ینی ایلینیز اوغورلو اولسون


Dec 30, 2015

چیلله آخشامی

عمران صلاحی ۱۳۸۵- ۱۳۲۵

چیلله آخشامی
کورسو آلتیندا
اوتوروب هامی
یئیب‌لر شامی
اوشاقلار اوینور
یورغان اوستونده.
یورغان اوزولوب
کورسو اوستونده
چایلار دوزولوب
شیرین پارتاخال
چایلار دال با دال.
شوشه دالیندا
گؤر نه قار یاغیر.
حیه‌طیمیزده
پامبیق اکیبلر.
گؤز قاباغینا
پرده چکیبلر
هاوا، یاوادیر
یئنه یئل اسیر
قولاغی کسیر
شاختادیر – شاختا
پالتار، ایپ اوسته
گئجه اوزوندور
هاوا قارانلیق.
شوشه دالیندا
قارقا ییغیشیب.
سویوق چیلله ‌ده
دوروب پیلله‌ده
قاپینی چالیر
جانیمی آلیر
کئچن گونلری
یادیما سالیر.
آتام دایانیب
قاپی دالیندا
شوشه‌دن باخیر.
یئنه آتامین
الی دولو دور
قاپینی آچین!
قاپینی آچین!
قاپی آچیلیر
هانی پس آتام!
کوره‌ک ییخیلیب
دووار دیبینه
کؤلک کئف‌لنیب
حیه‌طی گزیر
شاختا، پیچاغین
قویمور جیبینه.
شوشه دالیندا
قیشین نفسی
کورسو آلتیندا
آغلاماق سسی
مراغه ۳۰/۹/۱۳۵۱


http://ishiq.net/?attachment_id=14192

No comments:

Post a Comment