ینی ایلینیز اوغورلو اولسون


Apr 27, 2016

گل دومان

بهروز صدیق
داغ گونشه یاخیندیر و سن داغین بؤیوکلویونه باش ایمه‌یینله، یارادانین گؤز‌ه‌ل نعمت‌لریندن‌ اولان گونشین و داغین یولداشینا دؤنورسن؛ دؤنوکلوک بیلمه‌ین یولداشینا. ۷۸ینجی ایلین یاییندا قاراداغ ماحالی‌نین اوجقار داغلاریندا یئرلشن مؤحتشم «گل دومان» قالاسینا طرف یولا دوشدوک. کؤنلوموزده داغلار بویدا ییخیلماز داغ. «کیچیک کنده»‌نین آشاغیسیندا قوجامان گیرده‌کان آغاجی آلتدا قارا قفه‌دان‌لاری مئشه‌نین قوروموش آغاجلاریندان قوردوغوموز تونقالیندا دمه قویدوق. بیر آز دینجه‌لیب و سونرا جیغیرا یوللارین اوره‌یینی اوخشادیق و بیر داها “گؤز قورخاق اولورسا، آیاق مرد اولور” سؤزونه ایناندیق. پولاد قیچ‌لاریمیزلا آشیریم‌لاری آشاراق یانیق سینه‌میزی داغلارین مهربان کوله‌یینه تاپشیردیق. آلیشدیق؛ داشدیق؛ سئوگی ماحالینا طرف دورمادان قاشدیق. آرا بیر آیاغی خینالی کهلیک قاققیلتیسی یورغون جانیمیزا دؤزوم باغیشلاییردی و بیز اویان بویانین «کهلیک اوتو»، «یارپیز»، «چوبان یاستیغی» و طبیعتین آیری- آیری نعمت‌لری بوروین جیغیرلاری اوجالیق‌لارا دوغرو دورمادان، یورولمادان ایره‌لی‌له‌ییردیک. بو ایل قوراق گئچدیینه خاطیر بوللور بولاقلارین گؤزو یاشلی دئییلدی و چیچک‌لرین اوره‌یی ایسه چات – چات. سویوموز سونا چاتمیشدی، اومود الیمیز هر یئردن کسیلمشدی. اؤنوموزده‌کی اوجالیقلارین سونسوزلوغوندا گونشین آستا- آستا ییخیلدیغینی کؤورک – کؤورک تاماشایا اوتورموشدوق. بیردن دره‌نین دیبیندن سوروسونو اوتلاغا چیخارتمیش چوبان قارداشیمیزی گؤردوک.
بیر قده‌ر چایدان اوزاق اود قالامیش داغدا چوبان
اویادیر اؤز سوروسون اوتلایا یایلاقدا چوبان(۱)
اوچماغا قاناد تاپدیق. سوغاتی قوجاق دولو تایی، برابری گؤرونمه‌ین دادلی، دوزلو محبت اولان “کریم” آدلی بو چوبان بیزی آرخایین اولماغا دعوت ائدیردی. قایالار قده‌ر اوجا، دره‌لر قده‌ر درین. «کریم»ه قوشولوب و سورونو حئیرتله ایزله‌یرک «گوری» آدلی یایلاغا یوللاندیق. «محرم » آدلی گؤزه‌ل بیر اینسان
گلمیشم گزمگه سیزین داغلاری
باخیم یایلاقلارا دویونجا باری
بو یئره شاعیرین دوشدو گذاری
گؤزه‌ل قارشیلادی خوش اقبال منی…(۲)
داغین قوینوندا چوخ اوستالیق‌لا تیکیلمیش ائوه واریب و پال – پالتاریمیزی چیخاردیقدان سونرا، «یولدان گلیبسیز، یورغونسوز» – دئیه، ایستی و عطیرلی چای گتیریب یورغونلوغوموزو قویلامیش اولدولار. آرتیق گئجه چؤکموشدو و هامیمیز او قوناق سئوه‌ر اینسانین چتین و دؤزومسوز وضعیتده نئجه یاشادیغی باره‌ده موختلیف سورغولارلا مراجعت ائدیب و جاوابینی ائشیدیکده حزین – حزین دوشونمه‌یه باشلاییردیق.
دوشونمک! یارانمیشا یاراشیق و ایلاهی گؤزه‌ل بیر گوج! گئجه‌نی آج جاناوارلارین سورویه یوروش ائده‌جک‌می گؤره‌سن؟، فیکرییله سحره چاتدیریریق.
سحر چاغی‌دیر؛ دومان داغا قوناق‌دیر. گونش سانکی ساهمانلا چلنگلشمیش ساری بیر چیچک‌دیر گؤیون اوزونده. بوزلو بولاق سویویلا ال – اوزوموزو یویوب و بیر تیکه دوستلوق آرتیران پئندیر چؤره‌ک یئدیکدن سونرا:
الوداع، چیچکلی،چمنلی دیار
الوداع، قایالی، قارتاللی داغلار
روحومو، قلبیمی قویوب گئدیرم
اودلو گنجلییمدن سیزه یادگار(۳)
شعرینی اوره‌ییمده اوخوماغا باشلاییرام. آیریلیق و یئنه ده یول باشلاییر.
فیکیر ایشله دیکجه
گؤز ایشله دیکجه
نه قده ر گئدیرسن قورتارمیر اونلار
یوللار
یوللار
یوللار (۴)
اوچ ساعات یول گلدیکده «کیچیک کنده»‌نین آشاغیسیندا «قاسیم» آدلی بیر کیشی‌نین باغچاسیندا گیلانار آغاجلاری‌نین دوستلوغوندا بیر نئچه آنلیق اولورسادا بو باشی بلالی دونیامیزین غمین، کدرین اونوتموش اولوروق و سونرا :
سوکوتا غرق اولموش اوره‌ییمله من
کئچیرم یئنه ده موغان چؤلوندن(
۵)
ishiq.net

No comments:

Post a Comment