Oct 12, 2014

بیزه نه! – ساتیریک شعر

ﺧﻴﺮاﻟﻠﻪ ﺣﻖ ﺑﻴﮕﻲ (ﺳﺎﭘﻼﻕ)


یاشاییش میللته زیندان اولور اولسون بیزه نه،
یوخسولون حالی پریشان اولور اولسون بیزه نه.
بیز کی اوز قصدیمیزی میللته اعلان ائله‌دیک
اونلارا وعده وئریب جنته مهمان ائله‌دیک
یوخسولون قیسمتینی حوری و غیلمان ائله‌دیک
ایندی بیر عده پشیمان اولور اولسون بیزه نه
میللتین حالی پریشان اولور اولسون بیزه نه
انقلاب ائتمه‌میشیک کار-کاسیبین قارنی دویا
شئنله‌نیب آج- یالواج بورکونو قیقاجی قویا
بیزه نه دخلی جانیم کیم سویولا، کیمسه سویا
خلق اوچون قورخولو دوران اولور اولسون بیزه نه
میللتین حالی پریشان اولور اولسون بیزه نه
اولمایان ایشلری بیز قابیل امکان ائله‌دیک
بیر پارا سؤزلریله عالمی حئیران ائله‌دیک
هوشدوله قوم شه‌هرین مرکز استان ائله‌دیک
بابکین باغری قیزیل قان اولور اولسون بیزه نه
میللتین حالی پریشان اولور اولسون بیزه نه
کیم دئدی کتدلی‌یه، زحمتکشه کؤچسون شه‌هره
اوردا بیکار دولانیب باشینی سالسین خطره
بیز رضا اولماریق اعیانی دوشه دردسره
یوخسولون دیده‌سی گریان اولور اولسون بیزه نه
میللتین حالی پریشان اولور اولسون بیزه نه
گرچه یوخسول‌لارین احوالی کؤکوندن دولاشیر
وارلی‌نین گون گلیری مین قات اولور باشدان آشیر
دئ گؤروم بیر پارا دانقاز بیزه نیچون ساتاشیر
ایشلری ناله و افغان اولور اولسون بیزه نه
میللتین حالی پریشان اولور اولسون بیزه نه
بیرینین آغلی چاتیر قان‌دا سورور، بؤرک ده قویور
بیری دللال‌لیق ائدیر پول قازانیر، خلقی سورور
بیری‌ده روشوت آلیر ایش آشیریر، قارنی دویور
وارلی‌نین آلچاسی تووخان اولور اولسون بیزه نه
میللتین حالی پریشان اولور اولسون بیزه نه
نه زمان بیز دئمیشیک یاغ دوگو ارزان اولاجاق
یاشاییش میللته هر یئرده فراوان اولاجاق
بیز دئدیک بس بئله بو خلق‌ده ایمان اولاجاق
مملکت لاپ بئله ویران اولور اولسون بیزه نه
میللتین حالی پریشان اولور اولسون بیزه نه
گؤرموسوز بیز نئجه بو خلقی مسلمان ائله‌دیک
جومله دیندارلاری بیز شاد و خورامان ائله‌دیک
موسیو وارتان‌لاری دا قائیل قرآن ائله‌دیک
دولانیب ولی‌قلی وارتان اولور اولسون بیزه نه
میللتین حالی پریشان اولور اولسون بیزه نه

No comments: