغولموشوق، - دئدي - گولومسه‌ييب علاوه ائتدي. - بو، تنهاليق نيشانه‌سيدي. - لاورا فارينا اونا فيکير وئرمه‌دي، چونکي چکمه‌لري هارا قوياجاغيني بيلميردي.

سئناتور دا اؤز نؤوبه‌سينده بيلميردي کي، لاورا فارينايلا نئيله‌سين، اونا گؤره کي، گؤزله‌نيلمز محبت گؤروشلرينه عادت ائلمه‌ميشدي، بوندان باشقا بوگونکو گؤروشون آلچاق طبيعتيني آيدينجا درک ائله‌ييردي.

آنجاق واخت قازانماق، هر شئيي اطرافلي گؤتور-قوي ائله‌مک اوچون لاورا فارينا‌نين‌ ديزلري آراسيندا سيخدي، بئليندن ياپيشيب اونو سفر چارپاييسينا آتدي.

اوندا باشا دوشدو کي، دوندان باشقا قيزين اَگنينده هئچ نه يوخدو، چونکي اورگي‌نين‌ قورخويلا ووردوغونا، سويوق ترله اؤرتولموش دريسي‌نين‌ بوزا دؤندوگونه باخماياراق قيزدان وحشي حئيوانا خاص اولان  ايگ گليردي.

- بيزي هئچ کس سئومير، - او آه چکدي.

لاورا فارينا نسه دئمک ايسته‌ييردي، آنجاق هاوا آنجاق نفس آلماغا چاتيردي.

سئناتور اؤزو اونو يا‌نيندا اوزانديريب ايشيغي سؤندوردو. ايندي اوتاق قيزيلگولون کؤلگه‌سينده‌يدي. لاورا فارينا اؤزونو طالعين ايختييارينا وئردي.

سئناتور اهمالجا قيزي اوخشاماغا باشلادي، اونون اللري دئمک اولار، قيزين بد‌نينه توخونماييب اونو آختارماغا باشلادي، آنجاق اونو تاپماغي گومان ائله‌ديگي يئرده نسه بير دميره توخوندو.

- بو ندي بوردا؟

- کيليد، - قيز جاواب وئردي.

- بو نه آخماقليقدي! - غضبلنميش سئناتور قيشقيردي - سونرا بيله-بيله سوروشدو. - بس آچار کيمده‌دي؟

- آتامدا، - قيز ديللندي، او منه تاپشيردي سيزه چاتديريم کي، آچارين دالينجا آدام گؤندره‌سينيز، همين آدامدا ايشلريني دوزلده‌جگينيز باره‌ده ايلتيزام کاغيذي اولماليدي.

سئناتورون بوتون بدني گريلدي:

- موردار فرانسيزجيغاز! - او، حيددتله دونقولداندي.

سونرا گؤزلريني يومدو، قارانليقدا اؤز-اؤزويله اوز-اوزه دوردو. "ياديندا ساخلا، - خيالينا گلدي، - سن ده، هر هانسي باشقاسي دا چوخ تئزليکله اؤله‌جکسينيز، بو دونيادا هئچ آدينيز دا قالماياجاق. او تيترمه‌سي ساکيتلشنه کيمي گؤزله‌ييب سوروشدو:

- دئ گؤروم، منيم حاقيمدا نه دانيشيرلار؟

- اصل حقيقتي.

- اصل حقيقتي؟

- ياخشي، - لاورا جسارتلنيب جاواب وئردي. - دئييرلر کي، سيز باشقالاريندان پيس‌سينيز، چونکي هامي کيمي دئگيلسينيز.

سئناتور دئگيلنه موناسيبتي هئچ نه ايله بيلديرمه‌دي. او اوزون مودت گؤزلريني آچمادان سوسدو، آچانداسا گؤرکمي اورگي‌نين‌ ان گيزلي درينليکلريندن يئنيجه قاييدانا اوخشاييردي.

- لعنته گلسين، - او ديللندي، - اجلاف آتانا دئ کي، ايشلريني يولونا قويارام.

- اگر ايسته‌ييرسينيزسه، آچارين دالينجا من اؤزوم گئدرم، - لاورا فارينا تکليف ائتدي.

 سئناتور اونو دايانديردي:

- آچاري اونوت، - دئدي، - بير آزجا منيمله يات. او ياخشيدير، تنها آنلاريندا کيمسه يا‌نيندادي.

قيز گؤزلريني قيزيلگوللردن آييرمادان اونون باشيني اؤز چيگنينه قويدو. سئناتور قيزين بئليني قوجاقلادي، اوزونو وحشي حئيوان ايگي وئرن قولتوغوندا گيزلتدي، دهشت حيسي‌نين‌ قلبينه حاکيم کسيلمگينه ايجازه وئردي.

آلتي آي اون بير گوندن سونرا لاورا فارينا‌نين‌ آدييلا باغلي ايجتيماعي هرج-مرجليک اوزوندن روسواي ائديلميش، هامي طرفيندن ردد اولونموش سئناتور همين دقيقه لرده قيزين يا‌نيندا اولماديغيندان غضبله هؤنکوره-هؤنکوره بو وضعيتده‌جه اؤله‌جکدي.

لاتين اليفباسينا کؤچورنده بير نئچه سؤزون بيچيمي دگيشلميشدير .