Apr 18, 2013

غریبین آخشامی

علیرضا میانالی
غریبین آخشامی و ایکی باشقا شعر
"غریبه دویغولار" کیتابیندان

ƏLİRZA MİYANALI
Qəribin Axşamı və iki başqa şeir
"Qərib Duyğular" kitabından


غریبین آخشامی

غریبین آخشامی غریبه اولور؛
نئیله سن بیر دینجلیک تاپا بیلمیرسن‎.‎
وطن تورپاغیندا دئییلسن اگر،
وطن گؤی لرینی چاپا بیلمیرسن‎.‎

قانادی قیریلمیش قوش اولور کؤنلون؛
اوچوش حسرتیله یانیرسان آخشام‎.‎
وطنی یاد ائتمک ایسته سنده سن،
تکجه حسرت، هیجران آنیرسان آخشام‎.‎

غریبین آخشامی غریبه اولور؛
غریب اولمایانلار بونی بیلنمز‎.‎
ساده جه بیر بونی دوشونون بیر آن،
بیر غریب اوره کدن دئییب- گولنمز‎.‎

نفسی ده ییشیک اولور غربتین؛
دؤورد فه صیل دؤوردی ده دومانلی کئچیر‎.‎
غربتده سن باده ایچسن ده سربست،
او سنین گیزلیجه قانیندان ایچیر‎.‎
غریبین آخشامی غریبه اولور؛
نئیله سن ایسینمیر نه ال، نه آیاق‎.‎
اؤتن سهولره گؤز یومماق اوچون،
غربته گلمیشیک گونلری سایاق‎.‎

سهو ده ناخیشدی دئمیش بابالار؛
دی گل عکسینه دی بودا غربتده‎.‎
والله هئچ بیر یانا چیخا بیلمیرسن؛
دوشورسن ائله بیل اودا غربتده‎.‎

غریبین آخشامی غریبه اولور؛
نئیله سن بیر دینجلیک تاپا بیلمیرسن‎.‎
وطن تورپاغیندا دئییلسن اگر،
وطن گؤی لرینی چاپا بیلمیرسن‎.‎

‏ ‏

‎*****‎

بو گئجه یئنه ده برباد کیمی یم؛
خزر گؤزلریمه دولماغا گه لیر‎.‎
آتالی، آنالی گونلریم بو گون،
ائله بیل جانیمی آلماغا گه لیر‎.‎

ائله بیل باتلاقدا باتیبدی گه میم؛
نه گئدن، نه گلن اونی گؤرنمز‎.‎
قولومدان توتان دا تاپیلسا منیم،
باتدیغیم باتلاغا کیمسه گیرنمز‎.‎

رؤیالار ایچینده خولیالاردایام؛
حسسیمی، دویغومی بیلن تاپیلماز‎.‎
حالیما بیر کره آغلایانیم یوخ؛
اؤزوم تک اؤزومه گولن تاپیلماز‎.‎

بیر ایچیم سو آلیب ایچه بیلمیره م؛
خزر اودمی، سومی، سئچه بیلمیره م‎.‎
حسرتیم گئجه نی قالماغا گه لیر،
نئجه گلسه اوندان کئچه بیلمیره م‎.‎

بو گئجه یئنه ده برباد کیمی یم؛
خزر گؤزلریمه دولماغا گه لیر‎.‎
آتالی، آنالی گونلریم بو گون،
ائله بیل جانیمی الماغا گه لیر‎.‎


‎*****‎

هاچاندی باشیمدان بیر فیکیر کئچیر؛
نییه بئله کئچیر، نییه، بیلمیره م‎.‎
تله سیک ایشه ده منی لنگیدیر؛
اونی نئجه دئییم، دئیه بیلمیره م‎.‎

او بلکه یوخودی، یوزولمالی دی؛
بلکه ده یوخی یوخ، رؤیادی، بیلمم‎.‎
هرنه دیرسه منی مندن آلیبدی؛
رؤیادی، یوخسا او خولیادی، بیلمم‎.‎

فقط بیلیره م کی، اون اوچ یاشی وار؛
آدی هرنه دیرسه دادی حسرتدی‎.‎
اولان اولاجاقدی دئمیش بابالار؛
بلکه ده نه بیلیم بودا قسمتدی‎.‎

یاداکی، او دئمیش آلین یازیمدی؛
منی اؤز آردینجا دولاندیراجاق‎.‎
بلکه ده غربتده بو بیر حسرتدی؛
دؤنوب یاواش- یاواش نیسگیل اولاجاق‎.‎
قالمیشام، بیلمیره م، نئجه سؤیله ییم؛
بو فیکیر کؤنلومی لاپ اویاجاقدی‎.‎
هردن ظن ائدیره م وطنه دؤنسم،
آنامین مزاری چارتدییاجاقدی‎.‎

هاچاندی باشیمدان بو فیکیر کئچیر؛
نییه بئله کئچیر، نییه، بیلمیره م‎.‎
تله سیک ایشه ده منی لنگیدیر؛
اونی نئجه دئییم، دئیه بیلمیره م‎.‎

No comments: