Feb 14, 2016

ماوی گؤزلو سئرچه‌لرین گؤزونه…


سحر بارانی

قانچیل یارادیر یالان‌لارینین یئری
اورک دامارلاریمدا
لاختا باغلاییر باخیش‌لارین
کئچمه‌ییب کئچه‌سی دئییل
سؤکوب آتماق وار بیر ده سنی
بوتون گونلرین گؤوده‌سیندن
دالدالانماق وار بیر ده
قارا گؤزلوک‌لرین کؤلگه‌سینده

قیرمیزی ساچ‌لاریمین باشینا
قارا لئچک‌دیر آدین
گله‌جک‌دیر!
گله‌جک می گون‌لرین بیرینده دئمیشدی
فالچی قادین؟
خاطیرلاماق اولمور گؤزلرینین رنگینی
دنیزه دالمایینجا
بیر ده اورمان‌لار وار
همن دنیزلرین سینیریندا
کئچه‌جک می بو یارا ایزلری پیچاق‌لاردان…؟
سیلینه‌جک می یوللارین سونو
خریطه‌لرین آلنیندان
گئری دؤنوشو اولسون دئییرم
هئچ اولماسا
بیر چیمدیک گؤزلریمه چکیم
سورمه کیمی
دؤنگه‌لی یوللاری
دؤنمه ساقین!

http://ishiq.net

No comments: