ینی ایلینیز اوغورلو اولسون


Jan 24, 2013

غریبه دنیادی، دنیا

علیرضا میانالی
"غریب دویغولار" کیتابیندان

ƏLİRZA MİYANALI
Qəribə Dünyadı Bu Dünya
"Qərib Duyğular" kitabından

غریبه دنیادی بو قوجا دنیا؛
بیرین آغلادیرسا، بیرین گولدورور‎.‎
اونون نه وئجینه، اونا نه وار کی،
بیرین دیریلدیرسه، بیرین اؤلدورور‎.


غریبه دنیادی بو قوجا دنیا؛
آجیسی بولدوسا، شیرینی ده بول‎.‎
هله نه یاخشی کی، بئله دنیانین
دایازی بولدوسا، درینی ده بول‎.‎

غریبه دنیادی بو قوجا دنیا؛
کامینا چه کیبدی او اؤلمزلری‎.‎
غریبه ایشینین بیری بودورکی،
گؤزتچی قویدورور او گؤرمزلری‎.‎

غریبه دنیادی بو قوجا دنیا؛
آغلی اولمایانی تاختا میندیریر‎.‎
هله بو نه دی کی، دهشت اودی کی،
آغلی اولانلاری تاختان ائندیریر‎.‎
غریبه دنیادی بو قوجا دنیا؛
هله بوندان سونرا اویونی چوخدی‎.‎
آستارین اوز ائله، اوزونی آستار،
اؤز ایشین گؤره جک خیری یوخدی‎.‎

غریبه دنیادی بو قوجا دنیا؛
تپه سی داغیندان بارلیسی دا وار‎.‎
گز، دولان دنیانی گؤره جکسن کی،
آرانی داغیندان قارلیسی دا وار‎.‎

غریبه دنیادی بو قوجا دنیا؛
بعضا هر داشینی قوجماق ایستیرسن‎.‎
بعضا ائله اولور، ائله اولور کی،
الیندن قورتاریب قاچماق ایستیرسن‎.‎

غریبه دنیادی بو قوجا دنیا؛
بیر الی زه هردی، بیر الی بالدی‎.‎
کیمینه ان شیرین دادلی رؤیادی،
کیمینه دائیما او قیمه- قالدی‎.‎

غریبه دنیادی بو قوجا دنیا؛
بیرین آغلادیرسا، بیرین گولدورور‎.‎
اونون نه وئجینه، اونا نه وار کی،
بیرین دیریلدیرسه، بیرین اؤلدورور‎.‎
‏ ‏


‎*****‎

اولان اولدی کئچدی، آما کی، والله
هله ده جانیمدا اونون ایستیسی‎.‎
اوجاق یانیب، سؤنوب، کول اولوب، دی گل
اودی قالماسادا قالیر توستوسی‎.‎

بو یوللار بویونجا یولچولاریق بیز،
یولوموز هارادی بیله بیلمیریک‎.‎
تاسف گؤزوموز گؤرمه ینلری،
عاغیللا، ادراک لا گؤره بیلمیریک‎.‎

ایش وارکی، گؤرولوب توکه نیب، آما
بیتیب توکنسه ده ایزی توکنمیر‎.‎
ایشده وار گؤرولور توکه نیر، آنجاق
ایزی ده توکنسه، سؤزی توکنمیر‎.‎

بلکه اونا گؤره چاشیب قالمیشیق؛
اؤلموشوک، یوخدی دا آغلایانیمیز‎.‎
توتاق اؤلمه میشیک، دیری ییک هله،
تاپیلمیر بیر یارا باغلایانیمیز‎.‎
بوداغیندان قوپان یارپاقلار کیمی
یولون کناریندا دوشوب قالمیشیق‎.‎
بیر زامان گؤوده یه نفسدیک، ایندی
آیاقلار آلتیندا خزه ل اولموشوق‎.‎

اولان اولدی کئچدی، آما کی، والله
هله ده جانیمدا اونون ایستیسی‎.‎
اوجاق یانیب، سؤنوب، کول اولوب، دی گل‎ ‎
دا هله وار اونون توستوسی‎.‎
‏ ‏


‎***** ‎

بو دنیا هله کی، دوزه لن دئییل؛
بو قدر آلیشما، یاخما اؤزونی‎.‎
دئمیره م دیزینی قوجاقلا اوتور،
دئییره م دوشونوب دانیش سؤزونی‎.‎

هله گؤر نه قدر اوزوندی یوللار،
یوللار تضادلارلا یاشا دولورلار‎.‎
سنین دوز بیلدی یین، سر راست گؤردویون
اه یری گؤردویونله یاشید اولورلار‎.‎

آلیشماغین بؤیوک، یانماغین بؤیوک؛
دی گل مجراسینی ده ییشمه لیسن‎.‎
بعضا کؤنلون دئین دوزه دئییل، یوخ‎!‎
عاغلی نین سهوینه باش اه یمه لیسن‎.‎

خیال مرکبیندن ائنه بیلمه سن،
بیل کی، اؤز ایچینده غرق اولاجاقسان‎.‎
حیاتی حیات تک دوشونه بیلسن،
یئنی دن باشقا جور دوغولاجاقسان‎.‎

بو دنیا بئش گونه یارانماییب کی، ‏
بئش گونه دوزه له یا سر راستلاشا‎.‎
دوزه لیش آختاران شبهه سیز گره ک،
دره لردن کئچه، داغلاردان آشا‎.‎

دنیانی بئش گونه ده ییشمک اولماز؛
اونونلا سن ائکیز پیشه سن گره ک‎.‎
دوزدور، دوزه لتمه یه، آباد ائتمه یه،
تله سیر، تله سیر، تله سیر اوره ک‎.‎

تکلیکدن اوزاقلاش، تنهالیقدان قاچ‎!‎
یوخسا اؤز ایچینده یاشایاجاقسان‎.‎
اینان کی، نه قدر گوجلی ده اولسان،
بیر آدام یوکینی داشییاجاقسان‎.‎

دنیانین دردی تک سنه قالماییب،
نییه آلیشیرسان، نییه یانیرسان؟
نییه سؤیله سایی میلیاردی آشان
انسانین حاققینی، حاققین ساییرسان؟

منم دن اوزاقلاش، من دئمکدن قاچ‎!-‎
اوندادیر حیاتلا قارشیلاشماغین‎.‎
حیاتی حیات تک دوشونه بیلسن،
گؤررسن باشلانیر دویون آشماغین‎.‎

یوخسا آلیشماغین بؤیوکده اولسا،
بوشونا بوش یئره آلیشماق اولار‎.‎
باشیندان داغیلسا انسانلار اگر،
گور یانان اوجاقدا تکجه کول قالار‎.‎

No comments:

Post a Comment