Jul 2, 2015

ائشکلیک گونلریمدن(2)

درویش اوغلو

قنبر خداحافظ لیک ائتمک اوچون من ایله ال وئردیگینده، قاپینین آغزیندا بیر ایکی ثانیه دایانیب، آنلاملی بیر باخیش ایله گؤزوومون ایچینه باخاراق:

- اؤزوندن مواظب اول!
 دئدی.
 قاپینی باغلاییب، قاینالتی میزینی ییغیشدیرماق اوچون میطباغا گیردیم. الیم- گؤزوم ایشده ایکن، بئنیمده مین بیر فیکیر کئچیردی. بئنیمین ایچی آری یوواسی کیمی ایدی. فیکریمی بیر یئره ییغابیلمیردیم. اؤزومده بیر آنلامسیزلیق، هئچلیک، دگرسیزلیک و اؤنمسیزلیک حس ائدیردیم.
" کشکه آنیتایا اؤزومو بیر" اینتلکتوئل" یوخ، ساده بیر انسان کیمی گؤسترسه ایدیم، یوزلرجه کامیون شوفریندن بیری کیمی.  یالانچی رول اوینایاراق اینتلکتوئللیک اداسی چیخاردابیلمک اوچون بئله، بیر ایکی - اوچ کلمه اوخوموش اولماق گرکلی دیر. قادین بیر آلمانلی اولاراق منیم کؤلتورومدن، ادبیاتیمدان سوروشور، من ده "والاهی ادبیات دان ائله چوخ باشیم چیخماز" دئییرم. نه یاخچی کی موسیقی دن بیر شئی سوروشمادی. یوخسا ایش پوخدان دا پوخ اولاجاق ایدی."
کیمی فیکیرلشرکن، 
 "نه ائله ییم، بو دا بیر تجربه اولدو. اونسوزدا آنیتا منه بیر داها تلفن ائتمه یه جک، من ده اونا تلفن ائتسم، "بوگون اولماز، ساباح ایشیم وار، اوبیری گون ده هله بیلمیرم. دور،  باخاق، زامانیم اولسا زنگ وورارام....." دئیه باشیندان ائدجک"
 دئیه اؤزومه توخداقلیق وئرمه گه چالیشدیمسا دا، بئنیمده بیر- بیری ایله باغداشماز سورولار روحومو راحات بیراخمیردیلار. او گونه قدر اوستونده محکم دوردوغوم، دوغرولوغونا آرخایین اولدوغوم بیر دگر سیستمی دوزلتمیشدیم. اؤزومه بللی صفت لر تانییب، اؤزومو او اؤزللیکلره مالک بیریسی کیمی بیلردیم؛ "من اراده لی بیر انسانام" ؛ "صادق بیر انسانام"؛ "من یالانچی دگیلم"؛ "کؤکومه، اصلیمه باغلی بیر انسانام"؛ "من هرکسه بویون ایگمرم، یئلین اسدیگی طرفه ایگیلن بیریسی دگیلم....."
آنجاق بیر اؤنجه کی آخشام باشیمدان کئچنلر بو "من" ین آخار قوم اوستونده قورولموش بیر چارداق قدر سارسینتیلی اولوغونو و ان درین اینانجلاریمین بئله بیر قادین ایله یاریم ساعاتلیق دانیشماقلا شک و تردیده معروض قالاجاق قدر کؤکسوز اولدوغونو حس ائدیردیم.  "بس من کیمم؟" سوروسو ذهنیمده جانلانیردی، آنجاق هئچ بیر جواب تاپابیلمیردیم. او گونه قدر بیر چوخ تانیدیغیم انسانی اؤز ذهنیمده دگرلندیریب،  و هر بیرینین یاخچی، یاخود  قولای خصوصیاتلاری اولدوغونو گؤرموشدوم. بیر نئچه یولداش بیر آرایا گلدیگیمزده صحبتلریمیزین چوخو آرامیزدا اولمایانلارین دئدی - قودوسو اولاردی. هله بیرده بیر ایکی استکان ایچدیکدن سونرا غیبتلریمیزه بیر شیرینلیک و مزاح قاریشدیراردیق:
- او یوسوف وار ها، گئده بیر حسود دور، بیر حسود دور کی بیرینی اؤزوندن کئفی ساز گؤرسه، اونون کئفینی پوزماق اوچون الیندن گلنی اسیرگه مز، بیریسینی اؤزوندن داها وارلی گؤرسه، اونا بیر زیان وئرمک اوچون دونیانی ییخمالی اولسا ییخار.
- بیزیم جبراییل وار ها، گئده بئله بیلیر فیل بورنوندان دوشوب، بوتون دونیا اونون نوکرچیلیگینی ائتمه لی دیر. کئچنلرده منه زنگ ووروب بیلیرسن نه دئییر؟ ساباح منیم بیر ایشیم وار، گئدیب بیزیم اوغلانی اوشاق باخچاسیندان چیخاندا ائوه گئتیره بیلرسن؟ آز قالدیم دئیم گئده، قورومساق، سنین ایشین وار دا منیم ایشیم یوخدور؟ تک بو دگیل ها، هر شئینده ائله دیر. بیر کیتابی گؤتوروب واراقلار، ایکی جمله باشیندان، اوچ جمله اورتاسیندان، بیر جمله ده سونوندان اوخویار، اوندان سونرا اؤزونو بحرالعلوم بیلر، هر یئرده فضل ساتماغا باشلار......فیلان بیلگین فیلان کیتابیندا بئله یازیر....
- واه، واه، واه، هله اونون بیر باجیسی وار، بیر آی بورا قوناق گلمیشدی. گئدنده بوتون فلوه مارکتی (بیت بازارینی) ییغیب آلدی پلاستیکلرینه دولدوروب، سوقت آپاریب. دئییرلر آلتی آی دیر الینده آلدی پلاستیکی ایله تبریزین خیاوانلاریندا گزیر کی هامی بیلسین بو آلمانا گئتمیش ایمیش.
- هله دئییرلر بیر شئیدن آجیغی گلنده ده "شایسه" دئیر. ها ها ها ها ، آلماندا اؤیگرندی یالنیز شایسه دیر دا.....
- سیز فرشته خانیمی گؤره سیز ائی، فلومارکت دان جیر- جیندا نی آلار، "بو ژاکتی دوسلدورف دا کؤنیگز آله دن آلمیشام." دئییر.
- هیررررر.....کؤنیگز آله دن بیلیرسن کیملر آلیش وئریش ائدر؟ میکائیل شوماخر کیمی آداملارا بئله اورانین جینسلری باهالی گلر.....
- ها ها ها ها .... صاباحیسی سحر ده گؤررسن کؤنیگز آله دن آلدیغی ژاکت ایله سوسیال آمت (اجتماعی یاردیملار) دا اوتوروب نوبه گؤزله ییر.....ها ها ها
- نه بیلیم والله، بیزیمکیلر آج قارین ایله قودورورلار. ظاهیرسازلیق، قاریندان داها اؤنملی اولوب.
- اونون اؤز آدی بیلیرسن نه دیر؟ اونون اؤز آدی زینب دیر. من بیلمیرم زینب ایله فرشته نین نه فرقی وار.....
- نویدین ده آدی اصلینده نقی دیر. گؤتوروب ائله ییب نوید.
- نقی دگیل ائی.... علی النقی دیر. بیزیم کندلرده انناغی دئییرلر. ایندی اولوب نوید بیگ.
- بیر یول بیزیم رسول هامینین یانیندا اونوآقا نقید چاغیردی. طرفه پیچاق وورسایدین قانی چیخمازدی، ها ها ها ها .....
- رسول دا او دله دوزلردن دیر ها.....بیرینده بیر ضعف تاپسا اورانی اوقدر دئشر، طرفین تومانینی چیخارتمایینجا بیراخماز.
- آمما چوخ قورخاق و یالتاق دیر. بیریسیندن ده قورخوب ائله سه ها، اونون یانیندا سیچان کیمی اولار.
- هله هله آلمانلی  بیر قیز، بیر آرواد گؤرنده بئله یالتاقلیغا باشلار. گئده بئله بیلیر دونیانین آروادلارینین هامیسی اونا وورولوب. واه واه، گولمک اداسی چیخارداندا آغزی قولاقلارینین دیبینه جن آچیلار، ساپ ساری دیشلری آدامین گؤزونو چیخاردار. او ایگری گؤزو ده داها ایگریلر.... آروادلاردا اونو سریرلر، اودا بئله بیلر اوندان خوشلاری گلیر.
- اوگون کباب چکمه گه گئتدیگیمزده، گئده منیم اؤز یانیمدا بیزیم مونیکایا سولانیردی. بیر ایکی استکان دا ایچمیشدیم. گئده نی توتوب چکدیم بیر قیراغا،خیرتلگیندن توتوب،  دئدیم گئده منه باخ، بوردا اورمانین اورتاسیندا توتوب قورت قوزونو بوغان کیم بوغارام ها سنی.....! اوندان سونرا سسین سالدی ایچینه، آدام کیمی بیر قیراقدا اوتوردو.
- یوخ، ائله دگیل، حیوان بالانین حقارت عقده سی وار....نه ایله سین.

مطباقدان چیخارکن قارشی دووارداکی آینادان باخان آدام تحقیر ائدیجی باخیشینی گؤزومون ایچینه تیکدی:
- بس سن؟
آینانین قاباغیندا دایانیب دوردوم. اؤز سوروسو ایله اؤزونه جواب وئردیم:
- بس سن؟
- سن ده نه قدر ضاهیرسازلیق وار؟ سنده نه قدر یالتاقلیق وار؟ سنده نه قدر حسودلوق وار؟ سن نه قدر قورخاقسان؟ سن نئجه آروادرلارا یالتاقلیق ائدیرسن؟..سن نه قدر یالانچی سان؟ ...
آیناداکی آدام سوسدو. دئمه گه بیر سؤز تاپا بیلمه دی.
ایچیمده کی "من" ده سوسدو، آنجاق آغیر بیر سوسقونلوق ایدی بو:
- منده ده بئله خصوصیت لر اولابیلر می؟
- هله من زحمت چکیب بو توپلومون دیلینی اؤیگرنمیشم. بیر چوخو بیر تک دوغرو جمله دوزلده بیلمیز، آنجاق جماعتین یانیندا "وکیلیم ایله دانیشاندا گؤردوم اوبیری طرفدن دفاع ائله ییر، ووردوم آغزینا." دئیه فخر ساتار. دئملی بو آدام بو توپلومون دیلینی اؤیگرنمیش، بیرده حقوقی سیستمینی یاخچی بیلیر! حقوق دیلینی ده باجاریر! آفرین ...آفرین...
- اوتوز ایلده بیر دیل اؤیگرنیبسن، سنه ده آفرین،  بئله گئدرسن، گلجک یوز ایلده بلکه قولاقلارین بیرآز قیسسالا،  آداما بنزه یه سن!
پنجره دن گلن بیر پیشیک چیغیرتیسی دقتیمی چکدی. بیر قارا پیشیک بیر آغ پیشیگی قووالاییردی. آغ پیشیک قورخوسوندان چیغیرا چیغیرا حاصارین اوستونه دیرماندی. آنجاق اوردا بیردن بیره جسارتلندی. دؤنوب آردیندان دیرمانماغا چاغیشان قارا پیشیگی اورتادا جیرماقلاماغا باشلادی. بو یول  قارا پیشیک چیغیرا چیغیرا آشاغی دوشن کیمی، وار گوجونو دؤرد ال – آیاغینا ییغیب قاچماغا باشلادی.
- گؤرسن بونلار دا "من" داعواسی می ائله ییرلر؟
دئیه ذهنیمدن کئچدی.
 فیکریمجه اونلار "من" داعواسی ائتسه لر بئله اونلارین "من"ی بیزلرینکیندن فرقلی اولمالی دیر. اونلار "بو بؤلگه نین سیچانلارینا "من" حاکیمم، "سن" یوخ"، دئیه دیدیشیرلر. بیزلر ایسه بیر چوخ یئرده یالانچی بیر "من" اوچون او بؤلگه نین سیچانلارینین دا خئیریندن کئچیریک، آیری بیر یئرده ایسه گئنه او یالانچی "من" اوچون مین ایلده یئییب قورتارابیلمه یه جگیمیز قدر سیچانا صاحب چیخماق ایسته ییریک.
ایچیمده بیر ساواش باشلامیشدی. ایچیمده کی "من" ی سورغو سئوالا چکمه گه باشلامیشدیم. ایندیه دک آنجاق اؤزگه لرده گؤرمک ایسته دیگیم اؤزللیکلری اؤزومده آختاریردیم.
- آها، گنج یاشلاریمدا، من ایله چاغداش اولاراق آلمانا  گلن گنجلردن بیر پاراسینین بو توپلوما اویماغا چالیشدیقلارینا، اؤزلرینه قیز یولداشی تاپدیقلارینا آغزیمی بوزوب، تحقیر گؤزو ایله باخماغیم، دئمک کی اصلینده اؤز باشاریقسیزلیغیمی اؤزومدن گیزلتمک اوچون، حسادتیمی تحقیر ائتمک شکلینه چئویرمیش اولدوغوم ایدی؟!
- اونلاردان بیر پاراسینین اونیورسیته یه گئتدیکلرینه، باشاریلی اولدوقلارینا قارشی اولان قیسقانجلیغیمی ایسه، "اه، گئده پروفسور بئله اولسا، سونوندا بیر پوخ دگیل" دئیه اؤزومدن گیزلتمه گه چالیشمیشام.
- آلمانیایا تازا گلدیگیم ایللرده بو توپلومون گنجلرینه، "بونلار سکس شاپلار دا گزدیکلرینین یئرینه کارل مارکسین، فریدریش انگلسین کتابلارینی اوخومالی دیرلار" دئیه تعیین تکلیف ائتدیگیمه قارشین، کئچن اوتوز ایلده، بیر یول بئله شهر کیتابخانیاسینا گیرمه میشدیم، باخیم گؤروم بو بت قاییریب پرستش ائتدیگیم آداملارین یازدیقلاری دوغرودان دا ایکینجی - اوچونجو الدن منه تحویل وئریلن لردیر می....؟ یوخسا منه بو آدلارآلتیندا  آیری آداملارین فیکیرلرینی قبول ائتدیریبلر؟ او آدامین ایللر بویو کؤلن شهرینده یاشادیغینی، بو شهرده "راینیشه پست" آدلی بیر قزته نین باش رداکتورو اولدوغونو ائشیتمیشدیم. آنجاق اوتوز ایلدن بری بو شهرده یاشادیغیما قارشین، ایکینجی – اوچونجو الدن بئنیمه دولدوروموشلار ایله یئینمیش دیم. بو فیکیرلری منه قبول ائتدیرنلرین ده  او آداملارین یازدیقلارینی اؤز یازدیقلاری دیلده  بیرینجی الدن اوخویابیله جک گوجلری اولمادیغیندان، اوتوز ایلده بیر یول اولسون او کیتابخانایا گیرمه دیکلریندن، آرخایینلاشماغا باشلادیم. اؤزوم ایله قییاسلادیغیمدا، اونلارین دا "من مارکسیستم" دئه دؤشلرینه دؤگدوکلرینده، اصلینده "من "طبریست ام، من به آذین ایستم، من حکمتیستم، من فیلان ایست، یوخسا بهمان ایستم" دئمکلری گرکدیگینی فیکیرلشیردیم. عربجه بیلمه یه ن، یازیب اوخوماق باشارمایان، قران دا یازیلانلارین نه دئمک اولدوغونو آنلایابیلمه ین کور،  فاناتیک بیر مسلمان ایله منیم فرقیم نه اولابیلردی؟
- یوخ، بالام، دئیه سن منده ده ظاهرسازلیق وار ایمیش، منده ده قیسقانچلیق وار ایمیش، منده ده قورخاقلیق، یالتاقلیق، استفاده چیلیک..... ایندیه قدر آنجاق اؤزگه لرده گؤرمه گه چالیشدیغیم قولای خوصوصیتلرین هامیسی ....په.....پاهووووو!
آینادیکی آدام تحقیر ایله گؤزومون ایچینه باخیب دوداغینی بوزدو:
- اونلار سنین قدر آخماق دئگیللر. اونلار اوزلرینده کی ماسکی ساخلاماغی یاخجی باشارارلار.
آنیتادان اومودوم اوزولدوگو کیمی اؤزومدن ده اومودسوزلاشماغا باشلادیم." "من"، "من" دگیل ایمیشم" دئیه فیکیرلشمه گه باشلادیم. اوگونه قدر منیم باخیشیما گؤره عیبی، ایرادی، قولای خصوصیتی اولمایان بیر انسانا توش گلمه میشدیم. بیر تک اؤزومو بونلاردان استثنا بیلردیم. آنجاق ایندی "من" ده اوبیریلر کیمی بیریسی اولدوغومو حس ائدیردیم.
اونسوز دا، پاییزین گلمه سی و هاوالارین سویوماسی ایله بیرلیکده باشلایان دپرسیونوم، بو فیکیرلرایله بیر قات داها آرتدی. کامپیوترین باشینا اوتوردوغومدا، آرتیق اینترنته گیریب   زینگلز صفحه لرینده  تانیشابیله جگیم بیر قادین آخدارماق یئرینه،
 "من ده اوبیریلر کیمی بیرییم، چوخ یاخچی ایندی نه ائله مه لی یم؟"
دئیه باشلایاراق یازماغا چالیشیردیم.

دسامبر آیینین اورتالاریندا، داریخمادان آرتیق نه ائده جگیمی بیلمه دیگیم گونلرین بیرینده تلفن زنگ ووردو. آنیتانین سسینی ائشیتدیگیمده تعجب و هیجاندان سؤزومو ایتیردیم. نه دیئه بیله جگیمی بیلمیردیم. آنجاق آنیتا چوخ راحاتجا، ایسدی قانلی و محبتلی دانیشماغا باشلادی.
- بیلیرسن، من دوکترا تئزیمی یازماق ایله مشغولام، چوخداندیر سنه زنگ وورماغا فیکیرلشیردیم، آنجاق زامان تاپابیلمیردیم.
اورگیم چیرپینماغا باشلادی. گؤزلریم ایشیقلاندی، جانیما تازا روح گلمیش کیمی اولدو. سؤزون آراسیندا "نه زامان گؤروشه جییک؟" دئیه سوروشماق اوچون بیر ایلیشیک آخداریردیم. آنجاق آنیتا عینی راحاتلیغی ایچرسینده قیساجا کئچن ایگیرمی گونده باشیندان کئچنلردن، دوکترا تئزی اوچون نه کیمی قایناقلار آخداردیغیندان، بو قایناقلاری تاپماغین چتینلیگیندن فیلاندان صحبت لرینین آراسیندا بیر ده "فیروزو تانییرسان می" دئیه سوروشدو. فیروز آدیندا بیریسینی تانیمیردیم. آنجاق بیر لحظه قارنی یوغون، باشی داز، یئکه بورون، آغزیندا چیئنه دیگی باتمان یاریم ساققیز ایله بیرلیکده توپورجه گی داشلاناراق، سیگار توسدوسوندن سارالمیش بیغلارینین آلتیندا قارا دیشلری گؤزه باتان، دؤشونه دؤیدوردوگو لوت بیر آرواد شکلینی هرکسین گؤزونه سوخماق اوچون کؤینگینین یاخاسینی گؤبه گینه دک آچان، لات بیر کیشی نین تصویری گؤزومون قاباغیندا جانلاندی. اختیاریمدان آسیلی اولمایاراق
- سنه بیریسی بیر سؤز دئسه، قارنینی جیرارام
 دئیه جواب وئردیم.
آنیتا ائشیتدیگینی آنلایانمامیش کیمی تعجب ایله،
- نه؟
- فیروز سنه اذیت فیلان ائله مه ییب ها؟
- من سنین دئدیگینی آنلایابیلمیرم. نه دئمک ایسته ییرسن؟
- فیروزو سن هاردان تانییرسان؟
- منیم اوتوردوغوم ائوین آلت قاتیندا کیوسکو وار، سنین وطنداشلاردان اولدوغو اوچون بلکه تانییارسان دئیه فیکیرلشدیم. چوخ یاخچی بیر جواندیر. کؤلن اونیورسیته سیندن اینفورماتیک قورتاریب، آنجاق ایش تاپابیلمه ییب، بیر آرا تاکسی ایشلدیب، سونرا دا اؤزونه بیر کیوسک آچیب.......چوخ یاردیم سئور بیر جواندیر، دکترا تئزیمی یازماقدا بوتون فورمات ایشلریمده، متن دوزلیشلریمده منه یاردیم ائدیر.
آنیتانین نه دئدیگلرینین قالانینی ائشیتمیردیم آرتیق. باشیمدان سویوق بیر دویغو آشاغی ساری یاییلماغا باشلادی. سول الیم ایله باشیمی سیغاللایارق، "آهان، بونون آیری یولداشی دا وار...." دئیه فیکیرلشیرکن، سانکی ایگیرمی ایل بیرلیکده یاشادیغیم کبینلی  آروادیمین ایگیرمی ایل بویونجا مندن گیزلین بیر اویناشی اولدوغونو ائشیتمیش کیمی آغیر بیر سوسقونلوق و سویوقلوق اورگیمی دولدوردو. نئچه دقیقه هئچ بیر شئی دئمه گه، هئچ بیر شئی سوروشماغا جرئت ائتمه دیم. آنیتا ایسه منیم سوسغونلوغومو آنلامیش کیمی،
- سنه نه اولدو؟ یاشاییرسان می هله؟
- هئچ
- چوخ یاخچی، فرصت تاپدیغیمدا سنه تلفن ووراجاغام.
- آخشامین خیر اولسون
دئیه تلفون دانیشمامیزی کسدیم.
اختیارسیز یاتاغین اوستونده اوزانیب گؤزلریمی سقفه تیکدیم. سحردن آخشاما داش داشیمیش کیمی یورقونلوق حس ائدیردیم. نفسیم آغیر گلیردی. بئنیمده،  تانیمادیغیم، کیم اولوب، نه چی اولدوغونو بیلمه دیگیم، شکلینی قیافه سینی تجسم ائده بیلمه دیگیم بیر فیروز ایله دانیشیقلاریم، اؤز اختیاریمدا اولمادان بئنیمی یئییردی.
- گئده، باشی - گؤتو بیر کیوسکوچوسون دا، آخی سن کیمسن کی...؟
- جهندم اول گئده، من اینفورماتیک مهندسی یم.
- منه باخ، منیم عشقیمین آراسینا گیرمه ها، یوخسا پیس گؤررسن!
- گئده، آنیتا منیم نئچه ایللیک یولداشیمدیر. سن هایاندان تاپیلدین چیخدین؟ سیسقا!
- دئمک کی آنیتا سنی سئومیر، یوخسا نیه منیم ایله تانیشیردی؟؟؟؟
- سن هله اوشاقسان، او سنی سرییبدیر.
- من انسانی بیر باخیشدا تانییرام، آنیتا اوبیری آروادلار کیمی دگیل!
- آنیتا ایله بیرده تلفونلاشسان، قارنیوی جیرارام ها.......

گونلر، هفته لر، آیلار بئله کئچدی. هفته ده، اون گونده بیر یول آنیتا تلفن ائدیردی. بیر- ایکی کلمه ساغدان سولدان دانیشیردیق. بیر یکی یول دا بیرلیکده قهوه، یوخسا بیره ایچمه گه گئتدیک. آنجاق قهوه خانادان، یوخسا میخانادان چیخینجا، "گؤرووشه ریک" دئیه آییریلدی. زیلوسترن (ایل باشی) گئجه سی اوچون آلت اشتات (کؤهنه شهر) ده تاراققا پاتلاتماق اوچون قرارلاشدیغیمیزدا، "یعقین کی زیلوسترن گئجه سی چوخ ایچر، تاراققا پاتلاتاندان سونرا دا گئجه نین گئج ساعاتلاری اولار،" گل گئدک منیم ائویمه" دئیه راضیلاشدیرارام" فیکری ایله اؤزومو سئویندیرمیشدیم. آنجاق او گئجه ده هر زامان گؤروشدوگوموز کیمی کئچدی. آلت اشتات دا بیر میخانادا قرارلاشدیق، بیر ایکی بیره ایچدیکدن سونرا  دویتچ کؤرپوسونون باشیندا ییغیشمیش جماعاتاتین ایچینه قاریشدیق. سس،  کوو،  شولوقلوق بیر بیرینه قاریشمیشدی. ایگنه آتماغا یئر یوخ ایدی. جوانلی -قوجالی، آروادلی - کیشی لی، سانکی کؤلن شهرینین هامیسی اورایا ییغیشمیشدی. "شولوقلوق ایچینده بیربیریمیزی ایتیره ریک" دئیه ماهانا ائدیب، آنیتانین الیندن توتماق ایسته ییردیم. آنجاق الیمین سویوق و ترله میش اولدوغو اوچون  "الیندن توتارسام مندن چیمچه شر" قورخوسوندان اؤزومه بئله بیر جسارت وئره بیلمیردیم. ساعات اون ایکی یه یاخینلاشدیقجا اؤزومده قورخو ایله قاریشمیش بیر هؤوشنه حس ائدیردیم. "آنیتانی بو گئجه ائوه آپاراجاغا" فیکرینین هؤوشنه سی ایله تانیمادیغیم بیر قورخو بیربیرینه قاریشمیشدی. ساعات اون ایکی نی چتینلیک ایله گؤزله یه بیلدیم. بیرینجی تاراققا پاتلایینجا آنیتا دؤنوب قوللارینی بوینوما سالیب، اوزومدن اؤپرکن "تازا ایلین موبارک اولسون" دئدی. من ایسه تاراققالارین پاتلاماسی ایله عراق ین ساواش اوچاقلارینین شهری بمبلادیغی قورخوسوندان آز قالسین شالواریمی باتیراجاق ایدیم. بوتون بدنیم تیر- تیر تیتره ییردی. جانیما بیر اوشوتمه دولموشدو. آیاق اوسته دورا بیلمیردیم. بوتون جماعات "چیغیرا- باغیرا شادلیق و شنلیک ائتمکده ایدی. هرکس پاتلاتدیغی تاراققاسینین نه قدر اوجالدیغینی هاوادا نئچه پارچایا بؤلوندوگونو، نئچه رنگ ده  و نئچه ثانیه ایشیق ساچیدیغینن سئیرینه دالمیش ایکن، من تاراققالاردان چیخان باروتون قوخوسوندان بوغولور کیمی اولوردوم. آنیتا شولوقلوغون ایچینده سئوینجیندن، "هوررا" دئیه باغیراراق تاراققالارینی پاتلاتماقدا ایدی. دقتی منده دگیل ایدی. آنجاق من اؤزومو آیاق اوستونده توتابیلمیردیم. باشیمدان آشاغی یاییلان آغری اورک بولانماسینا، قارین عضله لریمین سیخیشماسینا سبب اولوردو. اورک بولانماسینی توتماغا چالیشیردیم. بیر ایکی دقیقه سونرا آرتیق طاقتیم سونا گلدی. اؤزومو توتابیلمه دیم. سویوق و نم آسفالتین اوستونده اوتوردوم. آغزیمی کؤرپونون بارماقلیقلارینین آراسیندان ائشیگه توتوب آجی آجی قوسماغا باشلادیم. بوتون اوست - باشیم باتدی. آنیتا چیگینیمی اوغوشدوراراق نه اولدوغونو سوروشدو. اونا دا دئیه بیله جگیم بیر جوابیم یوخ ایدی. اؤزوم ده منه نه اولدوغونو آنلایا بیلمیردیم. آنیتا اؤنده من آرخاسیندا، جماعاتین ایچینده اؤزوموزه چتینلیک ایله یول آچا آچا کؤرپونون باشینا دک گلیب، ماریتیم هتل ین قاباغینداکی تاکسی دوراغینا یئتیشینجه یه قدر اؤلوملره گئدیب گلدیم. دوراقدا تاکسی یوخ ایدی. ایلک گلن تاکسی نی گؤزله مک اوچون اوردا دورماق زوروندا ایدیک. آنیتا تاسف ایله اوزومه باخیب، گئنه سوروشدو.
- نه اولدو سنه؟
- بیلمیرم.
خسته خانایا می آپاریم سنی؟
- یوخ، ائوه یئتیشسم یتئر.
- او زامان ایلک گلن تاکسی ایله سن ائوه گئت. حیف اولدو، بو آخشام اریم ایله تانیشدیرماق ایسته ییردیم سنی، ساعات بیرده "دراخن هاوس" میخاناسیندا قراریمیز وار، اورایا گلجک. بو آخشام یاخچی فرصت ایدی، تانیشاردینیز، بیر - ایکی کلمه دانیشاردینیز، او دا اجتماعی موضوعلارا ماراقلی دیر....
ایلک تاکسی نین یاخینلاشدیغینی گؤرونجه، آنیتانین گؤزومدن ایچیمده کئچنلری آوخویابیلمه مه سی اوچون اونون اوزونه باخمادان، حتی ال بئله وئرمه دن
- یاخچی، گئجه ن خیر اولسون.
دئیه آییریلیب تاکسیا ساری قاچدیم.
تاکسینین قاپیسینی آچینجا سوروجوسونو اوزاقدان تانیدیغیمی حس ائتدیم. بیزلردن اولسا ایدی گرک. قارا قاباق، چیرکین بیر کیشی ایدی، آلینینداکی قیریشلارینی ایلک باخیشدا گؤرمه مک امکانسیز ایدی. اوردلاری شیشگین، سانکی هر اوردوندا بیر یومورتا  گیزلتمیش ایدی. چاتیق قاشلارینین آلتیندا، ایکی قارا مینجیق کیمی گؤزلریندن غضب فیشقیریردی. او ایسه منیم کئفلی اولدوغومو ظن ائدیب، اوست باشیما آشاغیدان یوخاری باخاراق:
-  آیاق اوسته دورابیلمیرسن، هر یئرین ده کر- کثافت دیر، منیم ماشینیمی باتیرارسان.
 دئیه منی میندیرمکدن امتناع ائتمه گه چالیشدی.
اؤز دیلیمیزده دانیشاراق:
- قارداش باغیشلا. من کئفلی دگیلم. بیلمیرم نه اولدو بلکه زهیرلنمیشم. اورگیم بولاندی.
بیر نئچه ثانیه فیکیره دالمیش کیمی سول الی ایله شیشگین اوردونون ساغ طرفینی یوخاریدان آشاغی ساری تومارلادیقدان سونرا،  آغزینی یاییب، دوداقلارینی بیر- بیرینین اوستونه سیخاراق ایچیندن اود چیخیر کیمی بیر نفس پوسگوردو. آجی بیر لحن ده:
- یاخچی، مینمه هله، دور بیر آز.
ماشیندان ائنیب ماشینین دالی جعبه سینی آچیب بؤیوک بیر دستمال گئتیریب صندلین اوستونه سردی. بو آرادا آنیتا منه یاردیم ائتمک اوچون یاخینا گلدی. آنجاق اونو گؤرمور کیمی، اؤنمسه مه دیم. اوزونه باخماق ایسته میردیم آرتیق.
تاکسی شوفری آجی بیر لحن ایله:
- یاخچی، اوتور، آنجاق دققت ائله ماشینیمی باتیرما.
باشیمی قاوزاییب آنیتانین اوزونه باخمادان، یالنیز ایستکسیزجه ال ترپتمه سی ایله خداحافظلیک ائدیب، ماشینا اوتوردوم. سون دئدیگی سؤزونو بئینیمده خیردالایا بیلمیردیم.:
"آنلایابیلمیرم، نئجه یعنی بو آخشام سنی اریم ایله تانیشدیرماق ایسته ییردیم......، ارین وارسا منی نیه آوارا ائدیرسن؟ زیرت ها زیرت تلفن، سلام، نه وار نه یوخ؟ نه لر ائله ییرس؟ بوش بوش سؤزلر، اوندان سونرا خداحافظ. گل گئدک میخانادا بیره ایچک، اوندان سونرا خداحافظ. گل گئدک راینین قیراغیندا گزک، اونان سونرا خداحافظ. گل گئدک ایل باشیندا تاراققا پاتلاتاق، اوندان سونرا دا سنی اریم ایه تانیشدیریم......قوی جهندم اولسون ائی......من آخماغام، پاخمایام نه یم؟ ..........آلله اکبر ها.......آنلایابیلمیرم. آخی  بو آرواد سویقونچودا دگیل، ایچدیگی بیره سینین پولونو اؤزو وئریر. مندن گؤزلدیگی بیر شئی یوخدور......یا دلی دیر، یا دا منده آختاردیغی بیر شئی وار......مندن نه آختارابیلر کی؟
"سنی اریم ایله تانیشدیرماق ایسته ییردیم." دئمک کی ارینه ده مندن بیر شئلر دئییب......"
تاکسی شوفری دؤنوب گؤزونون قیراغی ایله  بیر اوزومه باخدی. آنجاق گؤزونون گوشه سیندن ائله بیر گولوش فیشقیردی کی من ده اونون ایله بیرلیکده قاققا باسیب گولمه گه باشلادیم. نئچه دقیقه ایکیمیزده گولوردوک. آنجاق نیه گولدوگوموزو بیلمیردیم. دئملی بو بئینیمده کئچنلری اونون دا ائشیده بیله جگی قدر اوجا بیر سس ایله فیکیرلشمیشم.
- همشهری، نئچه ایلدیر بورداسان؟
- ایل اولماییب.
- آلمان کولتورونو تانیمیرسان دئیه سن.
- تانیمیرام.
- او خانیم ایله تازا تانیشیبسان؟
- اوچ آیدیر منی آوارا ائیله ییب.
- اقامت سورونون وار؟
- یوخ، آمما ائله - بئله تانیشدیق دا.
- هن، سن بیزلره باخما، قیزی گؤزو باغلی اره وئررلر، آلماندا بیر آرواد بیر کیشینی یاخیندان، یاخچی تانیمازسا اونا یاخین گلمز. اوره گی قیزدیقجا، اطمینان تاپدیغی اؤلچوده یاخینلاشار.
- بابا، اوچ آیدان سونرا ایندی "منیم اریم وار" دئییر.
- او سنی سیناماق ایسته ییر.
- نئجه یعنی سیناماق ایسته ییر؟
- سنینن اونو دوغرودان سئودیگینی، یوخسا یالنیز آلتینا باسماق ایسته دیگینی سیناماق ایسته ییر؟
- بیر کیشی سئودیگی آرواد ایله یاتاغا گیرر دا!
چوخ تمکینلی بیر لحن ایله:
- سئودیگی آرواد ایله، بلی!........... اونو سئودیگینه آرخایینسان؟
- هن!
- نه تهر سئویرسن؟
- سئویرم دا!
گئنه آغیر و تمکینلی بیر لحن ده:
بیر اوشاغین نه نه سینی سئودیگی کیمی سئویرسن؟ یوخسا بیر کئچینین بالاسینی سئودیگی کیمی؟
- ها ها ها ها ....
آجی بیر لحن ایله:
- گولمه، جیددی سوروشورام. سئومگین نه دئمک اولدوغونو بیلیرسن می؟ بیر اوشاق دا دوندورمانی سئودیگیندن سؤز ائدر. بیر جوان دا بیر موزیک پارچاسینی سئودیگیندن دانیشابیلر. بیر چوخ انسان بیر فوتبالیستی، یوخسا بیر سیناما آکتؤرونو سئودیگینی ادعا ائدر. شکنجه اولونموش بیر انسان دا سونرالاری شکنجه ائله یه نه اورک باغلایابیلر و اونو سئودیگینی ظن ائدر. کیشیلردن بیر پاراسی آروادینا هر گون اهانت ائدر، توهین ائدر، حتی دؤگر، آنجاق آرواد آیریلیب یاخاسینی قورتارماق ایسته دیگینده، کیشی اونو سئودیگینی حس ائدر، "سنی سئویرم" دئیه یالوارماغا باشلار.  سن سئومکدن دانیشدیغیندا نه یی قصد ائدیرسن؟
هئچ بیر شئی دئیه بیلمه دیم، آنجاق دوداغیمی بوزدوم.
- یئتیشمیش بیر انسانین سئومگی بونلارین هامیسیندان فرقلی دیر. سئومک پایلاشابیلمک دیر، سئومک مسئولیت حیسسی دیر، سئومک بیر انسانی آنلایابیلمکده دیر، سئومک بیر انسانین دویغولارینی، بیر بیگانه کیمی یوخ، اونون حس ائتدیگی کیمی حس ائده بیلمک گوجودور. سئومک بیر انسانی، بوتون یاخچی و قولای خصوصیالتارینا قارشین بیر بوتون اولاراق، وار اولدوغو کیمی قبول ائده بیلمک گوجو دور. سئومک بیر انسانین ساغلیغینا، شنلیگینیه، راحالیغینا امکان یارادابیلمک دیر. سئومک بیر وارلیغین دیرچلمه سی، گلیشمه سی اوچون امکان یارادابیلمک گوجودور.
اؤز ایچیمده:
- پاهوووووو!؟
- بوتون بونلار بیر یانا، او سنین، اونا بولاشدیرابیله جگین، بیر خسته لیگین اولمادیغینی هاردان بیلسین؟ هپاتیت؟ ائدز؟ سفلیس؟ اونون ایله نه جور بیر یاشاییش سوره جگینی هاردان بیلسین؟ اورک باغلاسین، سنه یاخینلاشسین، سن ایله یاتاغا گیرسین، سونرا بیراخیب گئدیب آیریسنی آختاراسان؟ نه جور اطمینان وئره بیلیرسن اونا؟ سندن ساغلیق تستی ایسته سین؟ یوخسا اؤزون ساغلیق تستی ائله تدیرجک قدر مسئولیت حیسینه صاحب سن؟ بو ایشی اؤزون گؤررسن. یوخسا...... هله گؤزله، گؤزله، چوخ گؤزله یجکسن!  سونوندا او سندن ساغلیق تستی ایسته یه جک اولورسا، دئملی سنین بو قدر مسئولیت دویغون  اولمادیغینی دا سینامیش اولاجاق. او سندن ساغلیق تستی ایسته یه جک یئره قدر گتیررسن ایشی، او زامان .......یوخودا گؤررسن.
- من ده اوندان ساغلیق تستی ایسته رم.
- آرخایین اول، اونون ساغلیق تستی حاظیر دیر. سنین مسئولیت دویغونو سیناماق ایسته ییر.
ایندیه قدر بئله بیر شئی ذهنیمه گلمه میشدی. بیر آرود ایله تانیشدیغیمدا، ایلک ذهنیمه گلن شئ، اونون ایله یاتاغا گیرمک اولاردی. بیر آروادین دا مندن گؤزله دیکلری اولابیلدیگینی، دیله گئتیرمدیگی دویغولاری اولابیلدیگینی بیلمیردیم. بیر آرواد ایله یاتاغا گیرمگیمین سونوجلاری اولابیله جگینی، بو سونجلار قارشیسیندا مسئول اولاجاغیمی، هئچ بیر زامان ذهنیمه گتیره بیلمه میشدیم. آنجاق بیر کیشینین آرواددان گؤزله دیکلرینی بیلیردیم. تاکسی شوفرینین بو دئدیکلرینین جوابیندا بیر سؤز تاپابیلمدیم. باشیمی آشاغی سالیب، ساغ الیمین باش بارماغینین اوجو ایله سول الیمین باش بارماغینین دیرناغینی سیغالاماغا باشلادیم. "من نه قدر قانماز بیر ائششک ایمیشم. آی آلله، بو قاراقاباق، چیرکین تاکسی شوفرینین ایچی نه قدر درین ایمیش؟ ظاهیری نه قدر گوبوت اولسا دا ایچی چوخ یوموشاق، چوخ مهربان بیر انسانا بنزییر." دئیه فیکیرلشیردیم. اوزون بیر سوسقونلوقدان سونرا ناویگاتسیون "مقصدینیزه چاتدینیز" دئیینجه شوفر ماشینی ساخلادی. تاکسی متر ده گؤردوگوم اون اوچ اویرو قیرخ سنتی حسابلاماسی اوچون بیر ایگیرمی اویرولوق وئردیم. تاکسی شوفری اون ایرو گئری وئررکن،  گئنه او آجی لحنی ایله:
- اون اویرو یئتر.
 دئییب، دریندن باخان مینجیق کیمی گؤزلرینی گؤزومون ایچینه تیکتی:
- گئت بیرآز فیکیرلش!

بو ناغیلین اوچونجو بؤلومو وار

No comments: