Jun 13, 2013

مایالان

ابوالفضل جورابچی

"سن اولدوغو کیمی حسابا قات، گؤندر" دئیدی. "آی قارداش سن بیلمیرسن قانون نه دیر؟" ‏دئیه سوروشدوم. "قانون منه کئچمز، دئدی. قانونا اویاجاق اولسا ایدیم، سنین یانووا نئیه ‏گلیردیم" دئیه اوستومه چیغیردی.‏

ABULFƏZL CORABÇI
MAYALAN


تبریزین محله لرینین و کوچه لرینین آدلارینین نه جور سئچیلیب، قویولدوغونون تاریخیندن ‏درین بیر خبریم یوخدور. بئللی آدلارین او یئرین بیر خصوصیت ینه گؤره خالق آغزیندا گئزن ‏و زامان ایله یئر ائدن بیر کلمه دن تؤرندیگینی آنلاماق چتین دگیلدیر. قونقا باشی، "قونقا" نین ‏باشلادیغی نقطه دئمکدیر. "قونقا" ایسه کئچمیشده، هله الکتریک تراموای اولمادیغی زامان، ‏آتلار ایله رئیل اوستونده چکیلن واگون ایدی. امیره قیز، کوچه باغ، داش کؤرپو و ........بیر ‏چوخ محله نین آدی او یئیرین بیر خصوصیتی، بیر تاریخی اولای، یاخود اورانین ‏ساکینلرینین ایش وشغل لاری ایله ارتباطدا دیر،" چوس دوزان" کیمی.‏

تبریز استثنا بیر شهر دگیل. دونیاینین هر یانیندا و هر شهرده کی محله لرین، کوچه لرین ‏آدلاری بئللی بیر مناسبته گؤره قویولوبدور.‏

آلمانیانین کؤلن شهرینده کیچیک بیر کوچه نین آدی سون زامانلاردا "مایالان" آ مشهور ‏اولماغا باشلاییبدیر. بو آد هله لیک کؤلن شهرینده یاشایان آذربایجانلیلار آراسیندا تانینیر. ‏آنجاق بو شهرین آذربایجانلی لاری اولاراق امضا ییغیب بو کوچه نین آدینین بلدیه خریطه ‏سینده ده "مایالان" آ دگیشدیریلمه سی اوچون ایستک (تقاضا) وئرمک ایشینی ده من ئوزوم ‏بوینوما گؤتورموشم.‏

Mayalan‏ کلمه سی نین یازیلیش و اوخونوش اعتباری ایله آلمانجایا یاخین اولدوغو‎ ‎اوچون، ‏بو آدی بلدیه ده قبول ائتدیره بیله جگیمیزه اینانیرام. بیر ده بو کلمه یه یالاندان گؤزل بیر معنی ‏قویمالییق. بلدیه یه "بو کلمه بیزیم دیلیمزده قیزیل گول آنلامیندادیر" کیمی بیر شئی دئملی ‏ییک، و بئیله جه بلدیه نی بیزیم اؤنریمیزی قبول اتمه سی اوچون ترغیب ائتمه لییک. یئترلی ‏امضا ییغابیلمز ایسک، جماعاتدان آیری بهانه لر ایله امضا ییغمالییق. منیم بئله ایشلرده تجربه ‏لریم چوخدور.زامانیندا، رحمتلیک " کؤلن آذربایجانلیلیارانجمنی" نین حقوقی ایشلرینین قاباغا ‏آپاریلماسی منیم بوینوما قویولدوغو اوچون، بئیله ایشلرده الیم یاتقینلاشیبدیر.‏

چوخداندیر کؤلن شهرینده حساب توتما و وئرگی مشاویرلیگی ایشینه مشغولام. اوزون ایللر ‏بوتون چیرپینما، چالیشمالاریما قارشین، اینترنت ده قویدوغوم تبلیغلره، داغیتدیغیم کارتلارا، ‏موختلیف درگی و قزته لرده چیخارتدیغیم تبلیغلره قارشین بیر تک نفر آلمان گلیب ده "منیم ‏حساب ایشیمی گؤر" دئمه دی. تصادف اولاراق گیردیگیم کنایپه ده (آبجوخانا)، سلمانی ‏توکانیندا، کیوسک دا یاخود باشقا بیر توکاندا کارتیمی وئریب "من حسابدارام، حساب ‏ایشینیزده یاردیمجی اولابیلرم" دئدیگیمده، آنجاق یوخاریدان بیر باخیش و آلچاقلاییجی بیر ‏سس تونو ایله قارشیلاشارام: "حسابداریمیز وار، کارتینیزی ساخلایین باشقا بیریئرده ‏لازیمینیز اولار". منه نه قالار، البته کی آنجاق خاریجی "ماندانت"لار. وکیله، وئرگی ‏مشاورنیه، حسابدارا مراجعه ائدن لره "ماندانت" دئییلر. بیر چوخو هئچ آلمانجا بیلمز، بیر ‏نئچه ایل آلمانیادا جوربه جور ایشلر ایله مشغول اولداوقدان سونرا بیر کیوسک، کیچیک بیر ‏باققال توکانی، بیر سلمانی توکانی کیمی بیر ایش یئری آچماغا چالیشار و چوخ تئز میلیونر ‏اولماق ایسده دیگی اوچون هر شئیی اوجوزا مال ائتمک ایسدر. منه "حساب ایشیمی گؤره ‏جکسن" دئیر آنجاق سونرا قیزی اونیورسیته یه گئتمک ایسده دیگینده دولدورماغی گئرکن ‏فورمو، آروادی دوغدوغوندا خسته خانا نین وئردیگی فورمو، اوغلونو ائولندیرمک ایسده ‏دیگینده لازیم اولان اداری ایشلرین گؤرولمه سینی ده مندن گؤزلر. "بو ایشلر اوچون من ‏زامان و انرژی صرف ائدیرم، اونا گؤره ده بئللی بیر اوجرت حسابلامالییام" دئدیگیمده، "بس ‏من نه اوچون سنین یانینا گلدیم، بئیله بیلسه ایدیم گئدردیم آلمان بیرینین یانینا دا...." دئیر، و ‏خالاسی اوغلونو "توریست" اولاراق گئتیریب، سونرا مین بیر بهانه ایله آلمانیادا اوتورما ‏اجازه سی آلماق ایسده دیگینده ده گئنه بوتون ایشلرینده مندن کؤمک ایسدر. بئیله، دوغرودان ‏دا منیم ایشیمین و حقوقی صلاحیتیمین چرچوه سینه سیغمایان، ایشلر بوینوما قویماغا ‏چالیشدیغیندا، "قارداش بونلار منیم ایشیم دگیل، بو ایشلر بیر وکیل ایشی دیر" دئسم، ‏‏"پاهووووو.....، سنده ه ه ه ، اه .....، پیشیگه دئدیلر پوخون درماندیر، سیچدی اوستونو ‏باسدیردی...." دئیر. بئیله وضعیتلرده سول بؤیرومده، قابیرقالاریم آلتیندا بیر نقطه، کؤز ‏قویولموش کیمی، یانماغا باشلار، بوغازیم بیچیلر، آغزیم قورویار، آلنیم قیریشار، گؤزلریم ‏دارالار، اوزومون جیزیقلاری درینلشر، چیگینلریمده بؤیوک بیر یوک وارمیش کیمی بیر ‏آغیرلیغین آلتیندا ازیله رم. آلت دوداغیمین ساغ یاینینی دیشلریمین آراسینا قیسدیرارام. سول ‏الیمین بارماقلارینین اوجو ایله بیغیمی، کئچی ساققالیمی قاریشدیرارام. آنجاق بیر چوخ یئرده ‏گئنه چاره سیز قالیب، هئچ ده گؤرمک ایسته مه دیگیم بو ایشین آلتینا گیررم. بوتون بونلاردان ‏اؤته یه، منیم "ماندانت" لاریمین بیرده، بوتون ریاضیات قایدالارینی آلت – اوست ائدن ، ‏ارسطونون، تالسین، ارشمیدوسون، فیساغورثین و عمر خیامین فیکیرلشیب، حسابلادیقلاری ‏و قایدالاشدیردیقلاری اؤلچولره اویمایان اؤز حساب متودلاری وار. اوچ ایله دؤردون توپلامی ‏یئرینه گؤره بئش، آلتی یاریم، یئددی ویرگول سکگیز، دوققوزیاریم حتی اون بیر بئیله ائده ‏بیلر. دئملی سونوج وئرگی اداره سینه، خسته لیک بیمه سینه، تصادوفلر بیمه سینه یوخسا ‏تجارت - صنایع اوتاغینا وئریله جک ایسه اوچ ایله دؤردون توپلامی بئش ایله آلتی ویرگول ‏یئددی آراسیندا بیر شئی ائتمه لی دیر. اوچ گون سونراسی....."ماندانت" بیگ بانک دان وام ‏آلماق ایسده ییر. اوچ ایله دؤردون توپلامی یئددی ائدرسه، بانک "گلیرین آزدیر" دئئیه کردیت ‏وئرمه یه جک. البته کی اوچ ایله دؤردون توپلامی اون بیر ائتمه لی دیر. بئش گون سونرا ‏ایسه "ماندانت" بیگ خالاقیزی سینی آلمانیایا دعوت ائتمک ایسده ییر. خاریجی لر اداره سی ‏دعوتنامه صادر ائتمک اوچون گلرینین نه قدر اولدوغونو سوروشور. اوچ ایله دؤردون ‏توپلامی بو یول نه ائدر؟ بورایا قدر کیچیک بیر حسابدار اولاراق "ماندانت" بیگین ‏بویوروقلارینا بویون قویمالی یام. منیم کیمی کیچیک بیر حسابدار بئیله قورال – قایدالاری ‏ازبره بیلمه لی دیر. "ماندانت" بئیگین کیچیک بیر اشاره سی، بیر تلفونو، بیر اِ – میل ی ‏محاسبه چینین نه ایش گؤرمه سینی بیلمه سی اوچون یئترلی اولمالی دیر. یوخسا "ماندانت" ‏بیگ چوخ حقلی یئره "سن فیکر ائدیرسن، من نه اوچون بو قدر آلمان حسابداری وارکن سنه ‏گلمیشم. سنین ده آلمانلار کیمی قورو و قایدا – قانونا دایاق تئرپنه جگینی بیلسه ایدیم، بیر ‏آلمانین یانینا گئدردیم، دولت موئسیسه لرینده ده سؤزو سندن داها یاخچی کئچردی...... " ‏دئیر. آنجاق "ماندانت" لاریمین گؤزونده هر زامان بئیله کیچیک، مسئولیتسیز، ایکینجی درجه ‏دن و دولت مؤسیسه لرینده سؤزو کئچمه ین بیر حسابدار اولاراق قالمیرام. کیمی زامان، ‏دئملی وئرگی اداره سینین "ماندانت" این سون دؤرد یاخود بئش ایلینین حسابینی کونترول ‏ائدیب، حسابین هر گوشه سینده بیر کلک، بیر تولکولوک ایله نئچه ایورو بوردا، نئچه ایرو ‏اوردا، وئرگی قاچیردیلدیغینی و بونلارین نئچه ایل بویونجا حسابلانماسی گره کن فائیزینی و ‏اوستونه بیر چووال جزا و جریمه حسابلاندیقدان سونرا توپلامینین اوتوز نئچه مین اویرو ‏ائتدیگینی آچیغا چیخارتدیغی زامان، "ماندانت" لاریمدان "سن بو ایشین متخصصی سن، ‏قانونلاری سن بیلمه لی سن، بو ایشین مسئولیتی سنین بوینووا دیر، منیم سنین تخصصی ‏ایشیوه قاریشماغا اجازه م یوخدور، سن بو ایشین تحصیلینی آلمیسان، من بو ایشلری ‏باشارمارام، سن منه ایشین نه جور گؤرولمه سی گره ک دیگینی ئویره تمه لی ایدین" کیمی ‏سؤزلر ائیشیدرم. بو ایشه تازا باشلادیغیم زامانلار ""ماندانت" لاریمی آنلاماق اوچون بیر آز ‏روح بیلیمی اؤیرنمه لییم" فیکری ایله زیگموند فرویدون، کارل گوستاو یونگ ون، آلفرد ‏آدلرین، ویلهم رایش ین و نئچه نئچه کلاسیک روح بیلیمچیلرینین اثرلرینی اوخودوقدان سونرا ‏‏""ماندانت" لاریمی آنلاماقدان هله ده عاجزم" سونوجونا یئتیشینجه اوتوروب ایوان پاولوف ‏ون اثرلرینی اَن اینجه آیرینتی لارینا قدر اوخودوم. سونوندا "منیم "ماندانت"لاریمین ‏ریاضیات آنلایشینی درک ائتمک اوچون ارسطونون، تالسین، ارشمیدوسون وعمر خیامین ‏گئتیردیکلری ریاضیات قایدالارینین اؤته سینده بیر سیرا ریاضیات قایدالاری گئتیریلمه سی ‏گدرکدیگی کیمی، اونلارین یاشام آنلاییشینی آنلایابیلمک اوچون ده گئنه بوتون کلاسیک روح ‏بیلیمچی لرینین تاپدیقلارینین اؤته سینده بیر سیرا فنومنا لارا و تکنیک لره ال تاپمالی یام" ‏سونوجونا یئتیشدیم.‏

کئچمیشده "ماندانت" لاریمدان بیریسی ده رحمتلیک همشهریمیز رحمت الله ایدی. اونو چوخ ‏قدیمدن تانییاردیم وتبریزین مارالان محله سیندن اولدوغونو دا بیلردیم. نئچه ایللر آیریلیق دان ‏سونرا بیرگون تصادف اثری کؤلن ون"آلته فویرواخه" آدلی مدنیت اوجاغیندا تازادان ‏گؤروشدوگوموزده چتینلیک ایله تانییا بیلمیشدیم. ساچینین قاباغی بیر آز توکولموشدو، قالانی ‏دا آغارمیشدی. ده ن دوشموش قالین بیغلاری بوتون دوداقلارینی ئورتموشدو و بیر نئچه ‏گونلوک، ده ن دوشموش، ساققالی ایله اولدوغوندان داها دا یاشلی گؤرونوردو. گؤزلری بیر ‏آز درین دن باخیردی، قالین و اوزون قاشلاری گؤزلرینین ئونونه توکولموش و باخیشینا بیر ‏قورخونج حالت وئریردی. بویو بیر آز قیسسالمیش کیمی ایدی. یوخسا اوزون زاماندان بری ‏گؤرمه دیگیم اوچون منیم ذهنیمده قالان خاطره سی داها اوجا بویلو قالمیشدی. ائولنمیش، ‏خوشبخت جه یاشاییر و ایکی قیزی اولدوغونو ائشیدینجه دوغرودان دا چوخ سوئینمیش ایدیم. ‏کؤلن ده کی "ایرانلی" لارین بیر چوخو کیمی تاکسی سورمک ایشینه مشغول ایدی. بیر آز ‏یاسدی یاسدی دانیشدیغی اوچون کؤلن تاکسی چی لاری آراسیندا "یه حمت مایالان" آدیندا ‏تانیندیغینی دا سونرالار ئویره نمیش ایدیم. بیرنئچه ایل سونرا بیر آخشام تلفن ائدیب او شیرین ‏و یاسدی لهجه سی ایله "آی اوغلان، تاخسی حساب ایشینده ن باش آچایسان؟" دئیه ‏سوروشدو. "بلی رحمت قارداش، نئچه دانا تاکسی چی "ماندانت" یم وار" دئدیم. "آخی ‏بیلیسن، بعضی خییدالیخلایی وای، تلفوندا دئیه بیلمی ییم، او خییدالیخلایینی دا بیله ی سن؟" ‏دئیه سوروشدو. "خییدالیخ" لاردان منظورو "وئرگی قاچاقچیلیغینین یولاری" اولسا ایدی ‏گرک. "ایسدرسن ساباح سحر گل، یاخیندان دانیشاق دئدیم". "یوخ من گوندوز گله بیلمه ییه م، ‏گوندوز ایشلییه م، آخشام ایشدن سویا تلفن ائیله یه م." دئیه جواب وئردی."یقین کی بو ایشین ‏منیم اوچون ایش یوخ، تفریح اولدوغونو فیکر ائدیر" دئیه فیکیرلشدیم، آنجاق بئنیمدن کئچنی ‏دیلیمه گئتیره بیلمه دیم. "ساغ اول، رحمت قارداش، سونرا گؤروشه ریک" دئدیم.‏

بیر نئچه گون سونرا بیر آخشام ساعات دوققوز یاریمدا "راین" چایینین قیراغیندا گئزمه گه ‏چیخماق ایسده ییردیم. باهارین سونلارینا یاخین اولدوغو اوچون گونون اوزون زامانلاری ‏ایدی. گون باتاندان سونرانین آیدینلیغی ساعات اونا قدر چکیردی. "راین" چایی چوخ آرام ‏آخیردی و قارشی طرفده کی سویود آغاجلاریندان یوخاری، قیرمیزیلیغا ووران ماوی گؤی ‏اوزو ایله گون باتاندان سونرانین آیدینلیغیندا گؤزل بیر منظره یه دؤنموش ایدی. او گون ‏سحردن آخشاما قدر پنجره نین دالیندا اوتوروب، کامپیوتره سایی وئرمک، تلفن دا "ماندانت" ‏ایله هئچ اوستونده بوغازیمی ییرتماق، هئچ د ه اجر- اوجرت حسابلایابیلمه یه جگیم ‏فورملار دولدورماق و وئرگی اداره سینین، یوخسا تصادف لر بیمه سینین فیلان ویا بهمان ‏‏"ماندانت" باره سینده کی تلفن لارینا جواب وئرمک ایله گونومو کئچیرتدیگیم و آلمانیادا ‏چوخ آز تاپیلان بئیله گؤزل بیر گونو الدن وئردیگیم اوچون چوخ حیفیم گلیردی. پنجره دن ‏گون باتانین منظره سی نی گؤرونجه اوزومو ساخلایابیلمه دیم. تر – تله سیک پالتاریمی ‏گئئیب قاپینی دالیمجا چیرپیب، پیلله لرین ایکیسینی بیر ائدیب ئوزومو ائوین چیخیشینا ‏یئتردیگیمده، بیزیم رحمت قارداشین قارا فورد ماشینینین قاپینین قاباغیندا دایانارکن رحمتین ‏هله فرمان دالیندان ائنمه میش پنجره دن سئوینرک "آی اوغلان، منیم الیمدن هایا قاچماق ایسده ‏ییی سن" دئیه سسلندیگینی گؤردوم. ماشینی سؤندوروب، یان اوتوراقدان بیر قوجاق کاغاذ ‏قولتوغونون آلتینا یئرلشدیریب، زیققیناراق آشاغی ائنیب یاخینلاشدی. گؤروشمک اوچون ‏ائلیمی اوزالدارکن، بیر آز دا طعنه ایله، "رحمت، بیر تلفن ائتسه ایدین ده، بیر قوزودان ‏فیلاندان کسدیرسه ایدیم" دئدیم. سؤزومده بیر آز دا طعنه اولدوغونو حس ائدرک "آی کیشی، ‏اؤزگه دگیلیک کی، بی ی دا، سیزین یاخینووزدا بی نفری گؤیه جه ایدیم، قئیده نده، ائیله سنه ‏ده بیر باش ویی یم، کیفوو سویوشوم دئدیم" دئییرکن اؤزونو دعوت ائدر کیمی الی ایله یولو ‏گؤستردی، "هله یئیی ی چیخاق یوخا یی، قالانینی سویا دئیه یه م" آچاریمی چیخاردیب، ‏ائوین قاپیسینا سالارکن بیر ده دؤنوب حیفسه نه رک گؤی اوزونون ماوی لیگی ایله گونش ‏ایشیغینین قیرمیزیلیغینین قاریشدیغینا باخدیم. بیر چای ایچیب، بیر آز ساغدان سولدان ‏دانیشدیقدان سونرا رحمت قارداش، "هن، ایندی گه له ک اصلی مطلبه" دئدی. "بیلی سن؟ من ‏کئچن هفته تاخسی ایشلتمه اجازه می آلدیم، ایندی ده، ائیله، سیزون محللووزده بی نفه یی ‏گویمه یه گئتمیشدیم. اونون تاخسی سینی آلماق ایسدیی دیم. انشا الله بو ایش توتسا، البته کی ‏ایشتویا به یاتا لیق(وئرگی مشاورلیگی) ایشله ییمی سن گویه جک سن. باخ، منیم ایشیم سنینن ‏اوچون اوبیی لَیین یایی سی قده ر اولاجاق، من ئوزوم بی خییدا حساب ایشیندن باشایایام. سن ‏ئوزون بیلی یسن، من بازای دا فه یش آلیش وئیی شینیه باخایدیم، حساب ایشله ییمین ده ‏هامیسینی ئوزوم گؤیی یدیم. نئچه ایلدی ده تاخسی ایشینده یم، خییدالیخ لایی نین هامیسینی دا ‏بیلی یم. سن مه نه فقط بی آز وئی گی ادایه سینه گؤی سه ده جه ییمیز ایشلَه ی ده کؤمه ائیله ‏یه جه سن....." بیر جواب وئرمه گه، هئچ بیر شئی دئمه گه، " یوخ قانوندا بئیله یازیلیب، سن ‏دئین کیمی اولماز" دئیه چیغیرماغا، باغیرماغا گرک قالمادی. رحمت قارداشین "من اؤزومده ‏بیی خی ی دا حسابدایام، تاخسی ایشلینین ده خی ی دالیخلایی نی بیلی ی م" دئدیگینی ‏ائشیتمک سول بؤیرومده، قابیرقالاریمین آلتیندا کی او نقطه نین یانماغا باشلاماسینا، ‏بوغازیمین بیچیلمه سینه،آغزیمین قوروماسینا، دیشیمین قیسیلماسینا، اوزومون جیزیقلارینین ‏درینلشمه سینه، گؤزلریمین دارالماسینا و آلنیمین قیریشماسینا یئترو آرتاردی بئیله. اختیاریمدا ‏اولمادان سول الیمین بارماقلارینین اوجو ایله باشیمین دالیسینی، بوینومون کؤکونو قاشیماغا ‏باشلادیم. بو تویون موبارک اولمایاجاغی دویغوسو باشدان بری ایچیمده یارانمیشدی. "رحمت ‏قارداش، گل بیر ایش گؤرک، چاییمیزی ایچدیک، بو حساب مساب سؤزونو بوردا باغلایاق، ‏یولداشلیغیمیز یئرینده قالسین، قالخیب گئدک "راین" دا بیر آز گه زه ک، سن ده ساباح گئت ‏آیری بیر مشاورین یانینا" دئمک اوچون آغزیمی آچدیم، " آنجاق، "رحمت قارداش، گل بیر ‏ایش گؤرک........" دَن ایلری گئتمه گیمیه اجازه وئرمدی. "یوخ، سن هله دوی ی ، باخ، من ‏سنه هامی نین وئی دیگی قدر وئیه ه جه یه م، ایشلی ی یمین ده چوخونوئوزوم گؤیه ه جه یه ‏م" دئیه سؤزونه ادامه وئررکن، یانیندا گئتیردیگی کاغاذلارین ایچیندن اوستونده ایش اداره ‏سینین آرمی اولان نئچه یاپراقلیق بیردوکومنت چیخاردیب منه وئررکن، "باخ، آیبای تس ‏آمت (ایش اداره سی) منه کؤمک ائتمک اوچون بعضی شئی لَه ی ایسته دی یی، بیل می یم، ‏بیزینیس پیلان دی، نه مه نه دی، سن بی لایی حاضی ی لا، قالانینی سویا دانیشاییخ..." هئچ ‏بیر جواب وئره بیلمه یه جک قدرحوصله م قاچدی. ایش اداره سینین نه ایسده دیگینی بیلیردیم. ‏گله جک اوچ ایل اوچون تخمینی شکیلده آیلیق گلیر- گئدر و چیخار- زیان حسابی نین یانیندا ‏بیر ده او شخصین خصوصی گلیر گئدر حسابینی، دئملی ائوینین گلیرینی و خرجینی نین ‏حسابینی ایسده ییردی. بئیله بیر(بیزینیس پلانی) دوزلدیب کاغاذا گئتیرمک بئش ایله آلتی ‏ساعات یاریم آراسیندا ایش ایدی و بونون اوچون ده، او شخصین اؤز یاردیمینا گرک وار ‏ایدی. گله جک اوچ ایلده گلیر گئدرینین تخمینی اونون ائده بیله جگی بیر تخمین ایدی. آنجاق ‏منیم "ماندانت" لاریم، هله بیرده قدیم دن تانیدیغیم بیر یولداشیم مندن حسابدارلیق و وئرگی ‏مشاورلیگینین اؤته سینده بیر ده جادوگرلیک استعدادی گؤزله ییر. اونون گله جک اوچ ایلده ‏گلیر گئدرنین یانیندا بیرده ائوینین خرج مخاریجینی، هاردان ایسه، بیلمه لی ایدیم. اونون منیم ‏یانیمدا اوتوروب منه بیلگی وئرمه گه زامانی یوخ ایدی. اونسوز دا گوندوزلری ایشله ییردی، ‏گئجه لری ده آرواد اوشاغینین یانیندا اولمالی ایدی و سونراسی دا ائرته سی گون ایشله یه بیلمه ‏سی اوچون استراحت ائتمه لی ایدی. رحمت قارداشین الیندن ایش اداره سینین فورمونو آلیب ‏میزین اوستونه قویارکن پنجره دن گؤزوم کیچیک دالقالارینین گؤی اوزونون قیرمیزیلیغینی ‏منعکس ائدن "راین" چایی نین قارشی ساحیلینده سوگود آغاچلارینین آلتیندا اود یاندیریب و ‏کؤز دوشه نه قدر کبابلارینی حاضیرلایان، یوخسا بیر بیره ایچن پیکنیک چی لره دوشدو. ‏‏"رحمت قارداش، بیلیرسن بو ایش ئوزو، سنین سونراکی ایشیندن آیری، بئش آلتی ساعاتلیق، ‏دئملی منیم بیر ایش گونومون ایشی دیر، اونا گؤره ده بئللی بیر اوجرت حسابلامالییام" دئمک ‏اوچون آغزیمی آچیدیم. آنجاق رحمت قارداش گئنه ده "رحمت قارداش، بیلیرسن، بو ایش...." ‏دَن ایلری گئتمه گیمه آمان وئرمه دی. "ائیله، گل بو آخشام بو ایشی یازیب قویتایاخ، منه ده ‏ساباح سحَی ی اوچون آیبایتس آمت دا (ایش اداره سینده) واقت وئی ی یبلر، ساباح بونو ‏تحویل وئیه ه بیلمه سم، ایشیمه انگل چیخایدارلای" دئیه سؤزومو کسدی. گئنه ده هئچ ایسته مه ‏دیگیم بیر ایشه بویون قویماق مجبوریتینده قالدیم و "انشا الله ایش قورتاراندان سونرا انصافینا ‏گؤره بیر شئی وئرر" اومیدی ایله کامپیوترین ئونونده اوتوروب، اِکسل پروگرامیندا گله جک ‏اوچ ایل اوچون آیلار و گلیر- گئدر لره گؤره جدوللر دوزلتمه گه باشلادیم. ساغ اولسون ‏رحمت قارداش، گئجه ساعات اون ایکی یه یاخینلاشاندا ائولرینه زنگ ائیله ییب، ‏‏"ایشیمیزگؤزله دیگیمدن چوخ چکدی، سیز یاتین، من سویا گله یم" دئدی و ساعات اوچ ‏یاریما قدر منیم یانیمدا اوتوروب منه گرکلی اولان بیلگیلری وئردی. سونوندا دا تشکر اولاراق ‏‏"بوشلی بوشلی نین ساغلیغینی ایدَی، انشا الله یاخچی بی ی موقعیت ده عوضینی ئوده یه م" ‏دئیه خداحافظ لشیب گئتدی. آنجاق رحمتلیک ئوزو یوخسا دا، الله ای وار، سؤزونه صادق ‏چیخدی و تاکسی ایشله تمه گه باشلادیقدان سونرا آلیق حساب ایشلرینین یانیندا نه قدر آیری ‏اداری و حقوقی ایشلری وارسا یولداشلیق قارشیلیغیندا منه گؤردوروردی. رحمتلیک منیم ‏تیپیک "ماندانت" لاریمدان ایدی، ئوزو قدیم تَیبیز بازاییندا فَیش آلیش وئیی شینه باخدیغی و بی ‏ی خی یدا حسابدای لیخدان باشا دوشدویو اوچون منیم نه ایش گؤره جه ییمه او یول گؤرسه ‏دردی. دئملی اوچ ایل بویونجا آکادمی ده اوخودوغوم حساب توتما قایدا قانونلاری، آلمان ‏دؤلتینین قویدوغو قانونلاری، وئرگی اداره سینین بروشورلرینده گؤرستدیگی ضابطه لری و ‏آلمان وئرگی مشاورلری اوتاغینین قویدوغو حد و حدودلاری بیر قیراغا بیراخیب، رحمت ‏قارداشین بویوردوغو یول یؤنتم لره گؤره ایش گؤرمه لی ایدیم. هر آی حساب ایشلرینین ‏سونوجونو گؤردوگونده "گئنه ده منه بی ی دونیا مالیات چیخایدیبسان کی" دئئر و مین بیر دانا ‏ایراد چیخارداردی."رحمت قارداش، باخ، قانونون بوراسیندا بئیله یازیر" دئدیگیمده، "آی ‏کیشی، بیز بی ی عؤموی دو امپِی یالیزمه قای شی موبایی زه اِیلیییخ، ایندی سن گلیب منه ‏امپی یالیزمین قانونوننان دانیشی ی سان؟" دئیه جواب وئره ردی. و هر سفرینده ده "گونون ‏بیرینده وئرگی اداره سی بونون حسابینی کونتورول ائتسه او زامان دا "من بی ایشله یی بیلمه ‏یه م، سن اؤزون بیلمه لی ایدین، سن بو ایشین تحصیلاتینی آلیبسان، اؤز مسئولیت ین ایله ایش ‏گؤییوبسن....جرمه – جزاسی سنین بوینووا دی" " دئیه جه گی قورخوسوندان آز قالا ‏شالواریمی باتیراردیم، آلتی آیلیغیم دالی دوشردی. بیر گون، "رحمت قارداش، سن تاکسی ‏ایشله دیرسن، دورماق اجازه ن اولمایان یئرده دورارسان؟ گیریلمز خیاوانا گیره رسن؟ " دئیه ‏سورشماق ایله اونون دا بئللی یئرلرده قانونلارا اویماغی گرکدیگینی و ایش ده اویدوغونو اونا ‏خاطرلاتماق ایسده دیگیمین جوابیندا، "آی کیشی، من قانونا مانونا باخمایام، آلمان دؤلتی اؤزو ‏ده بیلی ی، بیزله ی قانونا باخسوخ آجیمیزدان ئوله ییک. من وییوت ممنوع کوچه یه دالی دالی ‏گییه یه م" دئمیشدی.ایکی ایل یاریم بو شکنجه یه دایانماق منی اون ایل قوجالتمیشدی. بو ‏قدرعذاب ایله گؤردوگوم ایشین قارشیسیندا وئردیگی اوجرت ده هر آی آنجاق گؤردوگوم ایشه ‏دوشن اوجرتین یاریسیندان آزی، آنجاق اونون اوچ – دؤرد قاتی آه، ناله، فغان و یالواریش ‏اولاردی.‏

کئچن گوز(پائیز) آیلارینین بیرینده بیزیم رحمت قارداش کهنه ماشینینی ساتیب، مرسدس بنز ‏دن تازا بیر ماشین آلمیشدی و اونا گؤره ده اوآیین حساب ایشینین سونوجوندا وئرگی اداره ‏سیندن بیر چووال پول گئری آلماغینی گؤزله ییردی. بو هوس ایله کاغاذلارینی منه وئریب و ‏هر آی کیمی ئوزونه گؤره یئترلی معلوماتلاری وئردیکدن سونرا تعطیله گئتمیشدی. ایکی هفته ‏سونرا تعطیلدن قاییدا – قاییتماز تلفون ائدیب "حسابیما باخیرام، وئرگی اداره سیندن هئچ بیر ‏پول گلمه ییب" دئدی. "بیلیرم رحمت قارداش، حسابینین سونوجونو هله گؤندرمه میشم، تازا ‏ماشینینین آلیش دوکومنتی........" سؤزومو"بس سن بیلیرسن منیم بو پولا احتیاجیم وار، ‏حسابیم منفی ده دیر، هر گون فائیز وئریرم،..." دئیه یاریدا کسدی. "دور، قارداش من ‏سؤزومو قورتاریم، سن تعطیلده ایدین، سنی تاپماق مومکون دگیل ایدی، تازا ماشینینین آلیش ‏دوکومنتی ناقص دیر، آپاریب مرسدس بنز ده تکمیل لشدیرمه لی سین، یوخسا وئرگی اداره ‏سی ایراد توتار، آلاجاغینی وئرمز" دئدیگیم بیزیم رحمت قارداشین عصبلرینه توخونموش ‏کیمی اولدو. سسی بیر آز اوجالدی و "نئجه یانی ناقیص دی، اونو مِی سه دس بنز وئییب دی. ‏مِی سه دس بنزگونده نئچه یوز دانا ماشین ساتییی، ناقیص مدیَک وِئیمه ز" دئیه سسلندی. ‏‏"باشووا دولانیم، رحمت قارداش، اومزاتس اشتوییر قانونونون اون دؤردونجو مادده سیننین ‏اوچونجو بندینده آلیش دوکومنتی تعریف اولونوب و بئیللی ضابطه لر قویولوب، وئرگی اداره ‏سی فاکتورون کیم طرفیندن وئریلدیگینه یوخ، اونون قانونی ضابطه لره گؤره یازیلیب – ‏بازیلمادیغینا باخار" دئدی ایسم ده، بیزیم رحمتلیک رحمت قارداش گئنه ده منیم آلمان ‏قانونلارینا یوخ، اونون بویوروقلارینا گؤره ایش گؤرمه گیمی امر ائدرک، "سن اولدوغو ‏کیمی حسابا قات، گؤندر" دئیدی. "آی قارداش سن بیلمیرسن قانون نه دیر؟" دئیه سوروشدوم. ‏‏"قانون منه کئچمز، دئدی. قانونا اویاجاق اولسا ایدیم، سنین یانووا نئیه گلیردیم" دئیه اوستومه ‏چیغیردی. "رحمت، تلفن د ا اولماز، گل یاخیندان دانیشاق" دئیه دانیشماغیمیزی کسیب، ‏خداحافظ لیک سیز تلفونو اوستونه قویدوم.‏

ایگیرم دقیقه سونرا پنجره دن بیزیم رحمتلیک رحمت قارداشین تازا تاکسی سی ایله قاپینین ‏قاباغیندا دایاندیغینی گؤرونجه آتلاییب آشاغی ائندیم. قیسسا بیر سلاملاشدیقدان سونرا "رحمت ‏قارداش ائوده قندیم یوخدور سور بوردان کوچه نین باشینداکی سوپر مارکت دن بیر قوطو قند ‏آلیب قاییداق" دئیه ماشینینیا اوتوردوم. اوتوردوغوم کوچه نین آدی "هوهه اشتراسه" دیر، ‏‏"راین" چاینین قیراغیندا و راینا موازی دیر. یوز اللی متیر ایلرده قیرمیزی کئرپیچدن تازا ‏دوزلمیش ساختماندان سونرا ساغداکی کوچه نین آدی "آققرووق" دیر. بو کوچه بیزیم طرفدن ‏گئدرکن گیریلمز دیر. آنجاق گیریلمز تابلوسو آغاچلارین دالیندا گیزله نیب، اوزاقدان ‏گؤرونمور. اورایا یاخینلاشاندا "رحمت قارداش، بوردان گیر ساغداکی کوچه یه" دئیدیم. ‏رحمت ساغ راهنماسینی یاندیریب کوچه یه یاخینلاشدی. آنجاق گیریلمز تابلوسونو گؤرونجه ‏راهنماسینی سؤندوردو، گؤزونون یانی ندان غضبلی قاچاق بیر باخیش ایله، "اویانین وویود ‏ممنوع اولدوغونو سن بیلمیسن یانی.." دئدی. "من بیلیرم، آنجاق سنین اوچون بیر مسئله ‏اولمامالی دیر، "من قانونا مانونا باخمارام" دئئیردین. رحمتین قان تپه سینه وورموش کیمی ‏گؤزلری قیزاریب حدقه دن چیخدی، ماشینی ساخلادی. دؤنوب غضب ایله اوزومه باخاراق ‏‏"منی عصبانی ائیله مه ها..." دئیه تهدید ائتدی. من ایسه چوخ سویوق قانلی جا، "سنی نئیه ‏عصبانی ائیله ییم کی، سن اؤزون بئیله دئیرسن" دئدیم. بونون ایله بیزیم رحمتلیک رحمت ‏قارداشین دامارینا توخونموش کیمی اولدوم. دیشینی قیسیب، "اولان منی عصبانی ائیله مه" ‏دئیه باغیراراق بیرینجی دنده یه قویوب قازا باساراق وار سرعتی ایله گیریلمز کوچه یه ‏گیردی. تصادوف اثری، او لحظه ساغداکی کوچه دن آردی آردا دوزولموش نئچه دانا یانقین ‏سوندورمه ماشینی ماوی ایشقلارینی یاندیریب، آژیرلرینی چیغیردا چیغیردا چیخدیلار. آرتیق ‏چوخ گئج اولموشدو، فاصله چوخ قیسسا، و زامان چوخ آز ایدی. رحمتلیک رحمت قارداش ‏تورموز ائیله مه گه فرصت تاپابیلمه دی. بیرینجی یانقین سوندورمه ماشینینین تورموز ائدیب ‏ائتمه دیگینی خاطرلایا بیلمیرم. آنجاق یئر کوره سیننین بوتونون بیردن پاتلاماسی قدر گوچلو ‏بیر تاققیلتی قولاغیما گلدی....‏

خسته خانادان بیراخیلدیغیمدا قیش قورتاریب، باهار تازا باشلامیشدی. دوقتورلارین ‏دئدیکلرینه گؤره باش چاناغیمدا اوچ چاتلاق، بویون مهره لریمده ایکی سینیق، قابیرقالاریمدا ‏آلتی سینیق، ساغ قولومدا بیر و ساغ قیچیمدا دا اوچ سینیق وار ایمیش. بیر آی یاریم کوما دا ‏قالمیشام. کمرباغلامادیغیم اوچون ماشینین قاباق جامیندان ائشیگه اوچموشام و تاکسی ایله ‏یانقین سوندورمه ماشینینین آراسیندا تاخیلیب قالمیشام. خسته خانانین حیطی، آغاچلار، ‏انسانلار، تازا یاشیلاشماغا باشلایان چمن، هر شئی گؤزومده جانسیز و روحسوز کیمی ایدی. ‏قولتوق آغاجلاریمین اوستونده ساغ آیاغیمی هاوادا توتاراق، آنجاق سول آیاغیم وقولتوق ‏آغاجلاریم ین یاردیمی ایله خسته خانانین قاپیسیندان حیطه اولان نئچه پیلله نی چتینلیک ایله ‏ائنیب پیلله لرین قاباغیندا سفارش وئریلمیش و حاظیر دوران تاکسی یا چتینلیک ایله یئتیشدیم. ‏تاکسی سوروجوسو پیلله لرین اوستوندن کیچیک چامادانیمی ائندیریب دالی صاندیغا ‏قویدوقدان سونرا، گلیب فرمان دالینا اوتوروب و گئده جگیم آدرسی سوروشدو. آلمانجا ‏دانیشدیغینین لهجه سیندن بیزیمکی لردن اولدوغونو آنلاییب، اؤز دیلیمزده دانیشاراق گئده ‏جگیم آدرسی وئردیم. گولومسه یه رک "آهان، مایالان کوچه سینه یاخین اوتورورسان ‏دئمک" دئیه شوخلوق ائیله دی. "نئجه یعنی مایالان کوچه سی" دئیه سوروشدوم. "بیلیرسن، ‏دؤرد آی قاباق سنین اوتوردوغون کوچه یه یاخینن بیر کوچه ده بیزیم همکارلاردان بیری ‏شهید اولدو. رحمتلیگین آدینا "مایالان یحمت" دئئیردیرلر. اونون اوچون او کوچه نین آدی ‏ایندی "مایالان" کوچه سی قالیب" دئیدی. بئیله بیر شئی دن هئچ خبریم یوخ ایمیش کیمی، " ‏الله رحمت ائیله سین، بیزلره چوخ بؤیوک خدمت ائیله ییب، آلمانیانین کؤلن شهرینده تبریزدن ‏بیر اشاره بیراخیب گئدیب" دئدیم.‏

No comments: