ینی ایلینیز اوغورلو اولسون


Mar 8, 2014

کورتئز آداسی

آلیس مونرو
چئویرن:  مسعود سبزی -  ائدیتور:  سولماز محمد رضایی



بالاجا گلین. ایگیرمی یاشیم وار ایدی، اوزونلوغوم بئش فوت یئددی اینچ و چکیم یوز اوتوز بئش ایله قیرخ پوندون آراسیندا ایدی. آما بعضیلری –چئس[۱]-ین باشقانی­نین[۲] حیات یولداشی، آفیس­ین اسکی یازمان-ی[۳]، ایله اوست قاتدا کی خانیم قوری[۴]- بالاجا گلین آدی ایله منه موراجیعه ائدردیلر. بعضن، بیزیم بالاجا گلین دئیردیلر. چئس ایله بونا جوک قوشموشدوق، آما اونون گنل[۵] تپکیسی[۶] سئویملی و سایقیلی باخیش ایدی. من ده قاش قاباقلی و اوتانقاج گولومسه‌مکله تسلیم اولاردیم.
بیز ونکووئرده[۷] بیر زئرزمی ده یاشاییردیق. اوولده دوشوندویوم کیمی، ائو قوری-نین عائیله سی­نین یوخ بلکه اوغلو رئی[۸]-ین ایدی. او، اوناریم[۹] اوچون ائوه باش چکردی، چئس ایله منیم کیمی زئرزمی­نین قاپیسیندان گیرَردی. آریق، سینه‌سی ائنسیز بیر کیشی ایدی، یاشی، چوخ ائحتیماللا ۳۰ هنده‌وَرینده اولاردی. همیشه الینده بیر آلت­لر قوتوسو و باشیندا فهله­لرین بؤرکوندن اولاردی. نظره گلیردی بئلینده بیر ثابیت هؤهنه[۱۰] وار ایدی کی لوله کئشلیک، سیم کئشلیک، نجارلیق کیمی ایشلرده اوزون زامان بیر یئرده اَیری قالماق ائتگیسینده[۱۱] اولا بیلردی. اوزو یاغلی اولاردی و اؤسگورَردی. اؤسگورَکلری یاخشی داورانیش ایدی. هر بیر اؤسگورَک تدبیرلی و باغیمسیز[۱۲] دئگی کیمی ایدی کی زئرزمیده اولماغینی گرکن موزاحیمت کیمی ائشیتدیریردی. زئرزمیده اولماغینا گؤره عوذر ایسته­مه­سه­ده، آما اورانین یئیه­سی کیمی ده او یان بو یانا چوبالامازدی. تکجه قاپینی دؤیوب سویو یا دا برقی بیر آز موددته کسه­جه­یینی دئمک ایسته­ینده اونلا دانیشاردیق. ایجاره‌نی هر آی نقدی اولاراق خانیم قوری-یه اؤده­ردیک. بیلمیرم هامیسین اوغلونا وئرَردی یوخسا بیرآزین کؤمک خرج عونوانیندا ساخلاردی. یوخسا خانیم وقوری بَی-ین هر نه­یی کی وار ایدی-اؤزو منه دئمیشکن- قوری بَی-ین قوجالارا عایید علیل­لره وئریلن پئنسییا[۱۳] ایدی و قوری خانیمین دئییلدی. من هله گرکن قدر یاشلی دئییلم، دئیردی.
خانیم قوری همیشه رئی-ین حالین سوروشماق اوچون یا دا چای ایچیب ایچمه­دیینی بیلسین دئیین پیلله­لرین اوستوندن اونو سسله­یردی. او دا همیشه دئیردی یاخشیدی و چای ایچمه­یه واقتی یوخدو. خانیم دئیردی اوغلوم دا اؤزوم کیمی چالیشقاندی. همیشه دوزلتدیگی دئسئرلردن بیرآز آرتیق اونا یئدیرمه­یه چالیشاردی-آزاجیق مورابا، کؤکه، یا دا زنجفیللی فتیر-منه ده همیشه باسدیقلاریندان… اوغلو دئیردی یوخ، یا دا ائوده هر نه گرکن قدر وار. من همیشه قارشیندا دایاناردیم آما یئددینجی سگگیزینجی دؤنه ایصراریندا بویون اَیردیم. الین قایتارماق، دوغروسو اونو آلداتماق و اینجیتمک چوخ اوتاندیریجی اولاردی. من رئی-ی همیشه، یوخ دئمه­یینه داوام ائده بیلیردی دئیین آلقیشلاردیم[۱۴]. او “یوخ آنا” بیله دئمزدی تکجه یوخ دئیردی.
سونرا خانیم دانیشماق اوچون سؤز تاپماغا چالیشاردی.
خب، تازا و ماراقلی خبرین یوخدو؟
هئچ نه، بیلمیرم. رئی هئچ واقت تربییه­سیزلیک ائتمزدی یا دا سینیرلنمزدی[۱۵] آما آناسینا اوز ده وئرمزدی. اونون حالی همیشه یاخشی ایدی. سویوقلاماسی دوزه­لیب. خانیم کورنیش[۱۶] ایله ایرئن[۱۷] ده همیشه یاخشیدیلار. رئی ونکوورین دوغوسوندا[۱۸] خانیم کورنیش-ین ائوینده یاشاییردی. همیشه خانیم کورنیش-ین ائوی­نین هنده­ورینده بئله ایشلردن اولاردی، اونا گؤره ایشلرین یئیین بیتیریب گئتمک زوروندا اولاردی. هم ده اونون قیزی ایرئن-ین ساخلاماغیندا، کی ویلچئر اوستونده ایله­شردی اونا یاردیم ائدردی. ایرئن بئیین ایفلیجی اولموشدو. رئی، ایرئن ده یاخشی دیر دئمه میشدن اؤنجه خانیم قوری دئیردی “یازیق قیز”. خانیم هئچ وقت اوغلونون اوزونه دوروب وقتینی بیر دردلی قیز ایله سووشدورماسینا گؤره؛ قیزی ایستنلئی[۱۹] پارکینا یا دا گئجه لر دوندورما آلماق اوچون دولاندیرماغا آپارماغینا گؤره قینامازدی(هردن خانیم کورنیش ایله تئلفونلا دانیشدیغینا گؤره بونلاری بیلیردی). حال بو کی منه دئیردی: ایستر ایسته­مز دوندورمانین سویو قیزین اوزوندن سوزوب آخماق گؤرکمی منه گؤرسل­له­نیردی[۲۰]. اؤز الیمده دئییل، کسین کوتله[۲۱] اونلارا آخماق کیمین باخیب گولور.
او دئیردی کی قوری بَی-ی ویلچئرایله دیشاری­یا آپاراندا هامی اونا باخاردی( قوری بَی بئیین اینفراکتی[۲۲] کئچیرمیشدی)، آما او فرقلی ایدی،ائودن دیشاریدا ترپنمه­زدی و یا اؤزوندن سس چیخارمازدی و خانیم همیشه امین ایدی کی او گؤرکملی گؤرونور. حال بو کی ایرئن اویان بویانا آخاردی و قاز سسی چیخارداردی قا، قا، قا…. یازیق قیز اؤزونو ییغیشدیرا بیلمیردی.
خانیم کورنیشین بئینینده بلکه بیر شئی وار، خانیم قوری دئدی. او اؤلندن سونرا کیم او ایفلیج قیزا باخاجاق؟ ساغلام اینسانلارلا ائله اینسانلار ائولنه بیلمه­مک اوچون گرک بیر یاسا اولا. آما هله کی یوخدور.
خانیم قوری مندن ایسته‌ینده اوسته، قهوه‌لشمک اوچون گئدم، من هئچ وقت خوشلامازدیم. زئرزمی ده اؤز کیشیسل[۲۳] یاشامیما باشیم قال ایدی. بعضی واختلار گلیب قاپینی دؤینده ائوده دئییلم کیمی گؤسترَردیم. آما بونو ایناندیرماق اوچون تئز چیراغی سؤندوروب قاپینی دا کیلیدلردیم، ائشیدردیم کی پیلله لردن اوسته چیخیب قاپینی آچدی و سونرا مجبور اولاردیم دیرناقلاریلا قاپینین اوزَرین تیققیلدادیب آدیمی تیریلدایانا قدر اورادا آوارا قالام. داها سونراسی ان آزی بیر ساعات سس­سیز قالیب تووالئتده سیفون چکمه­مک زوروندا ایدیم. دئسه­یدیمسه واختیم یوخدو ایشیم وار. گولوب دئیردی “نئیلیرسن؟
مکتوب یازیرام” دئیردیم
همیشه مکتوب یازیسان” دئیردی، ” داریخیسان
قاشلاری چؤهرایی ایدی-ساچی نین بیر تورلو قیرمیزی­یا چالان چؤهرایی رنگی. ساچلاری­نین رنگی­نین دوغال[۲۴] اولدوغونو دوشونمورم، آما قاشلارین نئجه بویایا بیلردی؟ اوزو اینجه، طراوتلی، اَننیکلی[۲۵]، دیشلری بؤیوک و پارلاق ایدی. دوستلوغا و توپلاشیب دانیشماغا حدسیز حئسابسیز ماراقلی ایدی. بیرینجی صبح چئس منی بو آپارتمانا گتیره نده، منی قاطاردا گؤرندن سونرا، خانیم بیر بوشقاب کؤکه ایله قوردیانا گولوشلریله قاپیمیزی دؤیدو. منیم سیاحت بؤرکوم هله باشیمدا ایدی، چئس ده منیم قاییشیمی آچسین دئیین الین بئلیمه آپارمیشدی کی ال ساخلادی. کؤکه لری قورو و برک ایدیلر و اوست­لری آچیق چؤهرایی رنگده شکرله یومورتانین قاریشیغیلا اؤرتولموشدو کی منیم تویومو قوتلاسین. چئس اونونلا قیسا دانیشدی.
یاریم ساعاتا ایش یئرینه قاییتمالی ایدی. اونون شرریندن قورتاراندان سونرا باشلادیغی ایشی بیتیرمه یه هئچ واخت یوخ ایدی، عوضینه دال با دال کؤکه لری یئییب گیلئیله­ندی کی بونلارتاختا که­په­یی­نین دادینی وئریر.
سنین اَرین چوخ جیددی دیر”  یقین کی منه دئدی. او همیشه گلیب گئده­نده بو جیددیتی اوندا گؤرورم و گولمه­ییم گلیر. اونا دئمک ایستیرم کی چوخ چتین توتما، بوتون دونیانی سنین بئلیوه چاتمیبلار کی”.
بعضا اونون آرخاسیجا اوست قاتا چیخماغا مجبور اولاردیم، و اوخودوغوم کیتابی یا دا یازدیغیم پاراقرافی یاری بوراخاردیم. بیز اونون یئمک اوتاغی­ ماساسیندا ایله­شردیک. ماسانین اوستونده تور اورتوک و بیر سرامیکی قو قوشونون شکیلینی گؤسترن سگگیز بوجاقلی گوزگو وار ایدی. چینی فینجانلاردا چای ایچردیک و بالاجا سئت بوشقابلاردا کی یئمه­لیلردن یئیردیک( همن کؤکه لر و موراببالار و کیشمیشلی کئیک لردن یا دا برک بیسکویت لردن) و اینجه ناخیشلی دستماللارلا خیریم خیرداسین دوداقلاریمیزدان سیلردیک. من شوشه آراجی[۲۶] اولان کابنئتین اوزه­رینده ایله­شردیم، کابنئتده بوتون گؤزل شوشه آراجلاری دوزولموشدولر، شکر ایله موراببا یئمک سئتی، دئکوراتیو و یا گوندلیک قوللانماق اوچون دوز و ایستی­اوتلار قابلاری، هم ده تومورجوق[۲۷] گولدانلاری، داخما شکیلینده چامور[۲۸] چایدان، و زانباق گولو شکیلینده ساردونیا­لار[۲۹]. خانیم قوری آیدا بیر دفعه شوشه آراجی اولان کابنئتی تؤکوب هر نه­یی تمیزله ردی. اؤزو منه بئله دئمیشدی. او هر نه­یی کی گله­جکده ائوه و گله­جه­ییمه گؤره گرک ائدم منه دئیردی. او، بلکه من خوشلاییرام و دئمه سینی ایسته ییرم دوشونردی و چوخ دانیشاردی. ائله ده حیس ائدردیم بیر دمیر دنگه آغیرلیغی[۳۰] گؤوده­مه باغلاییبلار. گوندوزون اورتاسیندا هئی اسنه­ییردیم. اوزاغا سورونوب و گیزلنیب و یاتماق آرزولاردیم. آما اوزده هر نه­یی آلقیشلاردیم: شوشه کابنئتین آراجین، خانیم قوری­نین یاشامدا ائودارلیق قایدالارین، گونده کی گئیدییی بیر بیرینه یاراشان گئییم لری، یاسمن و یا مرجان رنگینده دامن و ژاکئتلر. و اونلارا اویغون قوندارما ایپکدن شال­لار.
همیشه اول ائله پالتار گئی کی ائله بیل ایستیسن ائشییه چیخاسان، سورا ساچلاریوی دارا و بزَن- نئچه دفعه منی گئجه پالتاریلا گؤروب لاغ یومورتا کیمین دووارا چیرپیلمیشدیم- سورا بیر شئی یومالی یا پیشیرمه لیسن­سه دؤشلوک باغلییا بیلرسن. بو روحییه­وه ده یاخشی دی.
و همیشه بیرآز پیشمیش یئمه­لی خبرسیز گلن قوناقلار اوچون الینده اولسون( من بیلن هئچ واقت مندن باشقا اونون گؤروشونه گلن اولمازدی و دئمک اولماز کی من خبرسیز گئتمیشم). و هئچ وقت قهوه­نی لیواندا ایچمه”.
سؤزلری کسینلیکله[۳۱] دئییلمزدی. “من همیشه” یا “من خوشلارام کی…” یا ” من دوشونورم کی یاخشیدی…” قوللاناردی.
من اوزاقلاردا وحشی یئرلرده بیله یاشایان زامانلار همیشه خوشلاردیم کی
بیر آن آغزیمی آچدیم و قاققیلداماغا احتیاجیم کسیلدی. هانسی وحشی یئرده یاشاییردی؟ و نه زامان؟
هیم، چیمرلیکدن[۳۲] اوزاقدا” دئدی، ” بیر زامان من ده گلین ایدیم، نئچه ایل اوردا یاشادیم. یونییون بای دا[۳۳]، چوخ دا وحشی یئر دئییلدی. کورتئز آداسیندا.”
سوروشدوم اورا هارادی،”اوه، بوردان اوزاقدی” دئدی.
اورا گؤرمه لی یئر اولمالی دی” دئدیم.
هیم، گؤرمه­لی دی” دئدی. “سنجه آیی­لار گؤرمه­لی اولسا. سنجه پومالار گؤرمه­لی اولسا. من اؤزوم بیر بالاجا اویگار[۳۴] یئرده یاشاماغی ترجیه وئررم”.
یئمک اوتاغی بیر پالید[۳۵] آغاجیندان دوزه­لن سوروگولو[۳۶] قاپی واسیطه­سیله قوناق اوتاغیندان آیریلمیشدی. قاپی همیشه بیرآز آچیق قالاردی کی ماسانین بو باشیندا ایله­شن خانیم قوری، قوناق اوتاغی­نین پنجره­سی­نین اؤنونده کاناپه­ده ایله­شن قوری بَیی هردن ایزله­سین. سونرا”منیم اَریم ویلچئر اوستونده” باشلیغی ایله دانیشاردی. آما دوغروسو تکجه دیشاری­یا دولانماق اوچون چیخاندا اونو ویلچئر اوستونده اوتورداردی. اونلارین تئلویزیونلاری یوخ ایدی- او زامان تئلویزیون یئنیجه چیخمیشدی- قوری بَی ایله­شیب خیاوانا و خیاوانین اوزوناسیندا کی کیتسیلانو[۳۷] پارکینا و اوندان یوخاریدا بورارد[۳۸] چایینا باخاردی.
قوری بَی تووالئته گئتمک اوچون اؤز یؤندمین تاپمیشدی. بیر الینده چه­لییی اولاردی باشقا الیله ده اوتوراجاق­لارین[۳۹] آرخاسیندان یاپیشاردی یا دا الین دووارا سورته سورته گئدردی. اؤزو اؤزون یویوب قاییدا بیلیردی و بو چوخ سورَردی[۴۰]. خانیم قوری دئییردی بعضا تووالئته تئی چکمک گرکیر.
من گئنللیکده قوری بَی-ین آچیق یاشیل رنگ کاناپه ده اوزادیلمیش قیچین گؤره­ردیم. من اورادا اولارکن بیر ایکی دفعه آغیر گؤوده­سینی چکیب ساللانا ساللانا تووالئته گئتمک زوروندا اولوردو. بؤیوک ، یئکه باش، گئنیش چییینلی و آغیر سوموکلی بیر کیشی ایدی.
من اوزونه باخمازدیم.منجه بئیین اینفراکتی و یا خسته لیک ائتگیسینده ایفلیج اولان اینسانلار بدبختلیک گتیره بیلرلر. و پیس اولایلاری خاطیرلادیرلار. اونلارین خسته عضولریندن و یا اونلارین قورخمالی طالئعین گؤسترن باشقا فیزیکی ایشارت­لریندن چکینمیردیم بلکه اونلارین اینسانی باخیشلاریندان چکینه­ردیم.
سانمیرام او دا منه باخمیش اولایدی، هر حالدا خانیم قوری، من آشاغیدان اونلارا قوناق گلمیشم دئیردی. او سالام وئرمک و یا خداحافیظلشمک اوچون ائلییه بیلدییی قدر بیر خیریلتی سسی چیخارداردی.
بیزیم آپارتماندا ایکی اوتاق و بیر یاریمچیلیق اوتاق وار ایدی. ائوین آراجی ایله کیرایه ائله میشدیک. بئله ائولرده آراجلار یاریمچیلیق اولار، هم ده کی ائشییه آتمالی اولارلار. یادیمدادیر قوناق اوتاغی­نین دؤشه­مه­سی[۴۱] آرتیق قالمیش کوادرات[۴۲] ودوزبوجاقلی[۴۳] شکیللی لئنولیوم لار ایله دؤشه­نمیشدیر. سانکی بوتون چئشیدلی بویالار و ناخیشلار بیر قیرخ تیکه قوراما کیمی بیر بیری­نین بؤیرونده ایله­شیب فیلماشین[۴۴]­لارلا سیرالانیبلار. مطبخده بیر دؤرد گؤزلو گازی اوجاق وار ایدی. یاتاغیمیز مطبخین بؤیرونده بیر چارداق­دا ایدی کی امن و امان قورولموشدو، ائله ایدی کی آشاغیدان یاتاغین ایچینه دیرماشمالی ایدین. چئس بئله یوزاردی[۴۵] کی بورا حرمسرانین یولودور و قیزلار سولطانین حرمینه گیرمک اوچون گرک بوردان کئچه لر[۴۶]. اؤنجه گرک آیاقلاریلا، سونرا یوخاری سورونوب اونون باشقا حیسسه­لریله[۴۷] حؤرمتله سئویشه­لر. بعضی واخت­لار بیز ده بو اویونو اویناردیق.
یاتاغین آیاغین­دا کی توتوق[۴۸] چارداغی مطبخدن آییرماق اوچون همیشه باغلی قالاردی. توتوق گئرچکده کؤهنه یاتاق اؤرتویو ایدی. سوروشکن ساچاقلی پارچا، بیر طرفی ساریمتیل بئژ رنگلی کی شرابی رز چیچکلری و یاشیل یارپاقلارلا بزنمیشدی، باشقا طرفده زولاقلی[۴۹] آل شرابی و یاشیل بویالی ایدی کی چیچکلرله یارپاقلار بیر روح کیمی بئژ بویادا  گؤرونوردولر. آپارتماندا هر نه­دن داها آیدین بو توتوغو خاطیرلاییرام. تعججوب­لندیریجی ده دئییلدیر. سئکس هیجانیندا و سونرا آلی­سین چکنده، پارچا گؤزومون قاباغیندا ایدی و منه نئجه اَره گئتدیییمی خاطیرلادیردی. و گؤزله­نیلمه­ین “بالاجا گلین” اولماغیمین آشاغی­لانماسی و و شوشه کابنئتی­نین عجیب قریب تهدیدلرینه نئجه دؤزدویومو خاطیرلادیر.چئس ایله من ائله عاییله­دن گلمیشدیک کی اورادا ائولنمه­میشدن اؤنجه سئکس آجیناجاقلی و باغیشلانیلماز سانیلیردی. و ائولنندن سونرا کی سئکسه گؤره گؤرونوش­ده هئچ واخت سؤز آچمازدیلار و اولدوغو یئرده اونوتولاردی. بو قونولارا گؤره بئله یاناشماق چاغی­نین دوز سونلاری ایدی. حال بو کی بیز بیلمیردیک. چئس-ین آناسی چمدانیندان کاندوم تاپدیقدا آغلایا آغلایا آتاسی­نین یانینا گئتمیشدی( چئس دئییردی کی اونلار اونو نیظامی اؤیره­تیم لر کئچیرسین دئیین بیر کمپه وئرمیشدیلر-کی دوغرو ایدی- و او هر نه­یی اونلارا راجع اونودوب-کی یالان ایدی). دئمک اؤزوموز اوچون بیر یئریمیز اولماسی و ایشیمیزی ائتمک اوچون بیر یاتاق، بیزیم اوچون چوخ معجزه لی گؤرونوردو.
بیز بونو قازاندیق آما هئچ نظریمیزه گلمیردی بیزدن یاشلی­لاری، آنا آتالاریمیز، دایی­لار،عمی­لر،خالالار، بی­بی­لریمیز ده، شهوت اوچون بیله، بونو ائده بیلردیلر. ائله گؤرونوردو کی اونلارین تمل هوس­لری ائو، وار دؤولت، گوجلو اوت­بیچن­ماشینلاری[۵۰]، فریزرلر و ایستیناد دووارلار[۵۱] ایدی. و کسینلیکله اوشاقلاری اوچون. بونلار بوتون،گله­جکده ایمکانی وار سئچیب و یا سئچمه­دیییمیز شئی­لردیر، ساناردیق. و هئچ زنّ ائتمیردیک ایسته­مه­دن هامیسی بیر گون گله­جکلر.
ایندی کی بونلارا دوزگونلوکله دوشونوروم گؤرورم کی یوخ هئچ نه بیزیم سئچیمیمیزسیز اولانمازدی. بویلانماق[۵۲] بیله، بیز تکجه، گئرچکدن بؤیودویوموزو بیلمک اوچون ریسک ائله­دیک، البته گئرچکدن بؤیوموش اولسایدیق اگر.
توتوق آرخاسیندا ائتدیییم باشقا ایش کیتاب اوخوماق ایدی. نئچه محلله آشاغیداکی کیتسیلانو[۵۳] کیتابخاناسیندان آلدیغیم کیتابلاری اوخویاردیم. بیر کیتابی اوخویاراق تعججوبله­ننده شاشقینلیقدان باشیم گیجه­للنردی و توتوغون زولاق­لاری گؤزومون اؤنونه گلردی. و یالنیز کاراکتئرلر یوخ بلکه حیکایه­نین اؤزو و کیتابین حال هاواسی توتوغون قوندارما گوللرینه باغلی توتقون شرابی و یا یام یاشیل بویانین اوزوناسیندا بئنیمده دولاشاردی. من آدلاری اؤنجه دن منه تانیش و ماراقلی اولان آغیر کیتابلاری اوخویاردیم. “نیشانلی”[۵۴] رومانین بیله اوخوماغا چالیشدیم. و بو دؤنمده آلدوس هاکسلی[۵۵] ایله هئنری قرین­-ین[۵۶] رومانلارین، مایاکا ساری[۵۷]، شئری-نین سونو[۵۸] و اورک اؤلومو[۵۹] رومانلارین دا اوخودوم. سلقه­مله تانیش اولمادیغیما گؤره بو کیتابدان او کیتابا قاچیردیم و نوبه­یله اؤزومو هر تورلو کیتابا تاپشیریردیم. اوشاقلیق چاغیندا کیتابلارلا بئله ائتدییم کیمی. من هله ایستکلر و آرزولاریمین آنی­جه دَییشیلمه آشاماسیندا[۶۰] ایدیم. قایغی و ایشکنجه­یه یاخین جوشقو[۶۱] آشاماسیندا.
آما اوشاقلیقدان باشقا بیر فیکیر ده بئینیمه ووراردی. نظره گلیر کی بیر اوخوجو اولدوغوم قدر بیر یازیچی دا اولمالییام. بیر اوخول دفتری آلدیم و یازماغا چالیشدیم. یازدیم، اؤنجه گوجلو باشلادیغیم صفحه­لر گئتدیکجه قورویوردو. بئله­جه اونلاری جیریب آییرامالی اولوردوم، و سانکی اؤزومو آغیر جزالاندیریرام  اونلاری بوکوب زیبیل قابی­یا تولازلاردیم. بونو او قدر تیکرارلادیم کی تکجه دفترین اؤرتویو منه قالدی. سونرا گئدیب باشقا دفتر آلدیم و بیر دفعه ده هامیسینی گلیشتیریمه[۶۲]  باشلادیم. همن دؤوره- هیجان و اومیدسیزلیک، هیجان و اومیدسیزلیک-هر هفته گیزلیجه بویلانیب اوشاق زیان ائله­مه­یه[۶۳] بنزه­ییردی.
تام دا گیزلین یوخ، چئس چوخ اوخویوب یازماغا چالیشدیغیمی بیلیردی. او منی بو ایشدن هئچ چاشدیرمادی. اونجا بو ایش منطیقجه ایدی و بلکه اؤیره­نه بیلردیم. چوخ وردیش[۶۴] گرکیردی آما اوستالاشماق ایمکانی وار ایدی، ورق اویونو ویا تئنیس کیمی. منه بئله اَلی آچیق اینانماغینا گؤره هئچ اوندان تشککور ائله­مه­دیم. تکجه منیم گولمه­لی اوغورسوزلوقلاریما آرتیریلیردی.
چئس توپدان ساتیش[۶۵] قیدا[۶۶] شیرکتینده ده ایشله­ییردی. اؤزو بیر تاریخ اؤیرتمه­نی اولماسینی آرزولاردی آما آتاسی اونو قاندیرمیشدی کی بو دونیادا درس دئمکله بیر قادین­ین باشین ساخلاییب کئچینه­ بیلمز. بو ایشی تاپماقدا آتاسی اونا یاردیم اولدو آما دئدی کی بیرینجی دؤنه اولاراق ایشله­ییرسن دئیین هئچ تورلو حیمایه گؤزله­نتین اولماسین، اونون دا اولمادی. ائولیلیییمیزین بیرینجی قیشی­نین بوتونون، گون چیخمادان ائودن چیخاردی و گون باتاندان سونرا ائوه دؤنردی. چوخ ایشلردی، هئچ دئمزدی ائتدییی ایش ماراقلاریلا اویغوندور یا یوخ و یا باشقا آماجی دا وار ایدی- یا وار کی بیر زامان اونا غرور دویورموش. آماجسیزلیق تکجه بیزی اوت­بیچن ماشینلار و فریزرلر یاشامینا یؤنه­لدیردی کی اینانیردیق اونا گؤره هئچ فیکر­یمیز یوخدور. او زامان دوشونسه­یدیمسه بویون اَیمکدن تعججوبله­نردیم. اونون شنلیکله- و بلکه سیز دئیه­سیز جسور- بویون اَیمه­ییندن.
آما سونرالار آنلادیم کی بونو بوتون ائرکک­لر ائدیر.
من دیشاری دا ایش تاپماغا گئتدیم. یاغیش برک یاغماسایدی­سا داواخانایا گئده­جکدیم و بیر قزئته آلاجاقدیم  و بیر فینجان قهوه ایچرکن رئکلام­لاری اوخویاجاقدیم. سونرا یاغیش دامجی­لاری­نین آلتیندا قیز قارسونو یا دا ساتیجی قیز و یا فابریکا[۶۷] ایشچیسی رئکلام اولونان یئره آددیملایاراق گئده­جکدیم. یاغیش آغیر یاغسا دا اوتوبوسلا گئده­جکدیم. چئس دئدی یاخشی­دی همیشه اوتوبوسلا گئده­سن و پول ییغماق اوچون پییادا گئتمییه­سن، سن پول ییغارکن، چئس دئدی، باشقا قیز گئدیب ایشینی توتا بیلر.
دوغروسو، نظره گلیردی بونا اومیدوار ایدیم. و بوندان هئچ واخت تاسسوفله­نمزدیم. بعضی وقت­لر مقصده یئتیشنده سکی ده دایانیب قادین پالتاری ساتان توکانلارین گوزگولو و سولغون دؤشه­مه­لی ویترینلرینه باخاردیم. و یا کارگذار ایسته­ین آفیس­ده ناهار واختلاری ایش یئرلریندن چیخان قیزلارا باخاردیم. من هئچ ایچری ده گئتمزدیم، بیلیردیم کی ساچلاریم، دیرناقلاریم و دابانسیز باشماغیم نئجه منیم ضرریمه اولاجاقلار. فابریکالاردان دا قورخاردیم، ایچریده ایشله­ین ماشینلارین های کویون ائشیده بیلیردیم، اورادا ایچگی­لر شوشه­لره تؤکولوردولر یا دا کریسمس بزکلری قوشولوردولار. تاواندان[۶۸] آسیلان چیلپاق لامپالار آنبارینا بنزه­ین یئرلری ده گؤره بیلیردیم. بلکه اورادا دیرناقلاریملا باشماقلاریمین دابانی اؤنملی اولمایا ما  آما یؤندمسیزلیییم و میکاینیکی ایشلرده الیم اولماماغی منی یامانلاتدیریب و اوستومه قیشقیرماقلارینا سبب اولا بیلردی.( ماشین لارین های کویونون اوستونده قیشقیرتی لارین دا سسینی ائشیده بیلیردیم). من روسوای اولوب ائشییه آتیلاجاقدیم. فیکر ائدیرم کاسسا آپاراتی[۶۹] ایله ده ایشله­یه­نمزدیم. بونو بیر رئسترانین مودورونه، او زامان کی نظره گلیردی منی ایشه گؤتورمک ایسته­ییر دئدیم. “  فیکر ائلیسن الوندن[۷۰] گلر ایشله دسن؟” دئدی و من دئدیم یوخ. او دا منه ائله باخدی سانکی ایندی­یه­جن ائشیتمه­ییب بیری بونا اعتیراف ائله­سین. آما من دوغرو دانیشدیم. سانمیردیم الیمدن گلسین هم ده تلسیکده و کوتله ایچینده. من دونوب قالاردیم. گئرچه­یی بودور کی من تکجه ساده قونولاردان اؤرنک[۷۱] اولاراق اوتوز ایللیک ساواشین قارماشیقلیغیندان باش آچا بیلردیم.
گئرچک بودور کی من ایشله­مه­یه مجبور دئییلدیم. چئس اؤز حددیمیز قدر منی ساغلایا[۷۲] بیلیردی. من دیشاری دونیاسیندا اؤزومو سیخینتیدا قویماق زوروندا دئییلدیم، چون او بونو ائدیردی. ائرککلر مجبور ایدیلر. دوشونورم کیتابخانادا ایشله­مک الیمدم گلر، اورادان بیله سوروشدوم حال بو کی اونلار رئکلام ائله­مه­میشدیلر. بیر قادین آدیمی لیست­ده یازدی. او نزاکتلی ایدی آما اومودلاندیرمادی. سونرا کیتاب توکانلارینا گئتدیم. و احتیمالن کاسسا آپاراتی اولمایان یئرلره باش چکدیم. نه قدر سایخین و پینتی اولسا یاخشیدیر. یئیه­سی یا سیگار چکه­جک یا دا ماسا آرخاسیندا مورگوله­یه­جک. نیمداش ساتانلاردا دا چوخونلوقلا پیشیک قوخوسو گلر.
قیشدا بیزیم باشیمیز ائله شولوغ اولمور” اونلار دئییردی.
بیر قادین دئدی کی “بلکه باهاردا بورا قاییدا بیلرسن. باخمایاراق کی اوندا دا باشیمیز ائله شولوغ اولمور
ونکووئرین قیشلاری باشقا گؤردویوم قیشلاردان فرقلی ایدی. قاری یوخ ایدی، بوندان علاوه هئچ سویوق کولک ده اسمزدی. گون اورتا چاغی شهرین مرکزینده یانمیش شکر قوخوسونا بنزه­ر قوخو گلردی، فیکر ائدیرم برقی تراموالاردان گلردی. من، هئستینگ[۷۳] خیاوانین بویوندا کی باشقا بیر قادین اورادان کئچمزدی، آددیم­لاردیم، یالنیز سرخوش­لار، آوارالار یوخسول قوجا کیشی لر، حوققاباز چینلی­ لر اورادان کئچردی. کیمسه منه پیس سؤز آتمازدی. آنبارلارین اؤنوندن، بیر کیشی بیله گؤزه گؤرونمه­ین بوم بوش چئوره­دن کئچردیم.یا دا کیتسیلانو-ون کیپ کیپه دوزلمیش کؤهنه تاختا ائولری­نین اورتاسیندان کی بیزیم کیمی اینسانلار اورادا یاشاییردیلار کئچردیم و دونبار[۷۴] محله­سینه دک کی تمیز و دوزنلی[۷۵] ایدی گئدردیم، آغ سیمان گؤرونوملو[۷۶] یایلاق ائولری، و بودانمیش[۷۷] آغاجلاری گؤرونردی. و کرئسیدل­دن[۷۸] کئچردیم کی اورانین کیلاسلی آغاجلاری، اوت­لارین اورتاسیندا توز آغاجلاری، سلطنتی چیراقلار، گورجو سیمئتری­لر[۷۹]، سوواق ائولرین تاوانیندان یامسیلانمیش آغ قار توپاسی شکیلینده تاوان لار- بلکه ده گئرچک، سوواق ائولرین تاوانلارین نئجه بیلمک اولار؟- گؤزه چارپیردی.
بوتون بو یئرلرده یاشایان اینسانلارین چیراقلاری آخشام چاغی ساعات ۴ هنده­ورینده یاناردی. گاهدان ایسه باتی طرفینده دنیزین اوستونده کی تیکه پارا بولودلارین اورتاسیندان باتان گونشین قیرمیزی ایشیق­لاری گؤستریلیردی. ائوه قاییداندا کئچدیییم پارکین قیش بیتگی­لر بوتاسی­نین یارپاقلاری آلاقارانلیق آچیق قیزیل گول بویالی ایسلاق هاواسیندا پاریلدایاردیلار. بازارا گلن اینسانلار ائوه قاییداردیلار، ایش یئرینده اولان اینسانلار ائوه دؤنمه­یی دوشونوردولر. تام اولاراق گوندوزو ائوده قالان اینسانلار دا هاوالاری دَییشیلمک اوچون دیشاری چیخاردیلار. من اوشاق آرابالارینی سورن قادینلاری و زیریلدایان کؤرپه­لریله راستلاناردیم؛ و هئچ دوشونمزدیم اونلارین باشینا گلن اویون تئزلیکده منیم ده باشیما گلجک. یاشلی اینسانلارا ایتلری ایله، و باشقا یاواش یاواش آددیم­لایان اینسانلارا، و یا حیات یولداشلاری یوخسا باخیجی­لاری­نین واسیطه­سیله ویلچئر اوستونده ایره­لی سورولن یاشلی­لارا راستلاناردیم. قوری بَی-ین ویلچئرینی ایته­لین خانیم قوری­نی بیله گؤردوم، او شئنل ایله توتقون قیرمیزی یون­دان بؤرک گئیمیشدی( ایندی بیلیرم کی پالتارلاری­نین چوخونو اؤزو توخویوردو) و نم نه قدر چؤهرایی بویا ایله اوز گؤزون بز­ه­میشدی. قوری بَی قیسا بؤرک قویموشدو و بوینونون دؤره­سینه قالین شال دولامیشدی.  او منله جیغان ویغان ایله بیر ائویئیه­سی کیمی سلاملاشدی، قوری بَی ده سانکی هئچ اورادا دئییلدی. ائله بیل بو گزینتی­نی خوشلامیر. آما ویلچئرده ایله­شن اینسانلاردا ایستر-ایسته­مز راضیلاشماقدان باشقا چتین بیر شئی گؤرمک اولمازدی، بعضی لری آشاغیلانمیش و یا آیدینجا قیسقانج گؤرونورلر.
باخ گؤروم او گون کی بیز سنی ائشیکده پارکدا گؤردوک سن ایش آختارماقدان قاییتمیردین کی؟ قاییدیردین؟” خانیم قوری دئدی
یوخ” یالاندان دئدیم. غریزی حیسسیم اونا هر نه­یی یالان دئمه­ییمه سبب اولوردو.
هیم، یاخشی فقط ایستیردیم دئیم کی، اؤزونده بیلیسن دا، اگر ائشیکده ایستیرسن ایش آختاراسان گرک بیرآز اؤزونه یئتیشه­سن، بونو بیلیسن دا
هه” دئدیم.
بو گونکو قادین­لارین دولانیشیغیندان باش آچمیرام، من هئچ واخت دابانسیز آیاق­قابی­لا و بزکسیز ائشییه چیخمارام، حتی باققالا ایسته سم گئدم، هله قالسین کی گئدم بیریندن ایسته­یم منه ایش وئرسین
یالان دئدیییمی بیلیردی، زئرزمی­نین قاپیسی­نین دالیندا دونوب قالدیغیمی و قاپی­نین دؤیولمه­سینه سس وئرمه­دیییمی بیلیردی. بیزیم زیبیل قابیمیزی ائشیب اوپ اوزون چتینلیکلریمی یازدیغیم قات قاریشیق کاغیذلاریمی اوخوسایدی دا هئچ تعججوبلنمزدیم. نییه منی بوراخمیردی؟ ائدنمیردی. من اونا اَیله­نجه[۸۰] کیمی ایدیم. بلکه ده عجیبلیییم و عورضه­سیزلییم، قوری بَی­ین جراحتلری ایله اونا  بیر گلیردی، و هر نه کی دوزه­لن دئییل اونا دؤزمه­لیسن.
بیر دفعه من زئرزمی­نین اورتاسیندا پالتارلاری یویاندا پیلله­لردن آشاغی ائندی. هر چرشنبه آخشامی اونون پالتار یویان و قورودان ماشین­یندان قوللانماغا ایزنیم وار ایدی.
هله ایشدن خبر یوخدو؟” دئدی، من ائله بئله­سینه دئدیم کیتابخانا دئییب بلکه گلجکده منیم اوچون بیر ایشلری اولدو. دوشوندوم کی یالاندان اورادا ایش باشینا گئدیرم ایددیعا ائده بیلرم. هر گون اورایا گئدیب اوزون ماسالارین بیری­نین آرخاسیندا ایله­شیب کیتاب اوخویوب و یازماغا بیله چالیشا بیلرم، کئچمیشده واختدان واختا گئتدییم کیمی. البته خانیم قوری کیتابخانایا گئدیب پیشیک باشینی چانتادان ائشییه چاخارداناجاق[۸۱] ایدی. آما قوری بَیی اوزویوخاری اوراجان سوروتله­ینمزدی، چتین ایشدیر.
خانیم دئییردی بعضی واخت­لار چئسه سلام وئرمه­یه قورخور، آداما اَیری باخیر.
خوب، بلکه بو آرادا…” دئدی.” بئینیمه چاتدی کی بو آرادا پیس اولماز کی بیر کیچیک ایشون اولسون، شاید گؤیلون ایستییه ناهاردان سورالار آقای قوری ایله ایله­شه­سن”.
دئدی کی سئنت پول[۸۲] خسته خاناسی­نین هدییه ساتان توکانی اونا هر هفته اوچ یا دؤرد گون ناهاردان سونرالار اونلارا یاردیم ائله­مه­سینی اؤنریبدی[۸۳]. ” بو پوللو ایش دَییر یوخسا سنی یوللاردیم”، دئدی. ” بو بیر کؤنوللو ایشدی، آما دوکتور دئدی ائودن ائشییه چیخماق حالیما یاخشیدی، دوکتور دئدی: اؤزونو چورودوسن… پولا گؤره گئتمیرم، چئس بیزه یاخشی اؤولاددی، آما فیکر ائلیرم بیر بالاجا کؤنوللو ایش ائلییه بیلر…”. پالتار یویان ماشین­ین ایچینه باخدی و چئس-ین کؤینکلرین منیم گوللو پالتارلاریملا آچیق ماوی مَله­فلرله بیر یئرده گؤردو.
ائی وای عزیزیم”، دئدی. ” سن کی آغ پالتاری رنگلی پالتارلارنان بیرگه یوموبسان؟
فقط آچیق رنگلی­لرنن” دئدیم. ” اولارین رنگی چیخماز”.
شاید فیکر ائلیسن بلکه کؤینک­لر هله آغ قالیبلار آما او جور کی گرک آغ دَییللر”.
دئدیم کی گلن دفعه یادیمدا قالار.
مسئله بو دو کی اَریوی نئجه قورویاسان”. زحلم گئتمیش قیسا گولومسه­مکله دئدی.
چئس اؤزونه آلماز “، دئدیم. گئتدیکجه بو سؤزلر گلن ایللرده دوغرو اولوب نظره اؤنمسیز و شوخلوق گلن ایشلر نئجه گئرچک یاشامیمین چرچیوه­سینده مرکزیت تاپیب اؤنملی اولاجاقلاری هئچ عاغلیما گلمیردی.
من ایشه آلیندیم. ناهاردان سونرالار قوری بَی­له ایله­شمک. یاشیل کاناپه­­نین بؤیرونده کی ماسانین اوستونده کی تؤر-تؤکونتوسون سیلمک اوچون بیر اَل-اوز حوله­سی و ماسانین باشیندا کی حب­لری­نین قوتوسو و شربت­لری و زامانی اونا بیلدیرمک اوچون بیر بالاجا ساعات وار ایدی. اوخومالی­لار دا باشقا اَلده کی ماسانین اوستونده قالاقلانمیشدیلار. صوبحون قزئته­سی، دونن آخشام چاغی­نین قزئته­سی، او زامانین چوخ اوخونان درگی­لری “یاشام[۸۴]“، “باخیش[۸۵]” و “مک لین[۸۶]” درگی­لری. همن ماسانین آشاغی چکمه­جه­سینده بیر توپا قزئته جیریقلاریندان دوزَلن آلبوملار وار ایدی. اوشاقلار اوخولدا قوللاندیقلاریندان، قونور کاغیذلی و قیراقلاری کوبود آلبوملار. قزئته قیرینتی­لاری ایله شکیللر قیراقلاریندا آزجاجا ائشییه چیخمیشدی، بونلاری قوری بَی اؤنجه کی ایللردن اینفارکتوس کئچیره­نه­جن، کی بیر شئی کسه­نمیردی، ییغیب ساخلامیشدی. اوتاقدا کیتاب ایشکافی وار ایدی آما درگی­لرله شکیللردن دولموشدو. بیر رَف­ده یاریسینا قدر اورتا مکتب کیتابلاریلا دولموشدو کی چوخ ائحتیماللا رئی-ین ایدیلر.
من اونا همیشه قزئته اوخویارام” خانیم قوری دئدی. او باجاریغینی ایتیرمه­ییب، آما اونلاری ایکی الیله ساخلایانمیر و گؤزلری یومولور”.
بئله­لیکله خانیم قوری گوللو چتیری­نین آلتیندا یونگولجه اوتوبوس دایاناجاغینا آددیم آتارکن، من قوری بَی-­ه قزئته اوخویاردیم. ایدمان[۸۷] صفحه­لری، بلدییه خبرلرین، دونیا خبرلرین، و بوتون جینایتلرین اوغورلوقلارین و خاراب هاوانین خبرلرین اونا اوخویاردیم. ائله گؤرونوردو کی ایدمان خبرلری و آن لاندرزین[۸۸] مکتوب­لاری ماراغین داها چوخ جوشدورور. من گاهدان بیر اویونچونون آدین یانلیش تلفوظ ائله­سیدیم و یا تئرمینی قاتسایدیم ائله کی اوخودوغوم آنلامسیز اولایدی، اوندا گیلئیلی خیریلتی­لاریلا گرک یئنی دن اوخوماغیمی بیلدیرردی. ایدمان خبرلرینی اوخویاراق او همیشه جیددی، دیققتلی و قاشقاباقلی اوتوراردی. آما آن لاندرزین مکتوب­لارین اوخویاندا ریلکس اولاردی و منه مینتدارلیغینی بیلدیرسین دئیین اؤزوندن قاز سسینه و گوجله فینخیرماق سسینه بنزر سسلر چیخاراردی. اؤزللیکله مکتوب­لارین سؤزلری قادین­لارین بعضی قونولاریلا ایلگیلی اولاندا بو سسلری داها چوخ چیخاریردی. اؤرنک اوچون اؤنمسیز نیگرانچیلیق­لار( بیر قادین یازمیشدی کی قارداشی­نین حیات یولداشی همیشه کئیکی اؤزو پیشیریب ایددیعا ائلر حال بو کی اونو یئینده قنادیچی قویان کاغیذ هله آلتیندا ایدی)، یا دا جینسی ایلیشکی­لرینه گؤره- او زامان ائحتیاط ایله- دانیشاندا.
باش مقاله­لری یا دا روسیه ایله آمئریکا بیرلشمیش اولوس­لار تشکیلاتیندا[۸۹] دئین هدرن پدرن­لری اوخویارکن کیپریکلری یومولاردی، یا داها دوغروسو دئسم ساغلام گؤزونون کیپرییی آزجاجا سیخیلاردی، و عئیبه­جر قارالمیش گؤزونون کیپرییی بیرآز یومولاردی؛ هم ده کؤکسونون حرکتی چوخ گؤزه گلردی، ائله کی بیرآز آرا وئرردیم گؤرم یاتیبدیر یا یوخ، سونرا باشقا بیر تورلو سس چیخاراردی، قیسا و دانلاق حالتی اولان سس. من اونا آلیشاراق او دا منه آلیشیردی. بو سس­لرین ده قاخینج حالتی آزالیردی و آرخایینچیلیق حالتی چوخالیردی. من ده آرخایینلاشیردیم. اونون یاتماغیندان یوخ بلکه اونون بو آن اؤلمه­مک گئرچه­ییندن.
اونون گؤزلریمین اؤنونده اؤلمه­سی اؤنجه قورخونج دوشونجه ایدی. نه­یه اؤلمه­سین کی؟ حال بو کی او چوخدان یاریم جان گؤرونوردو. معیوب گؤزو قارا سویون آلتیندا کی داشا نزه­ییردی. آچیق قالان آغزینین بیر طرفی اورجینال شرور دیشلرینی( او زامان یاشلی­لارین چوخونون قوندارما دیشلری وار ایدی) قارا دولدورمالاری ایله گؤستریردی و نم­لی مینالارینین آراسیندا پاریلداییردیلار. منجه اونون بو دونیادا دیری اولماغی هر آن سیلینه بیلن سهو ایدی. آما سونرالار، دئدیییم کیمی اونا آلیشمیشدیم. اونون بؤیوک آغایانا باشی ایله گئنیش کؤکسو و همیشه بودونون اوستونه اوزاتدیغی گوجسوز سول اَلی ایله بیر قوجامان ائرکک گؤرونردی و منی، اوخویاراق گودَردی. بربر دؤورانیندان یادیگار قالان بیر یاشلی ساواشچی­یا بنزه­ییردی. قانلی بالتالی ائریک[۹۰]، شاه نات[۹۱].
گوجوم یئیین الدن گئدیر”، دنیز شاهی کیشی­لرینه دئدی.
بیر داها بیر فاتئح کیمی دنیزلره دوشمه­یه­جیم.”
او بئله ایدی. تووالئته گئدنده گؤوده­سی­نین آغیر لئشی ائوین آراجلارینی و دووارلاری سیندیریب تهلوکه یه سالاردی. گؤوده­سی­نین قوخوسو چوخ توند اولماسا دا، اوشاق صابینی و تالک پودرو کیمی خفیف دئییلدیسه تمیز ده دئییلدی. قالین پالتاریندا قالان تنبَکی قوخوسو( باخمایاراق کی داها سیگار چکمیردی) و منجه قالین گئییم و گؤنه بنزه­ین، بیر تورلو حئیوانی ایستیلییی ده اولان دَریسی­نین قوخوسودا اولاردی. آز آما آردیجیل سودوک قوخوسو دا قوخویاردی. دوغروسو بو قوخولاری بیر قادیندان دویسایدیم ایرگه­نردیم آما بونون حاقدا تکجه باغیشلاماق یوخ بلکه بیر تورلو اسکی اوستونلوک ایرگه­نمه­ییمه مانع اولوردو. بیر دفعه تووالئتدن چیخاندان سونرا من گیردیم اورا، بیر اییرنج حئیوانین یوواسینا بنزه­ییردی، هله گوجلو وحشی بیر حئیوان.
چئس دئییردی قوری بَیی اوشاق کیمی قوروماقلا واختیمی کورلاییرام. هاوالار تمیزله­نیردی و گونلر داها اوزون اولوردو، توکان­لار یئنی ویترینلرله سوسلنیب[۹۲] و قیش سوستلوغوندان چیخیردیلار. هامی داها آرتیق یئنی آدام ایشه ­آلماغی دوشونوردو. بو حالدا من دیشاری چیخیب داها جیددی ایش آختارمالی ایدیم. خانیم قوری هر ساعاتیما تکجه ۴۰ سئنت وئریردی.
آما من خانیما سؤز وئرمیشم” دئدیم.
چئس بیر گون دئدی خانیم قوری­نی اوتوبوسدان دوشنده گؤروب. اونو آفیس­ینین پنجره­سیندن گؤرموشدو. اورا سئنت پول خسته خاناسینا یاخین دئییلدی.
او بلکه ایستیراحته چیخمیشمیش” دئدیم.
یا عیسی مسیح، من ایندییه­جن اونو گوندوزون ایشیقلیغیندا ائشیکده گؤرمه­میشدیم” ، چئس دئدی.
قوری بَیه اؤنردیم ایندی کی هاوالار یاخشیلاشیب اونو ویلچئرله دولانماغا آپاریم. آما او چیخاردیغی سسلرله بو فیکیری ردّ ائله­دی، ویلچئر اوستونده کوتله ایچینده چیخماغی خوشلامادیغینی منه بیلدیردی، یا بلکه ده منیم کیمی بیریسی­له کی آچیق-آیدین بو ایشی ائتمه­یه آلینمیشدیم دیشاری چیخاماغی خوشلامادیغینا گؤره.
بونو سوروشماق اوچون قزئته اوخوماغی کسمیشدیم و یئنیدن اوخوماغا چالیشاندا او بیر ژئست توتماق­لا و باشقا سسلر چیخارماقلا منه دئدی کی دینله­مکدن یورولوب. قزئته­نی یئره قویدوم. او ساغلام اَلین بؤیرونده کی ماسانین اَن آشاغی چکمه­جه­سینده اولان آلبوملارین توپاسینا ساری اوزاتدی و اؤزوندن داها چوخ سسلر چیخاردی. من تکجه بو سس­لری خورولداماق، فینخیرتی، اؤسگورمک، هورمک و میریلتی سسلریله گؤستره بیلرم. آما بیر سوره­دن سونرا او سسلر منه سؤزجوکلر کیمی گلیردیلر، اونلار سؤزجوکلر یئرینه دانیشیردیلار. اونلارا زورونلو ایفاده­لر[۹۳] و ایستک­لر کیمی باخیردیم؛( “ایسته­میرم”، “یاردیم ائله دوروم”، “ایچملی ایستیرم”)؛ بلکه داها قارماشیق ایفاده­لر کیمی باخیردیم: ” یامسیح نه­دن بو ایت سسین کسمیر”، یا دا “بیر سورو هدرن پدرن” ( بونو قزئته­لرین بعضی دانیشیق یا دا باش مقاله ­لرین اوخویاندا دئیردی).
ایندی ائشیدیییم سؤزو بو ایدی: ” قوی گؤروم بوردا قزئته یازیلاریندان باشقا بیر شئی ده وار”.
چکمه­جه­ده کی آلبوملار توپاسین سوروتله­ییب یئرده قیچی­نین یانیندا یئرلشدیردیم. اؤرتوک­لری­نین اوستونده بؤیوک قارا حرفلر ایله سون ایللرین تاریخی یازیلمیشدی. من ۱۹۵۲-جی ایلین آلبومونا گؤز دولاندیردیم و آلتینجی جورج-ون[۹۴] تورپاغا باسدیریلما تؤرن­ینه عایید اولان قزئته قیرینتی­لارین گؤردوم. باشیندا رنگلی میدادلا یازیلمیشدی” آلبئرت فئرئدریک جورج. دوغوم ایلی ۱۸۸۵٫ اؤلوم ایلی ۱۹۵۲″. اوچ ملکه­نین یاس گئییمیله ده شکیلی وار ایدی.
سونرا کی صفحه ده آلاسکا[۹۵] اوتوبانینا عایید بیر اولایین حیکایه­سی ایدی.
بو ماراقلی راپوردو”، دئدیم.” ایستیسن یاردیم اولام باشقا بیر آلبوم دوزلده­سن؟ ائلییه بیلرسن هر نه یی کی ایستیسن سئچه­سن من ده اولاری کسیب یاپیشدیررام”. چیخاردیغی سسین آنلامی بو ایدی:” چوخ زحمتلی ایشدی”. یا دا “ایندی نه­یه گرک اؤزومو اینجیدیم؟” یا حتی ” چوخ سفئی فیکیردی”. او باشقا آلبوملارین تاریخینی گؤرسون دئیین  شاه آلتینجی جورجو سوروتله­دی اویانا. ایسته­دییی اونلارین ایچینده یوخ ایدی. کیتاب ایشکافینا طرف ایشاره­لندی. من باشقا آلبوم­لارین توپاسینی گتیردیم. او بیر اؤزل تاریخین آلبوملارینی آختاریر دوشوندوم و اؤزتوک­لرین گؤرسون دئیین اونلاری بیر بیر قالدیردیم. آجیقلانماغینا باخمایاراق هردن ردّ ائله­دییی کیتابلارین صفحه­لرینه گؤز دولاندیریردیم. ونکووئر آداسی­نین پومالارینا گؤره، آکروبات آرتیستین اؤلومونه گؤره، هم ده قار اوچوغوندا بیر اوشاغین دیری قالماسینا گؤره مقاله­لر اوخودوم. ساواش ایللرینه قاییتدیق، اوتوزونجو ایللره قاییتدیق، من آنادان اولان ایله، تخمینن بیر اون­ایللیک سونراسی ایدی کی راضیلاشیب سیفارش وئردی. بونا باخ، ۱۹۲۳٫
آلبومون اوولیندن گؤز دولاندیرماغا باشلادیم.
ژانویه­نین قار یاغینتیسی کندلرین یولون باغلاییب”.
بو دئییل، تئز اول باشقاسین اوخو.
واراقلاماغا باشلادیم.
یاواش یاواش، راحات اول، یاواش یاواش.
هئچ نه­یی اوخومادان ایسته­دیینه یئتیشه­نه­دک صفحه­لری بیر به بیر چئویردیم.
اؤزودو. اوخو
هئچ شکیل و یا باشلیغی یوخ ایدی. رنگلی حرفلردئییردی،” ونکووئر سان[۹۶]، آپریلین ۱۷-سی، ۱۹۲۳″.
کورتئز آداسی”. اوخودوم.”اؤزودو؟
اوخو، تئز اول.
کورتئز آداسی. بازار گونو سحر ائرکن یا دا شنبه گونو گئجه یاریسی آنسون جئیمز وایلد-ین[۹۷] ائوی بوتونلوکله اود توتوب یاندی. ائو باشقا ائولردن و یاشام یئرلریندن ده اوزاق اولدوغونا گؤره آدادا یاشایانلاردان هئچ کیسمه آلوولاری گؤرمه­ییب. راپورلار دئییر کی اودو صبح ائرکندن دئزولئیشین ساوند-ا[۹۸] طرف گئدن بیر بالیق توتان گمی گؤروب آما گمی سکی­سینده دورانلار بلکه بیر نفر قورو بوداقلاری یاندیریر سانیبلار و قورو بوداقلارین یانماسی مئشه­نین یاش اولدوغونا گؤره هله­لیک هئچ تهلوکه­لی دئییل دئیین یوللارینا داوام ائدیبلر.
وایلد بَی “وایلد فروت[۹۹]” باغلاری­نین مالیکی ایدی کی ۱۵ ایل اؤنجه دن آدادا یاشاییردی. کئچمیش ده ارتئش ده خیدمت ائتمیش یالقیز بیر کیشی ایدی آما هامیلا صمیمی داوراناردی. او نئچه ایل اؤنجه ائولنمیشدی و بیر اوغلو وار ایدی. دئییرلر آتلانتیک ایالتینده[۱۰۰] آنادان دوغولوب.
اودون آلوولاری ائوی باتیرمیشدی و بوتون دیرکلر ییخیلمیشدیلار. وایلد بَی­ین گؤوده­سینی قالان قارا یانیقلارین اورتاسیندان تاپمیشدیلار؛ ائله یانمیشدی کی تانینمیردی.
خارابالیغین اورتاسیندا تاپیلمیش بیر قارالمیش قالای،  کی فیکر ائلیردیلر آغ نفت ایچینده وار ایمیش.
وایلد بَی­ین حیاط یولداشی او زامان ائوده دئییلدی؛ کئچن چرشنبه گونو، آلما یوکونو اَری­نین باغیندان کوموکس[۱۰۱]-ا داشییان بیر گمی ایله گئتمه­یی قبول ائتمیشدی. او همن گون قاییتماق قصدینده ایدی آما گمی­نین موتورونون سورونونا[۱۰۲] گؤره اوچ دؤرد گئجه ده آرتیق قالمیشدی. بازار گونو دوستو ایله کی اونو اؤز گمی­سیله یئتیرمه­سینی اؤنرمیشدی، قاییدیب بیرلیکده بو فاجیعه­نی کشف ائتمیشدیلر.
وایلدین کیچیک اوغلونون جانی تهلوکه­ده اولماق قورخوسو هامینین فیکرین قاتمیشدی. او اود توتان زامان ائوده دئییلمیش. آختاریش تئزلیکده باشلادی و بازار گونو آخشام چاغی قارانلیقلاشمادان اؤنجه اوشاق مئشه ده بیر مایل­دان آز ائولریندن اوزاقلیقدا تاپیلدی. نئچه ساعات یاش بوداقلارین آلتیندا قالماقدان ایسلانیب اوشویوردو آما باشقا جهتلردن ساغلام ایدی. نظره گلیردی ائودن چیخاندا بیرآز یئملی اؤزویله گؤتورموشدو نییه کی تاپیلاندا یانیندا نئچه تیکه چؤرک وار ایدی. کورتئنی[۱۰۳] ده وایلد عاییله­سینین ائوین اوچوروب وایلد بَی­ین اؤلومونه سبب اولان اود-ون ندن­ین بیلمک اوچون سورغو سئوال کئچیریله­جک.
بو آداملاری تانیسان؟” سوردوم.
صفحه­نی چئویر.
آگوستون دؤردو، ۱۹۲۳٫ ونکووئر آداسی­نین کورتئز شهرینده بو ایلین آپریل آییندا آنسون جئیمز وایلدین اؤلومونه سبب اولان اود-ا گؤره سورغو سئوال اوتورومو کئچیریلدی. رحمتلیک  کیشی­نین باشقا شخص و یا اشخاص الی­له اودا چکیلمک شوبهه­سی ایثبات اولونان دئییلدی. اود توتان یئرده آغ نفت دولچاسی­نین اولماسی یئترلی ندن عنوانیندا قبول اولانمازدی. پئرسی کئمپئر[۱۰۴] بَی، کورتئز آداسیندا مانسون[۱۰۵] لیمان بؤلگه­سینده[۱۰۶] توکانچی، دئدیینه گؤره وایلد بَی همیشه آغ نفت آلیب قوللاناردی.
رحمتلییین یئددی یاشیندا اوغلو اود حاقدا هئچ جوره شاهید کئچه­نمیردی. او نئچه ساعاتدان سونرا بیر آختاریش گروپونون واسیطه­سیله بیرآز اوزاقلیقدا مئشه­لیکده آوارا بیر حالدا تاپیلمیشدی. سورغولارین جاوابیندا دئمیشدی کی آتاسی اونا بیر تیکه چؤرک­له آلما وئریب دئمیشدی کی گئدیب مانسون لیمان بؤلگه­سینده دولانسین آما یولون ایتیرمیشدی. آما او نئچه هفته سونرا دئدی کی یادیندا دئییل کی اولای بئله اولموش اولا و نئجه یولونو ایتیردیینی بیلمیر بو حال دا کی اؤنجه لر او یولدان چوخ کئچمیشدی. ویکتوریالی[۱۰۷] دوکتور آنتونی هئلوئل[۱۰۸] دئییب کی اوغلانی یوخلاییب و اینانیر کی ایمکانی وار او اود-ون بیرینجی ایزلرین گؤرنده اورادان قاچیب و بلکه ده واخت ائدیب اؤزویله بیرآز یئمه­لی گؤتورسون و ایندی خاطیرلامیر. هم ده دئییر کی دئدییی ناغیللار دوز و یا یالان اولا بیلر، و ایندی کی نئچه سوره­دیر کئچیب اونلاری خاطیرلایانمیر. دوکتور دئدی داها بوندان آرتیق اوشاغی سورغو سئوالا چکمک فایداسیزدیر نییه کی چوخ ائحتیماللا بو قونویا گؤره گئرچک ایله دوش­لرینی بیر بیریندن آییرد ائدنمیر.
خانیم وایلد اود توتان زامان ائوده دئییلدی، یونییون بای­لی جئیمز تامپسون[۱۰۹] قوری­-نین گمی­سی ایله ونکووئردن قاییدیردی.
وایلد بَی­ین اؤلومونه بیر آجی تصادفی اولای اولاراق حکم وئریلدی. و اودلانماغین تمل ندنی بلله­نمه­دی.
ایندی آلبومو باغلا.
قوی قیراغا. هامیسین قوی قیراغا.
یوخ، یوخ ائله یوخ کی. اولاری دوزن­له دوز. ایل به ایل، بئله سینه یاخشیدی. ائله کی وار ایدیلر.
خانیم هله گلیب یئتیشمیب؟ پنجره­دن دیشاری باخدی.
یاخشی، آما تئزلیکده گله­جی.
خوب، بویور، بونا گؤره باخیشین نه دی؟
اؤنملی دَییر، اؤنملی دَییرکی بونا گؤره نئجه فیکیرله­شیسن.
ایندییه­جن فیکیرلشمیشدین کی اینسانلارین یاشامی بئله اولا بیلر و سوندا بئله­سینه سونا یئتیشه بیلر؟
خوب، اولا بیلر.
بونا گؤره چئس-ه هئچ نه دئمه­دیم. باخمایاراق کی گونده کی اولایلاریمین هانسینی کی دوشونوردوم ماراقلی دیر و اونو خوشلاندیراجاق دئیردیم. او هله­لیک قوری عاییله­سینه هر تور ایشاره­لنمکدن قاچینیردی. اونلارا سؤز ده بزه­میشدی. گولونجد­ولر.
پارکین بوتون قارامتیل گؤرونن کیچیک آغاجلاری چیچکلنمیشدیلر. گوللری آچیق چؤهرایی رنگده ایدی. قوندارما رنگله بویانیب قوورولموش مکه­لر کیمی.
و من گئرچک بیر ایشده ایشله­مه­یه باشلادیم.
کیتسیلانو کیتابخاناسیندان زنگ ائدیب شنبه گونو ناهاردان سونرا نئچه ساعاتلیق اورایا گئتمه­ییمی ایسته­دیلر. اؤزومو ماسانین او تاییندا، ارباب روجوع­لارین کیتابلارینا قایتارماق تاریخینی مؤهورله­یرک تاپدیم. بعضی مراجعه ائدنلرله تانیش ایدیم، منیم کیمی همیشه کیتاب بورج آلاردیلار.ایندی کیتابخانانین ایشچی­سی اولاراق اونلارا گولومسه­ییب دئییردیم، “ایکی هفته سونرا سیزی گؤره­جم”.
بعضی لری گولوب دئییدیلر: ” هیم، داها تئزلیکده”. منیم کیمی کیتاب دوشگونو[۱۱۰] ایدیلر.
بللندی کی بو ایش الیمدن گلر. کاسسا آپاراتی یوخدور، بیری ده جرمه­سینی اؤده­یه­نده کسیرین چکمه­جه­دن گؤتوروب وئرردیم. و اؤنجه­دن کیتابلارین چوخونون یئرین بیلردیم. و آرشیو کارتلاری  گلنده الیفبا سیراسینی بیلردیم.
منه چوخ ساعات ایشله­مه­یی اؤنردیلر، بیرآز سونرا دا گئچیجی فول تایم اولدو. ثابیت امکداشلارین بیرینین اوشاغی دوشموشدو. او ایکی آی ایش باشینا گلمه­دی بو سوره­نین سونوندا یئنی دن بویلانمیشدی و دوکتور مصلحت بیلمیشدی کی ایش باشینا قاییتماسین. بئله­لیکله من ده ثابیت امکداشلارا قوشولدوم و بیرینجی بویلولوغومون یاریسی سوووشانادک ایش باشیندا قالدیم. اؤنجه دن  اوزلرین گؤروب تانیدیغیم قادین­لارلا ایشله­ییردیم. ماویس[۱۱۱] ایله شئرلی[۱۱۲]، خانیم کارلسون[۱۱۳] ایله خانیم یوست[۱۱۴]. هامیسی دئییردی کی من کیتابخانایا گئدیب و نئچه ساعات او یان بو یانا دولانماغا نئجه آلیشمیشدیم. کئشکه اونلار منه بو قدر دیقت ائتمیردیلر، کئشکه من هر آددیم باشی اورایا گئتمیردیم.
دایاناجاغیمدا ایله­شیب ماسا دالیندان اینسانلارلا اوز اوزه اولماغین، و منه یاناشانلارلا یئتکنلی، قیوراق و صمیمی اولماغین و اونلارین منی ایشین اوجون بوجاغین بیلن و بو دونیادا دیرلی بیر ایشله مشغول اولان بیریسی گؤرمکلری، گیزلنمه­یی، آوارالیغی، دوشچولویو[۱۱۵] و قادینلیغیمی کیتابخانادا بوراخیب اونوتماغین نه یامان ساده کئفی وار ایمیش.
البته ایندی کیتاب اوخوماغا واختیم آز ایدی و بعضن بیر کیتابی بیر آن تکجه الیمده ساخلاردیم. ایش یئریمده ماسا آرخاسیندا کیتابی بیر نسنه کیمی الیمه آلاردیم؛ و تئزجه گرک سویونو بوشالداجاغیم بیر قاب عنوانیندا یوخ. بیر آن قورخو جانیما دوشردی، اؤزونوزو یانلیش بینادا گؤردویوز بیر یوخو کیمی، یا دا سیناغیزین[۱۱۶] وقت­ین اونودوبسوز و سونرا، بو تکجه بعضی آنلامسیز فاجیعه­لره و یا عؤمورلوک یانلیش­لاریزا ایشاره­دیر دوشونورسوز.
آما بو قورخو بیر دقیقه ایچینده ایتیب باتاردی.
کیتابخانادا بیرگه ایشله­دییمیز قادینلار منی یازماق حالیندا گؤردوکلرین خاطیرلاییردیلار.
اونلارا دئدیم مکتوب یازاردیم.
به مکتوبلاریوی چیرکنئویسده یازیسان؟
دوزدو”، دئدیم. “بو اوجوزدو”.
سون دفترچه چکمه­جه­ده قارماقاریشیق جورابلارلا آلت گئییملریمین آراسیندا گیزلی و بوش قالدی. اونو گؤرنده منه قوشقو[۱۱۷] و آشاغی­لانیلمیش حیسسی ال وئردیینه گؤره او بوش قالدی. شرریندن قورتارماق ایسته­ییردیم آما اولمادی.
خانیم قوری ایشه گئتمه­ییمی تبریک ائله­دی.
دئمه­میشدون کی یئنه ایش آختاریسان”، دئدی.
دئدیم اؤنجه دن آدیمی کیتابخانایا یازدیرمیشدیم و سیزه ده دئمیشدیم.
منه؟ ایش باشلامامیشدان اؤنجه؟”،دئدی. “ایندی قوری بَی نئجه اولاجاق؟
متاسیفم”، دئدیم.
بو اونون حالینا چوخ یاخشی دَییر؟ دوزدو؟
چؤهرایی قاشلارین قالدیریب منله اوجا دانیشدی. ائشیتمیشدیم تئلفوندا اونون سیفاریشین یانلیش گؤندرن قصاب­لا یا دا باققال­لا دانیشان کیمی.
من نئیله­مه­لییم؟”، دئدی. “سن منی اَل کسیک بوراخیب گئتدین.دوزدو؟ اومیدوارام باشقالارینا وئردیین سؤزون اوستونده دوراسان، منه سؤز وئردیین کیمی!”
البته هدرن پدرن دئییردی. اونا نه قدر قالاجاغیما گؤره هئچ سؤز وئرمه­میشدیم. هر حالدا بیرآز اؤزومو گوناهکار دویوردوم، باخمایاراق کی گوناهیم یوخ ایدی. دوغرو کی اونا هئچ نه­یی سؤز وئرمه­میشدیم آما قاپی دؤیمه­سینی جاوابلامایاندا و ائوه گیریب چیخاندا یاواشجا سوزمه­یه چالیشان واخت­لار و یا مطبخ پنجره­سی­نین اؤنوندن کئچنده منی گؤرمه­سین دئیین باشیمی اَیردیم، نئجه؟ و اونون تعارفونون جاوابیندا ایلگیمیزین یالانچیلیق دوستجاسینا اولدوغونا شیرینجه تظاهور ائله­دییم واختلار حال بو کی دوغروسو اونو تحمل ائدیردیم، نئجه؟
دوغروسو بیرآز دا یاخشی اولدو”، دئدی. “ایسته­میرم گوونمه­دییم بیریسی قوری بَیه باخسین. من سنین قوری بَیی قوروماق یولوندان ائله ده راضی دئییلدیم. هر حالدا ایسته­دیم بونو سنه دئیم.”
تئزلیکده باشقا باخیجی تاپدی. بیر کیچیک بسته بوی قادین، قارا، آلا بولا ساچلاریلا. هئچ واخت دانیشماغین ائشیتمزدیم، آما خانیم قوری­نین اونا دانیشماغین ائشیدردیم. پیلله­لردن یوخاری کی قاپی آچیق قالاردی کی من سسی ائشیدیم.
او آرواد هئچ واخت بونون ایستیکانین دا یومازدی، چوخ واخت هئچ چای دا دمله­مزدی. بیلمیرم او نه درده دَییردی، تکجه ایله­شیب قزئته اوخویاردی.”
او گونلر ائودن دیشاری چیخاندا مطبخین پنجره­سی آچیق اولاردی و سسی باشیما دوشردی، باخمایاراق کی گؤرونوشده قوری بَیه دانیشاردی.
گه، گئدیر باخ یوللانیب. هئچ ایندی اؤزونه زحمت وئرمییه­جه بیزه ال ترپتسین. بیز اونا هئچ کیم ایش وئرمیین واخت ایش وئردوی آما او اؤزونه زحمت وئرمیر…یوخ، یوخ.”
من اَل ترپتمزدیم. قوری بَی ایله­شن پنجره­نین آلتیندان سوووشمالی ایدیم. آما منجه ایندی اونا اَل ترپه­دئیدیمسه یا اونا باخایدیمسا دا، او آشاغی­لاناردی، یا دا آجیقلاناردی. هر نه ائتسه­یدیم اونون آجیغینا گله ­بیلردی.
محله­نین یاریسین کئچمه­میشدن هر ایکیسینی ده اونوداردیم. سحرلر ایشیقلیق اولاردی و اؤزگورلوک حیسسی­له دورتولو[۱۱۸] حرکت ائدیردیم. بئله واخت­لار یاخین کئچمیش چاغلاریم آنلامسیز اولاراق اوتاندیریجی گؤرونوردو. ساعاتلارجا توتوغون آرخاسیندا چارداقدا ایله­شمک؛ ساعاتلارجا مطبخ ماساسی­نین آرخاسیندا اوغورسوزلوقلا صفحه­لری دولدورماق؛ زامانی بیر بوغوجو اوتاقدا بیر قوجا کیشیله کئچیرمک؛ توکلو خالچا، مبل­لار، پالتاری­نین قوخوسو و گؤوده­سی­نین قوخوسو، آلبوملارین قوروموش یاپیشقانی­نین[۱۱۹] قوخوسونا دؤزمک. ایسته­دییینی سئچیب تاپماق زوروندا اولدوغوم بیر خلوَر قزئته کاغیذی.  ییغیب ساخلادیغی قورخولو اولای­لار، و منی زورلاییردی اوخویام.( بیر آن بیله دوشونمه­دیم بونلار من همیشه کیتابلاردا اونلارلا سایغیله یاناشدیغیم اینسانی فاجیعه لرین بیر بؤلومودور) بونلاری خاطیرلاماق اوشاقلیق چاغیندا او دؤورانا بنزه­ییر کی اؤزومو خسته­لییه ووروب و کافور یاغینی قوخویان ایستی و راحت پامبیق مله­فلر ایچینه سوزردیم و اؤز تنبللیییمین قیزدیرماسیندا یاناردیم. اوست قاتدا اوتاغیمین پنجره­سیندن گؤرونن آغاج بوداقلاریندان آنلامسیز مئساژلار آلاردیم. او واختلار پئشمان اولمازدیم و دوغال ساناردیم. ائله گؤرونوردو کی بو منیم وارلیغیمین بیر بؤلومو اولموشدو- خسته بؤلومو- کی ایندی آرادان آپاریردیم. بلکه اَره گئتمک بو دییشیکلییه سبب اولدوغونو دوشونه­­سیز،  آما بیر آز مودّته­جن ائله دئییلدی. من هله ده همیشه­لیک اؤزلویومده قیش یوخوسوندا یاتمیشدیم و دوشونجه­لریمده ایتیب باتمیشدیم. اینادکار، قادین سایاقسیز و آنلامسیز شکیلده گیزملی[۱۲۰] ایدیم. آما ایندی اؤز باشیمی ساخلایا بیلردیم و اؤز آلین یازیمی بیر قادین و بیر امکداش اولاراق قبول ائتمیشدیم. بیرآز چالیشاندا کیفایت قدر گؤرکملی و یئتنکلی ده اولوردوم، عجیب قریب یوخ. کئچینه بیلیردیم.
خانیم قوری بیر بالینج اوزو ایله قاپی­یا گلدی. ناچارلیق حالیتینده دیشلرین آغاردیب عداوتلی گولومسه­یرک سوروشدو کی بو منیم دیر. تردیدسیز دئدیم کی منیم دئییل. ایکی بالینج اؤرتویوم وار کی ایکیسی ده یاتاغیمیزدا بالینج­لارین اوزونده دیلر.
او مظلومانه لحن ایله دئدی: “بللی دی کی بو منیم دَییر
ندن بئله دئییسن؟”، دئدیم.
زهرلی گولوشلری گئتدیکجه داها آرخایین­لاشیردی.” من هئچ واخت بئله جینسده قوماشی[۱۲۱] قوری بَی-ین یاتاغی­نین اوزونه یا دا اؤزومونکونه چکمه­میشم
نییه؟
چونکو جینسی قولایدی
بئله­لیکله گئدیب چارداقدا کی یاتاقدان بالینج اؤرتوکلرین بالینج­لاردان چیخاریب گتیریب اونا گؤسترمه­لی اولدوم و بللندی کی اونلار جوت دئییل­لر. حال بو کی نظریمه جوت گلمیشدیلر. بیری­نین کی جینسی یاخشی ایدی اونون ایدی و الینده کی منیم ایدی.
اینانمیرام ایندییه­جن بیلمیبسن”،دئدی. “البته بو ایش سننن سورا باشقاسیندان بعیددی”.
چئس باشقا آپارتمان سوروشموشدو. دوغرو بیر آپارتمان- سوئیت یوخ- بیر کامیل تووالئت حامام سئرویسی و ایکی یاتاق اوتاغی وار ایدی. ایش یولداشلاری­نین بیری حیات یولداشی ایله ائو آلمیشدیلار و و اورادان داشینیردیلار. آپارتمان مک دونالد[۱۲۲] خیاوانیندا بیرینجی خیاوانین تین­ینده بیر بینا­نین ایچینده ایدی. من اورادان دا ایش یئریمه پییادا گئده بیلردیم و چئس ده همن اوتوبوس ایله گئده بیلردی. ایکی اَمک حاققی ایله آیلیغین یئتیره بیلردیک. چئس-ین دوستو ایله حیات یولداشی ائوین بعضی وسایل­لارین آپارمامیشدیلار و اونلاری اوجوز فییاتا ساتماق ایسته­ییردیلر. یئنی ائولرینه یاراشمیردیلار آما بیزیم اوچون اولدوقجا اعلا ایدیلر. بیز اوچونجو قاتین اوتاقلارینا باخدیق و بئژ رنگلی دووارلارین، پالید پارکئتین، مطبخین گئنیش کابنئت­لرین، و کیرئمیت[۱۲۳] دوزولموش حامام تووالئتین بیندیک. مک دونالد پارکی­نین آغاجلاری­نین یارپاقلارینا ساری باخان بالاجا بالکونی بیله وار ایدی. بیز سانکی یئنی­دن بیر بیریمیزه وورولموشوق هیجانا گلمیشدیک. یئنی دوروموموز و زئرزمی­دن تکجه بیر کئچیجی ایستاسیون[۱۲۴] کیمی کئچیب و یئتیشکینلیک یاشامینا گیرمه­ییمیزه وورولموشدوق. نئچه ایله­جن دانیشیقلاریمیزدا بونا گؤره شوخلوقلاشاردیق و بیر دؤزوم سیناغی اولاراق خاطیرلایاردیق. هر داشینماغیمیز- کیرایه ائله­دییمیز ائولره، بیرینجی مالیک اولدوغوموز ائوه، ایکینجی مالیک اولدوغوموز ائوه، باشقا شهرده بیرینجی ائویمیزه- گلیشیمین سئوینج حیسسین بیزده تؤره­دیردی و ایلگیمیزی سیخلاشدیریردی؛ سونونجو و ان بؤیوک ائویمیزه موتسوزلوق ایزلرینی دویاراق و قورتولوش یولونون گوجسوز گؤسترگه­لری­له اورایا گئتدیم.
خانیم قوری-ه دئمه­دن رئی-ه خبر وئردیک. بو ایشله خانیمی لاپ حیرصلندیردیک. دوغروسو بیرآز دلی کیمین اولدو.
هیم، بو قیز فیکر ائلیر بلکه چوخ زیره­دی، هئچ ایکی اوتاغی تمیز ساخلییانمیر، یئری سوپورنده بوتون گؤردویو ایش زیبیلی بیر بوجاغا ییغماخدی”.
بیرینجی سوپورگه­می آلاندا  خک­انداز آلماغی اونوتموشدوم و بیر نئچه موددت او ایشی ائدیردیم. او بونو تکجه بئله­جه بیله بیلردی کی بیز ائوده اولمایاندا اؤزونه ایجازه وئریب آچاری ایله بیزیم اوتاغا گیرسین. بئله­لیکله بللندی کی بونو ائدیر.
بیلیسن، فوضول بیریدی، اوول گؤروشده بیلدیم کی نه قد  فوضولدو. هله یالانچی­دی. هئچ نه­یی دوز دَییر، اوردا اوتورور دئییر مکتوب یازیرام حال بو کی بیر شئیی هئی یازیب پوزور. اولار مکتوب دَییللر کی، هئی تیکرارلانان بی یازیدی، هوش باشی یوخدو کی”.
ایندی بیلیردیم کی زیبیل قابی­دان منیم بوکولموش اَزیک کاغیذلاریمی گؤتوروب اوخویورموش. هر دؤنه همن حیکایه­نی همن سؤزجوکلرله باشلاماغا چالیشاردیم، بونا گؤره دئییردی تیکرارلاییر.
گئتدیکجه هاوا لاپ ایستی­لشیردی من ده ژاکت­سیز ایش یئرینه گئدردیم. دامنیمی بیر اینجه پولیوئرین اوستونه چکیب قاییشی سون دئشییینه­جن سیخ چکردیم.
گیرجک قاپینی آچیب آرخامجا قیشقیردی.
هوی پینتی قحبه، بو جیندایا باخون، بوجور گئیینمه­ینن سینه­لرین ائشییه قویوب بورجودا بورجودا گئدیر. دئییسن به مئرلین مونروسان[۱۲۵]؟
و” بیز ایسته­میروی بیزیم ائوده اولاسان، نه قد تئز بو ائودن گئتسن بئله یاخشیدی.”
رئی-ه زنگ ائدیب دئدی کی من اونون کتان یاتاق اؤرتویونو اوغورلاماغا چالیشیردیم. گیلئیلیک ائله­دی کی من محله­ده هر یئرده اونا سؤز قوشورام. آرخایین اولسون کی من ائشیدیرم قاپینی آچیق قویموشدو و تئلفوندا قیشقیریردی. آما بو ایش گرکمیردی نییه کی بیز بیر خط­­ی قوللانیردیق و هر نه­یی ایسته­سیدیک ائشیده بیلردیک. هئچ واخت بونو ائتمه­میشدیک- غریزی حیسسیم قولاقلاریمی توتوم دئییردی- آما بیر گون آخشام چاغی کی  چئس ائوده ایدی دسته­یی گؤتوروب دانیشدی.
رئی سؤزلرینه قولاق وئرمه، او فقط بی دلی قاری­دی. بیلیرم آنان­دی آما مجبورام دئیم دلی­دی.”
سوروشدوم رئی نه دئدی؟ سینیرله­نمه­دی؟
فقط دئدی: دوزدو، اولسون.”
خانیم قوری دسته­یی قویوب موستقیم پیلله­لردن آشاغی قیشقیردی: ” ایندی گلیب دئیرم کیم دلی­دی. گلیب دئیرم هانسی یالانچی دلی مننن اَریمین دالیسیجا هر یئرده یالان دئییر.”
چئس دئدی:” بیز سؤزلریوی ائشیتمیروی، منیم خانیمیمی بوشلا.” بیرآز سونرا منه دئدی:” منظوری مننن اَریم­دن نه ایدی؟
بیلمیرم”، دئدیم.
بو فقط سنه گؤره بئله ائلیر”، چئس دئدی. ” چون سن گنج و گؤزلسن و او قاریمیش ایفریته دی.”
بوشلا”، دئدی. و منی گولدورمک اوچون  بیر یاریمچیق جوک دا قوشوب دئدی: “گؤره سن قاری آروادلار نه درده دَییللر؟” .
چمدان­لاریمزی گؤتوروب یئنی آپارتمانیمیزا گئتدیک. سکی ده گؤزله­ییردیک و دالیمیز ائوه ساری ایدی. سون قیشقیرتی­لارینی دا ائشیتمه­یه گؤزلنتیم[۱۲۶] وار ایدی آما هئچ سس گلمه­دی.
نولار ایندی منی بی توفنگ­نن دالدان ویرا”، دئدیم.
اونون کیمی دانیشما”، چئس دئدی.
ایستیرم قوری بَیه ال ترپه­دم اوردا اولسا”.
بو ایشی گؤرمه­سؤن یاخشی­دی.”
سون دفعه اولاراق ائوه باخمادیم و داها بیرده او خییاواندا آددیم­لامادیم، او محله­نین آربوتوس[۱۲۷] خییاوانیندا کی اوزو پارکا و دنیزه ساری باخیردی.
ایندی بئینیمده اورانین نئجه اولدوغوندان آیدین ایماژیم یوخدی، تکجه بعضی شئی­لری یاخشی خاطیرلایا بیلیرم؛ چارداغین توتوغونو، شوشه آراج­لارین کابنئتینی، قوری بَی­-ین یاشیل کاناپه­سین. بیز گئتدیک و بیزیم کیمی اؤزگه­نین ائوینده اوجوز یئرده یاشاماغی باشلایان یئنی قوشا گنج­لرله تانیش اولدوق. سیچانلاردان، بؤجک­لردن، چیرکین تووالئت­لر و دلی قادین صابخانالارا گؤره سؤزلر ائشیتدیک. آما اؤز دلی قادین صابخانامیزدان پارانویی حالتیله، هئچ نه دئمه­دیک.
باشقا تور دئسم داها خانیم قوری-یه دوشونموردوم.
آما قوری بَی یوخولاریمدا اؤزون گؤسترَردی. یوخولاریمدا ائله گؤرونوردو کی من اونو، او خانیم قوری­نی تانیمادان اؤنجه تانییردیم. زیرنگ و گوجلو ایدی، آما گنج دئییلدی و اؤنجه­ کی­لرینه نیسبت  یاخشی گؤرونموردو. اوتاقدا اونا قزئته اوخودوغوم زامانلارا گؤره. بلکه دانیشا بیلیردی آما دانیشماغی، نئجه چئویره­جه­ییمی اؤیرندییم کیمی ایدی؛ دیک و زورونلو، هر ائیلمه[۱۲۸] گرکن آما آشاغی­لایان بیر آچیقلاما. حرکت­لری پارتلاییجی ایدی و یوخولار ائروتیک یوخولار ایدی. من بیر گنج قادین و آز سوره­دن سونرا بیر گنج آنا اولدوغوم بوتون واختلار مشغله­لی، وفالی و همیشه ممنون ایدیم. یوخولاریم او زامانلار و اوندان سونرالار دا داواملی ایدی و یوخو دونیاسیندا یوروش­لریم، تپکی­لریم و ایمکان­لاریم، یاشامین سوندوق­لاری[۱۲۹] سرحدلرینی آشیردی؛ و هانسی سئوگیسل حیکایه­لردن کی محبوب عنوانیندا سورگون اولموردوم. یاتاغیمیز- قوری بَی­له منیم کی- قومسال چیمرلیک ایدی یا دا گمی­نین کوبود گؤیَرته­سیدی[۱۳۰]، یا دا یاغلی کندیرلردن دوزلمیش سپیرال[۱۳۱] شکیلینده یاتاق. بیر تور کئفی وار ایدی کی بلکه سیز اونو پیس ساناسیز: توند قوخوسو، ژله­ای گؤزلری و ایت دیشلرینه بنزه­ین دیشلری­نین. من بو کوفرلو یوخولاردان اویاناندا تعجوب یا دا اوتانج­دان آز قالا یئره گیرم؛ و سونرا یئنی دن گیریب یاتاردیم و صبح یوخودان اویاناندا یادداشیمی دانماغا آلیشاردیم. ایللرجه و ایللرجه و کسینلیکله اونون اؤلوموندن نئچه ایل سووشاندان سونرا دا قوری بَی بئله­لیکله منیم گئجه یاشامیمدا وار ایدی. سانیرام من اوندان خینجاخینج[۱۳۲] اولدوغوم زاماناجان، اؤلومدن خینجاخینج اولدوغوموز کیمی. آما هئچ بئله اولاجاغی گؤزله­نیلمیردی، نییه کی قاباغا دوشن من ایدیم و من اونو اورایا گتیرَردیم. نظره گلیردی ایکی طرفلی ایش ایدی- او حالدا بئله اولاردی کی او دا یوخوسوندا منی اورایا گتیرَیدی- و بو یوخو منیم تجروبه­م اولدوغو کیمی اونون دا تجروبه­سیدی.
چیمرلیک­ده کی گمی، لیمان[۱۳۳] و قوم­لار؛ گؤیه اوزانمیش یا دا سویون اوزونه اَییلن آغاجلار، هنده­ورینده کی آدالارین قارماشیق گؤرکمی؛ و آنلامسیز و عئینی حالدا آیدینجا گؤرونن داغلار. سانکی دوغال بیر قاریشیقلیقدایدیق، یوخودا گؤره بیلدییم و یا ایبداع ائده بیلدییم هر شئی­دن عادی. بیر یئر کی سن اولاسان دا اولمایاسان دا اولاجاق و دوغروسو هله ده یئرینده واردیر. بیز کورتئز آداسیندایدیق.
آما من هئچ واخت گؤرمه­دیم ائوین کؤمور اولموش دیرک­لری او قادینین اَری­نین اوستونه دوشسون. بو اولای نئچه ایل اؤنجه اولموشدو و مئشه­لیک هنده­ورینده گؤیرمیشدی.
ایضاح:
حیکایه انگیلیس دیلینده چئوریلیبدیر.
[
۱] . Chess
[2] .
رئیس
[
۳] . منشی
[
۴] . Gorrie
[5] .
عمومی
[
۶] . واکنش
[
۷] . Vancouver
[8] . Ray
[9] .
تعمیرات
[
۱۰] . گوژ، قوز
[
۱۱] . تاثیر
[
۱۲] . مستقل
[
۱۳] . حقوق از کار افتادگی
[
۱۴] . تشویق ائله مک، تحسین ائله مک
[
۱۵] . عصبانی اولماق
[
۱۶] . Cornish
[17] . Irene
[18] .
شرق
[
۱۹] . Stanley
[20] .
مجسم شدن
[
۲۱] . جمعیت
[
۲۲] . سکته مغزی
[
۲۳] . شخصی
[
۲۴] . طبیعی
[
۲۵] . سرخاب
[
۲۶] . وسیله، اثاث
[
۲۷] . شکوفه
[
۲۸] .کاهگلی
[
۲۹] .شمعدانی گولو
[
۳۰] . وزنه
[
۳۱] . قاطعانه
[
۳۲] . ساحل
[
۳۳] . Union Bay
[34] .
متمدن
[
۳۵] . بلوط
[
۳۶] . در کشویی
[
۳۷] . Kitsilano
[38] . Burrard
[39] .
صندلی
[
۴۰] . طول کشیدن
[
۴۱] . کف
[
۴۲] . مربع
[
۴۳] . مستطیل
[
۴۴] . مفتول سیمی
[
۴۵] . تعبیر ائله مک
[
۴۶] . مین بیر گئجه ناغیللارینا اشاره ائدیر
[
۴۷] . حصه، قسمت، بخش
[
۴۸] . پرده
[
۴۹] . راه راه
[
۵۰] . ماشین چمن زنی
[
۵۱] . دیوار حائل
[
۵۲] . حامیله اولماق
[
۵۳] . Kitsilano
[54] . The Betrothed
، آلئسساندرو مانزونی-نین رومانی.
[
۵۵] . Aldous Huxley، بریتانییالی یازار.
[
۵۶] . Henry Green، بریتانییالی یازار.
[
۵۷] . To the Lighthouse ، به سوی فانوس دریایی، ویرجینیا وولف-ون رومانی.
[
۵۸] . The Last of Cheri، قابرییئل کولئت-ین رومانی.
[
۵۹] . The Death of the Heart، الیزابئت بووئن-ین رومانی.
[
۶۰] . مرحله
[
۶۱] . اشتیاق
[
۶۲] . پرداخت، پردازش
[
۶۳] . اوشاقی سالماق، سقط جنین
[
۶۴] . تمرین
[
۶۵] . عمده فروشی
[
۶۶] . مواد غذایی
[
۶۷] . کارخانا
[
۶۸] . سقف
[
۶۹] . صندوق پول شمار
[
۷۰] . دیالوقلار خیاو لهجه سیله یازیلمیش دیر.
[
۷۱] . مثال
[
۷۲] . ساغلاماق: تامین ائله مک
[
۷۳] . Hastings
[74] . Dunbar
[75] .
منظم
[
۷۶] .نما
[
۷۷] . هرس شده
[
۷۸] . Kerrisdale
[79] .
تقارن
[
۸۰] . تفریح
[
۸۱] . کانادادا قوللانیلان بیر آتالار سؤزودور کی بیرینین یالانی بلله نیب روسوای اولماغینی گؤستریر
[
۸۲] .St. Paul
[83] .
پیشنهاد دادن
[
۸۴] . Life
[85] . Look
[86] . Maclean
[87] .
ورزش
[
۸۸] . Ann Landers
[89] .
سازمان ملل متحد
[
۹۰] . Eric Blood-Axe
[91] . King Knut
[92] .
بزنمک
[
۹۳] . زورونلو ایفاده: بیان آمرانه
[
۹۴] . George Albert Frederick
[95] . Alaska
[96] . Vancouver Sun
[97] . Anson James Wild
[98] . Desolation Sound
[99] . Wildfruit
[100] . Atlantic Provinces
[101] . Comox
[102] .
مشکل
[
۱۰۳] . Courtenay
[104] . Percy Kemper
[105] . Manson
[106] .
لیمان بولگه سی: اسکله
[
۱۰۷] . Victoria
[108] . Helwell Anthony
[109] . Thompson Gorrie James
[110] .
معتاد، شیفته، علاقمند
[
۱۱۱] . Mavis
[112] . Shirley
[113] . Carlson
[114] . Yost
[115] .
خیال پردازی
[
۱۱۶] . امتحان
[
۱۱۷] . تردید
[
۱۱۸] . انگیزه
[
۱۱۹] . چسب
[
۱۲۰] . مرموز
[
۱۲۱] . پارچا
[
۱۲۲] . Macdonald
[123] .
کاشی
[
۱۲۴] . ایستگاه
[
۱۲۵] . Marilyn Monroe
[126] .
انتظار داشتن
[
۱۲۷] . Arbutus
[128] .
عمل
[
۱۲۹] . تقدیم ائله مک، ارائه دادن
[
۱۳۰] . عرشه کشتی
[
۱۳۱] . حلقوی
[
۱۳۲] . اشباع شدن
[
۱۳۳] . بندر


http://ishiq.net/?p=7667
  

No comments:

Post a Comment