Oct 12, 2014

کؤنلومه تبریز دوشدو

سلیمان روستم  (۱۹۰۶-۱۹۸۹)-حسن ایلدیریم

خیانت اولماز

هر کس اؤز خئیرینی گودسه دونیادا
آرادا، البته، محبت اولماز.
اوره‌کلر دیل تاپسا، بیرگه دؤیونسه
اورتادا کین اولماز، کدورت اولماز.
یئرسیز بر-بزه‌یه بورونن کسده
آغ گونده ان باشدا گؤرونن کسده
دار گونده خلوتده سورونن کسده
ذره غئیرت اولماز، صداقت اولماز.
بیزیم دونیامیزین جلالینا باخ
ایگیدلر بسله‌ییر هر ائو، هر اوجاق
اونلار گؤزل بیلیر دؤیوشدن قاباق
دؤشونه دؤینده جسارت اولماز.
یاییلسین دونیایا بو سس، بو خبر
سارسیتسین دوشمنین قلبینی کدر
بیزیم نسیل‌لرده تا قبره قده‌ر
وطنه، میللته خیانت اولماز.
آذربایجاندان آیریلماز
گؤزللیک، اینجه‌لیک، سئوگی، وفا اینساندان آیریلماز
جوشان سئللر، آخان چایلار نئجه عماندان آیریلماز.
اوزاق دوشسه گؤزومدن دیلبریم، کؤنلوم دؤز‌ر، چون کی،
سئونلر بیلمه‌میش اولماز، ووصال هیجراندان آیریلماز.
وفاسیزدان وفا اومما، وفادان یوغرولوب عشقیم
جانیندان آیریلار عاشیق، فقط جاناندان آیریلماز.
بوتون دونیا یئریندن، محوریندن قوپسا آیریلسا،
سلیمان روستم”ین قلبی آذربایجاندان آیریلماز.
باخدیم
من اؤزومدن اوول یول گئدنلرین
جیغیرینا باخدیم، ایزینه باخدیم.
وطنین، میللتین دار گونلرینده
جرعتله اؤلومون گؤزونه باخدیم.
سئیر ائدیب، یوردومون گولزارینی من
خزانسیز، ابدی باهارینی من
خوشبخت نسیل‌لرین ووقارینی من
ساندیم کی، بختیمین اوزونه باخدیم.
یانیندان کئچمه‌دیم مئیخانه‌لرین
معماری آدلاندیم کاشانه‌لرین
باخمادیم سؤزونه بیگانه‌لرین
اؤز شاعر قلبیمین سؤزونه باخدیم.
سنی ایستر
کؤنلوم یئنه مین شووقیله جانان، سنی ایستر
آند اولسون عزیز جانینا کی، جان سنی ایستر
چکمز اته‌ییندن الینی، چکسه‌ده هیجران
ائیلر جانینی جانینا قوربان، سنی ایستر
ایلهام آلیرام اینجه سسیندن، نفسیندن
تک من دئییلم، شانلی بو دؤوران سنی ایستر
سن قلبی تمیز، آلنی آچیق، شوخ گوزه‌لیم سن
ائللرده اولوب حوسنونه حئیران سنی ایستر
ایش‌دیر، منه اوز وئرسه فراغیندا کدر، غم
کؤنلوم یئنه‌ده دردینه درمان سنی ایستر
گون کئچسه زامان کئچسه وفاسیز بئله اولسام
اوول کی محبتله “سلیمان” سنی ایستر!
کؤنلومه تبریز دوشدو
گلدی مین دیللی باهار کؤنلومه تبریز دوشدو
گوللو بولبوللو باهار کؤنلومه تبریز دوشدو
تبریزین دردی منیم دردیم اولوب ایللردیر,
اوردادیر, نازلی نیگار, کؤنلومه تبریز دوشدو
چوخدا دونیادا گوزهل, آدلی شههر مین- مین‌دیر
هر یئرین اؤز یئری وار, کؤنلومه تبریز دوشدو
باجیمی- قارداشیمی, سئوگیلیمی گؤرمهلییم
یوخ, ده‌ییشمز بو قرار, کؤنلومه تبریز دوشدو
من “سلیمان” کور, آراز نغمهلی شاعر بابایام-
چکیرم عالمه جار, کؤنلومه تبریز دوشدو.
 

No comments: