ینی ایلینیز اوغورلو اولسون


Oct 14, 2016

دانکو’نون آليشان اوره‌گى - (قيساديلميش واريانت)

ماکسيم گورکى - عرب اليفباسينا کؤچوروب و اويغونلاشديران: آران

ماکسیم گورکی
"هئچ‌بير شئى ياپمايان، هئچ بير شئى الده ائده بيلمز" آ
دونيا‌نين اوزاق بير اوجوندا، چوخ اسکي زامانلاردا بير خالق ياشاردى. بو خالقين ياشاديغي توپراقلارين بير ياني بؤيوک بير بوزقيرليق و بيرى يانى ايسه کئچيت وئرمز اورمانلارلا آرايا آلينميشدير. بو اينسانلار ساغلام، گوجلو، اوره‌کلى کيشيلر ايديلر. يالنيز، گونلردن بير گون هر شئى دگيشدى، چتين گونلر باشلادى. هارادان گلديکلرى بللى اولمايان يابانچى آداملار، يئرلى خالقى اورمانلارا سوروب يئرلريندن چيخارديلار.
قوجامان اورمان اولدوقجا ياشلي و اسکى ايدى. ايچي باتاقليقلارلا دولو و چوخ قارانليق ايدى.
گؤى اوزوندن اورمانا باخابيلسه‌يدين  اورمان، آغاج داللاري‌نين بيربيرلرينه دولاشيب هؤرولمه‌سى اوزوندن اونلارى سئچمک اولمازدى. گونش ايشينلارى آغاج داللارى و ياپراقلارى آراسيندان کئچنمزدى، کئچيب باتاقليقلارا اولاشديغيندا ايسه چوخ پيس قوخولار اولوشوردو. اورمانا گلمه‌لى اولان يئرلى خالق بو قوخويا دايانابيلمه‌ييب بيربيرى‌نين آردينجا اؤلوردولر. قادينلار، اوشاقلار قان آغلارديلار، آتالار و ارلر کدر اوزوندن دايم فيکير دالميش ايديلر.
خالقين قورتولماق اوچون ايکي يولو وار ايدى. بيرينجي يول آرخالاريندايدى، اورادا کؤتو و گوجلو دوشمانلار يئر سالميش ايدى. ايکينجي يول ايسه اؤنلرينده اولان دؤرد دؤوره‌سى باتلاق و کؤکلرى چامورا ساپلانميش دئو آغاجلاري اولان اورماندان کئچيب گئتمک ايدى. گئجه گوندوز قارانليغا، سوسقونلوغا بورونموش، يئل اسنده بوغوق اوغولتولارين سسينى قايتاران اورمان، گئنيش و ايشيق بوزقيرلارا آليشميش اولان يئرلى خالقى اؤزوندن ائديردى، بئزديرير و اوميدسيزليگه يووارلاديردى. گونلر بئله کئچيردى.
بوتون چتينليکلره باخماياراق، بونلار گوجلو اينسانلار ايديلر. زور ايله توپراقلارينا گيرن اولسايدى، تجاووز ائدنلرله اؤلوم قاليم (ديريم) ساواشينا گيره بيلرديلر. تکى، ساواشدا اؤلمک ايسته‌ميرديلر. دونيادان گئتميشلردن اونلارا بير سيرا تاپشيريقلار وئريلميشدير. اؤلورلرسه تاپشيريقلارى دا اؤزلريله بيرليکده يوخ اولوب گئده‌جک ايدى. دؤزومله گؤزله‌ييرديلر. سورکلي دوشونوردولر. دوشونمکدن يورولور، ايچلرينده‌کى اوميدسيزليک، قورخولارينى بؤيودور و روحلارينى ائله کئچيريردى. پيس قوخولارا داياناماييب اؤلنلرين آرديندان سسلنن قورخو دولو آغيتلار يوکسليردى. کيمسه گيديب آزادليقلاريئنى دوشمانا تسليم ائتمک، کؤله اولماق ايسته‌ميردى.
بو سيرادا دانکو آديندا بيرى چيخدى اورتايا و هامينى تک باشينا قورتاردى. اينسانلارا بئله دئدى:
"آرخاداشلار. دوشونوب دورماقلا يولداکي قايالار يئريندن اويناديلا بيلمز. هئچ نه ائتمه‌ين، هئچ نه ده ائلده ائده بيلمز، هئچ يئره چاتماز. نه‌يه بوتون گوجوموزو، دوشونمکله، اوزولمکله بوشو بوشونا هدر وئريريک. هايدى! قالخين آياغا. دوشک يولا! بو آشيلماز اورمانى ياريب گئچک. دونيادا هر نه‌يين بير سونو واردير. گئدک آرخاداشلار. هايدى!"
دانکويا باخديلار. دانکونون ايگى و اوره‌کلي بيريسي اولدوغونو گؤردولر. دانکونو اؤزلرينه قلاووز (يول گؤسترن) سئچديلر. دانکونون آرديندان يولانديلار، چونکو اونا اينانميشديلار.
قارانليقدا يول گئتمک چتين ايدى. باتلاقلاردا بوغولوردولار. هر يانى آغاجلار، آغاجلارين بوتاقلارى و داللارى ساريميشدى. آغاج کؤکلرى توپراغين اوزرينده اوزانيميشدى، آياقلارينا دولاشيب اونلارى سارسيديردى. آدديم باشى تر تؤکور، قان ايچينده يورقونلوقلا يول تاپداييرديلار. يئريش چوخ اوزون سورموشدو. اورمان سيخلاشير، اينسانلار آزاليردى. دئگينمگه و گيلئيلنمگه باشلاميشلار، تجروبه‌سيز بير گنجين آردينا دوشمه‌لريندن، هارايا گئتديکلرينى بيلمديکلريندن دولايى. دانکو ايسه گوجلو و توکنمز بير اينانجلا اؤنده ايره‌لى يورويوردو.
گؤک گورولتولارى‌نين قولاقلارى باتيرديغى، ايلديريملارين شاخديغى بير آندا يورقون اينسانلار اومودسوزجا يورويورلر، دانکويا قارشي عصبى‌لنميشديلر. دانکويو سوچلاماغا باشلاديلار. اونلارا ضرر وئرن بير کيمسه اولدوغونو، اونو اؤلدورجکلرينى دانکويا سؤيله‌ديلر.
"سيز اؤزونوز ايسته‌دينيز، من ده سيزى بورالارا گتيرديم. سيزلره يول گؤستره‌جگيمه سؤز وئرديم. سؤزومده ده دوردوم. سيزلر نئجه؟ اؤز قورتولوشونوز اوچون نه ائتدينيز؟ يالنيزجا يورودونوز. اوزون يوللار اوچون گوجونوزو ساخلايا بيلمه‌دينيز. يالنيزجا قويون سوروسو کيمى يورودونوز، يورودونوز."
دانکو، قورتارمايا چاليشديغى، اونو اؤلدورمک ايسته‌ين اينسانلارا باخدى، هاميسي‌نين اؤزلريندن چيخماسينى، بير جاناوارا دؤنمه‌سينى گؤردو. چئوره‌سيني ساران بو اينسانلارين اوزلرينده هئچ بير سويلو و نجيب گؤرونوشه راستلاشمادى. اينجيکليدن آجيشيردى و حيرصدن باغرى قارالميشدى. يالنيز اينسانلارا اولان سونسوز سئوگيسى اوزوندن اؤفکه‌سى بير آندا ياتيشدى. اينسانلارى سئويردى، اونلاري قورتارماق ايسته‌ييردى. دانکونو اؤلدورمک ايسته‌ين اينسانلار چئوره‌سيني سارمايا باشلاديلار. دانکونون اؤرگى آلوولاندى، ايچيني بير حوزن بورودو.
اورماندا گؤک گورولتوسو قولاق باتيريردى، شيمشکلر چاخير، سؤکولموش سو تولوغوندان آخان کيمى، ياغمور ياغيردى. اينسانلارا باغيردي و بيردن کؤکسونو اللري ايله ييرتاراق اوره‌گينى قوپاريب چيخاردى، باشي‌نين اوستونه قالديردى. گونشدن داها پارلاق بير اوره‌ک الينده توتموشدو، گؤز قاماشديران بير ايشيق اورمانا ساچيلدى. اينسانلار چاشقينليقدان دونوب داش کيمى دوردوقلارى يئرده قالميشديلار. دانکو ايره‌لى‌يه کئچدى، اينسانلارا يورومه‌لرينى سؤيله‌دي. يولا دوشدولر...
چوخ يول گئديب آز دايانديلار، يورودولر، يورودولر...
و بيردن، اورمان سونا يئتدى. گونش اينسانلارين اوزلرينه ايشيق ساچيب پارلادي، تميز هاوا دولدو جيگرلرينه. بؤيوک بير بوزقيرا گليب چاتميشديلار. آخشام اوستو گون باتان چاغى‌نين شؤوقى آخان چايين اوزونه دوشوب اونو دانکونون يارالى اورگى و سؤکوک کؤکسونده آخان سيجاق قان کيمى قيرميزى بوياميشدى.
ايگيت دانکو، قارشيسينداکى گئنيش بوزقيرا غورورلا باخدى، آزاد توپراغا باخدى و گولومسه‌دى. سونرا يئره دوشوب جان وئردى.
اينسانلار سئوينچ و اومودلا دولويدولار. دانکونون اؤلومونو بئله فرق ائتمه‌ديلر. اونون يا‌نيندا، يئرده‌کى اورگينى ده گؤرمه‌ديلر. يالنيزجا، ايچلريندن بيريسى بونو گؤردو، نه‌دنسه قورخاراق، آياغييلا باستى بو اونورلو اورگين اوستونه. اوره‌ک آليشيب قيغيلجيملار ساچاراق يانيب سؤندو.
عرب اليفباسينا کؤچوروب و اويغونلاشديران: آران

No comments:

Post a Comment