Jul 29, 2016

اصیل "کودتا" تازا باشلاماقدادیر!

درویش اوغلو
اعدام حؤکمونو قانونلاشدیرماق اوچون ایکی آیاغینی بیر باشماغا سوخان بیگ، هانسی انگیزه دن حرکت ائتمکده دیر؟ اعدام حؤکمونو قانونلاشدیرسا، کیملری اعدام ائتدیرجک؟ اعدام حؤکمونو قانونلاشدیرابیلمه مه سی اؤزونون اعدام حؤکمونون صادر اولماسی آنلامیندا دگیل می؟  کئچن ایکی گونده یالنیز دؤلت آپاراتیندان، قضائی اورگاندان و اوردودان توتولان آلتی مین نفرین آخماقدان، پاخمادان فیلاندان اولدوغونو مو ظن ائدیر بو آدام؟ بو آداملارین بو توپلومدا سؤزو کئچدیگی هئچ بیر طرفداری اولمادیغینی می ظن ائدیر بو آدام؟ بو آداملار اعدام اولونمازسالار، اؤز حقلرینده اعدام حؤکمو چیخارتماق اوچون ایکی آیاغینی بیر باشماغا سوخان آدامی یاشادیرلار می؟ یوخسا دوغرودان دا ایندیه قدر بو دؤلت، بو "عدلیه باکانلیغی" بو اوردو، بو اداری دستگاه، یالنیز آخماقلار، پخمه لر و کیمسه سیزلر طرفیندن اداره اولونورموش. بو "خائین" لری دوستاقلاردا ییغان، ایشدن چیخاردان و اعدام اولونمالاری اوچون اعدام حؤکمونو قانونلاشدیرماق یولوندا ایکی آیاغینی بیر باشماغا سوخان بیگ، بونلارین دولت دستگاهینداکی رولونو هانسی "قهرمان" لارا وئرجک؟
بوندان سونرا بو دؤلت کیملر طرفیندن اداره ائدیلجک؟ اون آلتی مین اونیورسیته و مدرسه معلمینی بیر گون ایچینده ایشدن چیخاردان، بونلاردان بیر چوخونو دوستاقلاردا ییغان بیگ، مطلق کی بونلارین یئرینه اوخویوب یازماق باشارمایانلاری قویمالی دیر. بو اؤلکه نین اؤیگرنیم دوزئینی تکرار بوگونکو سئویه یه گتیره بلمک اوچون اون – اون بئش ایل زامان و آغیر ایش گرکلی دگیل می؟ بو قدر انسانی ایکی گون ایچینده دوستاقا سالماق اوچون نه قدر اضافه دوستاق کاپاسیته سی حاضیرلانمیش اؤنجه دن؟ یوخسا بونلاری یاشییش بینالاریندا، بلکه توریستلردن بوش قالان هوتللرده زندانی ائدیرلر؟ دؤلت آپاراتینا، قضائی اورگانا و اوردویا منسوب اولمایان، دئملی قارایاخا، قارا میللت دن نه مین نفر توتولدو؟
آنتی دمکراتیک یولو سئچمیش اولان بیر انسانین قدرت نردووانیندا چیخدیغی هر پیلله ده اؤزونو بیر آشاغیداکینا گؤره داها خطرده و داها قدرت تشنه سی حس ائتدگی کیمی، رقیبلریندن قورخوسونون دا داهادا ارتیغیندان، اونلارا قارشی دهادا قددارلاشماقدان باشقا چاره سی یوخدور. سئچگی ایله، یوخسا میللتین ایستگی ایله ایش باشینا گلمیش اولان، آنجاق قدرته چاتدیقدان سونرا آددیم ـ آددیم دمکراتیک پرینسپلری، دموکراتیک قانونلاری سیلمه گه، حذف ائتمگه باشلایان دیکتاتورلار تاریخده آز گؤرولمه میشدیر. پارلماندا دمکراتیک قانونلاری حذف ائتدیرَبیلجک قدر قدرت تاپان دیکتاتور، البته کی اوندان سونرا دا پارلمانین اؤزونو، دئملی میللت وکیللرینی "تمیزلملی" اولور. آنجاق بو تمیزلمه ایشی ایله قدرت نردووانینین بیر یوخاریداکی پیلله سینه چاتماغی ایله بیرلیکده، قورخوسو و مخاطره ده اولدوغو، بیر داهاکی سئچگی دن سونرا "تمیزلدیکلری" طرفیندن "تمیزلنمک" قورخوسو، بیر قات داها آرتار. بوندان سونراکی چاره ایسه، یالنیز پارلمانی یوخ، بوتون دولت آپاراتینی "تمیزلمک" اجباری اورتایا چیخار. بو ایکینجی "تمیزلمک" آکسیونو ایسه آرتیق بیر داهاکی سئچپیلری گؤزلمدن "تمیزلنمگ" قورخوسونو آرتدیردیغی اوچون، "تمیزلمک" آکسیونو اوردویا و قضایی دستگاها دا یاییلمالی دیر. خارجی اؤلکه لر ایله ارتباطدا دا "تمیزلیک" ایشلری قاباغا آپاریلماق زامانی گلمیشدیر. بو قدر "تمیزلیک" ایشی ایله مشغول اولماق اجباری حس ائدن انسانا عوام دیلینده واسی واسی دئیرلر. روح بیلیمی دیلینده ایسه "پارانویا" خسته سی دئییلر. بو روحی خسته لیک تئزـ گئج دیکتاتورلارین هامیسینین یاخاسینی توتار. دیکتاتورلار اؤز کؤلگه لریندن ده قورخارلار.
یا اردوغان بیگ، یاخود دا بوتون تورکیه سون گونلرینی یاشاماقدادیر.


No comments: