Sep 21, 2013

مدرسه لرین آچیلیشی موناسیبتی ایله بیانیه‏

گونوموزده ایراندا یاشایان اوشاقلارین یوزده یئتمیشی اؤز آنا دیللریندن باشقا بیر دیلده تحصیل ‏آلماغا مجبور اولونورلار. بئله لیکله هر ایل درسلرین باشلاماسیلا بیرگه، دیل و کولتور ‏استعماری داها یئنی بیر نسیل آذربایجانلی یا تحمیل اولونور.‏

اؤز آنا دیللرینده تعلیم تربیه دن محروم اولان اوشاقلار، مدرسه ده آنا دیللری یاساق اولان یئنی ‏یئتمه لر ساوادلانماق اوچون اؤنجه دیللرینی و سونرا دا کیملیک و کولتورلری نین بؤیوک ‏پارچاسینی بوراخیب دَییشدیرمه یه مجبور قالیرلار. بو سببدن آسیلی، غیر فارس میللت لرین ‏آراسیندا تحصیللی لرین ساییسی گئتدیکجه آزالیر. بونونلا بیرگه ایراندا وار اولان سیاسی - ‏ایجتماعی - ایقتصادی برابرسیزلیک داهادا درینله شیر. بو آیری سئچگی لیک نتیجه سینده غیر ‏فارس میللتلر گونو- گوندن داها آرتیق حاشیه یه سورولوب، مارژیناللاشیرلار.‏

بیلدیریش:‏ قلم انجومنی‌نین ایکینجی قورولتایی کئچیریلدی

سورگونده گونئی آذربایجان (ایران) قلم انجومنی‌نین ایکینجی قورولتایی 31 اوگوست و 1 ‏سئپتامبر گونلری پالتاکدا کئچیریلدی. ایکی گون دوام ائدن قورولتایدا، دبیرلرهئیاتی‌نین ایکی ‏ایللیک فعالیت گوزاریشیندن سونرا، بیر چوخ موضوعلار، او جمله دن: انجومنین آدی و ‏عونوانی، عوضویت حقلری نین بلیرلنمه‌سی، دبیلر هئیاتی‌نین ترکیبی و قورولتایلارین ‏کئچیریلمه زامانلاری باره‌‌ده اوزون بحث‌لر اولدو و تصمیم‌لر توتولدو.‏

ایکینجی قورولتای، یئنی دبیرلر هئیاتی‌نین سئچیلمه‌سی ایله سونا گلدی. خانیم آیدا امیر هاشمی، ‏صمد بی پورموسوی، و علی بی قره جه لو ایکینجی قورولتایدا دبیر اولاراق سئچیلدیلر. ‏قورولتای بو اوچ دبیره مأموریت وئردی کی دبیرلر هئیاتی‌نی تکمیل ائتمگه چالیشسینلار.‏

سورگونده گونئی آذربایجان (ایران) قلم انجومنی ‏
سئپتامبر 2013‏

سورگونده گونئی آذربایجان (ایران) قلم انجومنی‌نین ایکینجی قورولتایی‌نین گوزاریشی‏

قورولتای، مرکزی آوروپا واقتیلا شنبه گونو اوگوست آیی نین ‏‎31‎‏ ینده ساعات ‏‎18‎‏ ده تاخیرله باشلادی و ‏‎1‎‏ ‏سئپتامبر گونو آخشاما قده ر دوام ائتدی. شیوا فرهمند بی قورولتایین گئدیشاتی حقده بیلگی وئردیلر و ‏سونرا صدیقه خانیم عدالتی دوکتور رضا براهنی نین (قلم انجومنی نین فخری صدری) ایکینجی قورولتایا ‏گؤندردیکلری پیامی اوخودولار. قورولتای ایلک باشدا خانم آیدا امیر هاشمی و علی بی قره جه لونو ‏قورولتای ایداره رئیسی اولاراق سئچدیلر و آردیندان بیرینجی دبیرلرهئیتی عوضولری گوزاریشلرینی آیری ‏آیری قورولتایا تقدیم ائتدیلر. ایلک گوزاریش دبیرلر هئیتی نین صدری صدیقه خانیم عدالتی طرفیندن ‏آشاغیداکی شکیلده اوخوندو و آردیندان علیرضا بی اصغر زاده، سودابه خانیم اردوان، لیلا خانیم مجتهدی و ‏شیوا بی فرهمند اؤز گوزاریشلرینی قیساجا تقدیم ائله دیلر.‏