ینی ایلینیز اوغورلو اولسون


Aug 15, 2014

سیلاح لا ویدالاشماق

عمران صلاحی

احمد آغا دئدی:
-
بیزیم بو گوٍنکوٍ یاشاییشیمیز اوتوروش‌دان یاتیشا چئوریلیب.
دوٍز اوتوروب ایری باخماق یئرینه، ایری اوتوروب دوٍز باخیریق. ائویمیزه تئلویزیون گلندن بری بیزیم یاشاییشیمیزدان, اوتوروش‌دان یاتیشا چئوریلدی. اوّل‌لر صندل یا موبول اوٍستوٍنده اوتوروب برنامه‌لره باخاردیق، سونرا یاواش- یاواش دیوارین دیبینه بیر موٍتککه قویوب اونا سؤیکه‌نیب برنامه‌لره باخیردیق، گوٍن‌به‌گوٍن موٍتککه‌دن سوٍروٍشوٍب قاباغا گئدیردیک. بیر گوٍن گؤردوٍک کی، اوتورماغیمیز یاواش- یاواش اییلیب یاتیشا چئوریلیب. دئمک تئلویزیونا باخاندا موٍتککه‌نی باشیمیزین آلتینا قویوب، دالی اوٍسته اوزانیب قیچ‌لاریمیزی آچاردیق. اونو دا دئییم کی، برنامه‌لرین هامی‌سیندا بو وضعیت اوٍز وئریردی. دئمک اولار، فوتبال موٍسابیقه‌لری، هیجانلی فیلیم‌لر و سریال‌لار بیزی یاتیش وضعیتینه سالاردی. اونا گؤره تئلویزیون فیلیم وئره‌نده عآئیله عوٍضولریندن سوروشاردیم. بو برنامه‌یه موٍتککه ایله باخاجاییق؟ دئمک بو برنامه‌یه باخاندا یئره سریله‌جه‌ییک یا یوخ؟

میصراع:
یئره سریلیب باخیب، حظ آپاراق.
او قده‌ر اوزاناقلی یاشامیشدیق کی، یاواش- یاواش بئله بیر فیکره دوٍشموٍشدوٍک کی، تئلویزیونو ائوین سقفینه نصب ائله‌یک. بلکه بوینوموز آرتروز تاپماسین. خوشبختلیکدن ایل‌لر بویودور کی، تئلویزیون برنامه‌لری‌نین تأثیریندن اوزانیش وضعیت‌دن، اوتوروش حالینا گلمیشدیک. بو چوخ یاخشی بیر زاددیر، اونا گؤره کی، قاباق‌لار اوزاناقلی وضعیت‌ده اولاندا چوخ چتین‌لیک‌لرله اوٍزبه‌اوٍز ایدیک. میثال اوٍچوٍن بیر گئجه سینمایا گئدنده جاماعاتین صفینده بیر کیشی گؤردوٍک. اونون قولتوغوندا بیر موٍتککه وار ایدی. سینمانین ایچینده ده فیلم باشلانجاق، کیشی موٍتککه‌سینی باشی‌نین آلتینا قویوب و اونا سؤیکه‌نرک فیلمه باخیردی.
یوخاری مرتبه‌ده‌کی قونشوموز ائولری‌نین ائیوانیندا  ماهواره آنتئنی قویوب توٍرکیهنین برنامه‌لرینه تاماشا ائله‌یندن بیزیم ده وضعیتیمیز دییشیلیب‌دیر. اونلار مرحمت ائله‌ییب اوزون بیر سیم ده بیزه وئریبلر؛ بلکه بیز ده توٍرکیه‌نین برنامه‌لرینه تاماشا ائله‌یه بیلک. اوندان سونرا یئنه ده بیز موٍتککه‌لیک اولدوق. او قده‌ر اؤز تئلویزیونوموزدا جلب ائدیجی برنامه‌لر گؤرموٍشدوک کی، توٍرکیه تئلویزیونو هر نه گؤستریردیسه بیزه چوخ یاپیشردی. بونو دا دئییم کی، بو برنامه‌لری تاماشا ائتمک یاریمچیق سکته ائلهمه‌یه بنزه‌ییردی. دئمک بیر موٍتککه‌نین اوٍستوٍنه باش قویوب یئره سریلیب برنامه تاماشا ائله‌ین کیمین، ماهواره صاحیبی باشقا کانالا گئتمه‌یه هوس‌لنیردی. بیزیم گؤزلریمیز برنامه‌ده‌کی توریستی یئرلره خومارلانان گمینی بیردن گؤردوٍک، کانال دییشیلیب کئچدی توٍرکیه‌نین راز-ی بقاسی‌نین اوٍستوٍنه.
آخی حاییف دئییل، اؤزوٍموٍزوٍن راز-ی بقا برنامه‌میز اولا- اولا آدام پول خرجله‌یه، گیزلینجه ماهواره آنتئنی قورا و سونرا دا اوتوروب مین جوٍره جان‌سیخیجی قورخو ایچینده توٍرکیه‌نین راز-ی بقا برنامه‌سینه باخا.
بونلارین هامی‌سینی اودماق اولار. اعتراض ائتمه‌یه ده حاقلی دئییلیک. آخی اونلار اؤز مرحمت‌لریندن بیزه بیر سیم وئرمیشدیلر، بیز ده اونلاردان چوخ ممنون قالمالی‌ییق. دئمک راز-ی بقانی باشقا بیر دیلده گؤرمه‌یین بیزه آیری بیر خئیری ده واریدی. آنادیلینده چوخ یالان ائشیتدیییمیزه گؤره باشقا دیلی ائشیتمک بیزی دینجلدیردی.
بیزیم قونشوموزون بیر عئیبی وار: او ایسته‌ییر, بیر آندا ایکی گؤزوٍ ایله تئلویزیونون نئچه کانالینا بیر یئرده باخسین. اونا گؤره ده دال‌بادال کانال دییشیر. بئله بیر وضعیت یاواش- یاواش بیزی موٍتککه‌لیکدن چیخاریردی. دئمک بیردن گؤروٍردوٍک تئلویزیونون برنامه‌سینده قان سو یئرینه آخیر، ایبراهیم تاتلی‌سئس ده «ماوی، ماوی، ماس ماوی» اوخویور، یا دا کی، مایکل جکسونون سسی آشیق متین‌اوغلونون آغزیندان چیخیر. دئمه‌لی سسلرله قیافه‌لرین بیر- بیرینه اویغونلوغو یوخودور.
او واخت‌دان بری بیز یئنه ده اوتوروش وضعیتینه گلیب و موٍتککه ایله ویدالاشدیق. اؤزوٍموٍزله قرارا گلدیک کی، اگر قیافه‌لره اویغون اولمایان سسلری ائشیتمه‌ملی‌ییک‌ نه‌ییمیزه گرک‌دی اؤزگه کانال‌لاری تاماشا ائله‌یک.

سیلاح‎ لا ویدالاشماق 

No comments:

Post a Comment