Nov 29, 2012

اؤدیپوس

ابوالفضل جورابچی
Əbülfəzl Corabçı‎
Ödipüs
شرابیمین سون قورتومونو ایچیب، آیاغا قالخدیم. بارین قاباغیندان كئـچركن، كریستینانین ‏اوتوردوغو چارپایایا توتوناراق، اؤزومو كیچیك سالونا آچیلان قاپی یا چاتدیردیم.

‏[بو ناغیل زیگموند فرویدون "اؤدیپوس کمپلکس" آدلی تئوریسینین بیر کاریکاتورو دور. ‏زیگموند فروید بو تئوریسینده اوغلان اوشاغینین جنسی مسئله اوسدونده آتاسی ایله تضاد ‏تاپدیغینی و بو تضاددین بیر پارا روح خسته لیکلرینه یول آچدیغینی ادعا ائدیر. بو ناغیلدا ‏ادبسیز کلمه لر وارسا، موضوع نون گرگی دیر.]‏


شرابیمین سون قورتومونو ایچیب، آیاغا قالخدیم. بارین قاباغیندان كئـچركن، كریستینانین ‏اوتوردوغو چارپایایا توتوناراق، اؤزومو كیچیك سالونا آچیلان قاپی یا چاتدیردیم. اوتوردوغو ‏چارپایایا توتونماق ایله، اونا “من گئـدیرم، سن خوش قال” دئـمك ایسته دیگیمی آنلاییب، ‏اوتاناراق، دؤنوب، قاچاق باخیشی ایله حس ائـتدیگینین دوغرو اولوب-اولمادیغینی سیناماق ‏اوچون اوزومه باخدیغیندا، باخیشیمی گؤزوندن قیزله تمه دیم. دیم-دیك گؤزونون ایچینه ‏باخاراق، كلمه لره سیغمایاجاق بیر دیلده، كئـچن بیر هفته ده نه لر اولدوغونو، كئـچن شنبه ‏گونو، او داها یوخودا ایكن اویاتماماق اوچون آیاقلاریمین اوجو ایله یئـریب، ان كیچیك سس ‏چیخماسین دئـیه دقت ائـدرك حاضرلادیغیم قاینالتی دان سونرا سیگارینین دادینی چیخارداركن ‏‏“هفته یه گؤروشوروك” دئـدیگینین بیر هفته بؤیونجا قوردوغوم خیاللارین باشلاییش نقطه ‏سی اولدوغونو، هر گئـجه یاتاركن اونون فیكری ایله یاتیب، سحر قالخاركن بیر گون داها ‏كئـچدیگینه سئـویندیگیمی، اوغلوموزون آدینی “تایماز” قیزیمیزین آدینی ایسه “تانیا” ‏قویمامیزی ایسته دیگیمی..... و ثانیه نین نئـچه دن بیرینده، كلمه لرین اؤته سینده سؤیله نه ‏جكلرین هامیسینی آنلاتدیم. اوزونو مندن چئـویریركن دیرسگی ایله یانینداكی اوغلانین بؤرونه ‏ووراراق، منیم آرتیق اورتادان چیخدیغیمی یئـتیردی. كیم بیلیر، بلكه بیر داهاكی هفته یه عینی ‏چارپایانین اوستونده اوتوروب، دیرسگی ایله باشقا بیر اوغلاینین بوورونو دئـشه جك ایدی. ‏بارا آچیلان قاپینین دالینداكی رختكنی “قاردروبی” چتین لیكله تاپدیم. قارا كاپشنیمی تاپماق ‏اوچون بوتون پالتارلاری قاریشدیردیم. قیرمیزی، ماوی كاپشنلر، پولیورلر، شاللار، كامفا ‏بؤركلر، قادین پالتولاری، كیمیسی یوموشاق ، كیمیسی قابا، كیمیسینین یاخاسینا خز دریسی ‏تیكیلمیش،كیمیسیندن قادین پارفومو اییی گلیر، بغضی سی تر قوخویور، كیمیسی قولونو ‏یانینداكینین بوینونا سالمیش، كیمیسی او بیریلره دالیسینی چئـویرمیش، اورتاسیندان بوغولوب، ‏چینله نمیش بیریسی اؤزوندن بؤبوك اولان كئـچه یه بنزه ین توبراق رنگی اوزون بویلونون ‏قوجاغینا گیرمیش، كیمیسی میخدان آیریلیب، یئـره دوشموش، دووار دیبینده اوتوران تریاكی ‏قوجا كیمی دیزلرینی قوجاقلامیش. “یوخسا بیریسی منیم قارا كاپشنیمی دگئـشیك گئـیب، ‏گئـتمیش؟” دئـیه دوشوندوم. آنجاق منیم قارا كاپشنیمه مندن باشقا كیمسه نین صاحب ‏چیخمایاجاغیندان آرخایین ایدیم. بوتون پالتارلاری قاریشدیردیم، آخداردیم، پالتار آغاجیندا ‏اگیلمیش، یئـره-گؤیه آغیز ایگمیش سرمه رنگی كوتو، الینی یانینداكینین جیبینه سوخموش ‏یاشیل ایپك جاكتی، اوبیری لرین آلتیندا قالیب، بوزوشموش قهوه رنگی جیلققانی ساغا- سولا ‏ایته له ییب، سونوندا اؤز قارا كاپشنیمی تاپار- تاپماز یاخاسیندان توتدوغوم كیمی یئـریندن ‏قوپارتدیم. “كؤپك اوغلو، بس بیر ساعاتدیر هایانداسان؟ سنی آخدارماقدان جانیم گؤتومدن ‏چیخدی. مدرسه دن چیخینجا دوز توكانا گل دئـمه دیم می سنه؟ اوچ گوندور پنیرچی زینالین ‏قوندارالارینی وئـره بیلمه میشیك. دوشنبه گونو “هر شئـیدن اؤنجه بونلارین دابانلارینی ‏دگیشدیر، اوستلرینه بیر واكس آت” دئـمه میش می ایدیم سنه. اوچ گوندور ایكی دانا دابانی ‏دگیشدیرمه گی باجارمامیسان. بوتون فیكرین لائـبالیلیكده، قوش بئـینلیكده، اوتانمیرسان؟ ‏هاچان آدام اولاجاقسان؟ زینالین قوندارالارینی دوزه لت، ایكی ساعات سونرا گلیب، ‏آپاراجاق‎” ‎

كیتابلاریمی اوتوراغیمین دالینداكی كیچیك رفه قویوب، قارا كاپشنیمی چیخاردیب، ‏اوتوراغیمین اوستونده كی میخا ووروب، گؤن اؤنلوگومو میخدان ائـندیریب، بئـلیمه باغلاییب ‏اوتوردوم. پنیرچی زینالین قوندارالاری ائـیری دابانلاری اوستونده یان قیلیجی دوروب، منه ‏آغیز ائـییردیلر: “گوزله بابام، گؤزله، آخاماق، بیلمیرسن قیزین دئدیگینه بئل باغلاماق ‏اولماز”. قارشیمدا اوتوروب، الینده كی بیز ایله دیزلرینین آراسیندا سیخی توتدوغو باشماغین ‏گؤنونو دلن كیمی باخیشلاری ایله منیم اتیمی، دریمی دئـشیب كئـچن آتام دا، زینالین ‏قوندارالاری كیمی منی آنلاماق، دویغولاریمی پایلاشماسا دا، هئچ دگیلسه او آن منی راحات ‏بیراخماق ایسته میردی. گؤزونون ایچینه باخماقدان قورخوردوم. فیكریمدن كئـچه نلری ‏باخیشیمدان اوخودوغونو سئـزیردیم. آرامیزدا كلمه لرین اؤته سینده سوروب، گئـدن بیر ‏ساواش كئـچیردی. “ایتین قودوغو، دوننه جن گؤتوندن قورخوردوم، بوگوندن سونرا دا ‏سی...نین بلاسینی می چكه جگم” دئـیه دوشوندوگونو آپ-آیدین اوخویوردوم. آنجاق ‏بوغازیمدا بوغولان هاراییمی اونا چاتدیریب، چاتدیرانمادیغیمی بیلمیردیم؛ “من ده سنین كیمی ‏آدامام دا، سنین كؤنلون ایسته یه ندن منیم ده كؤنلوم ایسته ییر. اوتانیلاجاق بیر شئـی وارسا بو ‏ایشده، سن اللی یول داها چوخ اوتانمالیسان....” باخیشیمی گیزله دیب، بوتون ایسته ‏كسیزلیگیمه قارشین زینالین قوندارالارینین ساغ تایینی گؤتوروب، الیمده بیر آغیر-یونگول ‏ائـله دیم. قیرخ ایلدن سونرا یئـریمه گینی اویـره نمه ییب، ده آیاغینی ائـیری قویاراق ‏قوندارالارینین دابانلارینی ایچه ریه ساری سورتوب، بیر نئـچه هفته سونرا آز قالا باشاماغین ‏اوستو ایله یئـریه جك اولان زینالین ایكی آروادی اولدوغو فیكریمه گلدیگینده، “بو آدام قیرخ ‏ایلده یئـریمه گینی اویـره نمه میش، س... مه گی نه جور اویـره نیب؟” دئـیه دوشوندوگومده ن ‏گولمه گیمین قاباغینی آلابیلمه ك اوچون باش بارماغیمی دیشیلریمین آراسینا قیسدیردیم سادا، ‏دیلیمین دالیسینی داماغیما یاپیشدیردیغیما قارشین بورنومدان آسقیرما-اؤسگورمه و گولمه نین ‏قاریشیغی بیر پیق- پیق چیخینجا آتام یان- یان باخیشی ایله غضبینی بیلدیردیكدن سونرا ‏یئـریندن قالخیب، اؤنلوگونو آچیب، قاپینین یانیندا هر زامان حاضیردا قویدوغو آفتافانی ‏گؤتوروب، مسجد حیاطینا گئـتمك بهانه سی ایله توكاندان چیخدی. دوغرودان سو باشینا ‏چیخماق احتیاجی اولمادیغینی و یالنیزجا غضبینی اوتماق اوچون توكاندان چیخدیغینی حس ‏ائـدیردیم. راحات بیر نفس چكدیم. یاریمچیلیق قالخیب، كاپشنیمین جیبینده كی بوزولموش ‏كاغاذی چیخاردیب، آچیب، بلكه یوزونجو یول اولاراق، بیر داها اوخودوم: “پنجشنبه گونو ‏ساعات دورد ده...” بیر یاندان بیر هفته بویونجا پنجشنبه گونو ساعات دؤردون سئـوینجی ایله ‏یاشادیغیمین، اوبیری یاندانسا سونوندا آلداتیلمیشلیق، یالانا ساتیلمیشلیق دیغوسو آراسیندا ‏پارچالانیر كیمی ایدیم. زمان دؤنگه جینی گئـری چئـویریب، بیر اؤنجه كی شنبه گونو ساعات ‏دؤردو بیر داها یاشاماق ایسته ییردیم. ربابه نین یولداشلاری ایله بیرلیكده مدرسه دن چیخیب، ‏شاطرخان كوچه سینین باشیندا یولداشلاریندان آیریلدیغیندا قاجاق باخیشلاری ایله پاخلاچی ‏یحیی نین توكانیندا گؤزله دیگیمیدن آرخایینلاشدیغینی، اون آددیم گئـری ده دالیسیجا ‏گئـتدیگیمی، و بونو بیلدیگیندن اوره گینین چیرپیندیغینی، گوشه سینده بیر گول عكسی چكیب، ‏آلتیندا “پنجشنبه گونو ساعات دؤرد ده” یازدیغی كاغاذی چیخاردیب، چادراسینین آلتیندا یئـره ‏دوشمه گه بیراخاركن، ائـییلیب، گؤتوروب، گؤتورمه یه جگیم دن آرخایین اولمادیغینین ‏هؤوشنه سینی انون ایله بیر داها پایلاشماق ایسته ییردیم. آنجاق بو یول بوینومو دیك توتوب، ‏چادراسینین آلتیندان دوشن كاغاذی آیاغیمین اوجو ایله اؤنمسیزجه كنارا ایته له ییب، گلیب، ‏یاینندان كئـچركن، دیل- دوداغیم آراسیندا “كاغاذین ایله بیرلیكده گئـت جهنمین دیبینه، ایتین ‏قیزی” میریلدانماق ایسته ییردیم. “كشكه آتاما، “گئـدركن بو كاغازی دا غضبین ایله بیرلیكده ‏آت مسجدین مستراحینا” دئـسه ایدیم” دئـیه فیكریمدن كئـچدی. كلبه تینی گؤتوروب، پنیرچی ‏زینالین قونداراسینین دابانینداكی میخلاری، ربابه نین آغزینداكی دیشلرینی بیر به بیر چكر ‏كیمی، چیخارتدیم. آلتینی قوورا ایله سورتوب، تمیزله دیم. اؤلچوسونه گؤره پلاستیك ‏دابانلاردان ایكی دانا سئـچیب، آییریب، بیر قیراغا قویدوم. الیم-گؤزوم ایشده ایكن بئـینیمده ن ‏كئـچن دوشونجه لری دوردورا بیلمیردیم: “ایكی ایل قاباق اولسایدی پیق- پیق ین بیرینی ‏ائـشیتدیگین آن هئـچ دورمادان الینده كی چكیجی تولازلاییب، اللی سفر باشیمی یارمیش ‏اولاردین. چكیندیگین یالنیز هركسین یانیندا “انشا اللة بیر داهاكی ایل اونیورسیته یه گئـده جك” ‏دئـدیگینین غرورونو زه ده له مه مك اوچون دگیل، بیلیرم، بیر آز دا قوجالمیسان. اؤزون ‏اوتان، من نیه اوتانیم كی؟ من هله جوانام. سنین كیمی ده، اؤزومدن ایگیرمی ایل داها جوان ‏آروادیم یوخدور. “آنان دئـدی گلیركن بیر بادیه ده یوغورد آل گئـتیر”. اوتان، اؤزومده ن ‏آنجاق بیر نئـچه یاش بؤیوك اولان بیر قیزا “آنان” دئـمكدن اوتانمیرسان می؟ او منیم آنام ‏دگیل، منیم آنامی یئـددی ایل اؤنجه هاردا باسدیردیغینی خاطرلاماق بئـله ایسته میرسن. ‏‏“مدرسه دن چیخینجا دوز گل توكانا” نین دا نه دئـمك اولدوغونو یاخچی بیلیرم...” پنیرچی ‏زینالین قوندارالارینین، دابانلارینین یئـرلرینی یاپیشقان ایله سیواییب، ساغ تایینین دابانینی ‏یاپیشدیریب، سیندانا سوخوب، یوموروقلاریم ایله ربابه نین باشینا دؤگه ر كیمی، چكیچ ایله ‏دؤگمه یه باشلادیم؛ “آل، ایتین قیزی، آل كاغاذین ایله بیرلیكده گئـت جهندمین دیبینه. بیر ده ‏سنین سؤزونه اینانیرسام، اوندا....” یوخ. بو ربابه نین باشی دگیل ایدی. ربابه نین باشی بو ‏قدر قابا اولانمازدی. بو آتامین باشی ایدی. یوموروقلارمی آتامین ته په سینه دوگوردوم؛ ‏‏“اوتان، اوتان، باشیندا بیر تك دانا قارا توك بئـله قالمامیش، اوتان. اوتان، ‏‎....” ‎

‎“ ‎هی ! هی! اوردا نییه اوتوربسان، دیزینی نییه دوگورسن؟” باشیمی دؤنده ردیم. منصور ‏باشیمین اوستونده دوروب، گوله رك چیگنیمی اوغوشدورماقدا ایدی؛ “شراب توتارسا ییخار، ‏چوخ ایچمه دئـمه دیم می سنه؟ دیزلرینی نییه دؤگورسن؟” اوتوردوغوم یئـردن قالخماغا ‏چالیشیركن “ایت ..این... اوغلو....گئـدیب، گئـد.....یب..... گیریب، آر.....واد.....آرواد ‏پالتار.....لارینین....نین...... آراسینا.....” دئـدیم‎.‎

‎“‎من.....من ها..ردا....ن گه ل دیم..... بو..را.....یا؟ كیم ......گئـتی......ردی من...ی ‏بیرا...خدی .....بور....ایا..؟” بو...را . ای.....نه .........نه ......ره............كانال ........اینه ره ‏كانال........ اشتراسه اولسا گرك. منیم.... بوردا..... نه ایشیم.... وار؟ من ... ” هر ایكی الیم ایله ‏النیمی اوغوشدوروب، صوراتیمی اووجلاریمین ایچینده توتوب، بیر آن گؤزلریمی یوموب، ‏فیكریمی بیر یئـره ییغماق ایسته دیم. آنجاق گؤزلریمی آچینجا اینه ره كانال اشتراسه. ‏اطرافینداكی بوتون آغاچلار ایله، بؤیوك و كیچیك بینالار ایله بیرلیكده، ساغا-سولا، آشاغی-‏یوخاری اویناییردی. سانكی كؤلن شهرینی بیر گئـمی یه میندیریب، طوفانلی بیر اقیانوسون ‏اورتاسینا بیراخمیش ایدیلر. آددیملاریمی بؤیوك و یئـگین آتدیمغیما قارشین قاباغا گئـده ‏بیلمیردیم. بیر ساعاتدان بئـری اولدوغوم یئـرده ایدیم. آخار قومدا یئـریر كیمی آیاقلارمی ‏قویدوغوم یئـرین نه قدر برك اولوب اولمادیغینی بیله بیلمیردیم. سویوق قولاقلاریمی ‏قووروردو. آنجاق بدنیم اود توتموشدو، جهنم كیمی یانیردی. اللریمی قارا كاپشنیمین جیبینه ‏سوخوب، سویوقدان قورویوردوم. باشیمی قاوزاییب، تلویزیون قالاسینی آشاغیدان یوخاری ‏گوزدن كئچیردیم. دیم........- دیك.... بی.......گؤبه...... لك،......بو بیزیم كند........... ده ‏چیخسا یدی..... ایگیرمی......... ایل گؤبه ..... لك ....آشی .... پیشی......پیشیر ه ر....دیك، ‏اؤزوموز......یچـیب، دویدوقدان سونرا دا قالانینی ایتیله ریمیزه ....پیشیك لریمیزه وئـره ‏ردیك.... دئـیه فیكیرله شیركن، سول آیاغیم آلتیمدان چیخان كیمی باشیمین دالیسی بیر یئـره ‏توخوندو.... ای...تین .....اوغلو ، بونو نئـیه بو قدر اوجا دوزه لدیرسن؟ بیلمیرسن بوردان ‏گلیب، كئـچن اولار؟‎ ..............‎

بیر نئـچه یوز متر ایله ری ده، سول یانیمداكی تپه نین اوستونده كی آغاجلارین اینجه ‏بوتاقلاری سویوق یئـلین اسیشی ایله اوغولداییردیلار. آخشاملاری آردی كسیلمه ین ‏ماشینلاردان خبر بئـله یوخدو. مرسدس بنز نمایشگاهینین قاباغینداكی ساعات دورد و ‏ایگیرمی دقیقه كئـچه نی گوسته ریردی. بؤیوك جاملارین دالیندا ایشقلی چیراغلارین ایشیغی ‏آلتیندا یان- یانا دوزولموش ماشینلار جیبی پول ایله دولو مشتری لری گؤزله ییردیلر. ‏اونلارین منه وئـجسیزجه باخدیقلاری كیمی، من ده اونلارا وئـجسیزجه باخیب، كئـچدیم. ‏قطار یولونون دمیر كورپوسونون آلتیندا توتون پاكتیمی جیبیمدن چیخاردیب، بیر سیگار ‏ساریدیقدان سونرا كورپونون یانیندان سولا دؤنوب، آشاغیندان یوخاریا گئـت-گئـده داها آچیق ‏رنگده قیرمیزی قوشاقلارلا بویانمش قوجامان بینایا قدر اولان ایكی یوز آددیما یاخین آرالیغی ‏یوز ایگیرمی ایللیك بیر زامان گئـچیشینده یئـریدیم. بو بینانین منی نیه بو قدر درین ‏دوشوندوردوگونو، بوردا نییه اؤزومو و بوتون وارلیغی زامانسیز و مكانسیز یاشادیغیمی ( ‏تجربه ائـله دیگیمی) هئـچ كیمسه نین یانیندا و هئـچ بیر زامان دیله گئـتیرمه گه جرئـت ائـتمه ‏دیگیمی بیلدیگیمین یانیندا، یاشامیمین سونوناجان دا دیله گئـتیره بیلمه یه جگیمدن آرخاییندیم. ‏‏“گولرلر” دئـیه اوتانمیردیم، “باشا دوشمزلر” دئـیه قایغیم یوخدو، “دلی آدی قویالار” دئـیه ‏قورخموردوم، “آخماق گؤزو ایله باخارلار” دئـیه چكینمیردیم. بئـله بیر تجربه نین منه ‏اؤزگو(خاص) قالماسینی ایسته ییردیم‎. ‎

پیلكانلارین یانینداكی نرده دن توتوناراق یوخاری چیخدیم. بوزلو جام قاپی دان كئـچیب، ایلك ‏قاتین سالونونا گیردیم. گیریش قاپینین ساغ یانینداكی بوشلوقداكی گیرده میزین قیراغینداكی ‏اوزون چارپایادا اوتوروب، لیلك كیمی اوزون قیچلارینی بیر-بیرینین اوستونه آشیران آرواد ‏كریستینا نی خاطیرلاتدی. پوز ویـرمك اوچون سول الینین باش بارماغینی قارا مه شیندن قیسا ‏ائـته گینین اوستونده قارین-باغارساغینی پاتلاتاجاق قدر سیخدیغی كمرینین آلتینا كئـچیردیب، ‏ساغ الینین بارماقلاری آراسیندا توتدوغو سیگاری شهوت اویاندیراجاق بیر پوز ایله ‏دوداقلاری آراسیندا یئـرله شدیرن آرواد منی گؤرونجه آرامیزدا ایگیرمی ایللیك بیر تانیشلیق ‏وار كیمی الینی اوزالدیب، “هالو، گل بیرا باخیم” دئـدی. دؤنوب اوزنه باخدیم. تانیمادیغیم بیر ‏آرواد ایدی. یاخینلیق گؤسته ردیگی یالنیز من دگیلدیم. اوردان كئـچن هر كیشینی“هالو، گل ‏بیرا باخیم” دئـیه یانینا چاغیراجاغینی بیلیردیم. قاچاق بیر باخیشدا گوبوت صوراتینین گونش ‏سالونوندا یانمیش دریسینی، قیرخینا یاخینلاشدیغینی گؤسته ره ن قیریشلاری ایله، ساغ ‏گؤزونون آلتینداكی پیچاق یاراسینین قالینتیسینی، بورنونون ،بلكه ده پلاستیك جراحلیق ‏سونوجو، او صوراتا یاراشمایاجاق بیر اینجه لیك و ظرافت ایله اینجه و ایچری ساری ‏ییغیشمیش چیركین دوداقلارنین اوستونده گوزه باتدیغنی، مشین مه مه لیگینین باسقی سی ‏آلتیندا آز قالا پاتلایاجاق اولان مه مه لرینین ساغ یانیندا سیگار اودوندان بیراخیلمش بیر ‏یادگاری گؤروب، كئـچدیم. آجی تجربه لر باشیندان كئـچمیش اولسا ایدی گرك. نه ساغ ‏گؤزونون آلتینداكی پیجاق یاراسینین قالینتیسی، نه ده مه مه سینین اوستونده كی سیگار ‏اودونون یئـری بیر تصادف سونوجو اولابیلردی. كیم بیلیر، بلكه اون دوققوز یاشیندا گوزل ‏بیر قیز ایكن اومید باغلادیغی جوان نامرد چیخیب، اؤزوندن سونرا دا اونا-بونا ساتماق ایسته ‏دیگینده دیره نجینی (مقاومتینی) سیندیرماق اوچون الینده كی سیگاری مه مه سینده ‏سؤندورموشدور، یا دا اؤزوندن اوتوز ایل داها یاشلی اولان ایلك مشتریسی‎....‎

بیر-ایكی آددیم ایلریده ساغ یانداكی قاپینین آغزیندا دوروب، چرچه وه یه دایانان قیسسا بویلو ‏شرقلی جوان قیز قارا دوز ساچلاری ، كیچیك آغ صوراتی، یای كیمی قاشلارینین آلتیندا ‏یاری آچیق گؤرونن تیز باخیشلی گؤزلری ایله، سانكی یارادیجینین چوخ دقتلی و حوصله لی ‏بیر زامانینین ایشی ایدی. دوروب، گؤزلرینین ایچینه باخا-باخا قالدیم. سئـوگی دولو بیر ائـوین ‏قیزینا بنزه ییردی. باخیشلاریندا نه یالانچی شهوت، نه ییرتیجیلیق، نه یالانچی اوتانچ، نه ‏قورخو، نه نگرانئیلیق، نه بیریسینی آلداتماق ایسته گی، نه بیریسینه توهین ائـتمك ایسته گی، ‏واردی. گؤزلریندن بیر راحاتلیق، بیر آرخایینلیق یاییلیردی. اوبیریلر كیمی دؤشونو، قیچینی دا ‏آچمامیشدی. ائـوده گئـییله جك، دیزینه جن اوزانان راحات بیر تومان كؤینك واردی ائـینینده، ‏دؤشلرینین بیرآزی گؤرونوردو، آنجاق ایستیده ن یاخاسینی آچمیش كیمی ایدی. بوقدر ساده و ‏بو قدر راحات بیر انسانا توش گلمه میشدیم. ثانیه نین یوزدن بیرینده هر بیری یوز ایللیك بیر ‏یاشام گركدیرن مین بیر خیال فیكریمده ن كئـچدی؛ “كشكه بو قیز منیم سئـوگیلیم اولسایدی، ‏خانیمیم اولسایدی، منیم آنام اولسایدی، باجیم اولسایدی، قیزیم اولسایدی، عمه قیزیم اولسایدی، ‏دائـی قیزیم اولساید، قومشوم اولسایدی...” ایچیمدن درین بیر آه چیخدی. قیز، جیگرلریمدن ‏فیشقیران آلكول اییی نی اوتماماق اوچون نفسینی بوغازیندا قیفیللادی. آنجاق اؤسگورمه سینین ‏قاباغینی توتابیلمه دی. دؤنوب، اوتاغینا گئـدن كیچیك كوریدورن یان طرفینده كی قاپیدان ‏ایچری گیریب، بیر ایكی سفر اوسگوردوكدن سونرا گئـری دؤنه ركن، گئـینه او راحاتلیق و ‏ساده لیگینده، “ ایندی گئـت، بوردا دورما، ایچمه دیگین بیر گون گل” دئـدی‎.‎

ائـشیك حیاطدا حووضون باشیندا، آرمود آغاجینین آلتیندا اوزانمیشدیم. گؤزلریمین آچیق ‏اولدوغونا قارشین هئـچ بیر یئـری گؤرموردوم. یالنیز سسلری ائـشیدیردیم. آرواد-اوشاق-‏جوان-قوجا بیربیرینه قاریشمیشدی. كیمیسی آغلاییر، كیمیسی باغیریر، كیمیسی ساغا-سولا ‏قاچیر، آنجاق هارا قاچماق ایسته دیگینی بیلمیردی؛ “ائـی وای....”، “آمان آللاهیم، ایندی من ‏نه ایله ییم؟”، “آخ، یازیق، بونا نه اولدو؟” سسلر چوخ اوزاقلاردا، داغلارین آراسیندان، ‏قایالارادا انعكاس تاپاراق گلیردی. بونا قارشین هر سسین صاحیبینی تاننیردیم. خاتین خالانین ‏سسینی خیشیلدایشیندان، زینب عمه قیزینین سسینی قویونون دیبیندن زورلا چیخار كیمی ‏باتیقلیغیندان، حاجی علی عسگر عمینین سسینی گوبوت و یونولمامیشلیغیندان تانییردیم. ان ‏یاخیندان گلن، “چكیلین قیراغا” دئـین سس ایسه میرده شیر میرجابارین سسی ایدی. ‏آغلامیردی، سسینده نه كدر، نه غصه، نه مرحمت واردی. بؤیوك آددیملارلا یاخینلاشیب، ‏گوبوت الینی باشیمین آلتینا سالیب، بئـلیمی دیكه لتدیكدن سونرا اوستومده كی پالتارلاری ‏چیخارتدی. ساغیمدان-سولومدان بیر ایكی سییله ووردوقدان سونرا، قوللاریمین آلتیندان ‏توتوب، سورویه-سورویه حووضون اؤته كی طرفینه جن چكدی. یئـرده سورونن ‏دابانلاریمین دریسی چیخاجاق كیمی اولدو. بیر آن آیاغا قالخیب، وار گوجومله قولاغینین ‏دیبیندن سییله نی یاپیشدیرماق ایسته ییردیم؛ “ایتین اوغلو، بو نه جور اؤلو یوماقدیر؟” آنجاق ‏‏“دور بیر ده من باخیم” دئـیه ن یوموشاق بیر سس ایله آلنیمی اوغوشدوران ایسدی، قادینسی ‏بیر ال جانیما بیر آز راحاتلیق وئـردی. دیشیمی قیسدیم، سسیمی چیخارتمادیم. میرجابار ‏حووضون باشینداكی شیری آجیب، اووچلاری ایله سویوق سویو باش-گؤزومه سپمه گه ‏باشلادی. بیر آن اؤز-اؤزومه فیكیرله شدیم “آی آللاه بو نه ایشدیر؟ یوخسا دیری ایكن میرده ‏شیر میر جابارا بیر دوشمانچیلیق ائـله میشم؟” فیكریم ایشله دیگی قدر میر جابارا خیریمدن ‏باشقا بیر زیانیم دئـگمه میشدی.آغزیمی آچیب، بیر كلمه سوروشماغا، بیر ته رپه نیب، آیاغا ‏قالخماغا نه قدر جان آتدیمسا دا، یوخ، باجارانمادیم. سانكی دوغرودان دا اؤلموشدوم. ‏میرجابار گئـنه الینی باشیمین آلتینا سالیب، بئـلیمی دیكه لدیب، ساغیمدان سولومدان بیر ایكی ‏شاپالاق ووردوقدان سونرا، دیل-دوداغی آراسیندا؛ “یوخ... فایدا ائـتمه ییر” دئـیه ‏میریلداناراق، الینی باشیمین دالیسیندان چكن كیمی، دالیم اوسته موزائـیك لرین اوستونه ‏دوشدوم. باشیمین تاققیلیدیسی داغلاردا منعکیس اولوب، اوچ یول دالغالاندی. میر جابار ‏دؤنوب آروادلارین باشینا چیغیردی؛ “قویون گئـدین ایشینیزه، نیه دوروبسوز بوردا، جنازه ‏گؤرمه ییبسز؟ آروادلار قورخودان سسلرینی كسیب، هر بیریسی بیر طرفه قاچدی. میرجابار ‏ال تلفونونو چیخاردیب، بیریسی ایله بیر شیئـلر دانیشدی. كؤلن لهجه سینده دانیشدیغی اوچون ‏دوغروسو بیر تك كلمه بئـله باشا دوشمه دیم. بیر-ایكی دقیقه سونرا میرجابارین كوره كنی ‏شكور ایله تانیمادیغیم بیر جوان ایجری گیریب، كفن سیز، تابوت سوز، دورد ال-آیاغیمدان ‏توتوب، قاپیدان چیخارتدیلار. خوجیران قبرستانلیغیناجان اولان ایگیریم دقیقه لیك یولو ‏ایگیرمی مین ایللیك بیر زامان ایچینده گئـتدیك. خاطیرلادیغیم جان بیر-ایكی یئـرده جنازه می ‏یئـره قویوب، دینجه لدیلر. بیر یئـرده ده تانیمادیغیم جوان میرجابارین كوره كن ینیه دئـدی؛ ‏‏“آها، آیری بیر كلك تاپدیم” اوندان سونرا جنازه می یئـره قویوب، هر بیری بیر آیاغیمدان ‏توتوب، سورودولر. بیر نئـچه یول باشیمی قوزاییب، آغزیمی آچیب، دئـمك ایسته دیم؛ “آی ‏قارداش بو نه جور اؤلو یغیشدیرماقدیر؟ بو نه جور جنازه آپارماقدیر؟ اؤلو یه بیر عزت، بیر ‏احترام ائـدرلر، آخی....” آنجاق نه باشیمی قووزایابیلدیم، نه سه سیم چیخدی، نه ده ال-آیاق ‏اشاره سی ایله بیر شئـی آندیرابیلدیم. كهنه بیر قبیرین قیراغیندا تانیمادیغیم جوان دئـدی؛ “آها، ‏سال بوردا یاتسین” گئـنه دؤرد ال-آیاغیمدان توتوب، قبیرین ایچینه قویدولار. آیاق سسلری ‏اوزاقلاشینجا راحات بیر نفس آلدیم، اؤز-اؤزومه فیكیرله شمه گه باشلادیم؛ “ اؤلومدن نئیـه بو ‏قدر قورخارمیشام؟ بوندا چتین بیر شئـی یوخدور كی

آیاق سسلرینین یاخینلاشدیغینی حس ائـدینجه فیكیرله شمك ده اولدوقلاریمی بیر آن اونوتدوم. ‏‏“یعقین كی بو گلن لر نكیر ایله منكر دیر” دئـیه فیكیرلشركن نفسیمی قیفیللادیم، قیمیلدامادان ‏اولدوغوم یئـرده دوردوم. جبر درسی ساعاتیندا آقای حسینی منی چاغیریب، درس ‏سوروشماسین دئـیه اوتوردوغوم یئـرده قوروموش قلمه كیمی دوروب، گؤزلریمی آشاغی ‏تیكدیگیم كیمی، اؤزومو گؤرمه مزلیگه-بیلمه مزلیگه ووردوم. بیر-بیری ایله دانیشاراق ‏یاخینلاشان ایكی نفردن كیشی سسی ایله دانیشانین نكیر، آرواد سسی ایله دانیشانین منكر ‏اولدوغونو آنلادیم. بیردن بیره ایلدیریم شاخان كیمی بیر ایشیق گؤزومو دئـشیب، كئـچدی. ‏دیرسكلریمی یئـره وئـریب، دیكه لدیگیمده باشیمی بیر یئـره چیرپدیم. ثانیه نین یوزده بیرینده ‏آتامین شوخلوقچو اوزو گؤزومون قاباغیندان كئـچدی، “اوغول، قبیرین ایلك گئـجه سینده نكیر ‏ایله منكر گلدیگینده اؤلو دیرسكلرینی یئـره وئـریب قالخاركن، باشینی قبیرین سالینا چیرپیب، ‏اؤزونه گلر، “هه، اؤلن من ایمیشم. دئـیر” قورخولو بیر آرواد چیغیرتی سی “وای، ‏خورتلادی” دئـیه قولاقلاریمدا جینقیلدادی. باشیما نه گلدیگینی آنلایابیلمه دیم. بیر داها دققت ‏ایله اطرافیما باخدیم. ایكی نفر یاشیل پالدارلی، بیری كیشی، بیری آرواد. كیشی الینده كی قووه ‏چیراغینی گوزومون ایچینه سخیدیغیندان ایلدیریم شاخمیش كیمی اولموش. “قارداش او ‏چیراغی بیر آز اؤته یه توت” دئـدیگیمین جوابیندا، تعجب ایله “بس سن دیری سن كی” دئـدی. ‏‏“من اؤلمه میش ایسم، سن نه چی سن؟” دئـیه سوروشدوم. “بیز پلیس ایك...” یاشیل پالتارلی ‏آرواد سؤزونو كسدی؛ “بیزه تلفون ائـدیلیب، بوردا، اینه ره كانال اشتراسه نین قیراغیندا بیر ‏اؤلو اولدوغو سؤیله ندی....چوخ شوكور سیز دیریسینیز...، لطفا كیملیگینیزی وئـرین.” ‏دئـدی. دؤنوب بیر داها دققت ایله یان-یؤوره مه باخدیم. یاشیل پالتارلی منكر دوغرو دئـیردی. ‏قارانلیق بیر پاركدا، تاختا بیر نیمكتین اوستونده اوتورموشدوم. باشیمی چیریدیغیم دا داغداغان ‏آغاجینین نیمكتین اوستونه اوزانمیش ائـیری بویرو بوتاغی ایدی. الیمی قارا كاپشنیمین جیبینه ‏سالدیم، ایچینده پولوم، كیملیگیم، بیمه كارتیم. تصدیقیم اولان جیب چانتام یوخ ایدی. اوبیری ‏جیبلریمین هامیسینی گزدیم، یوخ، تاپابیلمه دیم. “یعقین كی میرده شیر میرجابار منی یوواركن ‏جیب چانتامی چیخارتمیش” دئـیه دوشوندوم. اوزومو یاشیل پالتارلی قادین منكره چئـویریب، ‏اوتاناراق، “خانیم، بیلیرسینیز، او آدینی آغزیما گئـتیرمك ایسته مه دیگیم ائـوده ایكن، بیلمیرم ‏نه اولدو ایسه، بیردن-بیره اؤزومدن گئـتدیم. اوندان سونراسینی بیلمیرم. كیملیگیم یانیمدا دگیل” ‏دئـدیم. اوچ وموز بیرلیكده، اینه ره كانال اشتراسه ده دوران ماشینا قدر یئـریب، مینیب، آدینی ‏آغزیما گئـتیرمك ایسته مه دیگیم ائـوه جن گئـتدیك. یاشیل پالتارلی انكیر قاپی نین قارشیسنداكی ‏‏“رسپتسیون” دا اوتوران جواندان منیم كئـچن گئـجه اوردا اولوب-اولمادیغیمی سوروشدو. ‏جوان دوداغینی بوزوب، “نه بیلیم، ساعاتدا ایكی یوز نفر بورایا گیریب، چیخیر. من هر ‏گلیب، گئـدنین كیم اولدوغونو یادیمدا ساخلایابیلمرم” دئـدی. “بیرینجی قاتدا اوزاق دوغولو بیر ‏قیز گؤرموشدوم. او یعقین منی تانییار” دئـدیم. انكیر-منكیر-من -بیر ده رسپتسیوندا كی جوان ‏بیرینجی قاتا چیخیب، شرقلی قیزین قاپیسینین قاباغیندا دایایندیق. قیز گئـنه عینی ساده لیگی ‏ایله قاپینین چرچه وه سینه دایانیب، دورموشدو. “من بیر-ایكی ساعات اؤنجه بوردا ایدیم” ‏دئـدیگیمین جوابیندا، گئـنه او ساده لیگی ایله،“من نه ائـیله ییم؟” دئـدی. “بیلمیرم، نه اولدو ‏ایسه اؤزمدن گئـتمیشم” دئـمك ایسته دیم. آنجاق قیز آغزیمی آچماغا ماجال وئـرمه دی. “من ‏سنی عؤمرومده ایلك یول گؤرورم، بیر داها دا گؤرمك ایسته میرم” دئـدی. اؤز-اؤزومه ‏فیكیرلشدیم، “شوكور آللاها، بو قیز منیم سئـوگیلیم دگیل، خانیمیم دگیل، آنام دگیل، باجیم ‏دگیل، عمه قیزیم، خالاقیزیم دگیل، قومشوم بئـله دگیل، یوخسا جیبیم دولو، اوست-باشیم تر-‏تمیز اولدوغو گون منی تاننیار، قارنیم آج، پالتاریم ییرتیق اولدوغو گون “سنی من ایلك یول ‏گؤرورم” دئـیردی‎”‎

No comments: