علی آقا واحد دن بیر غزل - قارا گؤزلردن!

س. حاتملوی

معاصر آذربایجان شعرینده سئودیییم شاعیرلرین بیری ده واحد دیر. بیر چوخ شعر هوسکاری کیمی منده واحدین غزللری ایله بویویوب، بویا- باشا چاتمیشام. آذربایجان غزل اوستادلاریندان بیری اولان علی آقا واحد، ان کیچیک یاشلاریمدان منی آذربایجان شعرینه باغلایان شاعیرلرده ن بیری دیر. واحدین غزللری آذربایجان موسیقیسی و موغامی ایله سیخی باغلی دیر. آدی هر زامان یاشار موغامات خواننده میز حاجی بابا حسین اوفون اثرلرینده یاشایان واحدین غزللری، بو بویوک اوستاد و دیگر مغنی لریمیزین ماهنی لاریندا، اؤلکه میزین بئله اوجقار یئرلرینه گئدیب، چاتمیشدیر.

اوستادین، «قارا گؤزلردن» غزلینین:

عشق زنجیرینه یوز دفعه گرفتار اولسون،
منه هر کیم دئسه، ال چک بو قارا گؤزلردن

بیتی، منی گنجلیک چاغلارینا، تبریزین نجات مدرسه سینده درس اوخودوغوم ایللره آپاریر. بو بیتی بیرینجی دفعه او مدرسه ده درس اوخودوغوم ایللرده، او زامان حؤرمتلی معلم و اوستادیم اولان فریدون قره چورلونون ادبیات درسینده آپاریلان مشاعره ده، بیر دوستدان ائشیتدیم. مشاعره بیتدیکده ن سونرا، ایندی تاسفله حیاتدا اولمایان او دوستومدان، بو بیتی منیم دفتریمده یازماغینی خواهش ائله دیم.

آذربایجان غزل ینده مستثنی یئره مالیک اولان واحد، آذربایجان یاشادیقجا، شعره، غزله هوسکار اولان آذربایجانلیلارین، اوره ک لرینده و یادداشتیندا یاشایاجاقدیر.   

   

علی آقا واحد

قارا گؤزلردن!

گؤزه لیم، گول یاناغین قیرمیزی دیر مخمردن!
دوداغین لعلدن آرتیقدی، سینه ن مرمردن،
گولده وارسا نه گؤزه للیک، گؤزه لیم.، سنده ده وار،
دی گؤره ک، بیر نه یین اسکیکدی گول- احمردن؟
دهنین غنچه، بئلین اینجه، اوزون گول کیمی تر،
ساچلارین سونبولو آواره سالیب چؤللردن
اهل- عشقه بو قدر ناز ائله مک یاخشی دئییل،
بسدیر، انصاف ائله، ال چک بو یامان شاکردن!
نئجه اغیاره باخیرسان، گؤزه لیم، قان اولماز،
گؤز اوجویلا بیزه ده بیر نظر ائتسن هردن
عشق زنجیرینه یوز دفعه گرفتار اولسون،
منه هر کیم دئسه، ال چک بو قارا گؤزلردن
بو پری چهره لر عشقینده گؤزه ل دیر، واحد،
غزلی سن دئیه سن، من اوخویوم از بردن