Oct 5, 2015

كوچوك حيكايه

قهرمان قنبرى

بوگون صف باشيندا مديريميز،آقاى مسعودى هر زامانين خلافينا گوره بيراز خوش اخلاق و موتلو گوزه گليردى.نرمال حالدا آقاى مسعودى چوخ بداخلاق و اونان آرتيق بير عصبى كاراكتره ماليك دير.اَلبته الينده كى آغاجى(شوككه)بالديرلارينا چيرپا چيرپا بير خوش لحنينن دئدى:

-«عزيز اوشاقلار اوجور كى بيليرسيز قيش گلير،باخساز قيريخ شيشه لر واريميزدى كى كلاس لارى داها سويوخ ائلير،نفتيميز يوخدور،بعضى بخارى لرين تعميره احتياجى وار!بو نقصانلارين قاباغيندا و بو سويوخ قيشين قاباغيندا كى سيز عزيزلريميزين تحصيلينه مانع اولور،پولوموزدا يوخدور.بلكه سيز بونلارى بيلمه غه گره ك يوخ اما عزيز دولتيميز وزارتخانايا دئيب-وزارتخانا اداره كل لا دئيب و اداره كل بيزيم اداره يه دئيب و بيزيم ايداره ده بيزه دئيب كى عزيز اويرنجى لر و فداكار ميلتيميزين مالى يارديم لارينان كى هر زامان بيزيم و دولتيميز آرخاسيندا دوروبلار بو قيشى كئچيردَك.
اويوزدان غلامعلى كى هر زامان حاضير جواب ليغينا گوره آقاى مسعودي نين اليندن كتك يئردى و مدرسه ده هامى دئردى كى غلامعلى دا كتك قاباغيندا سيريمسيب،محكم بير سس دن دئدى:
-«آقا،بير يالان يوخارى دان آشاغيا گلن ده او قدر تكرار اولور كى آشاغى يا يئتيرن ده هامى او يالانى دوز حساب ائلير،اما سيز اينان مايين يالان ائله يالاندير.آرتيق بيزيم اوزوموزه كومك ائليه ن ايستير.»
-«گده غلامعلى بير گون بيز ايسته ديخ مهربان اولاخ،اونو دا دييه سن پوزاجاخ سان.» آقاى مسعودى عصبى بير سَسدن دئدى.
-«يوخ آقا نفت قويولارى نين پولارى گورمويه ن يئرده،قارا بيل ين پولو نه گوره جخ؟»
اوشاخلار هامى ياواش ياواش گولمه غه باشلادى و هر كسين آغزيندان بير سس گليردى،بيرى دئيردى:بيزيم اُزوموزون نفتيميز يوخدو و نفتى گالن -گالن آليريخ،آيرى سس گليردى:«مملكتين نفتين يئرلر-دونيايا نفت وئريلر اما بيزه گلنده دئيلر نفت يوخدور»بير طرفدن سس گليردى كى هر مُلا ١٥٠ كيلو اولوب،نفت گورمور،اوجاح گتيريبلر ميلتين قانين سورماغا»
آقاى مسعودى يه پيچاق وورسايدين قانى چيخمازدى،قيپ قيرميزى قيزارميشدى.الينده كى آغاجى نه گوجو وار بالدير لارينا وروردو و بير عصبى سس دن باغيردى:
«عزيز اوشاقلار،سياست دوكانى آچمايين لوطفاً،اوجور كى دئديم،دولتيميزدن بيزه دستور گليب كى هر اويرنجى اوخولا مالى يارديم ائله سين.بيز البته سعى ائليريخ كى بونو يومشاق طريقينن دييَك،اما اصلينده دولتين يومشاق پيشنهادلارى دا،بيزيم الليميزه يئتيرن ده اونو دستور حالينا ساليرخ البته.ايندى ده والدينيزين گليرينه گوره بير مبلغ لر مشخص ائله ميشيخ كى كيلاس دا معليم لريميز خيدمتينيزه وئره جك.سيزده اونو حتماً گتيرمه ليسيز،پس سعى ائله مه يين آلتيندان قاچيب يا فيرلداق وئره سيز.ايندى ده آيهِ ياس اوخويوب بورانى سياست ميدانينا چئويرمه يين!قديم نن دئيب لر كى دولت "دوشانى" اَل داشقاسى لا توتار.سيزده بو يارديمى گتيرمه سز نه انضباط نمره سيندن خبر وار و نه كارنامه دن.ايندى گئدين كلاسا تا معليم لر فيش لريزى وئرسين،غلامعلى اوغول گل سنينده فيشينى من وئره جه ييم.»
«يوخ آقاى مسعودى،منيم كين ده آقا معليم وئرر»
-«گده دوزلانما،يوخسا گلسم اورادا سنين كى آغام ابولفظل قالدى،تولكو»
غلامعلى چيخدى صفدَن ائشيه و آغاى مسعود شاپ وورا-وورا ايچرى آپاردى بيله سين.كيلاسا گئديغيميزده آقاى مسعودى نين شاپ لارى و غلامعلى نين باغريلتيسى گليردى.
معلوم دور كى اوشاقلار پول يارديمينان راضى دئيلر،آخى بيزيم اوخول يوخسول بير منطقه ده و اورا گلَن اويرنجى لر ده چوخونلوغو يوخسول عائله دنديلر.نه دن كى اونلار والدينى چوخونوغو كتده قورولوخ اولدوغو ايچون شهره گليبلر،شهرده ده بير مهارتلرى اولماديخلارى ايچون ساختمان ايشچيليغى يا دا خيابان دا ميوه -سيگار ساتيرلار.بو ايشلر ده دايمى دئيل و هئچ زامان گارانتى سى يوخدو،ايكى گون اولاندا-اوچ گون اولمور.اونسوز دا ايندى قيش گلديغينه گوره داها بو دوروم آغير و چتيندير.بو زامانلار  اكثراً بيراز پيس كوح ده يايدا ييغيلان پس انداز و بيراز ده بقال دان بهار اومودونا نسيه له قيشى كئچينيلر، آخى بهار بيزلره نه بايرام بلكه چوخ  ايشلمه غه گوره قوتلانير.
كلاس دا آقاى حسينى يارديم فيشلرين داغيداندا،هامى كيلاسى سياست ميدانى نا چئويردى.مثلاً غلامرضا دئدى كى:
-«بو قدر نفتين پولون نئنيرلر كى ايندى نفت آلماغا بيزيم ييرمى مينه احتياج لارى وار؟»
آقاى حسينى فيشلرى داغيدا-داغيدا دئدى:
-«اوشاخلار بيليرم كى عائله لرينيزين مادى دورمو ياخچى دئيل،اما مدرسه نين ده خطا سى يوخدور.بو ايشلر دستور اولاراق  يوخارى دان يعنى دولت دن گلير كى مدرسه لر گره ك هزينه لرينين بعضى قيسمت لرين اوزلرى تقبل ائله سينلر.بونودا بيليرم كى بونون مينلر برابرين اوزلرى هدره وئريلر،بقول معروف قابلمانان سويو داغديب-قاشيق دان ييغيرلار.اما بيزيم اليميزدن نه ايش گلير،دولت دن دولتليخ ائليه مه نيخ كى !قاباغيندا دورا بيلميريخ،پس اليميزدن نه ايش گلير؟دستورلاريندان ايطاعت ائله مك.اما بونودا  منن دويماميش اولون كى هر زامان بير سيچان يولو وار،مثلاً مالى دورومويوز چوخ خاراب اولسا،بوگون صاباحا سالين،سورا ياددان چيخار گئدر اما ياخچى ترين يولو بودور كى بير شى گتيره سيز،مثلا يازديغيميز مبلغين ياريسين گتيرين تا كى هم سيزين جانييز قورتولا،هم ده بيزيم.
آخشام مدرسه دن قورتولاندا فيكيرله شيرديم كى بو مسله نى اول آنام نان اورتايا قويام،آخى نجور اولسا آنام منن آتامين آراسيندا بير كورپو كيميدى.بيلميرم نييه بوجوردو هر زامان نه سوزوم اولاندا يا احتياجيم اولاندا،اوزاوزومه اول آناما دئيرم و سونرا آنام آتاما اينتقال وئرير.هله ايندى ده باشا توشمورم كى بو ايش قورخودان-اوتانماقدان و يا صميميت سيزليخ دن نشات تاپان بير مسله دير كى من سوزلريم و ايستك لريمى مستقيم آتاما دئميرم يا آيرى بير مسله دن دير!
ائويميزه يئتيرنده ده ائله بو فيكيرلرده ديم،باشماق لارى چيخارديب و ايچرى گيرديم .آنام والور اوستونده يئرالما يومورتا پيشيريرردى،آدينين ساده ليغينه باخمياراق آنامين آشچيليخ مهارتيله بو يئمك منيم سئوديغيم يئمكلردن دير.آناما سلام وئريب والورا ياخينلاشديم،آخى هوا سويوخ لاشيب و بيزده هله بخارى قويماميشيق.اوزومو آناما توتدوم و اونا سارى دئديم:
-«آنا بخارى نى نه زامان قوراجاخسيز بس؟هاولار كى سويوخ لاشيب،شاختادان دونوروخ.»
آنام سوغانلارى تاوا دا والور اوستونده قيزرادا-قيزرادا بير گولومسويه رك جواب وئردى:
«قيرميزى قار گلميب هله!اوزونده بيليرسن گره ك نفت يانديرماق دا صرفه جويى ائليه ك،نده ن كى نفت بها دير و قيش دا دا آتان چوخ زامان بئكار اولور.بيرده گورورسن كى پنجره لره نايلون توتموشام تا ده ليك-دئشيك لردن ايستى ائشيكه و سويوخ ايچرى گلمه سين.اونسوز دا گئجه ياتاناجاخ والور يانير و لازيم اولان قدر هوانى ايستى ائلير.
گوله گوله دئديم:
«والور دا بامادور كيمى بير شى دير»
-«نجور كى؟» آنام سوروشدو
-«آخى يوخسولار قيرميزى بامادورو همه ميوه عوضينه قولانيلار  و هم اونان يئمك پيشيريللر،والورودا بيز همى يئمك پيشيرمه غه ايستفاده ائليريك همده ايستى سيندن ايستفاده ائليريك»
آنام بير ايچيندن قاه قاه چكيب و گوله گوله دئدى:
-«مدرسه ده بونلارى اورگه ديرلر سيزه؟»
-«يوخ آنا آيرى شى لر ده اورگه ديرلر،مثلاً اورگه ديرلر كى دولت "دوشانى" اَل داشقاسى لا توتار.يا مثلاً بوگون بونو اويره نديخ كى دولتين تلويزيون و  راديودا يومشاق دانيشماسينا باخمايين،دستور يوخارى دان آشاغى يا گلينجه نئچه اَل دَئيشير و آشاغى داكى عملى ايجرا ائله ديغى زامان اونو زوراكيليخ دان  (خشونت دن )ايجرا ائله مه دستورى آلير اصلينده.
-«عجب بير شى لر اورگه ديرلر!ظن ائليرم بوگون مدرسه ده بير ايتيفاق توشوب كى گنه سن باشلايبسان اونلارين سوزلرين تعريف و تفسير ائليرسن.ميص ميص دئينجك اوغلان بير سئرى دئگينن مصطفى! سوزون ممدعلى سين دئگينن گوره خ نه اولوب بوگون اوخولدا؟»
آنامى يواش يواش سوزمو دئمك ايچون حاضيرلاميشديم،نه اولسا بيردن بيره سوز دئمك اولماز.اوزوده يوخسولوق زامانيندا پول ايستمك داها گره ك مهارتلى اولا.بيراز دا اَتشلى اولسون دييه اوزومو آناما سارى توتدوم و دئديم:
-« بيليرسن بو هاسادليخدا دئمه م كى . اول گره ك بير ماچ ائليه سن منى اونان دا سونرا دا عاجيخ ميشام.بير دورمك ياغ سوغان نان وئره سن تا كى بير پيس خبر وئره م»
-« اوغلان سن نه بهاچيل سان، پيس خبرلرين بوجور باهالى اولور،خوش خبرلرين نه جور اولار؟اونان سورا بو قدر ده نامردليخ اولماز،سن فقط نيه اوزونو دوشونورسن و شرايط لرينده منى اوپمه شرطى قوي مورسان.»
-« منده سنى اوپورم آنا.»
آنام والورون كناريندان قالخدى و منى قوجاخ ليب اوچ دورد سئرى اؤپوشدوك و گوزلرى دولا دولا دئدى:
-«قادان آلارديم سنين.»
بيلميرم آنالارين اولادلار ايچون سئوگى سى نجوردو،آقاى فرزانه ادبيات معليم ميز  دئير كى آنانين سوگى سى اولادلارا عينى پرومته نين سئوگى سيدير اينسانلارا.اونا گوره كى پرومته اينسانلارى او قدر سئويردى كى اونلارا اود،صنعت و هنر هديه ائله دى بو حالدا كى گلجك دن خبر وئرن تانري لاردان اولاراق بيليردى كى زئوس تانرى لارين تانرى سى اونا بو ايشينهد گوره قفقازلاردا بير قايايا زنجيرليب و ايللر بويو هر گون قارا جيارى بير قارتال توسوطوله ييليب و بو ايشكنجه هر گون تكرار اولاجاخ. اما پرومته بونو بيلرك بو ايشى گوردو و حتى اينسانلاردان بير تشكور يا مينت اينتظارى اولمادى.او دئير كى آنالار حتى چوخ زامان اوتانالار اولادلارا اوز سئوگى لرين ابراز ائليه لر و بو سئوگى نى اوز حياتلارينين بهاسينا اوز عملرينن ابراز ائليرلر.اونا گوره پرومته افسانه سين تاپيب اوچ -دورد سرى اوخودوم و اونان سورا جهد گوستريم كى آنام اوز سئوگى سين آچيقلاسين.آتام هر زامان دئير كى حاليم قاريشير سيزين بو سوسول بازليغ دان.
بو فيكير لرده ديم كى آنام ياغ سوغان دان بير به له(دورمك) توتوب و ديدى:
-« هارا گئديبسن گنه بالام،آل بو ياغ سوغان به له سين (دورمك)يئگينن و دئ گوروم نه خبر اولوب اوخولدا؟»
-« ساغول آنا،مدرسه ده بوگون دئديلر كى قيش گلير و بخارى لارا نفتيميز يوخدو،اونا گوره هر كسين اوخولا مالى يارديم ائله مه سين ايسته ديلر،البته هر كسه بير فيش وئرديلر و اوردا مبلغ لر بللى اولدو كى هر كس نئچه گتيرمه لى دير. بيزه ده ٥٠ مين تومان يازيبلار.»
-«غلامحسين  بالا بونون آدى يارديم اولمادى كى ،اوزلرى كسيب اوزلرى بيچيب لر.»
-« به من نه دئرم كى دولت سوزده و مديا دا يومشاق دانيشسا دا عمل مرحله سينده گوج و زوراكيليخدان  ايجرا ائلير.البته آقاى حسينى دئدى كى بونون ياريسين دا گتيره بيلرسيز و يا بوگون صاباحا ساليب و زامان كئچديخدن ياددان چيخار گئدر. اما توصيه إئليردى كى ياريسين گتيرين قوى گورتولسون گئدسين و نه سيز و نه بيز هر گون اعصاب لاريميز قاريشماسين»
-« هميشه بير سيچان يولى قويولار قاشماغا غلامحسين»
-«اوجوردو آنا،اما گره ك هر گون اوندا آقاى مسعودى نن باش باشا ووراق.ذاتاً ده بيراز عصبى آدامدى،گير وئرسه توى دا سيچانين باشينا گتيرن اويونلارى آدامين باشينا گتيرير.»
-«يوخ اوغول،دوزدو آتانين مالى دورومو ياخچى دئيل.حتى اوزوموزون نفتيميز يوخدو،اما الله يارديمينان قويامانيخ سن باش آشاغى اولاسان يولداش لارينين يانيندا.اما بونلار بو قدر نفت لرى وار اوغول،اوزلرى نجور مدرسه لرده نفت يانديرماق ايچون محتاج ديلار؟»
ياغ-سوغان به له سين قورتاريب و اليمه سوزولَن ياغلارى دستمال دان سيليب و دئديم:
-« آنا بيليرسن بو مسله ده من نه يه اينانيرام ؟»
آنام سودا پيشميش يئرالما و يومورتانى ياغ سوغانا قاتاراق گولوُب و دئدى:
-«گنه منيم بالام فيكيرله شيب و بير شى لر كشف ائليب،دئ گوروم بالام نه يه يئتيريب سن؟»
«مسخره ائله سن دئميرم »
-« يوخ بالام دئگينن نه مسخره سى»
« بيليرسن آنا بونلار پول ايستيرلر،اصلينده منجه پول او قدر اونملى دئيل،اونملى اولان اوشاق لارا و اويرنجى لره باش ايمه غى و دولتين گوجونون قاباغيندا دايانا بيلمه مه نى ايثبات ائله مك دير.مثلاً پول ايستيرلر ها؟»
-« هه اوغول دا پول ايستيرلر.»
« ايندى من سندن سوروشورام آنا جان،اويرنجى لر و عائله لرى نه ايش گوره جك لر بو پول ايسته ديكلرينين قاباغيندا؟»
آنام بير دوروخاراق،قاشيقدان يئرآلما يومورتانى قاريشدريب و دئدى:
-« اوغول بونلارى نئچه بولومه بولمَك  اولار،مثلاً بير عده پولو وار يارديمين هاميسين وئره جك.بير عده كى پولو يوخدور گئديب يالوراجاقلار كى اونلاردان يارديم ايسته مه سينلر. بير عيده آتاجاخ لار قولاق لارينين دالينا و دئديغين كيمى مدير گونده اويرنجى نين باشينا ووراجاخ كى پس نيه يارديمى گتيرميرسيز.بير عده آقاى حسينى دئميشكن پولون ياريسين آپاراجاخلار و اورادا بير يواش دان عذر ايسته جكلر كى پولارى يوخودو هاميسين گتيرسينلر.منجه چوخونوخ بوجور قارشيلياجاخلار دورومو،اوجور دئيل؟»
«أحسن آنا اوجوردو. اما منجه بوردا اونلار كى پولون هاميسين اولده وئريلر،دولته و توتدوغو تصميمه و اونون گوجونه همن اولده تسليم اولورلار.اونلار كى گئديب يالواريلار كى پولارى يوخدو يارديم وئرمه غه ،بو گوجه تسليم اولورلار و همده اوزلرين سينديريلار،دولت بونان اونلارا گورسه دير كى بيزيم قاباغيميزدا مقاومت اولونماز و گره ك اوز گوجسوزلوغونوزو يالوارماق دان ابراز ائليه سيز.اونلار كى اوتانا اوتانا پولون ياريسين وئريلر،اوزون زامان ايچينده اونلاردا هر شى قبول ائليب و باش آشاغى اينسانا چئوريليب ظلم و حكم لرين قاباغيندا اوز ايچلرين ييه جكلر.اما اونلار كى بوگون صاباحا ساليب و ياددان چيخاردماغا چاليشاجاخلار،اصيل هدف اونلاردى!اونلارى هر گون صف باشيندا سسله نيب و او بيرى اويرنجى لرين قاباغيندا آشاغيلياجاخ لار تا هم عبرت آيينه سى اولسون و گورسه ديلسين كى حكم لارا باش ايميه ن نه سرنوشته دوچار اولارلار و همده او عاصى قشرى گله جك ايچون سينديب و باش ايمه ايچون حاضير ائله سينلر.»
 آنام نازيك دن گولومسويه يرك دئدى:
« اغلوم عجب نقطه لره يئتيريرسن!دييه سن اونلار ايسته ديخلرى كيمى اولموياجاخسان ها»
-« قديم دن دئميشلر خمير چوخ سو آپارار آنا!اونلارين عجله سى يوخ،بير سرى آقاى حسينى دئيردى كى دولت بير پيشيك كيمى دى،ندن كى پيشيك سيچانى توتاندا اونان اويناماق ايستير و اونو همن يئمير.بلكه اونان او قدر اوينويار كى سيچان آخيردا پيشيكه  يئيلمه غينده ن اوتورو او قدر يالوارار كى آخيردا باغرى چاتلايير.بيزده دولته بير طعمه كيمينيخ،او بيزده ن اوينامانى سِئوير!بودا بير ساواشا بنزيير كى سونوندا كيم قازانانير بللى دئيل.»
آنام والورون آلتين آزالدى تا يئرالما يومورتا پيشه پيشه ياوشجادان آلتى قازماق باغلاسين.آخى مندن آتام چوخ سئورديخ كى يئرالما يئمه غى پيشيرَنده آلتى قازماق باغلاسين.آنام آياغا قارخا قارخا دئدى:
-«اوغول غلامحسين منيم بير يورقان سفارشيم وار،من بيراز اونون اوستونده چاليشيم سنده درس -مشقينه باخ.نيگران اولما آتان گلنده ده دانيشاريخ يازديخلاري مبلغين ياريسين وئره ك، نده ن كى بيز اوز ايچيميزى ييه نلره اوخشويورق سانيرام»
-«منده اوجور فيكير ائليرم آنا.»
آنام او طرفده يورقان ساليردى و منده بو طرفده اوزانيب مشقلريمى يازيرام.
آتام دا گلدى بو حالدا،الينده بير ايكى نايلون ميوه و وسايل واريدى.آنام يورقانى ييغيشديردى و آتامين اليندن نايلون لارى آليب و سماورادان اوچ چاى توكه رك گتيردى،بير چاى دا منه گتيردى.
آتام چايى ايچه ايچه دئدى:
« اوغول غلامحسين مدرسه ده نه واريدى؟»
بو حالدا آنام منيم عوضيمدن جواب وئردى:
-« مدرسه دن غلامحسينه بير فيش وئريبلر كى كى مدرسه نين نفتى يوخدو و مالى موشكولو وار گره ك اَلى مين تومان مدرسه يه يارديم ائليه سيز.البته معليم لرى دئيب كى ياريسين دا گتيرسز اولار.»
آتام بونو ائشيدينجه باشلادى موللا و حكومته يامان دئمه غه:
-«مملكتى يئيرلر دويمورلار،دونيايا نفت ساتيرلار ايندى اوز مدرسه لرينده نفت لرى يوخدور.آخى اينصاف دى بو قيش داكى منيم اوز نفتيم يوخدور و والوردان باشا چاتديريرام كى اونودا گئجه بوغماسين دييه ياتاندان سورا ايشله دميرم من اوز آرواد اوشاغيمين بوغازيمدان كَسَم و بو موفته خورلارا وئرم؟بير تومان وئرمه مه م والله.هر موللا اولوب يوز اَلى كيلو،آز قاليب آروادلاريميزى دا اَليميزدن آلسين لار.دويمولار دا بو ايلان قارين لار.»
آنام بير مهربان سسيله دئدى:
-«كيشى غلامحسينيمين روحيه سى حساس دير،ياريسين وئره ك قوى اونو دا صف باشيندا اَزيب-اَذيت ائله مسينلر.دولت ده دولتيخ ائليه مه نيخ كى،نه زامان بيز باش قالديرميشق كى بودا ايكينجى سرى اولسون.اونسوز دا بير گول دن بهار اولماز،يارديمين ياريسين وئره خ گوى اَل چكسينلر.»
آنام بيليردى آتامى نجور يومشاق ائله سين،آتام جئبيندن يئرمى بئش مين چيخارتدى و منه وئره رك دئدى:
-«حراملارى اولسون،ظلوم قيامته قالماز.اوغول آل بونو وئر صاباح قوى اَل چكسينلر سانكى دده لرينين مالين آلاميرلار!»
پولو آلديم،اصلينده بيراز سئوينديم كى دا آقاى مسعودى له باش باشا وورموياجايام،نجور اولسا اينسانى آبير حايادان سالير.بيراز دا اوزولدوم كى بيز نيه يوخسولوق؟نيه چوخ ايشليب آز يئيب و چوخ محتاجيخ يا نيه هئچ بير دئيشيخ ليق يا ايلرله مه اولمور؟بو نفت پولارى ها گئدير يا نده ن موللا لار يوز اَلى كيلودور و هاميسى دا دوخسان ياشدان  ايضافه عمر ائليرلر.بونلارين چوخونون جوابين بيلميرم اما ذهنيمى بيراز قاريشديريب و كدرلى ائله ميشدى.
 بوجور دوشونوردوم كى آنام ألينن-اليمدن ياپيشدي و دئدى :
«اوغلان هارداسان به؟گل سوفرا باشينا،يئمك ايندى سؤوُيار.»
آتامين كئفى پوزقونودو هله،يئمك اوستوندن دال به دال سو ايچيردى و آناما دئيردى بو نه دير دوزلديبسن؟هم بى طعم دير و هم دوزسوزدور.آنام قيزاريردى و سَسي چيخميردى،بير سئرى منه دئيردى كى بيليرسن آتان نيه ائوده بو قدر يئمك لردن ناراضى چيليغ ائلير.اونا گوره كى ديشاريدا اوزون اَزيلميش احساس ائلير و بو حس دن قاچماغى ايچون مجبور ائوده بيزى اَزمه غه چاليشير.حتى دئيردى كى بير سئرى من اوشاق اولاندا،آتام اونون يئمك لرينه ايشكال توتاندا آنام جواب وئرميشدى كى نه آليبسان كى نه ايستيرسن؟آنام دئير كى آتان اوچ دورد آى منيم اوزمه اوتانا اوتانا باخيردى.اونا گوره آنام او گوندن بويانا تصميم توتور كى آتامين آتماجالارينين قاباغيندا سوسون تا كى آتام بوندان آرتيق اوزونه فيشار گتيرمه سين.سوفرانى ييغماق دا آناما يارديم ائله ديم و بوش قابلارى بير كنارا قويودوخ تا كى آنام اونلارى سحر چاغى حياط ده يوسون.هر كس بير كنارا چكيلدى،آنام تكرار يورقانى سارماغا مشغول اولدو،من درس اوخويورام و آتام دا راديو يا قولاخ آسيردى.راديودا عاشيق بو ماهنى نى يواش يواش اوخويوردو:

چال عاشیق سازینی، اوره گیم دولوب
بعضاً اینسان ایچون درمان بو اولور
سازین نغمه لری آخسین کونلومه
یوخسا چیچکلریم عطش دن سولور
چال عاشیق سازینی، بلکه سازیندا
اومودسوز حیاتا بیر اومید تاپیم
گًل عاشیق سازیندا صبيردن دانیش
بلکه دؤزمک درسین آغزیندان قاپیم...(اوختاى)
ياتماق وقتى دير و آنام والورو سوندورور،نده ن كى والورون تينى تهله كه لى دير و اينديه كيمى نئچه عائله نى اولدروب،هاميميز بير اوتاق دا ياتيريق البته بير پرده نن اوتاقى ايكى يه بولموشوق و من بير طرفده و آنا -آتام گيل بير طرفده ياتير.ياتا ياتا صاباحى دوشونورم كى گره ك اوشاقلار گورمه دن پولو ياوشجادان وئره م و دئيم كى مالى دوروموموز ياخچى دئيل و پولون ياريسين گتيرميشم.البته بيليرم كى بير پروبلم اولموياجاخ،اما بعضى اوشاقلار هر زامان بوجور بير شئى لر آختاريلار تا كى اينسانين آرخاسيندا مسخره قويوب گولسونلر!سانكى بيرينين پولو اولوب يا اولماماغى گولمه لى بير شى دير!اونا گوره دوشونورم كى گيزلينجه پولو وئرم.بو فيكيرلرده ديم كى ياتديم.حتى بير ايكى سرى يوخودان قالخديم،بير ايضطراب كيمى بير شى واريم دير،سانكى تلَسيرم و يا قورخورام.اصلينده بيراز تلَسيرم كى پولو وئرم نده ن كى اونو بير يوك كيمى داشيرام،ياتيغيم يئرده نئچه سرى اويوز بويوزا دونورم. صُبحه ياخين سويوخ دان و ايضطراب دان يوخودان قالخديم،گونون ايشيلتيسى پنجره يه توتولموش نايلون آرخاسيندان بولانيخ گورسه نير.اما سويوخ هاوادا بلكه گونون ايشيغى و ايستى سى داها اينسانا نئشه وئرير،ذاتاً گونون ايشيغين قيشين سويوخ و بولوتلو هاواسيندا سئويريخ.تئز قالخيب اَل اوزومو يوماق ايچون حياطا گئديرم و ايلك اول بولوتلو هاوادا  گونه باخيب و سونرا شيرى آچيب سويوخ سوي نان اَل اوزومو يويورام .اينسانا نه نئشه گلير سويوخ سو و گونون باشلنيش ايشيلتيسى !آتام صبح لر داها تئز قالخيب و فهله ميدانيا گئدير كى بلكه ايش تاپسين!آخى فهله ميدانين دا دا ايش قاپماق ايچون رقابت وار و چون ايش آزدير و ايشليه ن چوخدور،همى گره ك زرنگ اولاسان و همى ده شانسين اولا كى ايشى قاپاسان.آنام  هر سحر كيمى تئز قالخيب سماورى يانديريب و والور اوستونده ايكى يومورتا ياغا ساليب كى مندن برابر صبحانه يئسين.
سلام وئريب كئچيب يانيندا اوتورورام آنامين و سويوخ و ياش اليمى والورون اوستونه توتورام.آنام گوللر اوزله دئير:
-«سلام بالام،نده ن بوگون ياخچى ياتاميبسان!صبح كيمى اويوز بويوزا دونوبسن؟»
-«يوخ فيكير ائله ميرم بير دليلى اولا،احتيمالاً آخشام ايضافه چاى ايچميشم»
-«من دوشونورم كى ايضطرابين وار پول ايچون يا ناراحت سان.»
-«يوخ آنا،دئديم كى احتيمالاً چاى دان اولا.»
-«هر نه ايسه اوغلوم!جانينى سيخما،هر شى دوزله جك اينشالاه.گل صوبحانه نى ييَك،گئج قالارسان".»
آج اولدوغوما باخمياراق،ايشتاحام آزيدى.حتى بير شى يئمك ايسته ميرديم،فقط ايستيرديم كى گئديب و بو پولو معليميزه وئرم.اورگيم چيرپينماغين احساس ائليرديم،ذاتاً آنام دئمه لى سانكى جوجووه يئميشديم و بير يئرده دوراميرديم.اما آنامى دا نيگران ائلمك ايسته ميرديم،اونا گوره اوتوردوم سفرا باشيندا،بير پيش دستى ده بيراز پنير،كيچيك تاوا دا ايكى يومورتا و ايكى ايستكان شيرين چاى و ايكى پارچا چورك واريدى سفرا دا.عجله نن يئمه غه باشلاديم،ذهنيم آيرى يئرده دى اما آغزيم ايشليردى.آنام بير تعجب لحنينن دئدى:
-«غلامحسين بالا داليان آتلى دوشوب.»
باشيمى قالديرديم و دئديم:
-«نييه آنا؟»
-«بالا تيكه لرى هئچ چئينه ميرسن اودورسان،بير جورسن باخ بوگون.»
-«يوخ آنا هئچ نه ييم دئييل،او قدر ايشتاحام يوخدور.»
-«نه بيليم بالا،الله ائله سين.»
آنامين شبهه لى باخيش لارينين آلتيندا صوبحانه نى يئديم و بير چاى ايچيب آنام نان خدافيظ لشديم.
-«خوش گئدين بالا،بير پنير دورمگى ده قويموشام كيفينه.آجيخسان اونو يئگينَن.»
-«ساغول آنا،اللرين آغريماسين.»
آنام نام خدافيظ له شيب،سرعت له اوزومو كوچه يه آتديم.اورگيم چيرپينيردى،اوخولا تئز يتيريب و بو پولو معليمه وئرمك ايستيرديم.سانكى آقاى مسعودى يه بو هاسادليخدا تسليم اولماغيم دان راضى دئيلديم.اما بيزلر اورگنميشيخ تسليم اولماغا.بير سرى آقاى حسينى دئيردى كى اوشاق لار بيزيم كولتورده بيرينى تعريف ائليَنده دئيرلر كى فلانى چوخ باش آشاغى و ياخچى آدامدى!او دئيردى كى بيز باش قالديران لارى سئومه نيخ و اونا گوره باش ايمه و قورخاقليق بيزده بير دييَره (ارزش)چئوريليب.او قدر ذهنيم قاريشيخ دير كى گونون ايشيقين و ايستيسين  حيس ائله ميرم.اوزومو مدرسه قاباغيندا تاپديم،آرا- سيرا اوشاقلاردا گَلميشدى. ايلك صاباح شاختاسيندا،هر كس گونش ايشيغى سيچراديغى گوشه يه سيغينميشدى،گون ايشيغى و ايستى، سويوخ هاوادا نجوركى گلير اوجورده بدنَ ياپيشير.دونن هر كس پول دان و مدرسه يه يارديم نان دانيشيردى اما بوگون سانكى نه قورد گليب و نه زيانليخ ائليب!هر كس ساكيت دير.
اوزوموَ ديوار كناريندا بير يئر توتوب و ديوارا داياناراخ اوزومو گونشه سارى توتوب و منده ساكيت ديوارا دايانديم،سكوتدا گوزلريم قاماشسا دا گونشَه سارى باخيرام،گون ايشيلتيسى بير قيرباج كيمى اوزومه ياپيشير،اوچ دورد دقيقه سكوتدا كئچيردنن سورا عبدالله اوزون منه سارى توتوب و سورشدو؟:
-«غلامحسين پول گتيردين؟»
-«هه گتيرديم»
-«هاميسين؟»
ديليم آغزيم دا قورودو-سانكى قان جريانى بئنيم ده شدت تاپدى و دوروخا دورخا دئديم:«هه هاميسين.»هامى تيكرار ساكيت قالدى،اوره گيم چيرپينماغا باشلادى.سانيرام رنگيم ده آتدى،نيه يالان دئديم؟اگر معليم يالانيمى چيخارسا نه اولاجاخ؟گونه باخا باخا منده سوروشدوم؟
-«سيزده گتيردينيز؟»
عبدالله تيتره يَن سَسدن جواب وئردى:
-«هه منده هاميسين گتيرديم.»
دونوب اوزونه باخديم گچ كيمى آغارميشدى.
غلامرضا دا اويوزدان دئدي كى منده هاميسين گتيرديم.داها ائشيدمه ديم كى او بيرسى اوشاقلار نه دئدى،آياغا قالخيب و سورعت له قدم آتماغا باشلاديم،چونوب آرخاما باخديم كيمسه قالماميشدى هر كس داغليب و تك باشينا قدم آتيردى.بو احوالات داى ديم كى باشلانيش زنگى چاليندى،صف دورما زامانى دير،هر زامان كى گيبى صف دورماغا باشلاديخ ،بيرى قران اوخودو!دوزدو معنى سين هئچ كس بيلمير اما هر گون اوخونور صف باشيندا.غلامعلى بير سرى ده بونون اوستونده آقاى مسعودى نين اليندن كتك ئيدى!آخى او سيرادان چيخدى و دئدي بونون لااقل عربى سين اوخوياندان سونرا توركى ترجمه سين ده اوخويون  كى بيلخ نه دئير!قران اوخوماخدان سورا آقاى مسعودى ميكروفون آزخاسينا كئچدى و دانيشماغا باشلادى:
- آلله تعالى نين آدى و يادى نان،رهبريميزين و نظاميميزين عمرو اوزون اولسون دييه بير صلوات چئويرن تا دانيشماغا باشلايام!
هر كس بير ضعيف سَسدن صلوات چئويردى.آقاى مسعودى بير هيجانلى سسدن باغيردى:
-«سانكى هله يوخودان اويانميبسيز،تئزدن از جلو نظام وئريرم و سيزدن غرا آلله اكبر ايستيرم(سانكى سربازخانادى هر صاباح از جلو نظام وئريلر و بيزده گره جوابيندا دييَك : الله و اكبر -خامنه اى رهبر.آقاى مسعودى محكم و هيجانلى از جلو نظام وئردى و بو سرى اوشاقلار اونون اليندن قورتولالار محكم بير الله و اكبر جواب وئرديلر. آقاى مسعودى سئوينجك بير سَسدَن دئدى:بوجور ها عزيز اوشاقلار.
بيردن غلامعلى دئدى:دونن ماهواراه ده تركيه شبكه لرينده ”عزيز نسين“دئيردى هارادا الله اكبر و صلوات سسى گلير اوردا حتما بير باش كسيرلر،سانيرام بوردا بوگون چوخ باش كسيله جخ.اوخولون هاميسيرگولوش سَسيندن پارتلاماغا باشلادى.
آقاى مسعودى يه پيچاق وُرسايدين قانى چيخمازدى،باغيرا باغيرا غلامعلى نين اوستونه گئديب و اونو دويه -دويه باغيريردى:گَدَه سنين ديلين باشينا بلا اولاجاخ،سنى من بوندان سونرا گره ك سيرا دورمادان قاباخ بير ىسرى دويه م.سنين كيمى لرى دار آغاجينا اوجاه گلرلر،اما منيم ده هله اليمدن كيمسه دار اغاجينا اوجاه گلميب ندن كى من اونلارى آدام ائله ميشم.
بو سرى غلامعلى نى آقاى مسعودى بير ربع دان چوخ صف باشيندا دويدو،هر سرى صف دن سورا آپاريب دفتر ده دويوردو،بو سرى اما اوزون ساخلايامادى و صف قاباغيندا اونو دويمه غه باشلادى.اون -اون بئش دقيقه دويه ندن سونرا گنه ميكروفون دالينا كئچيب و دئدى:
-اوشاقلار بوگون اعصاب لاريم قاريشيخ دى و اگر ايستيرسيز كى بوندان دا قاريشيخ اولماسين لازيم اولان ايش بيرليغ لرى معليم لردن مدرسه پول يارديمى باره سينده ائله يين،چون آرتيق دا سيزين الينيزدن جانيم خيرخيراما يئتيريب و دا كيمسه نى گوزله مييه جه يم.ايندى ده گئدين كلاسلارا.
هر كس يئرينده تيتره مه غه باشلاييردى،قورخو هر كسين جانيندا اوتورموشدو.كتك دن چوخ كتك يئمه قورخوسو آدامى اينجيدير،غلامعلى يه باخاندا اونون كئفى بيزدن ساز گورسه نير،نده ن كى او سيريمسيب و كتك دن قورخمور و سوزون هر زامان دئير اما بيز هر زامان كتك قورخوسوندان وحشتده ياشيب و سَسيميزى قيسيريخ.صف لر بير به بير آقاى مسعودى نين قاباغيندان كئچيب كيلاسا گئديرديلر،هر كس ساكيت و يئره باخير و فقط آقاى مسعودى دير كى شاگيردلرين اوزونه باخير.
اول ساعات درسيميز آقاى فرزانه نن دير،آقاى فرزانه هر زامان يومشاق و محبتلى و سوادلى اينسان دير كى چوخ زامان پول آلمياراق ايضافه كيلاس قويور و اورادا ضعيف اولان اويرنجى لره يارديمجى اولور.اونان آرتيق دا اوشاقلارا ياشلارينا اويغون كيتابلار تانديرير تا كى اونلارى اوخوماق لا اوشاق لار بيلگيله سينلر.آقاى فرزانه ايچرى گيردى و اوشاقلار اونون احترامينا آياغا قالخدى او بير گولر اوزدن دئدى: زحمت چكمه يين اوشاقلار ،اَيله شين.گولشلى اوزده ن هر كس دَن بير كئف احوال لاشدى و سونرا دئدى گئده خ درسه اوشاقلار.عبدالله اويوزدان سسى توتولا -توتولا دئدى: آقا پولارى ييغميرسيز؟
-«من ييغيم اوشاقلار؟»آقاى فرزانه سوروشدو.
هر كس دئدى بلى آقا سيز يْيغين،اويوزدان عبداليرضا دئدى:آقا بيز گتيرمه ميشيخ بوگون،اولار سونرا دا بيز سيزه وئره ك؟آخى او بيرى معليم لردن قورخوروق آز اولسا قبول ائله ميه لر!
آقاى فرزانه باشين قاشياراخ جواب وئردى:سيزين بو ايشلره آقاى مسعودى منه ناراحات اولور هر زامان،اما عيبى يوخدو گتيرين وئرين منه،بير جورو ه  من حل ائلرم.آقاى فرزانه بير آغ صفحه چيخارتدى و دئدى: اوشاقلار كيم گتيريب بير-بير گتيرين وئرين سيرادان؟عجله ده ائله مه يْين.من دوردونجو حساب اولورام سيرا اوزونَن،اوزومه ديلخوش لوق وئريرم كى من هله دوردونجويَم و آدامين بيرى اوچ دقيقه چكسه هله اون ايكى دقيقه قالير منيم زامانيما!اول نفر غلام حسن دير آقاى فرزانه اوزون غلام حسن سارى توتو  و سوروشدو، اوغول غلامحسن گتيريبسن؟غلامحسن بير نازيك سَسدن دئير:
-«بلى اقا.»
-او زامان پس گَل اوغول.
غلامحسن دوروب گئدير آقاى فرزانه نين ميزينين قاباغينا و ساكيت اولاراق پول پاكتين آقاى فرزانه نين اَلينه وئردى.آقاى فرزانه پولارى پاكتدن چيخارديب سايير و غلامحسن نين آدين يازاراق اونا خطاب دئير گئد اوتور اوغلوم.هر كس دورد قولاخ قولاق آسير كى غلامحسن يازديخلاري پولون هاميسين گتيريب يا ياريسين!اما چون اونون باره سينده هئچ دانيشيخ اولمور بو نتيجه توتولور كى او پولون هاميسين گتيريب.آقاى فرزانه اوزون ايرضايا سارى توتور و دئير:اوغول سن گتيريبسن؟
ايرضا آغاريب و قيزاراراق بير توتولموش سَسدن جواب وئرير:يوخ آقا من سورا گتيره جه يم،آتام ائوده دئيل دير!
-اولسون اوغول هازامان آتان اولاندا گتير.اوغول ممد ايرضا سن گتيريبسن؟
-بلى آقا.
-گتير او زامان.
ممد ايرضا  يواش يواش يئرده ن قالخدى و آقاى فرزانه نين ميزينه سارى يولا دوشدو .قيپ قيرميزى قيزاريب و ترله ميشدى،الينده كى پاركتى او قدر اوينادميشدى كى بوزوشدورموشدو.ساكيتجه پاكتى آقاى فرزانه نين الينه وئردى،آقاى فرزانه پاكتى آچيب پولون مبلغينه باخدى و پولو ساييب ممد ايرضا نين اوزونه باخدى،ممد ايرضا قيپ قيرميزى قيزاريب و تيتريدى اما بيله سيندن بير سَس چيخميردى !ايكى دقيقه بير بيرين اوزونه باخديلار اما هيچ بيرى بير كلمه دانيشماديلار.هر كس قولاغين شوشله ميشدى كى بير شى ائشيدسين اما كيمسه سكوتون قيرماخ ايسته ميردى،آقاى فرزانه نين اوزو دونوب آغ آغاباق آغارميشدى.نهايت ايكى اوزون دقيقه دن سونرا آقاى فرزانه بير تيتره يَن سس دن دئدى:اوغول ممد ايرضا بويور اوتور.بير شى دئمه دن ممد ايرضا دونوب اوتوردو،كيمسه يه باخميردى،قيزارميشدى و رنگى گئتميش كاپشِنينين قولانان تئز تئز آنلينين تَرين سيليردى.كلاس سكوتا بورنموشدو،كيمسه دن بير سَس سمير چيخميردى.سيرا منده بو سكوتون بيتمه سين ايسته ميرم،آزيندان ايكى دقيقه اوزون سورمه سين ايستيرم.قلبيم حيزلا چيرپينماغا باشلايير ،سكوت سينير و آقاى فرزانه بير ضعيف سَسدن دئير: اوغول غلامحسين سن گتيريبسن بويور گَل.
-نه گوج واريم دى سينه مه يْغيرام و آياغا قارخا-قارخا دئيرم بلى آقا گتيرميشم.قدم لرى آتيب و دوشونورم كى نجور ديْيَم كى پولون ياريسين گتيرميشم تا همى اوشاقلارين يانيندا اوتانمييام و همى ده تئز قورتولام بو يوكون آلتيندان،بئش آديم يول دير اما هر آديم دا بير سرى اوشاقلارا دونوب باخيرام و بير سرى دوشونورم كى نه دييه م،بو يولون قورتولماغينى ايسته ميرم اما بو يول دا قورتولور و اوزمو آقاى فرزانه نين ميزينين قاباغيندا گورورم.پاكتى اوزالديرام آقاى فرزانه نين قاباغينا و پنجره دن گونه باخاراق نه گوجوم وار بوغازيما ييغيرام و دئيرم :
-ياريسين گتيرميشم آقاى فرزانه.
-اولسون اوغلوم بويور اوتور.
-آتامين ايشى يوخدور،قيش دير بير گون ايش اولاندا ايكى گون ايش اولمور.
-آنلاديم اوغول گئد اوتور.
اوتورماق ايسته ميرديم،سانكى اوزومو ايثبات ائتمك ايستيرديم نه اولسا بيزلر اوتانيريق يوخسول اولدوغوموزدان.ايستيرديم ديْيَم كى من اوتانميرام و يا حتى اونو ايثبات ائليه م كى من اوتانميرام اونا گوره تيكرار گونشين ايشيغينا باخا باخا دئديم : بونو دا آتام زوردان وئردى ندَن كى اوزوموزون هله نفتيميز يوخدور و اونا گوره ده هله بخارى قويماميشيق!
آقاى فرزانه ميزين آرخاسيندان قالخدى و اَلرينن سينه مدن ياپيشاراق تيتره ك و عصبى سَسدن باغريراراق دئدى:آنلاديم دئديغينى سنده من دئديغيمى آنلا گئت كيلاس دان ائشيه حياط ده قدم وؤر يوخسا ايدامه وئرسن زوردان سنى كيلاس دان ائشيه آتارام.دونوب كيلاس دان ائشيه چيخديم ،اوره گيم توتقون و بدنيم تيتره يردى،اوخول حياتيندا گون توتان بير گوشه ده اوتوروب اوزومه جومدوم،ممدايرضا نين سكوتون و بو كى او يوخسولوغون دان اوتانيب اونو ديله گتيرَميردى بو كى ممد ايرضا نين سرنويشتى بيزيم هاميميزين سرنويشتى دير،بيز اوتانيريق چون يوخسولوق اما بيزيم حاقى يينلر،ظاليم لر اوتانميرلار چون اونلار بيزيم حاقلاردان وارلى اولوبلار!بو فيكير لرده ديم كى بير نفر اوتوردو يانيمدا و اَلين سالدى بوينوما،باشيمى قاوزايب و آقاى فرزانه نين اولدوغون گوردوم !آراميزدا دورد-بئش دقيقه سكوت حاكيم اولاندان سونرا آقاى فرزانه باشين قويه قاوزايب و دئدى:
-«بيليرسن نيه اوستونه باغيرديم؟»
گونشه سارى باخا باخا جواب وئرديم:
-«چوخ زامان اينسان باغيرير چون اوزونو عاجيز حيس ائليْير»
-«دوز دئيرسن،من ممدايرضا نين سكوتونون قاباغيندا اوزومو عاجيز حيس ائله ديم.ممدايرضا دردين دييه بيلمدى.اصلينده ممدايرضانين  يوخسولوقو دئيل،بلكه او يوخسولوقدان اوتانماسى دير كى منى تيتره مه يه سالدى!او سكوت ايندى ده قولاغيمدا ويزيلير،اصلينده او سَسيزليغه عصيان اولسون  باغيرماق ايسته ديم سنين اوستونه باغيرماق ايسته مه ديم او باغيرماق اوزوم ايچونودور.حساب ائله سن كى سنين اوستونه باغيرديم سنن عذور ايستيرم.»

-«بيليرم.»
-«ايستيرسن گئد ائوده بوگون ايستراحت ائله،كيفى نى گتيرميشم اما منجه نه ايتيفاق دوشدوغونو ائوده دئمه نده ن كى اوزلرين سوچلو حيس ائلرلر!بعضى زامانلار سوسوب درد و كدرى اوزون داشياجاخسان  . حتى ايسته سن ناهاراجاخ گئت كيتابخانايا و ائله مدرسه داغيلاندا ائوه گئت»
-اولسون اوجور ائله رم.
آقاى فرزانه چانتامى منيم يانيما قويوب و قالخيب گئتدى كيلاسا.
هئچ بير شى دوشونموردوم،فقط ساكيت اوتوروب گوزلريمى اوزوم بيلمه ديغيم بير شئيه زيله ميشديم بلكه ياريم ساعات بوجور كئچدى.آياغا قالخديغيمدا فيكير ائليرديم كى بلكه مدرسه داغيلان زامانى گليب و منيم كيتابخانا يا خياباندا دولانيب وقت كئچيرمم ايچون لزوم يوخ!اما هله دورد ساعات واقت كئچيرمم لازيم دير تا ناهار وقتى گليب و من ائوه گئدم،كيتابخانايا گئتمَك مقصديله يولا توشدوم.خياباندا دولانسام او بو گوروب عائله مه خبر وئره بيلرلر اما كيتابخانادا كيمسه منى گورمز و اوردا بير كيتاب دان دا اوزومو مشغول ائلرم.كيتابخانا ساختمانى قديمى شيروانى بير ايكى قات ساختمان دير كى يئرين دارليغينا گوره اوخوما سالنى كيچيك دير و اصلينده كيچيك اولدوغو ايچون كيتابلارى امانت آليب آپاريب ائوده اوخويولار و آز آدام اوردا اوتوروب كيتاب اوخويور.آقاى "ببرى"٥٠ ياش جواريندا كيتابخانانين همى سوروملوسودور و همى ايشچى سى دير،او منى تانيير،نده ن كى منيم گوجوم يوخدو كيتاب الماغا اونا گوره هر زامان كيتابخانادان كيتاب بورج آليب و اوخويارام حتى آقاى "ببرى"بعضى شخصى كيتاب لارين دا ائودن گتيريب و منه بوش وئرير تا اونلارى اوخويام.سالانا-سالانا پله لردن يوخارى چيخيب و كيتابخانانين جير-جيرلايان قاپيسيندان ايچرى گيرديم،آقاى "ببرى"تزگاه داليندا گولش قاباخ اوتوروب.او هر زامان كى كيمى بوزارميش اما تميز و دوزنلى كت -شالوارين گئيب و اوزون ده سه تيغ چكيب،توكلرى آغارسا دا اما جوان و انرژى لى گوروشور.او منى گورونجه همن سالام وئريب دئدى:
-خوش گوردوخ غلامحسين،بو گون نه اوخوماق ايستيرسن؟
-«خوش گونويوز اولسون آقاى "ببرى".بير ساده بير شى،بلكه بير شعر.بورادا وقتى كئچيرمك ايستيرم.»
-فيكير ائليرم "برتولت برشت" شعرلرين سئورسَن،ساده اولدوغو حالدا دَرينديلر.ايستيرسن اونو بير ايمتحان ائله.
-«سيز مصلحت بيلسز،حتماً گوزل و فايدالى دير.»
آقاى ببرى،قالخدى و كيتاب رَفلرينده(قفسه لرينده)كيتاب آختاراراق ايدامه وئردى:
-برتولت برشت او يازارلارداندى كى گونون مسله لرين شعر،حكايه و درام حاليندا يازيب.
آقاى ببرى كيتابى تاپيب و گتيريب وئردى منه.تمركز حاليم ضعيف اولسادا اما كيتاب دا ساده و چكيجى دير،شعرلرى بير-بير اوخوماغا باشلاديم.شعرلر اينسانين جانينا اوتوروردو سانكى كرهَ نى تاوادا اَريديردين،زامانين كئچديغيندن خبريم يوخودور.


اَن ساده شى لرى اورگَن

اورگنمه ايستيه ن لره هئچ زامان گئج دئيل

اليفبانى اورگن،ئتمير اما اونو اورگَن

بير طرفدن باشلايان گره ك

سن هر شئى بيلمه لي سن

سن گره ك رهبرليغى اَلينه آلاسان

سورگونده حايات سوره ن اويرَن

زينداندا عومور سوره ن اوره گَن

اِى ائوده اوتوران آرواد اورگَن

اِى آتميش ياشينداكى كى اينسان اورگَن

سن گره ك رهبرليغى الينه آلاسان



اى صاحابسيزلار و ائوسيزلر اويرنمه داليسيندا اولون

اى سويوخ دان تيتره ين ائوسيزلر بير شى لر اورگنين

اى آجليخ چكه نلر،الرينيزه بير كيتاب آلين،بو اوزو بير سلاح دير

سن گره ك رهبرليغى الينه آلاسان

آى يولداش اوتانما سورغو،سورمادان

بيلمه ديخله رينى،قويما زوردان بوينونا قويالار

اوزون داليسيجاخ گئد

اورگنمه ديكلرينى اينكار ائله كى بيليرسن

فاكتورو اوزون جمع باغلا

ندن كى اونو أودُيَين سن سن

بيلمه ديغين رقمين اوستونه اَل باس

و سوروش بو نَدن اوتورو؟

سن گره ك رهبرليغى اَلينه آلاسان.(برتولت برشت)

بو شعرى نئچه سرى اوخودوم،آقاى ببرى دوغرو دئير.شعرلر ساده اولدوغو حالدا اما درين معنالارى وار،او قدر سئوديم شعرلرى هئچ بيلمه ديم بو اوچ ساعات نجور كئچدى.آياغا قالخديم گئدم،آقاى ببرى دن ايسته ديم كى برتولت برشت آيرى كيتابى دا وار امانت وئرسين،نده ن كى چوخ سئوديم و حتى دئمك اولار كى اونو اوخودوخ دا صاباحكى دردى و غمى اونوتوم.آقاى ببرى گولر اوزدن دئدى:

-باخيرام كى كيتابى اوخوماقدان راضى سان و يازارين آيرى كيتابلارين دا اوخوماق ايستيرسن.

-هه،چوخ سئوديم اصلينده،دئديغينيز كيمى شعر چوخ ساده اما عينى حالدا چوخ معنالى و درين دير.آز يازى ساده و معنالى و عينى حالدا دَرين اولار.

-اوغلوم غلامحسين ساوادلى آداملار ايكى مدل يازارلار،چوخو او قدر مطلبى آغير يازار كى اونو خيردالاماخ حضرت فيلين ايشى اولار.بير اقليت ده وار كى او قدر بيلگيلى ديلر كى بيلديخلرين گئجه گوندوز چاليشيب ساده لشديرلر كى اونلارين يازيلارين هر كس خيرداليا بيلسين.اصلينده ايلك گروپ يازارلار تا اوخونمويالار يا يازى لارى بير معما كيمى گورسن سين.برتولت برشت ده او يازارلارداندى كى آغير مطلب لرى ساده يازار و هر اينسان اخودوغو حالدا دا اونان بير شى لر اورگنديغينين فرقينده اولار.

كيتابلارى آليب و آقاى ببرى دن خدافيظ لشيب و نَشه مى تيكرار تزه ليه رك ائوه سارى دونورم.اوخول لار داغيلديغى ايچون خيابان شولوخ دور،هر زامان شولوخ خياباندا ائوه دونمه نى سئويرم،گونش آلتيندا-گوزل قيزلار كى اوشاقليق چاغلاريندا كوچه ده برابر اوينارديق و ايندى سنت و ياشلارينين ايجابينا گوره  اوزاخ گزيرلر و سانكى سنى تانيميرلار،اونلارى تيكرار گورمه دن هر زامان خوشلانيب و داها اوشاخ ليق خاطيره لرى خاطيرلايرام!گزيب باخا-باخا اوزومو ائويميزين قاباغيندا تاپديم،قاپيميز آچيخ اولور گوندوز وقتى نورمالدا،بودا كاسيب منطقه نين عادات و عنعنه لريندن دير كى قاپيلار گوندوز واقتى آچيق اولار.نده ن كى اونلاردا نه اوغورلاماغا بير شئلرى وار و نه ده بلكه او قدر صاف و ساده ديلار كى اينسانين اوغرو اولماغينا اينانميرلار.قاپيدان گيره نده اوسگوره رك ايچرى گيريرم هر زامان،قونشوموز جيران خالا دا آناما يورقان سالمادا يارديم إئليردى،والورون اوستونده شوربا قوخوسو،اينسانين ايشتهاسين آچيردى.سلام وئريب گئديب آنام نان -جيران خالانين يانيندا اوتوردوم.جيران خالا سونسوزدور و اوشاغى اولمويوب،اونا گوره آنام نان منى اوز اوشاغى كيمى حساب ائلير.حيات يولداشى دا محله بقالى دير و صاباح گئدر-آخشام ائوه گلر،اونا گوره ده نورمالدا جيران خالا بيزه گَلَر،همى آناما يارديم ائلر يورقان سالمادا و همى ده اوزون تكليخ دن قورتاريب داريخماز.اوشاق اولاندا هر زامان منه باياتى،تاپماجا و ناغيل دئيردى،اونا گوره آراميزدا صميميت چوخودور و سونرالار منده خوش بير شعر يا كيتاب اوخوياندا-جيران خالا لا  و آناما اونو تيكرارلارديم.او گونده اوخودوغوم شعرلرى،اونلاردان پايلاشماق ايستيرديم اصلينده.

جيران خالا اوزون آناما توتوب دئدى:قيزيم غلامحسين عاج اولار،ايسترسن اونون نهارين وئر،بيز سونرا ييَريك.

-آنامين عوضينه تئز من جواب وئرديم:

-يوخ خالا،آج دئيلَم.هاميميز برابر ييَريك.

-بالا آخى بيز بونون آخيرلرينده ييخ،دا ايسته ميريخ كى ياريمچيليخ بوراخاخ،بلكه بير-ايكى ساعات چَكه.

-اولسون منده درسلريمه باخارام،بيرده بير ايكى دنه ده تزه شعر اوخويارام سيزه.

آنام باشين قاوزايب و مهربان گوزوله منه باخيب و دئدى:عاج اولسان دور بير دورمك پنيردن زادان آتان آغزينا گَل تزه تاپديغين شعرلردن بير ايكيسين بيزه اوخو،سونرا درسلرينه باخ.

كيتابى آچديم  و اوچ دنه شعرلردن اوخودوم،هم حوزونلو و هم سئوينجلى.اونلاردا شعرلرى دينله مه دن چوخ سئوينديلر،حتى سونوندا بو قيسا شعرى اوخودوغوم دا


يولون قيراغيندا اوتورموشام.
سوروجو،تكرلرى دئيشير،
گَلديغيم يئره باغلى دئيله م.
گئده جه ييم يئره ده او قدر ماراقلى دئيله م،
پس نده ن صبيرسيز،
تَكَرلَرين دئيشمه سين گوزلويورم؟(برتولت برشت)


جيران خالا اوره گى دولدو و ايچيندن بير آه چكرك دئدى:اينسان لاردا نه قدر گوج وار كى  ائله بير شعر دئيرلر كى بيلمه ديغى آيرى عيرق و دين و اولكه  اينسانلارينين دا اوره ك سوزلرين دئيرلر.اوغول غلامحسين سونرا بو شعرلردن منه اوخو.

-اولسون جيران خالا هر زامان ايسته سن اوخويارام.
اونلار باشلاديلار يورقان سالماغا و منده صاباحين درسلرين اوخوماغا باشلاديم.زامانين كئچديغينين فرقينده اولماديم،اما بيردن آنام جيران خالايا دئدى: بونودا قورتارديق،ايندى ناهار ييه ك.جيران خالا دئيردى:يوخ دا من گئديم ائويميزه،اما آنام اَل چكمه دير و بيله سينه دئدى كى اَتسيز قورو بادمجاندان شورباسى پيشيرميشم و گئتسن اورگيمه ديير و قاليب باهم ناهار يئمه ليخ.جيران خالا ايكراه دان قبول ائله دى.(صميميتيميزه رغماً هر زامان بو ائپيزود تيكرار اولار)آنام سوفرانى سالدى،قابلامانين ايچينده لوبيا،قورو باديمجان،يئرالما و قارا باديمجان واريدى.كناريندا سبزى،سوغان و چورك ده سوفرادا داها اينسانين ايشتهاسين آچيردى.بير كاسا دا اول هر كس شوربانين سويون تيليت ائليب سبزى له يئدى (البته من سوغان دان يئديم)و سونرا يئرالما -باديمجان كى بيز پاىْ دئيريخ توخماخ دان بير قابدا آزيب و پايلاشيب يئديخ.سوفرانى ييغيشديراندان سونرا جيران خالا ايصرار ائله دى كى باتميش قابلارى آپارسين حياطدا يوسون.آنام دئدى كى سورا ايستى سو قويوب اوزوم يويارام،قوى هله چاى ايچه خ.جيران خالا گولدو و دئدى :بالا بوندان قاباخ هر صاباح آخار چايين بوزلارين سينديريب و چاميردان  قاب يويوردوخ،ايندى اوچ دنه كاسايا ايستى سو احتياج يوخدور.سن چاى حاضيرلاينجا منده بئش دقيقه يه قابلارى يويوب گَلَم.جيران خالا اَل چكمينجه آنام راضى اولدو،جيران خالا قابلارى ييغيشديردى آپاردى و آنام دا ايستكان -زير گتيريب چاى يى دمه قويوب بيراز دا اوتاغا  چكى -دوزَن وئردى.جيران خالا دا دئديغى كيمى قاب لارى بئش دقيقه ده يويوب گلدى و اوتوردو منيم يانيمدا،چاى لارى دا اوزو همن توكدو.جيران خالا سئومَز  چاى چوخ دَم آلا،او دئير كى چايى سوتول ايچه جخسن تا اونون دوغال دادين آلاسان .چاى لارين سووُماغين گوزلويَرك جيران خالا سوردو:

-بالا غلامحسين مدرسه نجوردو؟

-خوشدو خالا،ائله هر زامان كى كيمى.

-اوخو اوغلوم،قارا گونلردن قورتولماق ايچون اوخوماق لازيمدى.قارا گونلرى آشماق ايچون اوخوماق دان سورا آيرى بير چاره يوخدو.باياخ اوخودوغون شعرده بئله منى هوسه سالير دالدان يازيب اوخوماق اورگشه م.اما من دا قوجالميشام،عومرومون چوخو گئديب آزى قاليب!دونيانى سيزلره بوراخماليق بيز.

-خالا هئچ واقت گئج دئيل،بهانه آختاريب آلتينا وُورما.

-جيران خالا چاى گوتوروب و بير خورطوم ايچه رك دئدى:اوغولوم دوز دئيرسن،بيز هر زامان اوز تنبليغيميزه بير بهانه تاپيريخ.اصلينده هر شى بيزيم تنبليخ دن قايناخلانير،قالانلار دا بهانه ديلر كى اوزوموزو يالادماغا هر زامان بير بهانه تاپيريخ.

جيران خالا چايين آخير خورطومون ايچه رخ اوزون آناما سارى توتدو و سورشدو: قيزيم او بيرى يورقانى بو گون باشلاياجاخسان ؟

-آخشام باشلارام،ايندى بيراز ائو ائشيه يئتيريم.ايندى مورتضى دا ايش دن قورتولوب گلر،شام زاد پيشيريم بيراز!سونرا آخشام باشلارام.

-ايستيرسن قاليم ايكيمز باشلاياق قيزيم؟

-يوخ خالا،سنه ده زحمت وئريرم.أرين گلر،سنده گئت بيراز ايستراحت ائله،شام زاد پيشيره جخسن پيشير.

-يوخ نه زحمتى قيزيم،منده بئكارام اوئوده قالسام داريخارام.اوندا من ايندى گئديم صاباح صوبح گليب يارديملاشيب او بيرى يورقانى دا سالاريخ.

-اولسون خالا،آلاه سنى بيزه چوخ گورمه سين،قال بير آيرى چاى دا ايچ.

-هه قيزيم،قديم دن دئيب لر چاى گره ك جوت اولا.تك اولسا ايشلر جور گلمز.

آنام گولره ك هر كسين بوش بارداقينا ايكينجى چايي توكدو.جيران خالا چاى لار سُوُيونجا بير آيرى شعر اوخوماغيمى ايستدى.آنام گولومسويه رك دئدى:جيران خالانين بو گون بتر بو شعرلردن خوشو گلير،كيتابى جمشيد عمى نه وئر آخشام توكاندان گلنده جيران خالانين قولاخلارينا بو شعرلرى اوخوسون بلكه ليلى مجنون حكايه سى يئرينه جيران-جمشيد حيكايه سى ديللره داستان اولدو.هاميميز قاه قاه چكيب گولدوخ و من " اوخويان بير ايشچى سوروشور" شعرينى اوخودوم .شعرى اوخويا-اوخويا جيران خالا چايى ايچدى و شعرى قورتارديغيمدا  آرادا بير ايكى دقيقه سوكوت اولاندان سونرا،جيران خالا اَللرين يئره قوياراق زوردان آياقا قالخدى و بير حوزونلو و محبتلى سَسدن منه دئدى:بالا سنى آلله ساخلاسين،قوى سنى بو گون اوپوم،بو گون سن منه بو شعرلرى اوخوماق دان منه محبت ائله دين.منده آياقا قالخميشديم،جيران قاخالانى قوجاخلايب و دئديم قادانى آلارديم جيران خالا.جيران خالا اوچ -دورد سرى منى اوپورخ دئدى،يوخ بالا من سنين قادان آلارديم،سنه قوربان اولارديم.آنام لا آپارديخ جيران خالانى قاپيدان يولا سالديخ.قاپيدان دونن ده آنام ساكيتيدى،اَليندن ياپيشيب و سوروشدوم:

-آنا ناراحات سان؟

-اوغلوم هم جيران خالانين تكليغينه اورگيم توتولدو و هميده سنين وارليغينا سئونجه يه م،حيات هئچ زامان خوشلوغو تام دوغرو وئرمير،هر زامان يانيندا بير كدر وئرير.

-او بيرى اوزوده وار كى حتى دردى -كدرين ده يانيندا بير خوشلوخ اولور.
آنامين اَللرين سيخاراق،گوزونون ياشين او بيرى اَليمدن سيلديم و دئديم هر شى ياخچى اولاجاخ آنا.

-هر شى ياخچيدى اوغلوم دئدى باشين قويدو چينيمه،بياض توشموش ساچ لارين تومارليب و اَللريمى بوينونا ساليب آنا بالا قوجاخلاشيب و ايچه ريدَن جوشان محبتيميزى بير بيردن توتوشدوردوخ.آنام حياتيندا چوخ چتين ليخ چكيب،او آتامدان عائله سي راضى اولمادان ائولنيب و اونا گوره ده عائله سى اونو آتيب لار،سانكى كى گونش آديندا بير قيزلارى يوخدور.بير-ايكى سرى ده آنام خبرسيز  گئديب بويوك آتام و آنام گيلدن باريشا.عايله سى بيله سينه يامان دئيب و اونا بهتان آتيپلار كى چون آتامين مالى وضعيتى ياخچى دئيل،اونون باريشماق ايسته ديغى اونون پولسوزلوخ قاباغيندا چاره سيزليغيندن نشات تاپير.يانى مثلاً آنامين منظورو وار كى عائله سيله باريشيب،اونلار بيزه مالى يارديم ائله سينلر.بو سوزده آنامين اوره گين داها سينديرميشدى،اوزونه گتيرَميردى اما بو سوز آيريليق دان داها چوخ اونو اينجيديردى.آنام باشين چينيم دن گوتوره رك دئدى:كوچه يه چيخيرسان يا درسلرينه باخيرسان؟

سانكى حيس ائله ديم،آنام بيراز تك اولماخ ايستير.اونا گوره دئديم:هه بير ياريم ساعات ائشيه چيخيب قدم آتيب گليب درسلره باخماق ايستيرم.

-اولسون گئت اوغلوم اما تئز گَل،درسلريندن قالما.

آنام نان آيريليب و كوچه يه چيخديم،اصلينده منده بيراز تك اولماق ايستيرديم اونا گوره محله ميزين اوشاقلارى گورمه سين دييه،آيرى محله ده قدم آتماغا گئتديم.هاوالار يواش -يواش سرين اولوب و گونش ده او قدر گوج قالمايب كى بدنى قيزديرسين،اما اونا رغماً سرينلرده آز گونش ايشيغى دا لذتلى اولور.من البته ياشلى لاردان بونو اويره نديم،نده ن كى بيز گنجلر او قدر بونو بيلميريخ،اما ياشلى اينسانلار بير عومور تجربه دن سورا سرين و سويوخ هاوادا هازامان بير گونش ايشيلتيسى تاپديلار اوزلرين اونون قاباغينا وئريلر.منده حيزلا يول گيديرم كى جانيم قيزيشسين.يواش يواش دونمك لازيم دير،نده ن كى گئج اولور و ايجازه آلديغيم زامانيم دولور،اونسوز دا بو گون بيراز داها چوخ درس چاليشمام لازيمدير،چونكى كيلاس دان قالميشام.گلديغيم يولو تكرار دونوب و ائوه سارى گئديرم،كوچه ده اوشاقلار توپ اويونوردولار و اونلاردان قاريشيب توپ اوينامامى ايسته ديلر اما نه توپ اويناما ماراغيم واريدى و نه ده درسلريمه گوره ايمكانيم واريدى كى توپ اوينويام،اونا گوره قبول ائله مه ديم و ائوه سارى دوندوم.قاپى آچيخدى هر زامان كى كيمى و من ده اوسگوره رك ايچرى گيرديم،آنام والورون اوستونده آيران آشى پيشيريرردى،سلام وئريب و گئديب بير گوشه ده اوتوروب درسلريمه باخديم بو آندا آنام سوردو:

-غلامحسين،مدرسه ده پولو آز آپارميشدين بير شى دئمه ديلر بالا؟

باشيمى قاوزايب و دئديم:يوخ آنا بير شى دئمه ديلر،هر شى يولوندا.آنامين اوزونده خوشحاليخ اوتوراراق دئدى:چوخ شوكور بالام و آشى قاريشديرماغا باشلادى.منده باشيم درسه قاريشدى تا كى آتام گَلدى،باشيمى قووزايب و آتاما سلام وئريب يورولماياسان دئديم.آتام جوابيمى وئريب والورون يانيندا اوتوردو.او بوگون يورولدوغونو دئيب و آنام دان ايسته دير كى  اونا تئز بير چاى وئرسين،آنام دا منه آشى قاريشديرماسينى ايسته دى تا آتاما چاى حاضيرلاسين.آتام دا والورون يانيندا اوتورموشدو من ده اونون يانيندا آشى قاريشديريرديم.آتام منه باخاراق سوروشدو:پولو وئردين اوغول؟

-هه آتا وئرديم.بير شى دئمه ديلر.

آتام بير منه باخاراق دئدى:نه دئديجكلر اوغول،مملكتى يئيرلر بو پولارى دى خالا خاطيرين قالماسين آليرلار.بونلار بوگون صاباح ميلتين آروادلارين دا آلاجاخلار اَللريندن،ايندى آغير يونگول ائليرلر.موللا جماعاتى بوجوردو اوغول.بونلار نئچه يوز ايل دير برنامه توكورلر كى قدرت اوستونه گلسينلر،ايندى ده قدرت اوستونه گلديلر دا ميلتين قانين آخيرينا جاخ سومورولار.اسكى زامانلاردان مثل وار كى موللا نين جئبينين ديبى اولماز.نه قدر وئرسن او قدر سوزدولار.

بو آرادا آنام چاي دان گلدى و منده تكرار درس لريمه باخماغا گئتيم.آنام لا آتام نفت آلما قونوسوندا دانيشيرديلار،اما منده ايستميرديم كى تمركزومو اَلدَن وئره م ،اونا گوره چابا گوسترديم كى قولاق آسميام و درسلريمه باخام.آشاغى-يوخارى بير ايكى ساعات دان سورا آنام سوفرانى سالدى و شام يئمه غه سوفرا باشينا چاغيردى منى .هر كس بير بوشقاب آش چكدى و ايشمه گه باشلادى،آيران آشى ايچندن سورا اينسانى يوخو باسير،بيرده ساريمساقلى اولاندا ناف بتر.آشى ايچيب و آنام سوفرانى ييغيشديردى ،آنام هر كسه بير چاى وئردى سوفرانى يغيشديرانان سونرا.عادت اوزره آتام راديويا قولاخ آسيردى منده درسه باخيرديم.آنام دا تزه يورقانى سالماسين باشلييردى.بيز او قدر تلويزيونا باخميريخ ،نده ن كى هم منى درس دن قويور،بيرده دوغروسونا باخاسان هئچ بير فايدالى بير شى يوخدو كى اونان فايدالاناسان.ياتما وقتى گليب ،آنام يئرلري ساليب والورو سوندروب و هر كس يئرينده ياتماق ايستير،ذاتاً هر كس ده يورقونوندو حتى منده يورغونام .





ايكينجى بولوم

قيش اولوب و هاوالار سويوخ،سانكى گوى دن بوز ياغير.بخارى دا قيزديرمير ائويميزى ،ائوين ايچينده ده كاپشن و جورابلاريمى دا چيخاردماميشام.آنام پنجره يه بير آيرى نايلون دا ووروب اما سويوخ ديوارلاردان ايچه رى گيرير آرتيق.بخارى نين اوسته شوربا قور-قور قورولويور.بيراز گئج اولوب،منده عاجيخميشام،آنام دا آجيخيب.آنام دئير كى ايستيرسن سنين پايى نى وئريم يئگينَن .اما منده دئديم كى قوى آتام دا گلسين برابر ييَك،بو حالدايديخ كى آتام دا تاپيلدى.اودا تلسيردى،نده ن كى محرم ليخ آيى اولموشدو و او دا هر گون هئيتَ گئديردى.آتام نماز گليب اوروج توتان دئيل و مولالارا هئچ سئومَز اما محرم ليخ ده هئيت ده سينه چالار و مچيده مولانين مرثيه سينه قولاق آسار!آتام ،آناما دئدى تئز سوفرانى سال گئج قالميشام ايندى سينه ورماق باشلانير .آنام سوفرانى سالدى و هر كس آلاتلسيخ شامين يئدى.آناما سوفرانى ييغيشديرمادا يارديم ائله ديم،آنام همن هر كسه بير ايستيكان چاى توكدو.آتام چايى قاباغينا چكيب و دئدى:

-"گونش"بو آى بيراز صرفه جويى ائله،همى قيشدير ايش يوخدور.اوناندا سونرا ٦٠ مين تومان دا گره ك هئيت دن -مچيدين مولاسينا يارديم ائلييم.

بيردن منيم ياديما آتامين سوزلرى مولالار حاقيندا ياديما گلدى او زامان كى منيم اوخولوما يارديم إئليردى .اونا  گوره اوزومو توتوم آتاما و دئديم:

-مه يه سن اوزون مدرسه يارديم ائلينده دئمه دين كى بو مولالار مملكتى خارابليبلار و نفتين پولونان دويمولار ايندى ميلتين قانين سورولار.يا دئمه دين كى بو موفته خور مولالارا بير قيران وئرميه سن گرك؟به ايندى نه اولور كى اوزون بو مولالارا و هئيته يارديم ائليرسن؟نيه بو قيشدا و ايشسيزليخدا بيزيم قارنيميزدان كسيب مولايا وئرريرسن؟

آتام بير عصبى سَسدن جواب وئردى:محرم ليخ و عزادارليخ فرق ائلير.دوزدور كى مولالار موفته خوردولار و مملكتى خارابليبلار و هاميسى اوغورودور اما حسينچى اولما فرقلى بير آنلامدا.اونسوز دا هر كس يارديم ائلير.حتى آقاى محمدى كى ساوادلى و دوهتورودو و نئچه ايل مولالارين عليه نه دانيشديغى ايچون زيندان چكيب،او ١٥٠ مين تومان يارديم ائلير.

-مولا داننده كى حكومت آداميدى و اينديه كيمى نئچه نفرين حياتينا  باعيث اولوب،آيدا اوچ -دورد ميليون تومان دولت دن آلير و او قدر ده بيزيم كيمى بدبخت اينسانلاردان آلير.سوزَه ده گله نده هر كس دئير مولا داننده قاتيل دير و صفيح آدامدير اما هر كس ده اونون منبرينه گئدير و ميلت اوزو چورك تاپامياندا، اوز قارنينان كسير تا مولا داننده ١٣٠ كيلو وزن دن قالخسين ١٧٠ كيلويا.بيزيم لياقت ميز ائله مولالاردى، خصوصاً داننده كيمى قاتيل مولالار.

آتام عصبى لحنينن سوزومو كسدى و باغيرا باغيرا دئدى:آدينى غلامحسين قويدوم كى حسينين غلامى و قولو اولاسان.ايندى ايكى دنه كيتاب اوخويوب سان خوروز اولوبسان منيم باشيما.

منده نئچه سرى آديما و منيم كيمى آدى اولانلارا دوشونموشدوم سَسيمى زوردان بوغازيما يغيب دئديدم:بو غلام و عبد اولان آدلاردان كى منيم و چوخلارينين نوكرليخ و كوله ليخ نشانه سى دير نيفرتيم وار.بو آدى هر گون داشيديغيمدان اوزوم نن زهله م گئدير.بو آد منيم و بير ميلتين نوكرليخ نيشانه سيدير!بو آدلار نه ايفتيخار بلكه اوتانج سببى دير.يئكلديم ايلك ايشيم بو نوكرليخ نيشانه سى اولان آديمى دئيشه جه يم.

آتام باغيرا باغيرا اوستومه گلدى:يوموراق و سيله لرى اوزومو قيزيشديرردى،سسين ائشيديرديم كى دئردى:فيكير ائليرسن بيلميرم نيه مچيده و هئيته گلميرسن؟ايكى دنه كيتاب اوخويوبسان ايندى منه آغيل اورگه ديرسن؟بو توپلومدا ياشاماغا ميلتدن بير رنگ اولماليسان!هامى نين ايچينده بير سن بورنوز چيخاردا بيلمسن.آنام آغلييب و اوزون اوستومه آتدى و آتاما آند وئردى كى سن آلاه دا بس دير.آتام دئينه-دئينه ديشاريا هئيته سارى چيخدى و آنام آغليا -آغليا دوداقلاريم نان گلن قانى سيليردى.او آغليا-آغليا دئيردى :هر بيلديغين شى يا هر آغزينا گلديغين سوزو دئمزلر.او آلاها يالواريردى كى غلامحسينه بير شى اولماسين هئيته بير كله قند و ١٠ مين تومان نذير وئره م.

قهرمان قنبرى


No comments: